Eretsereto tie mirehake amy ty ana-dahi’e fito taogne ty rae raike. Le hoe reke ama’e: “Tamboaloha’e tagne ty Andrianagnahare namboatse ty tane naho ze kila raha ama’e eo iaby. Le ireke ka ty namboatse ty masoandro naho ty volagne vaho ty vasiagne.” Nandineke ty miomba izay i ajajay sady nagnontane aze tie: “O baba, a ia ka ty namboatse an’Andrianagnahare?”

Le hoe ty baba’e: “Tsy nisy namboatse reke fa nisy avao.” Va’e hagneke izay aloha i ajajay, faie naho fa bey reke va’e mbe hampinekoneko aze zay. Tsy heké ty sai’e tie tsy nisy namboatse ty Andrianagnahare, satria nisy namorogne ze kila raha iaby. Va’e handineke avao areke reke tie: ‘Akore zane ty nampisy an’Andrianagnahare?’

Akore hoe ty Baiboly? Mitovitovy amy ty nirehafe i loha ty keleiagney avao ka ty raha rehafe’e. Nanoratse ty Mosesy tie: “O Jehovah, ... taloha ty niterahagne o vohitseo naho ty niteraha’o o taneo vaho ty tane hoba, le fa ela bey ty naha Andrianagnahare azo sady tsy hisy fara’e.” (Salamo 90:1, 2) Izao ka ty nirehafe Isaia mpaminany: “Tsy fanta’o vao sa tsy rei’o? Andrianagnahare maharetse hatrake amy ty fotoagne tsy voafetra ty Jehovah, i Mpamorogne ty fara ty tane toỳ.” (Isaia 40:28) Rehafe ty taratasy i Joda ka fa nisy hatrake amy izay hatrake amy izay ty Andrianagnahare.​—Joda 25.

Atoro o andine’e reo fa “Mpanjaka nainai’e ” ty Andrianagnahare arake ty nirehafa i Paoly aze. (1 Timoty 1:17) Midika zay fa nisy avao ty Andrianagnahare hatrake amy ty fotoagne taka ty saintika sady mbe hisy avao amy ty hoavy. (Apokalypsy 1:8) Izay ty mampiambake i Andrianagnahare fara’e maherỳ.

Nagninogne ro mete ho sarotse amantikagne ty hahatakatse izay? Satria voafetra avao ty fotoagne iaignantikagne, le hafa ty fomba fahitantikagne fotoagne fa tsy mitovy amy ty ahy i Jehovah. Andrianagnahare nainai’e reke, le hoe andro raike avao ty arivo taogne tie ama’e. (2 Petera 3:8) Intoy misy ohatse: Maharetse roe volagne ty fotoagne iveloma ty valala fa beibey. Mete ho taka ty say i valalay vao tie 70 ndra 80 taogne ty fotoagne iaignantikagne? Tsy ho taka’e zay! Faie mirehake ty Baiboly fa hoe valala tikagne naho ampitoviegne amy i Mpamorogne bey Voninahitsey. Mihoatse lavitse ty saintikagne ty aze. (Isaia 40:22; 55:8, 9) Tsy mahagaga areke naho tsy taka ty say o ndatio ty raha ila’e miomba aze.

Mete ho sarotse dinehegne aloha i tihoey tie fa nisy avao ty Andrianagnahare sady hisy nainai’e. Faie mitombegne soa zay. Naho nisy namorogne ty Andrianagnahare, le ze namorogne aze ro toko’e ho natao tihoe tie Mpamorogne. Faie mirehake ty Baiboly fa i Jehovah ty “namboatse ze kila raha iaby.” (Apokalypsy 4:11) Haintikagne ka fa nisy fotoagne, mbe tsy nisy ze kila raha. (Genesisy 1:1, 2) Akore ty nampisy aze? Tsy maintsy ho nisy taloha izay areke i Mpamorogne azey. Fa nisy Reke taloha ty namorognagne ty raha manan-tsaigne, agnisa izay i Ana’e bako tokagney naho o anjelio. (Joba 38:4, 7; Kolosianina 1:15) Ireke raike avao ro fa nisy taloha bey tagne. Tsy nisy namorogne reke sady tsy nisy afake ho namorogne aze.

Itikagne naho ze kila raha iaby ty magnaporofo fa misy Andrianagnahare maharetse nainai’e. Tsy maintsy fa ho nisy avao i mampihetseke ze kila rahay, le i nanao ty lalàna mifehe azey. Ireke avao ty nahavita namorogne ze raha iaby.​—Joba 33:4. ▪