అబ్రాహాము తన కొడుకు ఇస్సాకుకు యెహోవాను ప్రేమించాలని, ఆయన వాగ్దానాల అన్నిటిని నమ్మాలని నేర్పించాడు. ఇస్సాకుకు దాదాపు 25 సంవత్సరాలు వచ్చినప్పుడు, యెహోవా అబ్రాహామును చాలా కష్టమైనది ఏదో చేయమని అడిగాడు. ఏంటది?

దేవుడు అబ్రాహాముతో: ‘దయచేసి, నీ ఒక్కగానొక్క కొడుకును తీసుకుని వెళ్లి మోరీయా ప్రాంతంలో ఒక కొండపైన నాకు బలిగా అర్పించు’ అన్నాడు. యెహోవా ఎందుకు అలా అడిగాడో అబ్రాహాముకు ఏం తెలియకపోయినా ఆయన చెప్పిన మాటకు లోబడ్డాడు.

అబ్రాహాము తర్వాత రోజు ఉదయాన్నే ఇస్సాకును, ఇద్దరు పనివాళ్లను తీసుకుని మోరీయా ప్రాంతానికి బయలుదేరాడు. మూడు రోజులు ప్రయాణించాక దూరం నుండి ఆ కొండలు కనిపించాయి. అబ్రాహాము పనివాళ్లతో అక్కడే ఆగమని చెప్పాడు, ఇస్సాకును తీసుకుని బలి అర్పించడానికి వెళ్లాడు. ఇస్సాకును కట్టెలు పట్టుకోమని చెప్పి అబ్రాహాము కత్తి తీసుకున్నాడు. అప్పుడు ఇస్సాకు వాళ్ల నాన్నతో ‘బలి ఇవ్వడానికి జంతువు ఎక్కడ ఉంది?’ అని అడిగాడు. అబ్రాహాము ‘యెహోవా ఇస్తాడు నాన్న’ అని చెప్పాడు.

చివరికి కొండ దగ్గరికి రాగానే వాళ్లు అక్కడ ఒక బలిపీఠం కట్టారు. అబ్రాహాము ఇస్సాకు కాళ్లూ చేతులు కట్టేసి బలిపీఠం మీద పడుకో పెట్టాడు.

అబ్రాహాము కత్తిని తీసుకున్నాడు. సరిగ్గా అప్పుడే యెహోవా దూత పరలోకం నుండి పిలిచి: ‘అబ్రాహాము! బాబును ఏమి చేయవద్దు! నీ కొడుకుని కూడా బలి ఇచ్చేయడానికి సిద్ధపడ్డావు కాబట్టి నీకు  దేవుని మీద విశ్వాసం ఉందని ఇప్పుడు నాకు తెలిసింది’ అని చెప్పాడు. అప్పుడు అబ్రాహాముకు ఒక పొట్టేలు కనిపిస్తుంది. దాని కొమ్ములు చెట్టులో ఇరుక్కుని ఉన్నాయి. వెంటనే ఆయన ఇస్సాకు కట్లు ఊడదీసి ఆ పొట్టేలును బలిగా ఇచ్చాడు.

ఆ రోజు నుండి యెహోవా అబ్రాహామును స్నేహితుడని పిలిచాడు. ఎందుకో మీకు తెలుసా? అబ్రాహాము యెహోవా ఏది అడిగినా చేశాడు, ఆయనను యెహోవా అలా ఎందుకు అడిగాడో అర్థం కాకపోయినా చేశాడు.

యెహోవా అబ్రాహాముకు చేసిన వాగ్దానాన్ని మళ్లీ అతనికి చెప్పాడు: ‘నేను నిన్ను ఆశీర్వదిస్తాను, నీ పిల్లల్ని అంటే నీ సంతానాన్ని ఆశీర్వదిస్తాను.’ యెహోవా అబ్రాహాము కుటుంబం ద్వారా మంచివాళ్లందరినీ ఆశీర్వదిస్తాడని దీని అర్థం.