1, 2. (a) Iwori bo eraar ainakinet ibore yen kameda naepol kaneijai ijo? (b) Kanukinyo ipedoria alimun ebe, erai alucet ainakinet naepol amedake noi adepar ainakinet adio kere?

ANYOIN ainakinet naepol noi na idumunitor ijo? Mam erai ebe ekot ainakinet korai naepol etia kanu araut naejok. Ajokis naka ainakinet duc mam ipimao kitirianitete kede isiringin. Konye, erai ainakinet ibore yen ejok arai kinakin ijo aiyalama, araibo neitodolikinia eipud loka aijar kon.

² Kainakineta nuipu nuimuno ijo ti adumun, ejai adiopet naepol edeparit ngun kere. Erai ainakinet naka Edeke nejaasi itunga. Einakinit Yawe oni iboro luipu, konye ainakinet ke naepol neijai oni nges alucet naka Okokuke, Yesu Kristo. (Matayo 20:28) Kwape ibunio oni aanyun kosula kalo, erai alucet ainakinet naepol noi na ipedori ijo adumun, naarai epedori ainakin ijo aiyalama naepol ido aitodolikin eipud kon. Erai alucet cut ibore yen itodunit amina naka Yawe naepol noi kanukon.

3. Inyoin bo alucet, ido inyo ibusakinit oni amisikin kanu aitojokar ainakinet naepol na?

³ Katemasi koipone loepatana, erai alucet eipone lo elakuna Yawe, araibo aitajar itunga kanejai adiakar ka atwanare. (Ipeson 1:7) Kanu apedor amisikin aisisianakin naka Ebaibuli na, ibusakinit oni aomoom nuapotu kotakanutu kolo komanikor loka Eden. Arai kito imisiik oni ejok iboro luabu Adam kotwania neadiakara ngesi, ipedori do oni aisialamikin ebe erai teni alucet ainakinet naepol kane ijai oni.

4. Arai anyoin apolounaka Adam ajaut kede aijar naedolit?

⁴ Neasubuna Yawe Adam, abu kijaik ngesi ibore yen etiai cut​—aijar naedolit. Komoom apolou kanu kanejai Adam. Kwape asubitere Adam koipone loadolit, mam ngesi adekanakin, amojongi, karaida atwanare. Kwape etunganan loadolit, ajaatar ngesi ka eidicane loetegelikina kede Yawe. Ebala Ebaibuli ebe arai Adam “Okoku loka Edeke.” (Luka 3:38) Aso, ajaatar do Adam eidicane loajok kede Edeke Yawe, kwape nat ejaatar ikoku ka papake loemina. Enerananas Yawe kede okokuke lokwap Adam, kijaanakini nges aswam naajai alelakin ka aitejenikin ngesi nuakotoi kamake.​—Ageun 1:28-30; 2:16, 17.

5. Inyoin bo apolou naka Ebaibuli nebalar ebe, esubitai Adam kotoma “aputo naka Edeke”?

⁵ Asubitai Adam kotoma “aputo naka Edeke.” (Ageun 1:27) Mam ngin erai ebe, aputosi do Adam kede Edeke kotoma akuan. Kwape isisiator oni kosula losodit koitabo kalo, erai Yawe emoyo lomam etakani. (Yokana 4:24) Aso, emameotor Yawe kede akuan naeputos kede kanaitunga. Asubio naka Adam kotoma aputo naka Edeke, apolouke ebe, asubitai ngesi kede iponesio kwape luka Edeke, aimoriarit amin, acoa, etube, ka agogong. Aputosi bobo Adam kede Papake koipone ece loepol, loajaut kede apedor naka  aseun aswam nuakoto. Aso, mam Adam aputos kede acuma naiswamai bon nuitemokinitai nges aswam. Konye, apedori ngesi aseun nuke, aseun aswam nuejokuka araibo nueroko. Arai koseunite ngesi arimaar Edeke, ti ngesi ebusit kotoma Aparadais kakwap ikar kere.

6. Nepalikina Adam Edeke, inyo abu ngesi kotwania, ido nuinyo apotu kotanikis ikedwe?

⁶ Kaica, nepalikina Adam Edeke, kosodete atubokin ngesi atwanare, abu ngesi kotac etiai loapol noi. Abu akediakar koinak ngesi atwaniar akeijar nadolit ka akererengusio kere. (Ageun 3:17-19) Nukaiturur, abu Adam kotwania akeijar naetiai mere kanuke bon, konye kanuka ikedwe da luongaren. Ebala Akirot naka Edeke ebe: “Kwape kelomunia adiakanar akwapin kanuka etuŋanan ediopet [Adam], kolom da atwanare kanuka adiakar, kwaŋin kodolok atwanare otuŋa kere, naarai apotu kere kodiakasi.” (Iromayon 5:12) Eebo, oni kere irumunit adiakar kanejai Adam. Aso, ebala Ebaibuli ebe abu ngesi ‘kogwela’ akekuan ka ikedwe toma obulesene loka adiakar ka atwanare. (Iromayon 7:14) Amamei amuno kanuka Adam ka Keba naarai apotu kesi kopeleikis aseun aipalikin Edeke. Dobodo idwekec ka aimoriarit oni?

7, 8. Inyoika iboro iarei luimoriarit alucet?

⁷ Abu Yawe koyuu itunga kitosomai alucet. Inyoin bo alucet? Aomisiot naka alucet nges imoriarit iboro iarei. Nasodit, alucet nges etiai lo etacio kanu ayaun aosikinio araibo alakun ibore. Epedorio aituput kede etiai loetacio kanu alakun emusubet. Nakiaret, erai alucet etiai loerapari, araibo loetacakini ibore. Esubit bala egelit kanu amusungut. Kwape aanyunet, arai iswamau itunganan akangas, ejaun ngesi atacakin iboro lueriakasi ka luekangasunos.

⁸ Epone ani ti epedorere arapakin atwaniar nabu Adam koyangau neijai oni ido alacakin oni kotoma obulesene  loka adiakar ka atwanare? Aso, kaanyutu ber oni alucet nabu Yawe koinak ka ameda naidumuni oni kanu alucet.

9. Alucet bo naepone ani akotoi?

⁹ Kwape araar aijar nadolit atwaniaritai, amamei idiotunganan kotunga yen adolit yen apedori alucokin aijar ngin. (Isabulin 49:7, 8) Ibore yen akotoi nges alucet narianas etiaike kede aijar na atwaniaritai. Iriamara ngin kede ekisil loka etube loedolit loejai Akirot naka Edeke loebala ebe: “Egeli aijar aijar.” (Ikisila 19:21) Aso, inyo ti epedo aibecokin arianuun kede aijar nadolit nabu Adam kotwania? Akotoi bobo aijar ace nadolit araun ‘alucet nairiamara.’​—1 Timoteo 2:6.

10. Eipone bani ainakina Yawe alucet?

¹⁰ Eipone bani ainakina Yawe alucet? Abu ngesi ijuk ediopet kodweke loadolit lomoyo toma akwap. Mam Yawe abu ijuk emalaika edio kere. Abu Ngesi ijuk lominatake, Okokuke loteluna. (1 Yokana 4:9, 10) Kainakina, abu Okoku lo ojalak akeiboisit kotoma akuj. (Ipilipin 2:7) Kwape idaunia oni aisisiaun kosula loatubor koitabo kalo, abu Yawe kiswamau aumokinet nejuluna nges aijar na Okokuke kiton akoik naka Mariam. Kotoma apedor naka emoyo lokalaunan loka Edeke, aponi kourunai Yesu kwape etunganan loadolit ido komam ejai toma aitisilario naka adiakar.​—Luka 1:35.

11. Eipone bani apedora ediope etunganan araun alucet kanuka itunga luipu?

¹¹ Eipone bani ti epedoria ediope etunganan araun alucet kanuka itunga luipu? Aso, eipone bani araunatar itunga luipu adiakanarak kageunet? Kiitu ebe, kanu adiakar, abu Adam kotwania ainakinet naetiai naka aijar naedolit. Aso mam ngesi apedori aijaikin aijar ngin nejaasi idweke. Abu do ngesi koyau adiakar ka atwanare. Yesu loenyarit  Ebaibuli kwape “Adam lokawasia,” ngesi ajaatar aijar naedolit ido komam ediakari. (1 Ikorinton 15:45) Kotoma abeit, abu Yesu koloma aiboisit naka Adam kanu alakun oni. Kanu aipal akejar naedolit korimarite Edeke, abu Yesu kotac etiai kanuka adiakar naka Adam. Abu Yesu koyau amuno nejaasi idwe luka Adam.​—Iromayon 5:19; 1 Ikorinton15:21, 22.

12. Anyoika nuabu aiticanitoi naka Yesu kitacau?

¹² Itetemit Ebaibuli kaidules aiticanitoi nabu Yesu kotitingik eroko etwana. Aponi kolei, kibubuikinai, ido kotwana kapipilu noi kokitoi. (Yokana 19:1, 16-18, 30; Koany nuiyatakinitai apapulai 204-6) Kanukinyo ebusakinitor Yesu aiticanio noi? Kotoma kosula loingaren koitabo kalo, ibuni oni aisisiaun ebe abu Satan kijaik abuonokin arai cut ejaatar Yawe kede ejanakinak lutunga luepedorete apaikin emunoko kotoma acodunio. Kanu atitingikin kamunonut karaida ajai aiticanitoi naapol, abu Yesu koinak abongokinet naejok nejai ainingosit naka Satan. Abu Yesu kitodu ebe etunganan loedolit loejatar apedor naka aseun, epedori asalakin emunokina Edeke karaida ejaas nuiswamaikini Satan ngesi. Ebusakinit Yawe kolakara noi kanu amunonut naka Okokuke lominat!​—Awaragasia 27:11.

13. Eipone bani atacere alucet?

¹³ Eipone bo bani atacere alucet? Kotoma apaaran na 14 naelap Nisan loka Iyudayan kokaru 33  Akaulo Naurunere Yesu (A.N.Y.), abu Edeke ocamak Okokuke loadolit, komamei adiakaret, aario. Abu Yesu kopal aijarake nadolit “irwan atipet bon.” (Iburanian 10:10) Kapaaran naiuniet akaulo na atwania Yesu, abu Yawe kitajaru ngesi ajaikin bobo aijar namoyo. Kokuju, abu Yesu koinak Edeke etiai loka aijarake nadolit nabu ngesi koinak kwape alucet kanu alakuna idwe luka Adam. (Iburanian 9:24) Abu Yawe kocam etiai loka ainakinet naka Yesu kwape alucet nakotoi  kanu alakuna itunga kotoma obulesene loka adiakar ka atwanare​—Iromayon 3:23, 24.

14, 15. Kanu adumun “aisionio na adiakanareta [wok],” anyoika nuibusakinit oni aswam?

¹⁴ Karaida irai oni ikadiakanarak, ipedori oni adumun arerengusio nuipu kanuka alucet. Kaanyutu ber oni ace arerengusio nukwana ka nuoingaren nueyauni ainakinet na, naepol noi naka Edeke.

¹⁵ Aisionio naka adiakanareta. Kanu airumunet naka adiakar, ija oni kacereded naepol kanu aswam nuedolito. Idiakanari oni kere kotoma akiro araibo kotoma aswamisio. Konye kanuka alucet nabu Yesu koinak, ipedori oni adumun “aisionio naka adiakanareta [wok].” (Ikolosain 1:13, 14) Kanu adumun aisionio ngin, ibusakinit oni araasi cut luitironikin. Ibusakinit bobo oni aingainga Yawe kaitasono, engisitos akeisionio kasipokinitos aiyuun wok nejai alucet naka Okokuke.​—1 Yokana 1:8, 9.

16. Inyoin kingarakin oni aima Edeke kede aomisio nuelaete, ido anyoin ameda naka aomisio kangun?

¹⁶ Aomisio nuelaete kakonyen nuka Edeke. Aomisio nuemunara epedorete kapatan alemar amun wok ka ainakin oni aipup bala luemamei ajokis. Konye kotoma aisionio naesipedo alucet, acamaki do Yawe oni kasianut aima ngesi kede aomisio nuelaete karaida mam oni idolit. (Iburanian 9:13, 14) Einakinit na oni ajaut kede kailajara neinerar ka Yawe. Asodo, ipedori oni adolokin ngesi kalacakina kotoma ailip. (Iburanian 4:14-16) Ajaut kaomisio nuejokak einakinete oni ainapakina naka aomisio, ido kijaikinete ijo aibuses.

17. Anyoika arerengusio nuipedori oni adumun naraai abu Yesu kotwan kanuwok?

¹⁷ Amuno naka aijar namam edaun kotoma paradais kakwap. Ebalas Iromayon 6:23 ebe: “eropit loka adiakar nges  atwanare.” Iyatakit ekokoro ngol ebe: “konye ainakinet naka Edeke erai aijar naka ikar kere kotoma Kristo Yesu Ejakaitiwok.” Kotoma Kosula 3 koitabo kalo, apotu oni ketetemitos arerengusio nuepote ajaun Paradais kakwap. (Apukokinio 21:3, 4) Arerengusio ngun kere nukoingaren, imoriaritos aijar naka ikar kere kotoma angaleu naedolit, kesi epedoros naarai abu Yesu kotwana kanuwok. Kanu adumun arerengusio ngun, ibusakinit oni aitodun ebe isialamikinit oni ainakinet naka alucet.

18. Kanukinyo ibusakinitor oni aisialamikin Yawe kanu ainakinet naka alucet?

¹⁸ Kanukinyo ibusakinitor oni aisialamikin Yawe noi kanu alucet? Erai duc ainakinet naetiai arai imoriarit aipal apak, agogong, araibo atwaniar icebore kanejai loainakinan. Ilakanar oni duc neiwanyuna oni ebe ainakinet itodunit amina alopet naka ekainakinan. Erai alucet ainakinet naitelekarit ainanakineta kere, naarai abu Edeke kotwania noi kanu aijaikin oni. Ebala Yokana 3:16 ebe: “Komina Edeke akwapin kwanata, abu koinak Okokuke loteluna.”  Erai alucet aitodiaret naepol noi naitodunit amina naka Yawe kanuwok. Erai bobo aitigogongoret naka amina naka Yesu, naarai abu ngesi ijaik aijarake kanuwok kakote ke. (Yokana15:13) Ainakinet naka alucet itogogongit ebe Yawe ka Okokuke eminas oni kwape idiopediopen.​—Igalatian 2:20.

19, 20. Nunyoka ipedoria ijo aswam aitodun ebe isialamikinit ijo ainakinet ke Edeke naka alucet?

¹⁹ Eipone ani ipedoria ijo aitoduun ebe isialamikinit ijo ainakinet ke Edeke naka alucet? Nasodit, kojenu nuipu nuikamunito Ekainakinan Lokapolon,Yawe. (Yokana 17:3) Aisisia Ebaibuli kitosomai eitabo lo epedori aingarakin ijo aswam ngun. Neiyatakina ijo ajenun nuipu nuikamunitos Yawe, iyatakin do amina kon da kanuke. Ijaikin do amina ngin ijo akoto aisialamikin ngesi.​—1 Yokana 5:3.

²⁰ Ibwaik aiyuun kon nejai alucet naka Yesu toma aswam. Nuikamunitos Yesu elimunitai ebe: “Yeniyuuni Okoku ejaas kaijar naka ikar kere.” (Yokana 3:36) Epone ani ipedoria oni aibwaikin aiyuun wok nejai Yesu toma aswam? Aiyuun kwape kangin mam itodunio kede akiro bon. Ebala Yakob 2:26: “Kwaŋin da etwania aiyuun emameete aswamisio.” Eebo, aiyuun nabeit itodunio kede “aswamisio.” Epone loipedoria oni aitodun ebe ibwaikinit oni aiyuun wok neijai Yesu, nges aswam nuipedori kere aputoor ngesi mere kotoma koinera bon konye kaswamisio wok da.​—Yokana 13:15.

21, 22. (a) Kanukinyo ibusakinitor oni ajaanakin opucit loiitunere inyamat luka Ejakait lukatibong kangolikaru? (b) Anyoika nuebunio aitetem kosula kalo 6?

²¹ Kojanakin toma aiitunun Atibong Naka Ejakait wok kangonikar. Kotoma atibong naka Nisan 14, okaru 33  A.N.Y., abu Yesu kitegia epucit loitegelikina loenyarit Ebaibuli ebe “inyamat luka Ejakait.” (1 Ikorinton 11:20; Matayo 26:26-28) Enyaritai bobo epucit lo Aitunet naka  atwanare naka Kristo. Abu Yesu kitegia nges kanu aingarakin ikeyakia ka Ikristayon kere luetupakinete kesi aiitun ebe kanuka atwanare ke kwape etunganan loadolit, abu ngesi koinak akeijar araun alucet. Nuikamunitos epucit lo, abu Yesu kicorak ebe: “Kiswamaenenete kwaŋin akiitunitor eoŋ.” (Luka 22:19) Ejanakin opucit lo isiitikini oni amina naepol nabu Yawe ka Yesu kitodutu kanu ainakin alucet. Ipedori oni aitodun aisimar wok kanuka alucet arai kijanakin oni kangonikaru opucit loka Aiitunun atwanare naka Yesu. *

²² Kabeit ainakinet ke Yawe naka alucet erai naetiai noi. (2 Ikorinton 9:14, 15) Epedori ainakinet na naepol etiai aimeda luatwakata da. Epote isulai 6 ka 7 aitetem eipone loepedorotor ngun.