Ekiror loka Edeke ngesi Yawe apolouke ebe “epedori ngesi aitodolikin aisumunetake ka alosikineta kere nuejaatar ngesi.” Erai Yawe Edeke lokapedor kere, ido ngesi esubit iboro kere. Ejaasi ngesi kapedor aswam nueseuni ngesi kere.

Kotoma Aburanian, ewadikatai ekiror loka Edeke kanyukutan aongon YHWH. Kotoma Ateso, iwadikao ekiror ngol kwape Yawe. Kolo sek newadikaere Ebaibuli ajai ekiror Yawe kotoma aiwadikaeta nepetai irwan 7,000. Kakwapisinei nuipu, egelegela epone loiwadikaere ekiror loka Yawe, elimunete ice ekiror ngol koipone kalo ebeitor kotoma angajepekec kikulepek.

▸ Esu. 1, atu. 15

Ekewadikan Ebaibuli ngesi Edeke, konye itosomat ngesi itunga aiwadik akirotoke. Eputosi bala lokapolon esomero loijaikini ekalani aiwadik ebalua loejaasi aomisioke. Kwape kwangin Ekawadikan Ebaibuli ngesi Edeke, mere itunga luetosomai ngesi. Abu Edeke kiyengak kesi Emoyo lokalunan kanu ainakinia kesi apedor naka aiwadik aomisioke. Abu Emoyo loka Edeke kingarenik kes koiponesio luegelegela kotoma aitapoeta arai bo airujasia nuaponi kiwadikai kotoma Obaibuli.

▸ Esu. 2, atu. 5

Eraasi nu aisisianakineta nuka abeit nuitetemitos atiaketait kiding nueroko ka nuejokuka. Ingarakinete oni aicoreta nuka Ebaibuli aswam aseununeta nuisiyalamikinete Edeke. Kwape aanyunet, aicoretait naebala ebe “aupa  kalueroko emunaari iponesio luejok” isisianakini oni ebe epedorete ipapero amunaar oni arai bo aitaraun oni luijok. (1 Ikorinton 15:33) Aicoretait ace bobo ebala ebe “nueyei itunganan, ngupengul esaki da” isisianakini na oni ebe mam oni ipedori aiku atiokisio nueyangaunete aswamisiowok nueroko.—Igalatian 6:7.

▸ Esu. 2, atu. 12

Eraasi nu akiro nueponitos kama ejai Edeke. Eraasi akiro nuitacaunitos akote naka Edeke, aisisianakineta nuka iponesio luejokak, imoriaritos ikisila, ka itubesia. Eraasi bobo akiro nuikamunitos iboro nuepote atakanun koingaren. Ipu noi adwareta nuka Ebaibuli nuetodolikinos ido ace epote aitodolikin.

▸ Esu. 2, atu. 13

Apotu aiwadikaeta nukedwaritai kanuikamunitos Mesia kitodolikinos kanejai Yesu. Koany asaduku “ Adwareta Nuikamunitos Mesia.”

▸ Esu. 2, atu. 17, nuiyatakinitai.

Abu Yawe kosub akwap kwape ere loarai paradais loibus kanuka itunga lueminasi ngesi. Mam akote naka Edeke ijulakina, eapie Edeke alemar aronis kakwap ka itunga luiswamaete nueroko emudiaro ikar kere kosodete ainakin luedolito aijar ikar kere.

▸ Esu. 3, atu. 1

Satan nges emalaika loabu komwang Edeke. Enyaritai nges Satan, apolouke ebe “Eketepegan,” naarai abu ngesi  kitepeg Yawe. Enyaritai bobo ngesi ebe Ekejodijodon, apolouke “Ekengalan.” Enyaritai ngesi epone ngon naarai abu ngesi kiner nukaisab nuikamunitos Edeke ido eroko ngesi ingalai itunga.

▸ Esu. 3, atu. 4

Egeit Yawe aisub imalaikan eroko ngesi kesubuna akwap. Esubitai kesi aiboi kotoma akuj. Esubitai imalaikan ipu noi. (Daniel 7:10) Ejaatar kesi ka ikiroria ka iponesio luegelegela, ido mam imalaikan luemunooko ekotosi itunga aima kesi. Ejaatar kesi kadoketa nuegelegela ka aswamisio da nuegelegela. Imoriaritos aswamisio nu aijaanakin Yawe koicolongoke, aitejenunun akiro, ayuwar ka aingarenikin ikejaanakinakake kotoma akwap, aitodolonikin itubesia luka Edeke, ka aigang aswam naka alimonokin. (Isabulin 34:7; Apukokinio 14:6; 22:8, 9) Koingaren, epote kesi aimorikikin nepepe ka Yesu kojie loka Arumagedon.—Apukokinio 16:14, 16; 19:14, 15.

▸ Esu. 3, atu. 5; Esu. 10, atu. 1

Ediopone kere loipupia oni, loiwomoomoa oni, ka aswamisiowok kere numam ecamanara kede akote naka Edeke Yawe kesi eraasi adiakar. Ainaki Edeke oni aicoretake ka ikisilake nuingarakinete oni aisac aswam nueroko naarai epedori adiakar amunaar eidicanewok keda Edeke. Kageunet, asubit Yawe iboro kere ejokuka, konye neamwangiata Adam ka Keba Yawe, apotu kodiakasi ido mam apotu kosalata eraasi luedolito. Apotu kesi komojongata kotwakata da, ido oni da kimojongi katwakete naarai apotu kerumutu adiakar kanejai Adam.

▸ Esu. 3, atu. 7; Esu. 5, atu. 3

Erai loejie loemudiara Edeke akwap naka Satan ka aswamisio nueroko kere.

▸ Esu. 3, atu. 13; Esu. 8, atu. 18

Erai Ajakanut naka Edeke apugan naesipokinit Yawe toma akuj. Ipugai Yesu kwape Ekabaka. Koingaren, ebuni Yawe aitosom akejakanut kanu alemaria aronis kere. Ebuni Ajakanut naka Edeke aipuga akwap.

▸ Esu. 3, atu. 14

Abu Edeke kosub Yesu eroko ngesi kesuba idiobore kere. Abu Yawe kijuk Yesu toma akwap kanu atwanikin itunga kere. Akaulo naarere Yesu, Abu Yawe kitajaru ngesi. Ipugai kwana Yesu kokuju kwape Ekabaka loka Ajakanut naka Edeke.

▸ Esu. 4, atu. 2

Adwarit Ebaibuli apak na abeitor Mesia abunere. Eraun na angetakinet naka apak na asabaton 69, na abu kogeun kokaru 455 E.K.Y. (Eroko Keurunia Yesu) kosodi anangakin okaru lo 29 A.N.Y.

ipone bo ani ijenunia oni ebe abu apak ngin konangak okaru lo 29 A.N.Y.? Egeunitos asabaton 69 kokaru 455 E.K.Y. Kedol Nekemia Yerusalem, abu koduk bobo arwatat nako Yerusalem. (Daniel 9:25; Nekemia 2:1, 5-8) Kwape ijenia oni ebe 12 kesi iswamaunete “adasen,” kwape kwangin apaarasia 7 kesi iswamaunitos “esabiiti.” Asabaton nuadwaritai kane mam eraasi asabaton nuka  apaarasia 7 kosabiiti, konye eraasi asabaton nuka ikar Ikanykaarei, koupanara kede adwaretait naka “nginipaaran erianasi kekaru.” (Aimario 14:34; Esekiel 4:6) Apolouke ebe kanginisabato ejaasi kapak naka ikar 7, ido asabaton 69 edolitos ikar 483 (69 x 7). Arai kimara oni ikar 483 anyoun kokaru lo 455 E.K.Y., kidolokini oni okaru lo 29 A.N.Y. Arai okaru lo 29 cut ngesi ebatisaunor Yesu kosodete ainyonyoikin ngesi kwape Mesia!—Luka 3:1, 2, 21, 22.

 Inerit adwaretait ngin bobo nuikamunitos asabato ace, nabobo abwoikinit ikar 7. Kapak kangin, kokaru lo 33 A.N.Y., arai okaru lo nges aponi kotubokinere Mesia atwanare. Kageunet naka ekaru lo 36 A.N.Y., aponi kolimonokinai akiro nukajokak anatar atekerin kere mere Yudaya bon.—Daniel 9:24-27.

▸ Esu. 4, atu. 7

Isisianakini Ebaibuli ebe Yawe ngesi Lokasuban ido abu ngesi kosub Yesu eroko kesuba iboro kere. (Ikolosain 1:15, 16) Mam Yesu erai Edeke Lokapedor kere. Mam ngesi abala ebe eriakasi ngesi keda Edeke. Kabeit, abu kotema atiar: “Papa nges Lokapolon adepar eong.” (Yokana 14:28; 1 Ikorinton 15:28) Konye ipu idiinin luisisianakinete nuikamunitos Etiriniti, ebe itunga iuni iswamaunitos Edeke ediopet: Papa, Okoku, ka Emoyo lokalaunan. Akirot “Etiriniti” mam elomunit Obaibuli. Erai ngin aisisianakin nakaisab.

Erai emoyo lokalaunan agogogng naka Edeke, naitosomai ngesi aitodolikina akoteke. Mam emoyo lokalaunan erai itunganan. Kwape aanyunet, aponi ‘kilelebai Ikristayon lukolosek kere Emoyo lokalaunan,’ ido kobala Yawe ebe: ‘Abukokini awat kere Ekamoyo.’ —Aswamisio 2:1-4, 17.

▸ Esu. 4, atu. 12; Esu. 15, atu. 17

Kanukinyo mam Ikristayon lukabeit itosomata emusalaba kanuka aima Edeke?

1.  Etosomata idiinin lukaisab emusalaba adaun apak naepol. Kapaarasia nukolo sek etosomao emusalaba kotoma aima isuban ido etosomaete ikapiirin koinonosio luka aelo. Akaulo naka ikar 300 ketwana Yesu, mam Ikristayon etosomaete emusalaba kotoma aimakec. Ketubor apak  naepol, abu ekepugan loko Rom loanyaritai Constantine kitarau emusalaba kwape ibore yenebwoikinit ekritayone. Etosomao emusalaba kanu aitam aitijenaar ekristayone. Konye mam emusalaba ikamanara kede Yesu. Itetemit eitabo New Catholic Encyclopedia ebe: “itosomaete ikapiirin da emusalaba kononosiokec.”

2.  Mam Yesu Kristo etwanikit omusalaba. Akirot naka Ayonanin naijulunitere “emusalaba” akepolou ebe “epir,” “abawo,” arai “ekitoi.” Itetemit eitabo The Companion Bible ebe: “Emamei idiobore kotoma Ayonanin [Aitutuket Nakitetet] yenitodunit ebe araasi abawoi aarei.” Etwanikit Yesu okitoi loetenara.

3.  Mam Yawe ekoto oni aitosom aputosia kotoma aimawok.—Anyoun 20:4, 5; 1 Ikorinton 10:14.

▸ Esu. 5, atu. 12

Abu Yesu kicorak ikesisiakake aiitun atwanareke. Iswamaenenete kesi ngun kangol apaarasia 14 kolap Nisan, apaaran ngin enumunumiata idwe luka Isirael aleleng. Emugati keda ebino, ebwoikinitos aokot nuka Yesu ka akuanake ido isirimorio nejaas itunga kere kapak ngin naiitunere atwanare naka Yesu. Ngul luebeit aipuga keda Yesu Kristo kotoma akuj kesi enyamete emugati ka aimat ebino. Ejaunos ngul da luejaas keda amuno naka aijar kakwap ikar kere toma aiitun atwanare naka Yesu konye mam kesi enyamete emugati ka aimat ebino lo.

▸ Esu. 5, atu. 21

Kotoma Obaibuli loka amusugun New World Translation, akirot naijulitai Obaibuli loka Ateso “etau“ akepolou ebe (1) itunganan, (2) itiang, (3) aijar naka itunganan arai naka itiang. Kwape aanyunet:

•  Itunganan. “Kapaarasia nuka Noa . . . Kama etajarere itunga idis, kotoma akipi, kesi itunga ikanykauni.” (1 Petero 3:20) Kane, akirot etau ngesi ijulunitai kwape itunga—kesi Noa ka, akeberu, ka ikesap iuni ka akecengor.

• Itiang. Abu Edeke Kotema atiar: “‘Kilweka akip lueliatos luipu luejaas aijar, ido koporitos akweny nuka apak naka akuj.’ Kobala bobo Edeke ebe: ‘Kilwek akwap nginibore yenejai aijar kotoma oponeke, ibaren, ka yeneliat, ka etiang loka akwap koponeke.’ ”—Ageun 1:20, 24.

• Aijar naka itunganan ka itiang. Abu Yawe kolimok Musa ebe: “Atwaka itunga kere luekotos aiar jo [‘luamootos akonijar.’] (Anyoun 4:19) Naajaar Yesu akwap, abu kotema atiar: “Arai eong ekecokon lokajokan; einakin ekecokon lokajokan akeijar kanuka amerekekin.”—Yokana 10:11.

  Aiyatakin bobo, nainerar Ebaibuli ebe ekoto itunganan aswam “keketau kere,” erai apolouke ebe ekoto nges akokakinit aswam kagogong kere. (Matayo 22:37; Ikisila 6:5) Akirot “etau” ebwoikinit bobo eipud loejaatar itunganan. Itunganan da arai bo itiang yenikatwan enyarao etau lokatwan.—Aimario 6:6; Awaragasia 23:2; Isaia 56:11; Kagai 2:13.

▸ Esu. 6, atu. 5; Esu. 15, atu. 17

Akirot naka Aburanian ka naka Ayonanin na ijulunitai kwape “emoyo” ko Obaibuli ebwoikinit iboro luipu. Iboro luebwoikit emoyo eraasi lumam oni ipedori aanyun keda akonyewok, kwape nat ekwam loiyengasi itunga ka itiang. Ebwoikinitos bobo akiro nu imalaikan ka emoyo lokalaunan, ngesi apedor naka Edeke. Mam Ebaibuli isisianakini ebe ejai ibore toma akwan naka itunganan yenekui atwanare.—Anyoun 35:21; Isabulin 104:29; Matayo 12:43; Luka 11:13.

▸ Esu. 6, atu. 5; Esu. 15, atu. 17

Arai Egeena aiboisit nayapiei keda Yerusalem naecwere agasia. Emamei ibore yenitodunit ebe ecweo itiang arai itunga kanen. Mam Egeena erai aboisit naitisilarere ka aicwe itunga kakim ikar kere. Naenerar Yesu nuikamunitos acakakinio Ogeena, enera ngesi nuikamunitos amudiario naka ikar kere.—Matayo 5:22; 10:28.

▸ Esu. 7, atu. 20

Erai na ailip naesisianakina Yesu ikesisiakake eipone loibusakinitor ailip. Enyaritai bobo ngesi ailip naka Papakosi. Kwape aanyunet, abu Yesu kisisianak oni ailip kwanata:

• “Ekonikiror kitalaunai”

  Kilipi oni Yawe aitalaun ekekiror, alemar aingal kere nainerai kanuikamunitos ekekiror. Tetere ngul kere luejaasi toma akuj ka itunga luejaasi akwap itopolooritos ka ayongit ekiror loka Edeke.

• “Akonijakanut kobu”

  Kilipi oni apugan naka Edeke abunere amudiar akwap naronon naka Satan. Abunere aipuga, ka aitaraun akwap paradais.

• “Nuikoto kiswamai kakwapin kwape iswamaere kotoma akuj”

  Kilipi oni akote naka Edeke aitodolikin kane kotoma akwap tetere itunga luerimaaritos Edeke, ido kodolito ejarete ikar kere koparadais, kwape akotor Yawe sek neasubia ngesi itunga.

▸ Esu 8, atu. 2

Abu Yawe kijaik oni alucet kanu alakun oni kotoma adiakar ka atwanare. Erai alucet etiai loetacio kanuka alakunia aijar  nabu etunganan losodit loanyaritai Adam kotwania, ka aitemokin eidicane loabu komunaar kiding itunga ka Yawe. Abu Edeke kijuk Yesu toma akwap tetere etwanikini ikadiakanarak. Kanuka atwanare naka Yesu, edumunete itunga kere arereng naka aijar ikar kere kadolit.

▸ Esu. 8, atu. 21; Esu. 9, atu. 13

Isisianakini oni adwaretait naejai toma oitabo loka Daniel isulai  4 ebe aponi kosipokinai Ajakanut naka akuj kokaru 1914.

Adwaretait: Abu Yawe koinak Ekabaka Nebukadenesar airujasit naka adwaretait naikamunit ekitoi loejepario. Kotoma airujasit kangin, aponi koenai ekomio keda asuat ka aisinit kanu aisimik ngesi apol adaun “apakio akanykaarei.” Akaulo apakio kangun, ecamakinio ekitoi apoloor bobo.—Daniel 4:1, 10-16.

Ajokis naka adwaretait kana kamawok: Ebwoikinit ekitoi lo Ajakanut naka Edeke. Abu Yawe koinak ikabakan aipuga idwe luko Isirael ko Yerusalem. (1 Aisiitonokin 29:23) Konye mam ikabakan ngul apotu koraunos luamunooko, ido abu ajakanutukec kosang. Aponi komudiarai Yerusalem kokaru 607 E.K.Y. Erai ngin ageunet naka “apakio akanykaarei.” (2 Ikabakan 25:1, 8-10; Esekiel 21:25-27) Neabalar Yesu ebe, “icakacakaete Imo Yerusalem, aitodol naedolioto apakio nuka Imo,” enera ngesi nuikamanara apakio “akanykaarei.” (Luka 21:24) Aso mam “apakio akanykaarei” apotu konangakisi neajaar Yesu toma akwap. Abu Yawe kisumunik aseun Ekabaka akaulo naka “apakio akanykaarei.” Ajakanut naka Yesu Ekabaka lokitetet, erai naeyauni ajokisio nuipu noi nejaasi itunga kere kakwap ikar lumam edaunos.—Luka 1:30-33.

Aojau naka “apakio akanykaarei”: Apotu “apakio akanykaarei” koyangaikisi aojau naka ikar 2,520. Kimara oni  ikar 2,520 ageun kokaru 607 Eroko Keuruna Yesu, idolokini oni ekaru 1914. Apakio ngun ngesi adakakina Yawe Yesu kwape Mesia. Ekabaka loka Ajakanut naka Edeke kotoma akuj.

Eipone bo ani idumunia oni ikar 2,520? Ebala Ebaibuli ebe apakio auni katutubet eriakasi keda apaarasia 1,260. (Apukokinio 12:6, 14) Aso “apakio akanykaarei” erai 1,260 kirwan aarei, ngesi idumuna oni apaarasaia 2,520. Eriakasi apaarasia 2,520 keda ikar 2,520 kotupitete ekisil loka adwaretait naka ‘nginipaaran ebwoikinit ekaru.’—Aimario 14:34; Esekiel 4:6.

▸ Esu. 8, atu. 23

Akirot “emalaika lokapolon” apolouke ebe “Ekengarenon loka imalaikan.” Inera Ebaibuli nuikamunitos emalaika lokapolon ediope bon ido ekekiror nges Mikael.—Daniel 12:1; Yuda 9.

Mikael ngesi ekengarenon loka ajore naka imalaikan luka Edeke. Ebala Apukokinio 12:7 ebe: “kitiji Mikael ka ikemailakan apiu. Koji apiu ka ikemalaikan.” Ebala eitabo loka Apukokinio ebe Yesu nges Ekengarenon loka ajore naka Edeke, aso erai Mikael ekiror ece loka Yesu.—Apukokinio 19:14-16.

▸ Esu. 9, atu. 4

Ebwoikinitos akiro nu apakio nuetakanuniata aanyununeta nuepolok kotoma akwap eroko Ajakanut naka Edeke kebuno amudiar akwap naka Satan. Enyaritai bobo akiro nu kwape “esange loka akwapin” arai bo nat “abunore naka Okoku loka etunganan,” ido ebwoikinitos akiro ngun kere apakio nukawasia. (Matayo 24:3, 27, 37) Egeunitos “apakio nukawasia” atipet nape ageunia Ajakanut naka Edeke  aipuga kotoma akuj ageun kokaru loka 1914 ido ebeit Ajakanut ngin abunere amudiar akwapin nuka Satan kotoma ojie loka Arumagedon.—2 Timoteo 3:1; 2 Petero 3:3.

▸ Esu. 9, atu. 5

Neinyakunia bobo Edeke itunganan yenatwanit toma aijar, enyaritai ajarun. Itetemit Ebaibuli atenak akanykaongon nuka ajarun nuapotu kotakanutu. Apotu Eliya, Elisa, Yesu, Petero, ka Paul kitajarutu lukatwak. Apotu aumonokineta nu kotakanutu kanuka apedor naka Edeke. Isumunit Yawe ebe “ejaun ajarun naka luedolito ka lumam edolito da” kotoma akwap. (Aswamisio 24:15) Ebala bobo Ebaibuli ebe ejaun ajarun naka alosit toma akuj. Etakanunete ngun arai itajarun itunga luinyonyoikinit Edeke alosit aipuga keda Yesu toma akuj.—Yokana 5:28, 29; 11:25; Ipilipin 3:11; Apukokinio 20:5, 6.

▸ Esu. 9, atu. 13

Ecudet ngesi apeleikin einer keda ajokin, arai bo aitosom emuron loatagoro. Iswamaete itunga ecudet naarai iyuunitos kesi aisisianakinet nakaisab ebe ekuiete imoyon lukaitunga atwanare ido ebe eraunete kesi imoyon luepol agogong. Eutasi ajokin aitapaar itunga aimwang Edeke. Aingic aacer, ecudet, amurwonut, aira ikee, aimud akeje eraasi ngul kere iponesio luecudet. Iboro luitodiarito ecudet kwape nat; ibidion, apositan, ikosiosinei, itabon esubitos bala ejokuka kitelelete. Inonosio luka aida kwape nat: asuban naka lukatwak, ipucino luka eipud arai apunya, aiwalakin aikweny akuare kia kates imoriaritos nu kere aiswamanara ka ajokin.—Igalatian 5:20; Apukokinio 21:8.

▸ Esu. 10, atu. 10; Esu. 16, atu. 4

Erai Yawe Edeke Lokapedor kere, ido ngesi esubit akuj keda akwap kere. (Apukokinio 15:3) Kanuka ngun erai ngesi elope iboro kere ido ejaasi ngesi ka apedor naka aipuga isuban kere. (Isabulin 24:1; Isaia 40:21-23; Apukokinio 4:11) Ijaikinit ngesi ikesuban kere ikisila luebeit atupit. Ejaasi bobo Yawe kapedor naka aitaraun lucetunga ikepugak. Ekoto oni aigangit eipugae loka Yawe koipone lo amina ka arimaarit ngesi.—1 Aisiitonokin 29:11.

▸ Esu. 11, atu. 10

Erai aicik akoik apeleikin aiar ikoku yeneroko euruna. Mam ngin erai akangas arai aijecun. Ageun apaaran na epotuunio aberu, eraun ikoku ngin itunganan.

▸ Esu. 13, atu. 5

Erai na amukian naiyatakinere itunganan aokot naka icetunganan arai bo nuingadatai. Iwaitin iwongon luka aokot kes plasma, red blood cells, white blood cells, ka platelets.

▸ Esu. 13, atu. 13

Kotoma Obaibuli, akirot ‘alecorio’ mam erai aitisilario bon. Konye imoriarit alecorio, aituutoorio, aisisianakinio ka aitetenio. Mam Yawe iticani karaida adedenganakin naelecoria ngesi oni. (Awaragasia 4:1, 2) Ijaikinit Yawe auriak aanyunet najokan. Alecorio naijaikini ngesi erai naejok noi naeinakini itunganan aminun alecorioke. (Awaragasia 12:1) Emina Yawe iketunga, ido ituutoonori ngesi kesi.  Ijaikini Yawe kesi aituutoorio naitetenaari ibore yenerono kanuka ainakin itunganan aisisaun aomoom ka aswam koipone loejok. Kanejaasi auriak, imoriarit alecorio aingarakin idwekec amisiikin kanukinyo ibusakinitor kesi araut luerimaaka. Imoriarit bobo aisisianakin kesi amina Yawe, ka akekirot naejai Obaibuli, ka amisiikin aicoretake.

▸ Esu. 14, atu. 13

Eraasi ajokin imalaikan luarokok ido epol agogong. Apotu kesi koraunos luarokok akaulo narauniata kesi lukasurup luka Edeke koipone lo aimwang ngesi. (Ageun 6:2; Yuda 6) Apotu kesi kimorikikinos keda Satan kotoma aipalikin Yawe.—Ikisila 32:17; Luka 8:30; Aswamisio 16:16; Yakob 2:19.

▸ Esu. 16, atu. 4