Tea i Jehovah Andrianagnahare hianatse ty miomba aze naho i Fanjakà’e an-dagnitse agney o ndatio iaby, ndra manao akore ndra manao akore ty raha iaigna’e. (1 Timoty 2:3, 4) Izay ty anto’e mahavy o Vavolombelo i Jehovah-o mampiboake Baiboly naho boke fianaragne Baiboly afake hagnampe ndaty maro, agnisa izay o karegnegneo. Naho ty maregne, le fa nampiboake video naho fitaovagne ara-baiboly hoahy ty karegnegne naho moagne agnarivo’e ty fandaminagne sady amy ty firehake baiko moagne losotse ty 100.  a Akore ty atao naho fa mamboatse o video rehoe sady mampiparitake aze? Inogne iaby ty fagnasoagne fa nataontikagne tagnate ze taogne maro zay?

 Trea magneran-tane ty ekipa mpandika rehake mampiboake o boke naho o gazeteo amy ty baiko moagne. Dinehe ty ndaty tsikiraidraike agnate i ekipay ao soa ze raha hadika. Afara izay iareo vaho manapa-kevetse tie, akore ty fomba soa hampitaegne i fagnazavagney amy ty baiko moagne. Naho fa vita zay, le alaegne video i fitaovagne adikay. Misy 60 ty ekipa mpandika o boke fianaragne Baibolio amy ty baiko moagne. Misy ekipa 40 hafa ka manao izay faie kindraike avao.

 Vola bey ty nilany taloha naho fa namboatse o video baiko moagneo. Mbe nilafo ohatse ty vily o kamerào naho ty fitaovagne hafa tie taloha naho oharegne amy ty vili’e amy izao. Nalaegne video tamy studio ao ohatse i video rey, ty dika izay tsy maintsy namboatse tragno tikagne. Kindraike ka aza tikagne nagnavao tragno hanoagne izay. Losotse ty 30 000 b dolara ty vola lany mba hahazoagne ze fitaovagne ilae ty ekipa raike mpandika rehake amy ty baiko moagne.

 Mba hahafahagne hampiasa soa o vola fagnomezagneo, le nipay fomba hagnasoagne sady hagnatsotragne o fandikan-drehake amy ty baiko moagneo ty fandaminagne. Nampiasa i fitaovagne moderina mora ampiasaegne sady tsy lafo rey areke tikagne. Afake mampiasa i atao tihoe rindrigne maintsoy o ekipa mpandika rehakeo sady mamboatse i videoy amy ty birò iareo ao avao toe izay hampiasa studio. Naho fa maro ty ndaty halaegne video, le o rahalahy naho o rahavaveo avao le fa afake mangalake video i anjara’ey amy ty birò iareo ao ndra an-tragno iareo agne fa tsy mandeha amy studio agne sasa.

 Namboatse programa tena ilae o mpandika rehake amy ty baiko moagneo amy ty asa’e ka tikagne. Ty voka’e, nihegne ty fotoagne nilany mba hahafahagne mampiboake boke ndra raha hafa amy ty baiko moagne. Tena mankasitrake o fagnasoagne rehoe o rahalahintikagneo. Izao ohatse ty nirehafe i rahalahy Alexander: “Maro ty video baiko moagne aboake tie amy izao naho oharegne amy ty taloha. Tena mahafale ahy ze raha zay. Isan’andro raho le magnente i video rey.”

 Latsake ty 5 000 dolara ndra 21 000 000 ariary eo ho eo ty vola ilaegne mba hivilianagne ty fitaovagne paliae ty ekipa mpandika rehake raike. Maro areke ty video amy ty baiko moagne afake vokaregne.

 Naho vita alake ty video o boke aman-gazeteo ndra ty video ty raha hafa, le tsy maintsy atao ze hahafaha o ndaty liagneo hahazo aze. Tie taloha, le kasety video ndra DVD ty nisiagne aze. Faie asa bey zay sady nandany fotoagne naho vola bey. Ie naho fa nivita zay, le mbe tsy maintsy nalefa tamy ty orinasa raike mba hanoagne aze kopỳ. Afara izay i kasety video ndra DVD rey vaho izay nalefa tamo o fiangonagneo. Vola mahery ty 2 000 000 dolara ndra 8 400 000 000 ariary eo ho eo ty nilany tamy 2013 mba hampiboahagne DVD amy ty baiko moagne.

 Le vata’e mankasitrake i DVD naho kasety video rey o ndaty karegnegneo. Faie tsy mora ty nampiasa aze lohotsie naho fa nihamaro ty isa’e. Maro zao ohatse ty DVD nipaliaegne vaho izay niombe ty boke raike amy Baiboly ao. Hoe ty Gilnei, rahalahy boake a Brezily agne: “Naho fa nite hamaky andinin-teny zahay, le maintsy nipaliavegne hey ze kasety video nisy aze. Afara izay vaho kodebegne agnate’e ao ka ty misy i andinin-tenỳ. Nagnore ty nampiasa aze.” Nampiasa DVD misy baiko moagne ka ty rahavave raike atao tihoe Rafayane. Hoe reke: “Le vata’e mandrokake ty nanao fianaragne raike ama’e. Malaogne ty ahatreava’o andinin-teny naho loharanon-kevetse.” Akore ka ty natao ty rahalahy naho ty rahavaventika naho fa iareo nitory? Mateteke iareo ro ninday i DVD-y ndra i kasety videoy. Ie naho fa nahatrea ndaty liagne iareo, le nalefa’e tamy ty fitaova i ndatỳ i rahay. Nisy mpiara-manompo ila’e aza ninday ty fitaova’e mba handefasagne i DVD-y. Faie tsiela tafara izay, le nanjare nisy fitaovagne fandefasagne DVD nindesegne tagnagne, le maro ty mpitory afake nampiasa aze. Hoe ty Bobby, rahalahy boake a Etazonia agne: “Tsy maintsy mangalake DVD hafa rehe naho ohatse fa boake nampiseho andinin-teny faie mbe te hampiseho andinin-teny hafa. Nandany fotoagne i rahay le nanjare tsy loho afake nampiasa Baiboly o mpitorio.”

 Nampiboake ty programa JW Library Sign Language ty fandamina i Jehovah tamy 2013. Ze rahalahy naho rahavave managne aze, le afake malake ty video hoahy o karegnegne naho moagneo amy ty telefoni’e ndra ty tableti’e sady afake mandefa aze. Hoahy ty Baiko moagne Amerikana ty nampiboahagne o programa iohoe voaloha’e. Faie nihavaozegne reke tamy 2017 le nanjare nimete hoahy ty baiko moagne magneran-tane. Tena nifale o rahalahy naho rahavave magneran-taneo naho fa nahazo aze. Hoe ty Juscelino, rahalahy a Brezily agne: “Tena nitampoke ahy i rahay. Nanjare nieretseretse avao raho tie tena tea anay ndaty karegnegneo o Filan-keve-pitantanagneo sady tena tea iareo handroso manahake o ndaty maharey io avao zahay. Tena nifale raho naho fa niboake o programa iohoe. Vao mainke mindra ty fahazotoako mianatse Baiboly amy izao.”

 Aboake amy ty endreke elektronike iaby ze video amy ty baiko moagne amy hinane zao sady azo alaegne amy tragnom-porarontikagne ao naho amy ty programa JW Library Sign Language ao. Fa andro tsiampeampe avao areke ty andikagne naho angalagne i video rey vaho izaragne boke amy ty baiko moagne fa tsy am-bola’e ndra aman-tao’e sasa. Ty ankamaroa o video amy ty baiko moagne reo aza le fa miarake miboake amo o boke natao hoahy o mahareio avao.

 Ino ty tsapa o rahalahy naho o rahavave karegnegne ila’eo boake amy izay? Hoe ty rahavave Klízia: “Aia ka ro hahatrea fandaminagne mikarakara o ndaty karegnegneo manahake izay, sady vognogne hagnomey hanegne ara-pagnahy hoahy iareo, ie amy izao tsy magnore alaegne? Ty fandamina i Jehovah avao ro mahavita izay ho anay karegnegneo fa tsy misy hafa.” Hoe ka ty Vladmir: “Naho fa magnente ty video natao ho anay karegnegneo raho, le tsapako fa tena mikarakara anay ty Jehovah, manahake ty atao amo o mahareio avao.”

 Mateteke ro ahatreavagne ze o rehake zao ty amo o video amy ty baiko moagneo: “Natao mba hampianaragne Baiboly magneran-tane ty anto’e nampiboahagne ty boke toy sady tohanagne amy ty alala ty fagnomezagne an-tsitrapo.” Tena mankasitrake ty fagnomezagne atao’areo zahay. Maro ama’areo ty manao izay amy ty alala ty donate.jw.org. I vola mea’areo rey ro ahafaha’ay mampiboake Baiboly naho boke fianaragne Baiboly hoahy ze kila ndaty, agnisa izay o ndaty karegnegne naho moagneo.