KOANY epone lo itururo esapat ido omameotor amuno. Erai nges Yosep. Adautu ikenacan aitwegelar ngesi nejaas itunga luelosete Misiri. Itarauno Yosep kangina ebulesit. Kanukinyo eswamaikinatar ikenacan ngesi ibore yeni aronon kaayen? Naraai ekokoteikitos kesi Yosep.

Papakec Yakob, amina Yosep noi noi. Abu itodiik nges akemina kotoma adonyikin nges ekooti loaoja ido olai noi. Keanyutu inacanake 10 luapolok epone lo aminar Yakob Yosep, kogeutu aikokoteikin ka adingakin Yosep. Konye ajai bobo acekirot na adingakinitotor kesi ngesi.

Erujat Yosep airujasia aerei. Kotoma airujasia nuka Yosep, akukonokinos ikeinacan ngesi. Kelimoki Yosep ikeinacan airujasia nu, kopoloor edinget kec noi.

Kadiopepaaran, kicokiete inacan luka Yosep luapolok amerekekin nuka papekec, kiakia Yakob Yosep alosit aanyun epone lo ajaatar kesi. Eanyutu inacan luka Yosep ngesi ebuni, kobalas ice ebe: ‘Kaarasi ngesi!’ Konye Reuben, onacekec loapolon akere, kotema ebe: ‘Mam, siri kiswamaata ngun!’ Kikamutu do Yosep, kocakakisi aipany na oakikinitos akipi kotoma. Kiboikinos aomoomom nu iswamaikinete ngesi.

Kotoma apak ngipengin, kopotu ice, Isimaelin. Kotema Yuda ikeinacan ebe: ‘Aso, ketwegwelikis ngesi Isimaelin.’ Kiswamaata ngupengun. Kogwelasi Yosep kanuka atutubeta 20 nuka epuesa. Itukwi aswamisiot na amamei apodokinit ka asianut!

Anyoika bo do epote inacan lu alimokin papakec? Koarata akinei, kidomanakisi ekoti loka Yosep loalai aokot nuka akinei. Koyangasi ekoti ore, koinutu papakec Yakob, kobalas ebe: ‘Kipou kadumutu lo, aso kojen arai ŋesi ekooti loka ikokukon arai mere nges.’

Koany Yakob ebe erai. Komony kobala ebe: ‘Aar etiang loaronon Yosep.’ Ido ngupengun akotosi inacan luka Yosep papakec aomoom. Kiturur Yakob noi noi ido kibwor apaarasia nuipu. Konye mam Yosep etwanit. Aso kaanyutu nu opotu otakanikis nges kangina ne aponi koyangarai.