• TERAKE TAMY: 1941

• FIRENENA NIAVIA’E: BENIN

• FIAIGNA’E TALOHA: NANAMBALY EFATSE SADY TSY TEA O VAVOLOMBELO I JEHOVAH-O

TY FIAIGNAKO TALOHA:

Boake a Cotonou eto raho, rovabey i Bénin. Katolika zahay faie kindraike avao raho vaho niangogne. Fomba ty Katolika maro tama’ay atoy ty nanambaly maro, satria tsy rinara o lalànao io tie tamy izay. Nanambaly efatse areke raho.

Nigoreve o vahoakeo tamy 1970 tagne ho agne. Nihevetse areke raho fa hampandroso i firenenay zay, le nandeha nigoreve ka raho sady nanao politike. Nenjehe’ay o Vavolombelo i Jehovah-o satria tsy nanao politike. Niroahegne ty misionera iareo tamy 1976. Nitamà raho fa tsy hisy misionera hiheregne sasa ty eto.

TY NAGNOVÀ TY BAIBOLY TY FIAIGNAKO:

Tapetse i goreve natao o vahoakeoy tamy 1990. Tena gaga raho fa niheregne i misionera rey. Nieretseretse raho tie: ‘Kera ndra iran’Andrianagnahare retoagneo?’ Niova asa raho tamy izay, le nisy Vavolombelo i Jehovah niara-niasa amako. Le avy le nitory tamako reke. Natoro’e ahy amy Baiboly ao tie bey hatea naho manao ty rare’e ty Jehovah. (Deoteronomia 32:4; 1 Jaona 4:8) Nahaliagne ahy zay, le nanjare te hahafantatse i Jehovah raho. Nianatse Baiboly areke raho.

Nagnatreke ty fivoria o Vavolombelo i Jehovah-o raho tsy ela tafara izay. Gaga raho fa tena nifankatea iareo, sady tsy magnavakavake. Naho fa nifagnosehose elaela zahay, le treako fa tena mpanonjohy ty lia i Jesosy iareo.​—Jaona 13:35.

Fantako fa tsy maintsy miala tsy ho Katolika raho naho te hanompo i Jehovah. Sarotse tamako zay, satria natahotse ty reha o ndatio raho. Faie nampea i Jehovah raho, le nahavita niala avao naho fa niela ty ela.

Nisy raha hafa nila nataoko ka. Nianarako tie tsy mete ty manambaly maro, sady i valiko voaloha’ey avao ty toko’e hiarahako. (Genesisy 2:18-24; Matio 19:4-6) Nisoratse areke zahay. Nisaraheko i valiko hafa rey, faie nampeako mba tsy ho sahiragne ara-bola. Nanjare Vavolombelo i Jehovah ty roe naho fa tafara tatoy.

TY SOA NIRAMBESEKO:

Katolika i valikoy faie tsy sarote’e reke mahatrea ahy manompo i Jehovah. Sambe mahatsapa zahay fa nanjare nisoa fagnahy raho.

Nanao politike raho tie taloha satria nieretseretse tie hampandroso i firenekoy zay. Faie tsy nisy voka’e zay. Tsapako fa i Fanjakàn’Andrianagnaharey avao ty mahavoavaha ty olagne mahazo o ndatio. (Matio 6:9, 10) Misaotse i Jehovah raho satria nampea’e mba ho tena sambatse.

• TERAKE TAMY: 1977

• FIRENENA NIAVIA’E: BREZILY

• FIAIGNA’E TALOHA: PASITERA PATEKOTISTA

TY FIAIGNAKO TALOHA:

Nipetrake ta Itu, a São Paulo agne raho. Maro malaso ty amo o tanàgne iohoe ao.

Tena nimpiarotegne naho narengerenge raho. Nivarotse rongony ka raho. Faie nikezake niova raho naho fa tafara tatoy satria nahatsapa fa va’e hogadraegne ndra ho mate, naho izay avao ty ataoko. Nivavake tamo o Patekotistao agne raho, sady nanjare pasitera.

Nieretseretse raho tie tena hahavita hagnampe o ndatio naho manao izay. Nanao toriteny tamo o radio iaby aza raho, le nanjare marom-pahafantatse. Faie treako fa tsy le mikarakara ty mpivavake ama’e ao o Patekotistao, sady tsy tena mieretseretse ty hagnomey voninahitse an’Andrianagnahare. Ty hahazo vola avao ty paliave’e. Niala areke raho tamy ty fara’e.

TY NAGNOVÀ TY BAIBOLY TY FIAIGNAKO:

Naho vaho nianatse Baiboly tamy ty Vavolombelo i Jehovah raho, le treako fa tsy mitovy amy ty fivavahagne hafa iareo. Raha roe ty tena nahaveregne ahy. Tena tea an’Andrianagnahare naho tea o ndatio iareo, fa tsy tihoe mitory avao. Tsy manao politike ndra mandrambe anjara amy ty aly ka iareo. (Isaia 2:4) Rese lahatse areke raho fa nahatrea ty fivavahagne maregne, le i lalagne maifitse mandeha mbamy i havelogne nainai’e mbeoy.​—Matio 7:13, 14.

Faie nisy raha tena nila nataoko naho te hampifale an’Andrianagnahare raho. Vao mainke toko’e hikarakara o keleiakò naho hiambane raho. Ie aloha tsy mora tamako ty nanao izay, faie nivitako avao satria nampea i Jehovah raho. Tena nigaga ty valiko nahatrea ahy niova, le nanjare nazoto nianatse Baiboly, ie amy izao fa talohako reke ty nianatse. Sambe te hanjare Vavolombelo i Jehovah zahay tafara kede izay, le niarake natao badisa.

TY SOA NIRAMBESEKO:

Sambatse zahay keleiandraike ty amy izao. Ampea’ay hanjare ho nama i Jehovah ka i ana’ay telo rey. Misaotse i Jehovah raho satria natao’e ty hahavy ahy hahafantatse ty maregne amy ty Saontsi’e ao. Tena niova raho naho fa nianatse io. Magnova ndaty vata’e ty Baiboly.

• TERAKE TAMY: 1957

• FIRENENA NIAVIA’E: OSTRALIA

• FIAIGNA’E TALOHA: TENA NIJALE

TY FIAIGNAKO TALOHA:

Nipetrake ta Newcastle, a Nouvelle-Galles Atimo agne raho. Fito zahay troke raike, le iraho ty talé amy ty ampela’e. Mamo lava naho mpiarotegne ty baba’ay. Tena nasiake ka ty rene’ay sady nijera ahy. Tena natahotse raho satria nirehafe’e avao tie nao marengerenge zao, le ho agn’afobey agne.

Tena naratse raho isake tie tsinabotsabo’e, le tsy nianatse mateteke. Nasinta o fanjakagneo boake amy i rae aman-dreneko rey raho, tamy iraho ni-11 taogne. Napetrake tamy ty fikambanagne raike raho, le naho fa avy eo tamo o maserao agne. Faie nilay raho, tamy iraho ni-14 taogne, sady tsy noly fa niriorio ta Kings Cross, a Sidney agne.

Nanjare nifoke rongony, ninon-toake, nanao filma vetaveta, vaho nanao makorely raho. Nisy raha tena nampatahotse ahy zay tamy i hariva zay. Tamy ty lahilahy raike tompo i toeragne fandihizagney tao raho tamy izay. Nisy lahilahy roe zay nipay ahy. Nampihove iareo tamy ty efetse raike zay raho, le reiko ty reha iareo. Hivily ahy ty niavia iareo. Ho naeta iareo agnate sambo ao raho, sady ho ente’e a Japon agne mba hiasa amy ty bara. Le avy le nivoagne andavarangagne eo raho naho vaho naharey izay, sady nipay ndaty handrombake ahy.

Nahatrea lahilahy raike tagn’arabey egne zay raho. Ndaty sendra nandalo ta Sidney tao reke. Nitantaraeko tama’e ty raha nanjò ahy mba hahavy aze hagnomey ahy vola. Faie nampandena’e amy i tragno nivantagna’e zay raho, mba hihinagne agne sady hiandro. Le lia’e tsy nisarake zahay, le nifanambaly herentaogne tafara tatoy.

TY NAGNOVÀ TY BAIBOLY TY FIAIGNAKO:

Sady boseke raho ro fale tamy iraho vaho nanomboke nianatse Baiboly tamy ty Vavolombelo i Jehovah-y. Boseke raho satria izay vaho fantako tie i Satana ty mahavy o fijaleagneo. Nampianaregne ahy avao fa Andrianagnahare ty mampijale antikagne. Faie tena nifale ka raho, satria fantako fa kay ty Andrianagnahare tsy mampijale antikagne agn’afobey agne. Nampatahotse ahy avao ze raha zay tie taloha.

Gaga raho fa magnorike ty toroheve ty Baiboly avao o Vavolombelo i Jehovah-o naho fa mandrambe fanapahan-kevetse. Tena ampihare’e ze raha ianara’e. Iraho aloha tena mitangingigne faie tea ahy naho magnaja ahy avao iareo, ndra ino ndra ino ty raha nirehafeko naho nataoko.

Nahatsiaro tegna ho tsy misy dika’e raho, le io ty tena nimafe tamako. Tsy nimete niafake an-tsaiko ao io, ndra tie fa ela bey tafara ty badisako aza. Tea ahy ty Jehovah, faie nihevetse raho fa tsy ho tea ty ndaty manahake ahy reke.

Faie niova avao raho 15 taogne tafara ty badisako. Naho fa naharey lahajaka raike tamy ty fivoria ty Vavolombelo i Jehovah. Nirehafegne tamy izay ty Jakoba 1:23, 24. Rehafegne ao fa manahake o hetsorò ty Baiboly, sady ahatreavagne tie manao akore ty fivazohoa i Jehovah antikagne. Nanjare nieretseretse raho tie kera ndra hafa noho ty eretseretako aze ty fivazohoa’e ahy. Faie tsy nimete nagneke zay raho tamy ty voaloha’e. Mbe nihevetse avao raho fa tena tsy ho tea ahy reke.

Namaky ty Isaia 1:18 raho andro tsiampeampe tafara izay. Io ty tena nampisokake ty lohako. Hoe ty Jehovah ao: “Avia tikagne hifandamigne fa ndra tie mena bey aza ty fahota’areo, le hataoko foty bey.” Hoe nisaontsy tamako reke tie: “Avia tikagne Vicky mba hirehake! Fantako soa rehe. Fantako ty raha natao’o. Faie tena fantako ka fa tena manegnegne rehe. Matokia fa tena teako rehe!”

Tsy niazon-droro raho tamy ty hariva io. Mbe tsy nino raho tie tea ahy ty Jehovah. Faie nieretseretse ty miomba i solovoigne natao i Jesosỳ raho. Teo vaho nitsapako tie nanam-paharetagne amako ty Jehovah. Fa nateteke nampiseho amako reke tie tea ahy, faie hoe nirehake ama’e avao raho tie: ‘Tsy tea ahy rehe satria tsy bey hatea. Tsy mahavita magnavotse ahy ka i soro i Ana’oỳ, le ento agne fa tsy ilaeko.’ Faie nanjare tsapako fa tea ahy reke, naho fa boake nisaintsaigne ty miomba i solovoigney raho.

TY SOA NIRAMBESEKO:

Nanjare sambatse raho, sady tsy mihevetse sasa tie tsy misy dika’e. Vao mainke mifankatea zahay mirovaly, sady manjare mahay magnampe ndaty raho, satria fa maro ty raha nandalovako. Nanjare tena namako ka ty Jehovah.

• TERAKE TAMY: 1974

• FIRENENA NIAVIA’E: ROSIA

• FIAIGNA’E TALOHA: TEA ROCK MAVESATSE

TY FIAIGNAKO TALOHA:

Terake ta Votkinsk, toeragne niterahagne i Tchaïkovski, mpamorogne mozike malaza agne raho. Keleiagne mahantra zahay. Soa toetse ty baba’ay faie mamo lava, le tena nahasoregne ty fiaigna’ay an-tragno ao.

Tsy le nahay raho le nanjare nieretseretse tie donendra, fa tsy mba manahake o ndatio. Nivibìke raho fa tsy natoky ndaty. Tena tsy teako ty mandeha mianatse. Naho fa ampagnazavae i ramosé’aỳ hevetse raho, le tsy mahay, ndra tie hevetse tsotra aza, ie amy izao haiko i rahay amy ty fotoagne hafa. Izao ty nisorate o ramosé-eo miomba ahy indraike andro zay: “Tsy le mahay voambolagne fire sady tsy mahay magnazava ty heve’e.” Vao mainke kivy naho nahatsapa ho tsy nisy dika’e raho. Nieretseretse areke raho tie ino ty anto’e ivelomako.

Nanjare tena ninon-toake raho. Falefale raho naho fa boake ninogne. Faie nagnenjeke ahy ty eretsereko naho fa nimaro loatse ty toake ninomeko. Hoe raha tsy nisy dika’e zay ty fiaignako. Vao mainke kivy raho. Kindraike raho tena tsy miboake i tragnoy agnate ty andro maromaro, sady te hamono tegna.

Nitsanogne rock mavesatse raho tamy iraho ni-20 taogne, sady ninamagne tamy ty ajaja tea io. Nagnalava ty voloko raho, nagnisy kavigne, sady nitsikombe ty akanjo fagnisia o mpanao rock nahafinaritse ahikeo. Maivankivagne raho faie nitsiela avao zay. Nanjare tea jerajera naho nipay aly raho, le lava nialy tamy ty ndaty tan-tragno’ay ao.

Nihevetse raho tie ho falefale naho fa mitsanogne rock mavesatse, faie ndra tsy izay ty raha niseho. Tena niova ty toetseko. Tena niboseke ka raho naho fa naharey ty raha raty natao i mpihira teakoy.

Vao mainke tapa-kevetse ty hamono tegna raho. Faie tsy sahy ka raho naho fa niavy eo, satria fantako fa tsy ho zaka i rene’ay zay. Tena tea’e raho sady nagnampe ahy avao reke. Tsy hitako ty hatao. Tsy afake ty hamono tegna raho, faie tsy te ho velogne sasa ka.

Namaky boke raho satria teako hilamindamigne ty saiko. Nisy tantara o ndaty mpivavake nahavita raha miambake tamy ty boke raike nivakieko. Nanjare te hanompo an’Andrianagnahare naho hagnampe o ndatio raho. Nirehafeko taman’Andrianagnahare iaby ze raha tam-poko ato. Mbe liako naho nanao izay tie taloha. Nagnonteneako aze tie ino ty toko’e hataoko mba hahasambatse ahy. Gaga raho fa tena nanjare naivankivagne. Vao mainke tena gaga raho naho fa niavy eo satria nisy Vavolombelo i Jehovah niavy ty tamako teo, roe lera tafara izay, sady nandrisike ahy hianatse Baiboly. Niova ty fiaignako nanomboke teo. Nanjare sambatse raho.

TY NAGNOVÀ TY BAIBOLY TY FIAIGNAKO:

Nariako iaby ze kila raha mifandrambe amy ty rock, ndra tie nimafe tamako aza zay. Faie ela bey tafara atoy vaho nihalignoko ze hira haiko. Naho vaho mandriogne amy i toeragne mpandefa azey egne raho, le fa tadidiko ty fiaignako taloha. Tsy teako zay satria nagnelengelegne ty saiko, ie amy izao raho mba fa nianatse raha mahafinaritse. Tsy nandriondriogne amy i toeragne rey sasa areke raho. Nivavake mafe ka raho isake tie te hieretseretse ty raha taloha. Nahatsapa ty “fiadanan’Andrianagnahare ambone ze raha iaby taka ty say o ndatio” areke raho.​—Filipianina 4:7.

Nianarako tie mila mitory o Kristianao, faie nieretseretse raho fa tsy hahavita izay. (Matio 28:19, 20) Faie fantako fa mila mahafantatse ty maregne amy Baiboly ao ka o ndatio. Ty anto’e, iraho zao nanjare nilamin-tsaigne naho fale raho naho fa nianatse io. Nitory areke raho ndra tie natahotse aza. Tena gaga raho fa nanjare natoky tegna naho fa nanao aze. Nagnamafe ty finoako zay.

TY SOA NIRAMBESEKO:

Sambatse zao ty tokantragnoko. Fale ka raho fa nampianatse Baiboly ndaty maromaro, agnisa izay i rahavavekoy naho i reneko. Manjare tena sambatse raho satria manompo an’Andrianagnahare sady magnampe o ndatio hahafantatse aze.