ASISIAET 2
Akoto Rebeka Aisialamikin Yawe
Arai Rebeka aberu namina Yawe. Ekiror okilenike nges arai Isaak. Amina nges da Yawe. Eipone bo ani eriamunotor Rebeka ka Isaak? Eipone bo ani etodunia nges ebe akoto aisialamikin Yawe? Aso esisiautu nuipu nuikamunitos nges.
Auriak ke Isaak kesi araas Aburaam keda Sara. Iboitos kotoma akwap naka Kanaan, ne mam itunga amaatar Yawe. Konye akoto Aburaam okokuke aimany aberu na ejaanakini Yawe. Abu do nges kijuka ekebulesit, aticepak Elieser, kanu adumakin Isaak aberu kotoma aboisit na enyaritai Karan, neboiotor ice kopajan ka Aburaam.
Akukurana Rebeka airitonokin ikaalai akipi atan
Abu Elieser kolot nepepe ka ibulesin ice luka Aburaam. Arai alosit naluana noi. Apotu koyautu nepepe ka kesi ikaalai itomon igwokitos inyamat keda ainanakineta. Eipone bo ani ti ejenunia Elieser aberu naeseikini Isaak? Ne adolunio Elieser ka Ibulesin luce Karan, apotu kopaikisi atan naarai ajeni Elieser ebe etapit itunga abunenen aiwok akipi nen. Abu kilip nejai Yawe kosodi atiar: ‘Arai engit eong aberu aijaikin eong akipi kosodi nges aijaikin eong kaitamat ikaalai ka da akipi, ajenuni do eong ebe erai na aberu naiseunit ijo.’
Kosodi Rebeka abunere atan. Ebala Ebaibuli ebe arai Rebeka natemel. Abu Elieser kingit nges akipi numatan, kosodi nges atiar: ‘Eebo. Ejaikini eong ijo akipi, kasodi aokokin ikaalai kon da.’ Koomom! Ikaalai luejakit akure emasete akipi nuipu, abu do Rebeka kirit akipi atan. Iseseni kotoma aputo eipone lo ekukuranar nges?— Abu Elieser koumok eipone lo abu Yawe kobongokina ailipa ke.
Abu Elieser kijaik Rebeka ainanakineta nuipu nualaete. Abu nges kisukuny Elieser keda ice jaanakinak okale apapake. Kitetem Elieser akiro nuejukaritor Aburaam nges ngina ka eipone lo abu Yawe kobongokinia ailipa ke. Ekaleke Rebeka, abu kiyalamikin noi kosodete acamakin nges adukokin ka Isaak.
Abu Rebeka kolot keda Elieser kosodi adukokin ka Isaak
Konye iwomit ijo ebe akoto Rebeka adukokin ka Isaak?— Ajeni Rebeka ebe arai Yawe nges ejukarit Elieser ngina. Aso ne engisia ekaleke Rebeka nges arai ekoto nges alosit kanaan kanu adukokin ka Isaak, abu kotema ebe: ‘Eebo akoto eong alosit.’ Katipet, apotu kolototo keda Elieser. Ne adolunatar kanaan, apotu kodukokinos.
Naarai abu Rebeka kiswama nu akoto Yawe nges aswam, abu Yawe isirereng nges. Etuboros ikar luipu, aponi kourunai Yesu kotoma okaleke! Arai kirai ijo kwape Rebeka kosodi aitalakar Yawe, ebuni nges aisirereng ijo da.
