కీర్తనలు 69:1-36
సంగీత నిర్దేశకునికి సూచన; “లిల్లీ పువ్వులు” అనే రాగంలో పాడాలి. దావీదు కీర్తన.
69 దేవా, నీళ్లు నన్ను ముంచెత్తుతున్నాయి, నన్ను రక్షించు.+
2 కాలు నిలపడానికి గట్టినేల లేని లోతైన ఊబిలో నేను కూరుకుపోయాను,+
నేను లోతైన నీళ్లలో మునిగిపోయాను,వరద ప్రవాహానికి కొట్టుకుపోయాను.+
3 మొరపెట్టీ పెట్టీ నేను అలసిపోయాను;+నా గొంతు బొంగురుపోయింది.
నా దేవుని కోసం ఎదురుచూసీ చూసీ నా కళ్లు క్షీణించాయి.+
4 ఏ కారణం లేకుండా నన్ను ద్వేషించేవాళ్లు+నా తలవెంట్రుకల కన్నా ఎక్కువమంది ఉన్నారు.
నన్ను చంపాలని చూసేమోసగాళ్లయిన శత్రువులు* ఎక్కువయ్యారు.
నేను దొంగిలించనిదాన్ని బలవంతంగా ఇవ్వాల్సి వచ్చింది.
5 దేవా, నా తెలివితక్కువతనం నీకు తెలుసు,నా అపరాధం నీకు కనిపిస్తూనే ఉంది.
6 సర్వోన్నత ప్రభువా, సైన్యాలకు అధిపతివైన యెహోవా,నీ మీద ఆశపెట్టుకునేవాళ్లు నా కారణంగా సిగ్గుపడే పరిస్థితి రాకూడదు.
ఇశ్రాయేలు దేవా,నిన్ను వెదికేవాళ్లు నా కారణంగా అవమానాలపాలు కాకూడదు.
7 నీ కారణంగా నేను నిందల పాలయ్యాను;+అవమానం నా ముఖాన్ని కప్పేసింది.+
8 నేను నా సహోదరులకు పరాయివాణ్ణి అయ్యాను,నా తోడబుట్టిన వాళ్లకు పరదేశిని అయ్యాను.+
9 నీ మందిరం* విషయంలో నాకున్న ఆసక్తి మండుతున్న అగ్నిలా ఉంది,+నిన్ను నిందించేవాళ్ల నిందలు నా మీద పడ్డాయి.+
10 ఉపవాసం ఉండి నన్ను నేను తగ్గించుకున్నప్పుడు,*దాని గురించి నన్ను నిందించారు.
11 నేను గోనెపట్ట కట్టుకున్నప్పుడు,వాళ్లు నన్ను ఈసడించుకున్నారు.*
12 నగర ద్వారం దగ్గర కూర్చున్నవాళ్లు నా గురించి మాట్లాడుకుంటున్నారు,తాగుబోతులు నా మీద పాటలు పాడుతున్నారు.
13 అయితే యెహోవా,అనుకూలమైన సమయంలో నా ప్రార్థన నీ దగ్గరికి చేరాలి.+
దేవా, నీ అపారమైన విశ్వసనీయ ప్రేమను బట్టి నాకు జవాబిచ్చి,నువ్వే నిజమైన రక్షకుడివని చూపించు.+
14 ఊబిలో నుండి నన్ను రక్షించు;నన్ను లోపలికి కూరుకుపోనివ్వకు.
నన్ను ద్వేషించేవాళ్ల నుండి,లోతైన నీళ్ల నుండి నన్ను కాపాడు.+
15 నన్ను వరద ప్రవాహానికి కొట్టుకుపోనివ్వకు,+లోతైన నీళ్లు నన్ను మింగేయనివ్వకు,గొయ్యి* నన్ను లోపలికి లాక్కోనివ్వకు.+
16 యెహోవా, నీ విశ్వసనీయ ప్రేమ మంచిది, నాకు జవాబివ్వు.+
నీ అపారమైన కరుణను బట్టి నా వైపు తిరుగు,+
17 నీ సేవకుడి నుండి నీ ముఖం దాచుకోకు.+
నేను కష్టాల్లో ఉన్నాను, నాకు త్వరగా జవాబివ్వు.+
18 నా దగ్గరికి వచ్చి, నన్ను రక్షించు;నా శత్రువుల నుండి నన్ను విడిపించు.
19 నాకు కలిగిన నింద, సిగ్గు, అవమానం నీకు తెలుసు.+
నా శత్రువులందర్నీ నువ్వు చూస్తున్నావు.
20 నిందలవల్ల నా గుండె బద్దలైంది, నా గాయం నయంకానిది.
ఎవరైనా సానుభూతి చూపిస్తారని ఎదురుచూశాను, కానీ ఎవ్వరూ చూపించలేదు,+ఓదార్చేవాళ్ల కోసం చూశాను, కానీ ఒక్కరూ కనిపించలేదు.+
21 ఆహారానికి బదులు నాకు విషాన్ని* ఇచ్చారు,+దాహం వేసినప్పుడు పుల్లటి ద్రాక్షారసాన్ని ఇచ్చారు.+
22 వాళ్ల భోజనం బల్ల వాళ్లకు ఉచ్చుగా తయారవ్వాలి,వాళ్ల సమృద్ధి వాళ్లకు ఉరిగా మారాలి.+
23 వాళ్ల కళ్లకు చీకటి కమ్మాలి, వాళ్లకు ఏమీ కనబడకూడదు,వాళ్ల కాళ్లు* ఎప్పుడూ గజగజ వణకాలి.
24 వాళ్ల మీద నీ ఉగ్రతను* కుమ్మరించు,నీ కోపాగ్ని వాళ్లను తరిమి పట్టుకోవాలి.+
25 వాళ్ల పాలెం* నిర్మానుష్యమైపోవాలి;వాళ్ల డేరాల్లో ఒక్క నివాసి కూడా ఉండకూడదు.+
26 ఎందుకంటే, నువ్వు కొట్టినవాణ్ణి వాళ్లు తరుముతున్నారు,నువ్వు గాయపర్చినవాళ్ల బాధల గురించి మాట్లాడుకుంటున్నారు.
27 వాళ్ల అపరాధానికి వాళ్లకు పూర్తి శిక్ష పడాలి,వాళ్లు నీ దృష్టిలో నీతిమంతులుగా ఎంచబడకూడదు.
28 జీవగ్రంథంలో* నుండి వాళ్ల పేర్లు తుడిచేయబడాలి,+నీతిమంతులతో పాటు వాళ్ల పేర్లు రాయబడకూడదు.+
29 నేను కష్టాల్లో ఉన్నాను, బాధపడుతున్నాను.+
దేవా, నీ రక్షణ శక్తితో నన్ను కాపాడు.
30 నేను దేవుని పేరును స్తుతిస్తూ పాటలు పాడతాను,కృతజ్ఞతలు చెల్లిస్తూ ఆయన్ని ఘనపరుస్తాను.
31 అది ఎద్దు కన్నా, కొమ్ములు-డెక్కలు* ఉన్న కోడెదూడ కన్నాయెహోవాను ఎక్కువ సంతోషపెడుతుంది.+
32 సాత్వికులు దాన్ని చూసి సంతోషిస్తారు.
దేవుణ్ణి సేవించే ప్రజలారా, మీ హృదయాలు తెప్పరిల్లాలి.
33 ఎందుకంటే, యెహోవా పేదవాళ్ల మొరను వింటున్నాడు,+బందీలైన తన ప్రజల్ని ఆయన నీచంగా చూడడు.+
34 భూమ్యాకాశాలు ఆయన్ని స్తుతించాలి,+సముద్రాలు, వాటిలో కదిలేవన్నీ ఆయన్ని స్తుతించాలి.
35 ఎందుకంటే, దేవుడు సీయోనును రక్షిస్తాడు,+యూదా నగరాల్ని మళ్లీ కడతాడు,ఆయన ప్రజలు అక్కడ నివసిస్తారు, దాన్ని* స్వాధీనం చేసుకుంటారు.
36 ఆయన సేవకుల వంశస్థులు దాన్ని వారసత్వంగా పొందుతారు,+ఆయన పేరును ప్రేమించేవాళ్లు+ దానిలో నివసిస్తారు.
అధస్సూచీలు
^ లేదా “కారణం లేకుండా నాకు శత్రువులైనవాళ్లు.”
^ అక్ష., “ఇంటి.”
^ లేదా “నేను ఏడుస్తూ ఉపవాసం ఉన్నప్పుడు” అయ్యుంటుంది.
^ లేదా “నామీద సామెత చెప్పుకున్నారు.”
^ లేదా “బావి.”
^ లేదా “విషపు మొక్కను.”
^ అక్ష., “తుంట్లు.”
^ లేదా “ఆగ్రహాన్ని.”
^ లేదా “ప్రాకారాలుగల పాలెం.”
^ అక్ష., “సజీవుల గ్రంథంలో.”
^ లేదా “కొమ్ములు-గిట్టలు.”
^ అంటే, దేశాన్ని.
