HOAHY TY TANORA
9: Mijoroa amy ty Heve’o
INO TY DIKA IZAY?
Tsy ty agnara’o ndra ty pozi’o avao ty mampiambake azo, fa ty fitsipike orihe’o naho ty raha inoa’o vaho ty toetse’o. Mijoro amy ty heve’o rehe naho managne ty maha ie azo fa tsy mora miovaova hevetse.
NAGNINO ZAY RO TENA ILAEGNE?
Hahavita hitagne ty heve’o rehe naho managne ty maha ie azo fa tsy hagnorike ze raha rehafe ty nama’o avao.
“Maro ty ndaty magnorike avao ze raha ampanoe ty hafa aze. Manahake o popetio! O ndatio ro mifily ty akanjo agnisia’e fa tsy ireke.”—Adrian.
“Tsy magneke ho taone o ajajao harengerenge raho ndra tie sarotse aza ty manao izay. Treako tie namagne soa ty ajaja raike naho ohatse tsy matahotahotse raho tie miarake ama’e satria fantako fa tsy hamoresé ahy hanao raty reke.”—Tatiana.
TORO LALA TY BAIBOLY: “Ko magneke hovolavolae ty tontolo toy sasa, fa miovà le havaozo ty sai’areo.”—Romanina 12:2.
INO TY AZO’O ATAO?
Fantaro ty raha hai’o, ty toetse soa’o, ty toetse rati’o naho ty raha inoa’o. Izay ty hahatreava’o tie, ndaty manao akore rehe hinane zao sady te hanjare manao akore.
Ty raha haiko naho ty toetse soako: Ino iaby ty talentako? Ino iaby ty toetse soako? (Ohatse: Magnaja fotoagne vao raho? Mahafehe tegna vao raho? Tea miasa vao raho? Matarike vao raho?) Ino iaby ty raha soa fa ataoko?
SOSO-KEVETSE: Agnonteneo ty baba’o ndra ty rene’o ndra ze nama’o atokisa’o naho tsy hai’o tie, ino ty toetse soa’o ndra ty raha hai’o.
TORO LALA TY BAIBOLY: “Faie ... toko’e handineke ty raha anoe’e ty ndaty tsikiraidraike, amy izay reke hahatrea fifaleagne amy ty raha atao’e, fa tsy amy ty fampitahagne ty tegna’e amy ty hafa.”—Galatianina 6:4.
Ty toetse ratiko: Ino iaby ty toetse toko’e hialako? Naho fa manao akore raho ro te hanao raty? Amy ty ino raho ro tena mila mifehe tegna?
TORO LALA TY BAIBOLY: “Naho manao tihoe tikagne tie: ‘Tsy manan-tahigne’, le mamita-tegna.”—1 Jaona 1:8.
Ty raha inoako: Ino ty raha fantako fa mete ndra tsy mete? Ino ty anto’e? Mino an’Andrianagnahare vao raho? Nagnino raho ro magneke fa tena misy reke? Ino ty raha treako fa tsy rare’e atao o ndatio? Ino ty anto’e? Ino ty inoako fa hiseho amy ty hoavy?
TORO LALA TY BAIBOLY: “Hiambegne azo ty fahaiagne misaigne, sady hiaro azo ty fahaiagne magnambake.”—Ohabolana 2:11.
Va'e ho Tea'o Ka
FAGNONTENEAGNE 10 MAHALIAGNE TY TANORA
Ndaty Manao Akore Raho Toy?
Ho vita’o ty hanapa-kevetse soa naho mahafantatse ty raha hai’o, ty talenta anagna’o, ty fahaleme’o naho ty tanjo’o rehe naho fa misy hanere azo hanao raty.
