Naterake ta Székesfehérvár, a Hongria eto raho. Fa losotse ty 1 000 taogne zay ty nisia o tanàgne manan-tantara iohoe. Mampalahelo fa nisimba i tanà’aỳ, tafara i Aly Lahibey Faharoey, sady tsy mete afake an-tsaiko ao o raha niseho iohoe.

I dadabeiko naho i bebeiko ty niteza ahy tamy iraho mbe nikede. Mbe tsiaroko avao iareo, lohotsie fa i Elisabeth bebei’ay. Ty anto’e, natao’e ze hahavy ahy hino an’Agnahare. Lava niarake nanao i Vavake Nampianare i Tompoy avao zahay isake hariva, nanomboke tamy iraho nitelo taogne. Faie ndra tie teo zay, le tamy iraho ni-30 taogne latsake kede vaho tena nahazo soa ty dika o vavake iohoe.

Niasa handro halegne avao ty babako naho i reneko mba hiviliagne tragno soasoa ho anay, le izay ty nahavy i dadabey naho i bebeiko hiteza ahy. Faie niarake nihinagne zahay keleian-draike naho fa Sabotsy, isake tapa-bolagne. Tena teako i fotoagne niharoa’ay rey.

Nitanterake i raha nirie i babako naho i renekoy tamy 1958. Ty anto’e, nahavoavily tragno iareo tamy io. Ela ty ela fa niarake nitoboke avao zahay telo. Faie nampalahelo fa tsy naharetse zay, satria nimate ty kansera ty babako enem-bolagne tafara izay.

Tena nikivy raho. Tsiaroko fa nivavake raho tamy izay tie: “O Andrianagnahare! Fa nivavake tama’o raho tie mba avoto ty baba’ay! Tena mipay aze anio raho! Le nagnino zane ro tsy nivalea’o i vavake nataokoy?” Tena niteàko ho hay tie aia ty baba. Nandeha mban-dagnitse mbeo vao sa tsy misy sasa nainai’e? Nanjare nialogne o ajaja mbe velon-draeo raho.

Fa nagnaly ho isan’andro raho ty nandeha an-kibory i babako agne tagnate ty taogne maro. Nitongaleke raho sady nivavake tie: “O Andrianagnahare, mba atorò ahy moa tie aia ty babako e!” Nivavake ka raho tie nagnino ty Andrianagnahare ro namboatse o ndatio.

Nanapa-kevetse ty hianatse rehake alemà raho tamy iraho ni-13 taogne. Tena lako ty boke alemà nahaliagne ahy, le nieretseretse raho tie va’e ho voavale ato ty fagnonteneako. Nianatse ta Jena tagne raho tamy 1967. Agnisa i Alemaigne Atignanagne agne ty Jena tamy izay. Nazoto namaky boke sinora o filòzofa alemào raho, lohotsie fa o aze mirehake miomba ty anto’e isia o ndatioy. Maregne fa nisy nahaliagne ahy avao ty fagnazavagne tao, faie tsy tena nahafa-po ahy. Mbe nivavake avao areke raho mba hahazo ty vale i fagnonteneako rey.

Niheregne ta Hongria teto raho tamy 1970. Nifankatrea tamy ze ampela raike atao tihoe Rose zay raho tamy io, le nivaly zahay naho fa tafara tatoy. Tane Kominista ty Hongria tamy izay, le hafara’ay nilay ta Otrisy agne tafara kede i mariaze’aỳ. Hifindra amy i dadatoako a Sydney, a Ostralia agney ty tena tanjo’ay tamy izay.

Vaho niavy kedekede ta Ostralia agne raho, le nahatrea asa. Nisy mpiara-miasa tamako zay nirehake tie amy Baiboly ao iaby ty vale i fagnonteneako rey. Nimei’e boke maromaro miomba ty Baiboly raho. Le hoe tioke avao ty namakiako aze faie mbe tsy tena niafa-po raho. Ahy o Vavolombelo i Jehovah-o i boke nivakieko rey, le nanoratse tamy iareo agne raho mba hahazoako boke hafa ka.

Nisy tanora Vavolombelo i Jehovah raike zay nitilike anay, tamy i aniverisera mariaze’aỳ voaloha’e. Ninday i boke nangataheko rey reke, sady nitaone’e raho mba hianatse Baiboly. Tena nazoto raho hafaràko nianatse indroe isan-keregnandro. Efatse lera eo ho eo ty lani’ay isake tie mianatse.

Tena nifale raho naho fa nahay ty raha ampianare o Vavolombelo i Jehovah-o. Hoe nagninofy zay raho naho fa natoro iareo boake agnate Baiboliko Hongroà ao ty tahinan’Agnahare tihoe Jehovah. Fa 27 taogne raho ty niangogne, faie mbe liako naho naharey o tahinagne iohoe ndra ho indraike aza. Nigaga ka raho fa voavale mazava soa agnate Baiboly ao iaby i fagnonteneako rey. Nianarako ohatse fa tsy misy raha rendre’e o ndatio naho fa mate fa manahake o ndaty azon-droro soao. (Mpitoriteny 9:5, 10; Jaona 11:11-15) Nianarako ka fa mampitamà ty Baiboly tie hisy tontolo vaovao sady “tsy hisy fate sasa” ty ao. (Apokalypsy 21:3, 4) Mitamà raho fa hahatrea an-draeko tie amy izay, satria hovelomegne amy ty mate reke.​—Asan’ny Apostoly 24:15.

Nazoto niara-nianatse tamako ka ty Rose. Nandroso malaky i fianara’aỳ hafara’e roe volagne avao le fa nivita i boke nianara’aỳ. Natrehe’ay iaby ka o fivoriagne iaby anoe o Vavolombelo i Jehovah-o. Tena nilatsa zahay fa mifankatea naho mifagnampe sady miharo saigne iareo.​—Jaona 13:34, 35.

Nahazo alalagne hifindra ta Ostralia agne avao zahay amy valiko tamy 1976, le avy le nipay Vavolombelo i Jehovah zahay naho fa niavy agne. Le avy le nirambese iareo soa zahay. Nanjare Vavolombelo i Jehovah zahay tamy 1978.

Nitreako iaby ty vale i fagnonteneagne nampivali-doha ahy amparake izay rey. Nanjare nifandrambe maifitse tamy i Jehovah Andrianagnahare ka raho, le nahatsapa tie tsy misy Rae fanjaka mandikoatse aze. (Jakoba 4:8) Tsy ligneko ze hahitako indraike i raeko niterake ahỳ, amy tontolo vaovao agne.​—Jaona 5:28, 29.

Nanapa-kevetse zahay mirovaly tamy 1989, fa holy a Hongria agne. Ty anto’e, tea’ay hatalily o longo’aio naho o ragne’aio ty raha nianara’ay. Fa an-jato’e zao ty ndaty nampianare’ay Baiboly. Le ty 70 mahery amy iareo fa nanjare manompo i Jehovah miarake ama’ay, agnisa izay ty reneko.

Nivavake raho tagnate ty 17 taogne mba ho voavale iaby i fagnonteneako rey. Mbe mivavake avao raho, 39 taogne afara izay, faie izao indraike ty raha rehafeko: “O Baba! Misaotse azo namale i vavake nataoko tamy iraho mbe nikedey.”