Paul: Tena nifale zahay! Novambra 1985 ty tamy izay. Handeha a Liberia an’Afrika Atignanagne agne zahay tamy io. Tagne ty nanendreagne anay ho misionera voaloha’e. Nijanogne ta Senegale ao i rapolany nindreza’aỳ. Le hoe ty Anne: “Lera raike sisa, le avy a Liberia agne tika.” Nisy fitaliliagne hoe izao naho fa niavy eo: “Mila miakatse iaby ze handeha a Liberia agne. Misy goreve ty agne, le tsy afake ho mbeo tika.” Nitoboke tamy ty misionera ta Senegale ao zahay tagnate ty folo andro. Nirei’ay tamy ty vaovao tie, maro ty ndaty nimate tagne sady tsy nengà o fanjakagneo hiakatsakatse o ndatio naho fa hariva, fa ze manao izay le vonoegne.

Anne: Ndaty mitao zahay. Amparake ty naha ajaja ahy, le fa nivotro raho hafarako nipetaha o ndatio agnaragne. Ndra ty hanapake arabey aza, le fa nampatahotse ahike! Faie nitapa-kevetse handeha amy i fanendreagne anaỳ avao zahay, ndra tie nagnoho-doza aza zay.

Paul: Valo kilometatse miala i Angletera ty niterahagne anay amy i Anne. Niarake nanao mpisava lalagne zahay naho fa nahavita fianaragne, satria sambe nandrisike anay hanao izay ty rae aman-drene’ay. Tena nanohagne anay tamy ty fanompoagne marain-tsy hariva iareo. Nasaegne hanompo amy Betela ao raho naho fa ni-19 taogne, le niarake nanompo tao zahay amy i Anne tafara ty mariaze’ay tamy 1982.

Anne: Tea’ay ty Betela faie ty hanompo amy ze toeragne ilagne mpitory maro ty tena nirie’ay amparake izay. Vao mainke nihamafe ze fagniria’ay zay naho fa niara-niasa tamo o rahalahy naho o rahavave fa ni-misionera talohao zahay. Nivavake ty miomba izay zahay isan-kalegne tagnate ty telo taogne. Tena nifale areke zahay naho fa nasaegne hagnatreke ty Sekoly i Gileada kilasy faha-79 tamy 1985. Tinendre ta Liberia an’Afrika Atignanagne agne zahay.

Paul: Le avy le nandeha zahay naho fa nengagne handeha a Liberia agne amy izay o rapolanio. Tena natahotse o ndatio sady mbe tsy nengagne hiakatsakatse naho fa hariva. Naho misy tomabile magneno tampoke, le fa endrake iareo sady lomay. Niarake  namaky ampaha’e amy Salamo ao zahay mirovaly isan-kariva mba hahavy anay ho tony avao. Ndra tie tsy mora aza ty raha niseho tagne, le tena nitea’ay i fanendreagne anaỳ. Ni-misionera ty Anne fa iraho ni-Betelita niara-niasa tamy i John Charuk. a Fa ela reke ty nitoboke ta Liberia agne, le fanta’e soa ty raha sarotse atrehe ty mpiara-manompo agne. Maro ty raha nianarako boake ama’e.

Anne: Noho o rahalahy naho o rahavaveo ty nahavy anay le avy le nitamagne ta Liberia agne. Tena nitea anay iareo sady tsy nivalike. Nifandrambe bey zahay hafara’e nanjare hoe keleia’ay vaovao iareo. Nagnomey torohevetse soa sady nampahery anay ka iareo. Tena niambake ty fitoriagne tagne. Tsy tea ty ndaty agne naho tsiela avao ty irehafagne amy iareo! Ze omba’o, le ahatreava’o ndaty mirehake miomba o Baibolio. Tsy nisarotse tama’ay areke ty nanombo-drehake amy iareo. Nanagne fampianaragne Baiboly maro zahay, le tsy nimora ty nampianatse iareo iaby. Tena nahafinaritse ty tagne!

Paul: Nilamigne hey ty tamy i firenenay ao tagnate ty efatse taogne faie nisy vahoake nigoreve tamy 1989. Nifehe ty faritse nagnodidigne i Betela i mpigoreve rey tamy 2 Jolay 1990. Tsy afake nifandrambe tamy ty ndaty ivela i firenenay zahay tagnate ty telo volagne, agnisa izay ty keleia’ay naho i foibey. Aly avao ze omba’o, tsy ampe ty hanegne sady maro ka ty ampela nisy namahotse. Mbe nitohy avao ze raha rezay tagnate ty 14 taogne.

Anne: Ty foko ila’e nialy sady nifamono. Nahatreavagne ndaty mpigoreve nagnisy lamba hafahafa naho ninday fitaovam-pialiagne ze tane nombagne. Nizilike an-tragno ka iareo, le nalake ze raha tea iareo. Hoe “mamono akoho” ty mamono ndaty ty tamy ty ila’e amy iareo. Maro ty fate nidodoke narine i Betela tey. Nisy Vavolombelogne tsy nivalike ka nimate, agnisa izay ty misionera roe.

Ze ndaty agnisa ty foko heje i ndaty mpigoreve rey, le vonoe’e naho trea’e. Nanao sorogne ty fiai’e areke o rahalahio, le nagnetake ze mpiara-manompo boake amy i foko niheje iareoy. Nanao hoe izay ka o misionerao naho o Betelitao. Niheo amy i Betela ao ty Vavolombelogne ila’e tsy maintsy nilay. Niroro ambane etaze ao ty ila’e, fa ty ila’e niarake niroro ama’ay ambone etaze ao. Fito iareo ty tama’ay tao.

Paul: Nite hilitse amy Betela ao i mpigoreve rey isan’andro mba hagnente kera misy ndaty aeta’ay avao ty ao. Nisy ndaty efatse areke natao mpiambegne: Ty roe niheo ivela i vavahadỳ eo, le ty roe tan-dafinete eo nagnara-maso ty raha niseho. Naho natao i roe tam-bavahady eoy aloha iareo ao ty tagna  iareo, le midika zay tie tsy nisy olagne. Faie naho nibabe ty tagna’e iareo, le midika zay fa nisisike ty hilitse i ndaty mpigoreve rey. Tsy maintsy nilay tsiela i aze tan-dafinete eoy mba hagnetake i nama’ay rey.

Anne: Nisy fotoagne i ndaty mpigoreve rey tsy nivoakala i rahalahy rey. Nihily tan-dadosy ao zahay amy i ze rahavave raike zay. Nisy fisiagne entagne zay ty tao, le nisy toeragne kedekede azo nietahagne ty tagnate’e ao. Nietake tao areke i rahavavey. Niavy tambone etaze agne i ndaty mpigoreve rey sady ninday basy. Nidondogne iareo mafe i lalan-tragno’aỳ. Nikalagne iareo tsy hilitse ty Paul, le nirehake tie: “Mbe an-dadosy ao ty valiko.” Nagneno i raha nietaha i rahavavey naho fa nahily sady elaela vaho nivitako ty nagneregne i entagne rey tamy ty pilasi’e. Natahotse areke raho, le nititike iaby ty raha amako. Nila tony heike raho aloha ty hamoha i lalagney. Nivavake tamy i Jehovah areke raho tam-poko ao. Nisokafeko i lalagney, le nitony raho naho fa nanalama iareo. Nasio ty raike amy iareo raho, le nimbamy i fisiagne entagney mbeo reke sady namoha naho nisavasava aze. Tsy nisy ndaty nitrea’e ty tao. Nisava ty efetse hafa naho ty tambone plafond agne ka iareo amy i nama’e rey faie mbe tsy nahatrea avao ka.

Paul: Tsy nihinagne hanegne maraindraigne zahay mateteke, fa le fa i fotoam-pivavahagne maraindraigne amy i Betela aoy avao ty nihoe hane’ay. Nihai’ay tie hahavita hiaretse zahay isan’andro naho mamaky vaho mianatse Baiboly.

Tsy afake nipay hanegne naho rano zahay satria fanta’ay tie naho mandeha zahay, le va’e hisy hamono i nama’ay rey. Faie nagnomey ze raha nilae’ay avao ty Jehovah tamy ty fotoagne nila’ay izay. Nikarakara anay reke sady nagnampe anay ho tony avao.

Maregne fa nahakivy ty raha nisy faie nagnomey hery anay i hamaregnagney. Mateteke, le tsy maintsy nilay ty ankamaroa o mpiara-manompò mba hagnavotse ty fiai’e, faie nikezake hanagne finoagne matanjake avao iareo sady nitony ndra tie teo aza i raha sarotse rey. Nirehake ty ila’e tie, “nagnomagne iareo hiatreke i haoreagne lahibeỳ” i alỳ. Bey herim-po o androanavi-pagnahio naho o rahalahy tanorao, le nanao ze azo’e atao mba hagnampeagne o mpiara-manompò. Nifagnampe i rahalahy naho i rahavave nilay rey, le nitory tamy ze toeragne nilaisa iareo. Nampiasa ze raha nitrea iareo tagn’ala agne iareo mba hamboaragne Anjomba i Fanjakagney hivoria iareo. Tagnate o fotoan-tsarotse rehoe, le tena nagnomey raha tamaegne sady nampahery o mpiara-manompò ty nivory naho nitory. Naho fa nizara hanegne, akanjo naho raha hafa zahay, le kitapo findesegne mitory ty nangatahe o rahalahio fa tsy akanjo. Tena nampahery anay zay. Nitsanogne i talily soay iaby ze ndaty nalahelo naho natahotse tie tamy izay. Tena nahalatsa iareo ty nahatrea o Vavolombelo i Jehovah-o nifankatea naho nifale avao ndra tie tagnate i alỳ aza. (Mat. 5:14-16) Noho ty fahazotoa i rahalahy rey nitory, le nisy tamy i ndaty mpigoreve rey nanjare rahalahintikagne.

Paul: Tsy maintsy nienga i Liberia zahay kindraike. Intelo niala tao tagnate ty fotoagne fohe zahay, le nisy fotoagne ka indroe niala tao an-tao’e. Nisy rahavave misionera raike zay tena nahay soa ty raha nitsapa’ay naho fa nandeha zahay. Hoe reke: “Nampianaregne ho tea ty rahalahy naho ty rahavave amy ze toeragne anendreagne anay amy ty fo’ay zahay tamy i Sekoly i Gileaday, le izay vata’e ty natao’ay. Tena nalahelo areke zahay naho fa tsy maintsy nienga o rahalahio amo o fotoan-tsarotse iohoe.” Faie tsy lavitse i Liberia ty nifindrà’ay, le tena nifale zahay satria mbe afake nagnampe iareo avao tie tagne.

Anne: Niala i Liberia zahay tamy Mey 1996, le nindese’ay ty taratasy miomba ty asa tagne. Tomabile i Betela ty nandehana’ay, le efatse zahay tie tao. Nieretseretse ty handeha amy ze toeragne tsy atahoragne zay zahay. Enegne ambifolo kilometatse miala i Liberia ty misy o toeragne iohoe. Nieretseretse ty ho agne zahay faie nisy nanafike tan-dalagney. Nisy mpigoreve romotse rezay nampipoake basy sady nanakagne anay. Nakare iareo boake agnate tomabile ao ty telo tama’ay, le nindese iareo niarake amy i tomabiley ty Paul. Tena tsy hita’ay ty ho natao. Tampoke teo, le nitrea’ay niheregne boake agne ty Paul sady nandeha lio ty loha’e. Nieretseretse zahay tie nivoatifitse reke faie tonga saigne zahay naho fa niavy eo tie, tsy ho niafake nandeha reke naho nivoatifitse. Nikomondro aze ty raike amy i ndaty rey naho fa nanoseke aze hiakatse boake agnate tomabile ao. Faie soa fa naratse kedekede avao reke.

Nisy tomabile o maramilam-panjakagneo zay tsy lavitse teo fa handeha. Nanapa-kevetse ty hiarake amy i tomabiley zahay faie fa feno ndaty ty tao, hafara’ay nitsiraviravy avao. Fa ho nitonta iaby zahay satria nandeha mafe i soaferay. Nihalale tama’e zahay mba hijanogne faie tsy nitsanogne reke satria natahotse. Nitoly avao zahay faie tena nirokake naho fa niavy sady nititike iaby ty vata’ay.

Paul: Naloto zahay, niriadriatse ty akanjo’ay sady tsy nino zahay tie mbe nivelogne. Nisy helikopitera feno liam-bala zay ty tagnila’ay eo. Io ty hinday anay a Sierra Leone agne ty maray igne. Niroro eo areke zahay. Tena fale zahay fa nivotso-belogne faie ninekoneko miomba i mpiara-manompo rey avao ka.

Anne: Nitoly soa amy Betela a Freetown, a Sierra Leone agne zahay sady nikarakara anay soa o rahalahio. Faie tsy nimete niafake an-tsaiko ao i raha raty niseho ta Liberia agney. Lava natahotse avao raho isan’andro tie, kera hisy raha raty hiseho hafarako tsy nisaigne soa. Hoe nagninofy zay raho. Lava taitse avao raho naho fa halegne i androy sady natahotse tie, hisy raha raty hiseho. Tena tsy nimora zay. Namihigne ahy ty Paul sady niarake nivavake tamako. Nihira ty hira i Fanjakagney ka zahay amparake ty hahatony ahy. Natahotse raho tie hanjare minegne, le tsy ho afake ho misionera sasa.

Tsy ombia hohalignoko ty raha niseho tafara izay. Nahavoarae gazete roe rezay zahay tamo o heregnandro iohoe. Ty raike ama’e, Mifohaza! 8 Jona 1996 (malagasy). Nisy lahatsoratse hoe izao ty tao, “Fiatrehana Fihetsehan’ny Fahatsapana Horohoro.” Nanjare niazoko tie, nagnino raho ro natahotahotse. Ty faharoe, le ty Fitalakesan-davitse 15 Mey 1996 (malagasy) misy ty lahatsoratse tihoe “Aiza no Ahazoan’izy Ireo ny Heriny?” Nisy sare tandrato tapake elatse zay ty tao. Nihazavae i lahatsoratsey tie, afake mipay hanegne naho mitiligne avao o tandratò, ndra tie misy tapake aza ty ela’e. Hoe izay avao ka fa afake magnampe antika mba hagnampe ty hafa ty Jehovah, ndra tie mahatsiaro ho rerake aza tika noho ty raha nahazo antika. Hanegne ara-pagnahy niavy tamy ty fotoagne mete vata’e igne. (Mat. 24:45) Nipay lahatsoratse hafa mirehake miomba i raha tsapakoy ka raho, le navoriko raike. Naho fa nandeha ty fotoagne, le tsy nampijale ahy sasa i raha raty nitsiaroko rey.

Paul: Fale zahay naho fa niheregne a Liberia agne indraike. Niheregne tagne zahay tamy ty farampara ty taogne 2004. Feno 20 taogne teo ho eo tamy io ty nagnampea’ay ty rahalahy tagne naho atambatse. Fa nijanogne i alỳ. Nisy tetik’asa fagnoregnagne ty tamy sampagne ao faie tampoke teo, le nahazo fanendreagne vaovao zahay.

Tena nimafe tama’ay io. Tena nitea’ay o rahalahy naho o rahavave tagneo, le tsy nifoe’ay ty hienga iareo. Tsy nimora tama’ay ka ty nienga ty keleia’ay  tamy izahay hanao ty Sekoly Gileaday faie nitahy anay ty Jehovah. Natoky areke zahay fa hagnampe anay indraike ty Jehovah, le neké’ay i fanendreagne vaovaoy. Tinendre a Ghana agne zahay. Tsy lavitse i Liberia o firenena iohoe.

Anne: Nitagny zahay naho fa niala i Liberia. Tsy nampoize’ay ty raha nisaontsie ze rahalahy raike fa bey taogne atao tihoe Frank zay. Hoe reke: “Tsy maintsy halignove’areo zahay.” Le avy eo reke nagnazava tie: “Fanta’ay fa tsy ombia hohaligno’areo zahay faie tsy maintsy teave’areo amy ty fo’areo iaby ka ty rahalahy naho ty rahavave a Ghana agne. Fanendreagne boake amy i Jehovah io, le karakarao soa ty mpiara-manompo agne.” Nagnampe anay ho vognogne hiragnetse amy ty mpiara-manompo amy i tane tsy maro ndaty mahafantatse anay sady vaovao ama’aỳ i saontsi’ey.

Paul: Faie tsy ela avao le nanjare ninama’ay ty rahalahy naho ty rahavave ta Ghana tagne. Maro ty Vavolombelogne agne! Niana-draha maro boake amy ty tsy fivaliha i nama’ay vaovao rey naho ty finoagne matanjake nanagna iareo zahay. Nahazo fanendreagne hafa ka zahay tafara ty nanompoa’ay ta Ghana agne tagnate ty 13 taogne. Voatendre hanompo amy ty sampa i Afrika Atignanagne, a Kenya agne zahay. Ndra tie nimanigne ty nama’ay ta Ghana naho ta Liberia agne aza zahay, le tsy ela avao le nanjare mpiragnetse tamy ty mpiara-manompo ta Kenya agne ka. Mbe maro ty asa mila atao a Kenya eto manahake ty ta Ghana naho ta Liberia agne avao ka.

Anne: Niatreke raha sarotse maro raho tamy ty fiaignako, le nisy fotoagne natahotse. Misy voka’e amy ty fahasalamantika naho ty fihetseham-pontika ty raha magnoho-doza ndra mahakivy iaignantikagne. Faie tsy mitamà tikagne tie, hiaro antika amo o raha reo ty Jehovah. Amy izao, ndra tie maharey basy mipoake avao raho, le avy le magnoritoke ty troko sady maleme iaby ty tagnako. Niantehetse amy ty raha nimea i Jehovah mba hagnatanjahagne anay raho, agnisa izay ty fanohagna o rahalahy naho o rahavaveo. Nitreako ka fa noho izahay nanagne fahazaragne soa ara-pagnahy, le nagnampe anay hijanogne amy i fanendreagne anaỳ avao ty Jehovah.

Paul: Kindraike o ndatio magnontane anay tie: “Tea’areo vao ty fanendreagne anareo?” Va’e hahatamagne ty firenena raike faie misy fotoagne va’e hikorontagne naho hagnoho-doza avao ka. Faie o rahalahy naho o rahavave sarobilio ty tea’ay mandikoatse o firenenao satria keleia’ay iareo. Ndra tie sambe hafa aza ty fiaviantikagne, le sambe manompo i Jehovah iaby tika. Nieretseretse zahay tie nalefa atoy mba hagnatanjake iareo, faie naho ty maregne, le iareo ro nagnatanjake anay.

Mahagaga fa ze tane omba’ay, le lava misy keleia’ay avao. Hafara’ay mahatsapa hoe ama’ay agne avao. Tena matoky tika fa naho miantehetse amy i Jehovah lognandro, le hagnatanjake antikagne reke mba hahavitantika hiaretse ze raha miseho.​—Fil. 4:13.