1-2. Ino ty tafilitse amy tihoe tea i Jehovah, le akore ty fomba nagnoriha i Jesosy izay?

 “TEAVO ty Jehovah Andrianagnahare’o amy ty fo’o iaby, amy ty tegna’o iaby, amy ty heri’o iaby vaho amy ty sai’o iaby.” (Lioka 10:27) Nihay i Jesosy soa ty raha tena lahibey amy i Lalà i Mosesỳ ao. Mareho fa toko’e ho teaventikagne amy ty fo ty Jehovah. Tafilitse amy izay ty fagniriantika, ty fihetseham-pontikagne, vaho ty raha tsapantikagne. Toko’e ho teaventikagne amy ty tegnantikagne iaby naho ty herintikagne ka ty Jehovah. Faie toko’e ho teaventikagne amy ty saintikagne ka ty Jehovah. Tafilitse amy izay ty fiheverantikagne ty raha raike. Ie aloha tsy ho takantikagne amy ty fomba feno ty fomba fiheve i Jehovah iaby. Faie naho mianatse ty fomba “fisaigna i Kristy” tikagne, le hahatakatse soa ty fomba fiheven’Agnahare. Ty anto’e, nanahake tanterake ty fomba fiheve i Baba’e ty Jesosy.​—1 Kor. 2:16.

² Niteave i Jesosy tamy ty sai’e iaby ty Jehovah. Nifanta i Jesosy ty zoton’arofon’Agnahare miomba aze. Nitapa-kevetse ty hanao raha mifagnarake amy izay reke, ndra tie hampijale aze aza zay. Nifantoke amy ty fanoagne ty zoton’arofon-dRae’e ty Jesosy, le tsy nisy raha nenga’e hikalagne aze amy ze tanjogne zay.

3. Ino ty raha nianara i apostoly Petera tamy i Jesosy, le ino ty raha nirisihe i Petera hatao o Kristiana nama’eo? (1 Petera 4:1)

³ Nitahie’e ty Petera naho i apostoly ragne’e rey, satria afake nifagnosehose tamy i Jesosy naho nianatse ty fomba fiheve’e. Naho fa nanoratse ty taratasi’e voaloha’e ty Petera, le nandrisike o Kristianao mba hanagne toe-tsaigne manahake ty ahy i Kristy. a (Vakio ty 1 Petera 4:1.) Nampiasa rehake irehafagne  maramila minday fitaovam-pialiagne ty Petera naho fa nanoratse tihoe “anò ka ty hanagna’areo.” Naho managne ty toe-tsaigne ndra ty fomba fiheve i Jesosy areke o Kristianao, le hanagne fitaovagne matanjake hialiagne amo o tsy fahavoririhagneo naho ty tontolo fehe i Satana toy.​—2 Kor. 10:3-5; Efes. 6:12.

4. Ino ty hotrea ato mba hahavy antikagne hagnorike i toroheve i Peteray?

⁴ Hodinehentikagne ty fomba fiheve i Jesosy naho ty azontikagne anahafagne aze. Hotreantikagne boake amy io 1) ty azontikagne anahafagne ty fomba fiheve i Jehovah, satria izay ty hagnampe antikagne hiharo saigne, 2) ty hagnampe antikagne hiambane, naho 3) ty hagnampe antika hisaigne soa, zane hoe hiantehetse amy i Jehovah amy ty alala ty vavake.

TSIKOMBEO TY FOMBA FIHEVE I JEHOVAH

5. Ino ty raha natao i Petera ahatreavagne tie tsy nitovy fomba fihevetse tamy i Jehovah reke?

⁵ Nisy fotoagne ty Petera tsy nanagne ty fomba fiheve i Jehovah. Nirehake tamo o apostoli’e reo ty Jesosy tie, handeha a Jerosalema agne reke le hatolotse an-tagna o mpitarike fivavahagneo eo, hampijalejalegne, le ho vonoegne. (Mat. 16:21) Faie sarotse tamy i Petera ty nagneke tie, henga i Jehovah hovonoegne ty Jesosy, i fanantena o Israelioy naho i Mesia nampitamaegneỳ. (Mat. 16:16) Nente i Petera nitolake areke ty Jesosy, le hoe reke: “O Tompo, toko’e ho soa fagnahy amy ty vata’o rehe, le tsy toko’e henga’o hanjò azo ze raha zay!” (Mat. 16:22) Noho i Petera tsy nanagne ty fomba fiheve i Jehovah tamy io, le tsy nitovy hevetse iareo amy i Jesosy.

6. Akore ty nanoroa i Jesosy tie nitovy fomba fihevetse amy i Jehovah reke?

⁶ Tena nitovy fomba fihevetse amy i Rae’e an-dagnitse agney ty Jesosy. Hoe ty Jesosy tamy i Petera: “Mihova afarako ao rehe Satana! Ndra ihe ka ro manjare vato mamingagne alohako eo, satria tsy ty fomba fiheven’Agnahare ro eretserete’o fa ndra ty fomba fiheve o ndatio.” (Mat. 16:23, f.a.p.) Va’e nisoa ty anto’e nanoseke i Petera faie niliere i Jesosy i toroheve’ey. Trea boake amy izay, fa tsy ty hanoa i Jesosy ze hahametemete ty fiaigna’e ty zoton’arofo i Jehovah miomba aze. Faie nisy lesogne lahibey nianara i Petera tamy izay, le ty hitovy fomba fihevetse aman’Agnahare.

7. Akore ty nanoroa i Petera naho fa tafara tatoy tie nampifagnarake ty fomba fiheve’e tamy ty ahy i Jehovah reke? (Henteo i sarey.)

⁷ Naho fa tafara tatoy, le natoro i Petera tie nanagne ty fomba fiheve i Jehovah reke. Neké i Jehovah ho agnisa ty vahoa’e o hafa firenena tsy nitapakeo tamy izay. Nivoatendre mba hitory amy i Kornelio ty Petera. I Kornelio ty agnisa ty voaloha’e nanjare Kristiana amo o hafa firenenao. Zara’e naho nifandrambe tamo o hafa firenenao o Jiosio, le tsy nahagaga naho nila fagnampeagne ty Petera amy i fanendreagne azey. Faie naho fa nihai’e ty zoton’arofon’Agnahare miomba izay, le nagnova ty fomba fiheve’e reke. Voka’e, naho fa nampangalae i Kornelio reke, le “tsy nandietse” fa le avy le nandeha. (Asa. 10:28, 29) Nitory tamy i Kornelio naho ty keleia’e reke, le natao badisa iareo.​—Asa. 10:21-23, 34, 35, 44-48.

8. Akore ty azontikagne anoroagne tie mitovy fomba fihevetse amy i Jehovah tika? (1 Petera 3:8 naho fagnamarehagne ambane peje)

⁸ Taogne maro tafara tatoy, le nandrisike o Kristianao mba “hiharo saigne” ty Petera. (Vakio ty 1 Petera 3:8 naho fagnamarehagne ambane peje.) Amy ty maha vahoa i Jehovah antikagne, le afake mitsikombe ty fomba fiheve i Jehovah tikagne, sady miharo saigne satria izay ty rehafegne amy ty  Saontsi’e ao. Nandrisike o mpanonjohy ty lia’eo ohatse ty Jesosy, mba hanao voalohan-draha i Fanjakagney amy ty fiaigna’e. (Mat. 6:33) Noho izay, le va’e hisy mpitory amy ty fiangona’areo eo hanapa-kevetse ty hanao fanompoagne marain-tsy hariva. Toko’e hirehake raha soa miomba ze kezake natao’e zay naho hanohagne aze areke tikagne, ta tie handrisike aze mba ho soa fagnahy amy ty tegna’e.

MIKEZAHA HIAMBANE

9-10. Akore ty nanoroa i Jesosy tie tena miambane reke?

⁹ Nampianatse lesogne lahibey i Petera naho i apostoly ila’e rey miomba ty fiambaneagne ty Jesosy, tamy ty halegne taloha ty hamonoagne aze. Taloha io, le nagnirake i Petera naho i Jaona ty Jesosy, mba hagnomagne i toeragne hihinana iareo i hanegne hiaraha iareo mihinagne ama’e fara’ey. Va’e ho nagnomagne koveta naho serivieta ka iareo, amy izay voasasa ty tombo i ambahiny rey aloha ty hihinana’e. Faie ia ty hanao ze asa mitake fiambaneagne zay naho fa avy i fotoagney?

¹⁰ Natoro i Jesosy tie tena miambane reke, le tsy nisalasala reke ty nanao o asa iohoe. Nanao ty raha toko’e hatao ty mpanompo reke. Tena nitampoke i apostoli’e rey ze raha natao’e zay. Nafaha i Jesosy i akanjobei’ey, nadia’e ambania’e ey i serivietay, nasia’e rano i kovetay, le nisasa’e ty tombo iareo. (Jaona 13:4, 5) Va’e nitake fotoagne ty fanasagne ty tombo i apostoly 12 rey, agnisa izay ty Jodasy, i hifotetse azey. Faie niambane ty Jesosy, le nività’e hatrak’ampara’e zay. Le nagnazava hoe izao tamy iareo reke naho fa niavy eo: “Hai’areo vao ty anto’e nanasako i tombo’areoy? Inareo mitoka ahy tihoe ‘Mpagnanatse’ naho ‘Tompo’, le tsy diso zay satria toe izay vata’e raho. Faie ndra tie Tompo naho Mpagnanatse aza raho, le nanasa i tombo’areoy. Toko’e hifanasa tomboke ka areke nareo.”​—Jaona 13:12-14.

11. Akore ty nanoroa i Petera tie nianatse ty hiambane reke? (1 Petera 5:5) (Henteo ka i sarey.)

¹¹ Nianatse boake amy ty fiambanea i Jesosy ty Petera. Tafara ty nionjogna i Jesosy mban-dagnitse mbeo, le nagnasitragne lahilahy raike maleme tomboke boake an-tron-drene’e agne ty Petera. (Asa. 1:8, 9; 3:2, 6-8) Nahalatsa o ndatio i fahagagagney, hafarà’e nivory mbama’e mbeo o ndatio. (Asa. 3:11) Faie nirehareha vao ty Petera satria nibey tamy ty kolontsaigne magnambone tegna naho tea toeragne ambone? Oho’o, niambane reke fa tsy nitsiriry vatagne, le i Jehovah naho i Jesosy, i fagneva ty homeagne voninahitsey ty nimea’e voninahitse. Hoe reke: “Tamy ty agnara [i Jesosy] naho ty finoa’ay ty agnara’e, ro nampatanjake o lahilahy trea’areo naho fanta’areo iohoe.” (Asa. 3:12-16) Naho fa nandrisike o Kristianao mba hiambane ty Petera amy ty taratasi’e ao, le maniahy antikagne ty nandiagna i Jesosy i serivietay ambania’e ey naho ty nanasa’e i tombo i apostoly rey ty rehake nampiasae’e.​—Vakio ty 1 Petera 5:5.

12. Akore ty hahavy antikagne hiambane avao manahake i Petera?

¹² Afake mikezake ty hiambane manahake i Petera ka tikagne. Tadidio fa tsy amy ty raha rehafentikagne avao ty ahatreavagne ty tena fiambaneagne. Tafilitse amy i rehake tihoe “miambane” nampiasae i Peteray ka ty agnate ty saintikagne laleke agne, zane hoe ty fiheverantikagne ty tegnantika naho ty hafa.  Teantikagne ty Jehovah naho o ndatio, le izay ty mahavy antikagne manao raha soa hoahy ty hafa, fa tsy tihoe noho itikagne te ho tsiririegne. Akore ty anoroantikagne tie tena miambane tika? Manao izay tika naho manompo i Jehovah naho o rahalahy vaho o rahavaveo am-pifaleagne arake ze vitantikagne, ndra misy ndra tsy misy mahamareke ty kezake ataontikagne.​—Mat. 6:1-4.

MIKEZAHA ‘HISAIGNE SOA’

13. Ino ty tafilitse amy tihoe “misaigne soa”? Hazavao

¹³ Ino ty tafilitse amy tihoe “misaigne soa”? (1 Pet. 4:7) Manao ze azo’e atao mba handrambesagne fanapahan-kevetse mifagnarake amy ty fomba fiheve i Jehovah ty Kristiana raike misaigne soa. Tsapa’e tie ty fifandrambesagne amy i Jehovah ty raha tena lahibey amy ty fiaignagne. Mahay manahatsahatse amy ty fihevera’e ty tegna’e reke sady taka’e soa tie, tsy voatere ho hai’e iaby ze kila raha. Trea ka tie miantehetse aman’Agnahare reke, le miharine i Jehovah mateteke amy ty alala ty vavake am-piambaneagne. b

14. Ino ty mampiseho tie tsy niantehetse tamy i Jehovah ty Petera?

 ¹⁴ Tamy ty halegne fara’e taloha ty nimateza i Jesosy, le nampitao o mpiana’eo hoe izao reke: “Hienga ahy iaby nareo tie androany halegne noho ty raha hanjò ahy.” Tsy narikarike ty Petera ty namale tie: “Ndra tie hienga azo iaby iareo amy ty raha hanjò azo, iraho tsy ombia hienga azo zao!” Nanoro hevetse i mpiana’e ila’e rey hoe izao ty Jesosy tamo o halegne iohoe: “Miambena naho mivavaha lognandro.” (Mat. 26:31, 33, 41) Naho nagnorike ze torohevetse zay ty Petera, le va’e ho nisahy ty ho nampahafantatse tie mpiana i Jesosy reke. Faie ndra nandietse i Tompo’ey reke, le tena nanegnegne.​—Mat. 26:69-75.

15. Akore ty ahatreavagne tie nisaigne soa ty Jesosy tamy ty halegne fara’e taloha ty nimateza’e?

¹⁵ Tena niantehetse tamy i Jehovah ty Jesosy. Nivavake mateteke reke ndra tie voririke aza. Izay ty nagnampe aze hanagne herim-po hagnatanterake ty zoton’arofo i Jehovah miomba aze. (Mat. 26:39, 42, 44; Jaona 18:4, 5) Nisy voka’e tamy ty fiaigna i Petera, ty vavake mateteke natao i Jesosy tamy i halegne fara’ey.

16. Akore ty ahatreavagne tie nanjare nahay nisaigne soa ty Petera? (1 Petera 4:7)

¹⁶ Nanjare niantehetse tamy i Jehovah tamy ty alala ty vavake ty Petera. Tamy i Jesosy vinelogne tamy ty matey, le nagnomey toky i Petera naho i apostoly ila’e rey reke tie, hahazo  fagnahy masigne iareo mba hahavità iareo i asa fitoriagne nanendreagne iareoy. Faie nampandignase i Jesosy ta Jerosalema ao avao iareo amparake ty hiavia izay. (Lioka 24:49; Asa. 1:4, 5) Ino ty natao i Petera amy ireke mandigney? “Nivavake tsy nisy fitofa’e” reke naho i Kristiana ragne’e rey. (Asa. 1:13, 14) Naho fa nanoratse ty taratasi’e voaloha’e hoahy ty Kristiana nama’e ty Petera tafara tatoy, le nandrisike iareo mba hisaigne soa naho hiantehetse amy i Jehovah amy ty alala ty vavake. (Vakio ty 1 Petera 4:7.) Nianatse nitoky tamy i Jehovah ty Petera, le nanjare mpagnampe naho nagnatanjake o fiangonagneo.​—Gal. 2:9.

17. Ino ty mbe toko’e hataontikagne avao ndra tie fa managne fahaiagne aza tikagne? (Henteo ka i sarey.)

¹⁷ Tsy maintsy magnatogne i Jehovah mateteke amy ty alala ty vavake tikagne mba hahavy antikagne hisaigne soa. Tsapantikagne tie mbe mila mivavake amy i Jehovah avao tikagne, ndra tie managne fahaiagne aza. Vao mainke mila mangatake ty tari-dala i Jehovah tikagne naho fa handrambe fanapahan-kevetse lahibey. Matoky tika fa ireke ty mahafantatse ze mahasoa antikagne.

18. Akore ty hahavy ty fomba fiheventikagne hitovy amy ty ahy i Jehovah?

¹⁸ Tena fale tikagne fa namboare i Jehovah ho afake ty hanahake ty toetse’e. (Gen. 1:26) Mazava hoaze fa tsy afake hanahake tanterake i Jehovah tikagne. (Isaia 55:9) Faie manahake i Petera, le te hikezake ty hitovy fomba fihevetse aman’Agnahare ka tikagne, le hiambane lognandro sady hisaigne soa.