విలాపవాక్యాలు 5:1-22
5 యెహోవా, మా మీదికి వచ్చిన కష్టాన్ని గుర్తుచేసుకో.
మాకు కలిగిన అవమానాన్ని చూడు.+
2 మా వారసత్వ ఆస్తి పరాయివాళ్లకు, మా ఇళ్లు పరదేశులకు అప్పగించబడ్డాయి.+
3 మేము తండ్రిలేనివాళ్లం అయ్యాం, అనాథలం అయ్యాం; మా తల్లులు విధవరాళ్లు అయ్యారు.*+
4 మా సొంత నీళ్లను, మా సొంత కట్టెల్ని డబ్బిచ్చి కొనుక్కోవాల్సి వచ్చింది.+
5 మమ్మల్ని వెంటాడుతున్న వాళ్లు మా మెడ దగ్గర ఉన్నారు;మేము అలసిపోయాం, కానీ మాకు విశ్రాంతి దొరకట్లేదు.+
6 ఆహారం కోసం మేము ఐగుప్తు* మీద, అష్షూరు మీద ఆధారపడ్డాం.+
7 పాపం చేసిన మా పూర్వీకులు ఇప్పుడు లేరు, కానీ మేం మాత్రం వాళ్ల దోషాల్ని భరిస్తున్నాం.
8 సేవకులు మమ్మల్ని ఏలుతున్నారు; వాళ్ల చేతుల్లో నుండి మమ్మల్ని విడిపించే వాళ్లెవ్వరూ లేరు.
9 ఎడారిలోని ఖడ్గం వల్ల మేము ప్రాణాలకు తెగించి ఆహారం తెచ్చుకుంటున్నాం.+
10 తీవ్రమైన ఆకలి వల్ల మా చర్మం కొలిమిలా కాలిపోతోంది.+
11 సీయోనులోని భార్యల్ని, యూదా నగరాల్లోని కన్యల్ని వాళ్లు అవమానించారు.*+
12 తమ చేతితో అధిపతుల్ని వేలాడదీశారు,+ పెద్దల మీద ఏమాత్రం గౌరవం చూపించలేదు.+
13 యువకులు తిరుగలి మోస్తున్నారు, పిల్లలు కట్టెల మోపులు మోయలేక తడబడుతున్నారు.
14 నగర ద్వారం దగ్గర పెద్దలు లేరు;+ యువకులు సంగీతం వాయించట్లేదు.
15 మా హృదయంలో ఇక సంతోషం లేదు; మా నాట్యం దుఃఖంగా మారింది.+
16 మా తల మీద నుండి కిరీటం పడిపోయింది. అయ్యో, మాకు శ్రమ! మేము పాపం చేశాం!
17 అందువల్ల మా హృదయం బలహీనపడింది,ఈ విషయాల వల్ల మా కళ్లు మసకబారాయి;+
18 ఎందుకంటే సీయోను పర్వతం నిర్జనంగా మారింది;+ ఇప్పుడు దానిమీద నక్కలు సంచరిస్తున్నాయి.
19 యెహోవా, నువ్వు ఎప్పటికీ సింహాసనం మీద కూర్చొని ఉంటావు.
నీ సింహాసనం తరతరాలు ఉంటుంది.+
20 నువ్వు మమ్మల్ని ఎందుకు శాశ్వతంగా మర్చిపోయావు? ఇంతకాలం పాటు మమ్మల్ని ఎందుకు వదిలేశావు?+
21 యెహోవా, మమ్మల్ని మళ్లీ నీ దగ్గరికి తెచ్చుకో, మేము ఇష్టపూర్వకంగా నీ దగ్గరికి తిరిగొస్తాం.+
మళ్లీ మాకు పాత రోజుల్ని తీసుకురా.+
22 అయితే నువ్వు మమ్మల్ని పూర్తిగా తిరస్కరించావు.
మా మీద చాలా కోపంగా ఉన్నావు.+
