1. Inogne ty zoton’arofo i Jehovah amy izao?

 TY HITORIAGNE ty talily soa miomba i Fanjakagney magneran-tane ty zoton’arofon’Andrianagnahare amy izao. (Mar. 13:10; 1 Tim. 2:3, 4) Asa i Jehovah io, sady tena lahibey ama’e. Izay ty nahavy aze nanendre i Ana-dahi’e ikokoa’ey mba hitarike o asa iohoe. Afake matoky areke tikagne fa ho vitantika arake ty fomba iteava i Jehovah aze i asa fitoriagney aloha ty hiavia ty fara’e, satria mahay i mpitarike antikagney.​—Mat. 24:14.

2. Inogne ty hodinehentikagne ato?

² Hotreantika amy ty lahatsoratse toy tie akore ty ampiasae i Jesosy o “mpanompo mahihitse naho mahimbagneo” mba hagnomey hanegne ara-pagnahy o vahoa’eo naho mba handamigne o mpanonjohy ty lia’eo hanao i asa fitoriagne lahibey mbe tsy nisy nitovy ama’ey. (Mat. 24:45) Hotreantika ato ka ty raha azontika tsikiraidraike atao mba hanohagnagne i Jesosy naho o mpanompo mahihitseo.

3. Inogne ty fahefàgne nimeigne i Jesosy?

³ I Jesosy ty mitarike i asa fitoriagney. Nagnino tika ro mirehake izay? Taloha kede ty nandehana i Jesosy an-dagnitse agne, le nifanao fotoagne tamy ty ila’e amy i mpiana’e tsy nivalike rey tamy ty vohy i Galilia agne reke. Le hoe reke tamy iareo tamy izay: “Fa nimeigne ahy iaby ze fahefàgne an-dagnitse agne naho an-tane etoy.” Mareho amy izay ty raha nirehafe’e magnarake toy: “Mandehana areke, le ampianaro ze ndaty amy ty tane toy iaby.” (Mat. 28:18, 19) Agnisa ty fahefàgne nimeigne i Jesosy areke ty hitarike ty asa fitoriagne.

4. Nagnino tika ro afake matoky fa mbe magnaramaso i asa fitoriagney ty Jesosy amy izao?

⁴ Nirehafe i Jesosy fa hatao “amy ty firenena iaby” ty asa fitoriagne naho ty asa fampianaragne, sady hiarake amy i mpiana’e  rey avao reke “isan’andro, amparake ty hiavia ty fara ty tontolo toy.” (Mat. 28:20) Trea mazava boake amo o rehake rehoe fa nagnaramaso i asa fitoriagney avao ty Jesosy nanomboke tamy izay hatrake amy izao.

5. Nagnino tika ro mirehake tie mandrambe anjara amy ty fahatanteraha ty Salamo 110:3?

⁵ Tsy ninekoneko ty Jesosy tie kera tsy ho ampe ty ndaty hanao i asa fitoriagney agnate i vanim-potoagne aloha ty hiavia ty fara ty tontolo toỳ. Ty anto’e, nihay i Jesosy fa tsy maintsy ho tanterake ty raha nirehafe ty mpanao salamo raike toy. Hoe reke: “Hanolo-tegna an-tsitrapo o vahoa’ò amy ty andro anafiha ty tafi’o.” (Sal. 110:3) Naho mandrambe anjara amy i asa fitoriagney rehe, le manohagne i Jesosy naho o mpanompo mahihitseo sady mandrambe anjara amy ty fahatanteraha o faminaniagne iohoe. Mandroso o asa iohoe, faie tsy midika zay tie tsy misy ty olagne.

6. Inogne ty agnisa ty raha sarotse atrehe o mpitory i Fanjakagneio amy izao?

⁶ Agnisa ty olagne raike atrehe o mpitory i Fanjakagneio zao o fagnenjehagneo. Mirehake raha tsy maregne miomba ty asantikagne o mpivali-pinoagneo, o mpitarike fivavahagneo, naho o mpanao politikeo. Naho mino i vande rey ty longontikagne naho ty ndaty haintikagne vaho ty mpiara-miasa amantikagne, le va’e ho seré iareo tsy hanompo i Jehovah sasa naho tsy hitory sasa tikagne. Amy ty tane ila’e agne, le magnorohoro naho manafike vaho mitsepake o rahalahintikagneo o fahavalontikagne rehoe. Ty ila’e aza gadrà iareo. Faie tsy tampoke antika ze raha zay, satria izao ty raha fa nirehafe i Jesosy: “Ho heje ze kila ndaty nareo noho ty agnarako.” (Mat. 24:9) Ty falaigna o ndaty rehoe antika le porofo tie ankasitraha i Jehovah tika. (Mat. 5:11, 12) I Devoly ty amboho o fagnenjehagneo ao. Faie mahery ambone’e ty Jesosy. Noho ty fagnampea i Jesosy, le vitantika ty mitory i talily soay amy ty firenena iaby. Andao hagnente porofo.

7. Nagnino rehe ro rese lahatse fa tanterake amy izao ty Apokalypsy 14:6, 7?

⁷ Olagne hafa atrehentika mpitory ka ty tsy fitovia o firehakeo. Amy i fahitagne niazo i apostoly Jaonay ao ty Jesosy, le nirehake mialoha tie ho vitantikagne ty handrese o olagne iohoe amo o androntika zao. (Vakio ty Apokalypsy 14:6, 7.) Amy ty fomba akore? Manao ze azontika atao tikagne mba ho fara izay ty maro ty ndaty liagne amy ty hafatse miomba i Fanjakagney. Amy izao ohatse, le ndaty maro magneran-tane ro afake mamaky fagnazavagne ara-baiboly amy ty tragnom-porarontikagne jw.org ao, satria misy amy ty firehake 1000 mahery i raha rey tie ao. Neké ty Filan-keve-pitantanagne ty handikagne amy ty firehake mihoatse ty 700 i fitaovagne lahibey ampiasaentika hanoagne ty asa fampianaragney, le ty boke tihoe Ankamamio Nainai’e o Fiaignagneo! Eo ka ty raha nalaem-peo naho ty video vaho ty fitaovagne amy ty soratse Braille mba hahavy o ndaty karegnegneo naho o goao hahazo hanegne ara-pagnahy. Treantika amy ireo fa le vata’e tanterake i faminaniagney. Mianatse i ‘firehake malioy’ ty ndaty boake amy ty firehake sambe hafa magneran-tane. (Zak. 8:23; Zef. 3:9) Tsy ho nivita o raha rehoe naho tsy teo ty Jesosy Kristy, i mpitarike mahaỳ.

8. Ino ty voka o asa fitoriagne ataontikagneo amo o ndatio?

⁸ Misy ndaty mahery ty 8 000 000 amy ty tane 240 ty agnisa ty fandamina i Jehovah amy izao, le an-ketse’e isan-taogne ty ndaty atao badisa. Faie tsy ty isa iareo ro tena lahibey, fa ty toetse kristiana, ndra ty “toetse vaovao” anagna o mpiana i Jesosy vaovao rehoe. (Kol. 3:8-10) Maro amy iareo ty niraty findesam-batagne, nitea aly, nagnavakavake naho nihevetse ty firenena nisy aze ho ambone noho ty ahy ty  hafa, faie fa tsy hoe izay sasa iareo tie amy izao. Tanterake i faminaniagne amy Isaia 2:4 ao tihoey tie ‘tsy hianatse aly sasa’ iareo. Mahavy o ndatio hagnatogne i fandaminagne ty fikezahantikagne mafe hiakanjo i toetse vaovaoy, sady atorontikagne amy izay ka tie magnorike ty raha rehafe i Kristy Jesosy i mpitarike antikagney tika. (Jaona 13:35; 1 Pet. 2:12) Tsy kisendrasendra avao o raha rehoe. Noho i Jesosy magnampe antika ty anto’e ahavitantikagne ireo.

9. Inogne ty raha nirehafe i Jesosy fa hiseho amy ty fotoa ty fara’e, arake ty Matio 24:45-47?

⁹ Vakio ty Matio 24:45-47. Nirehafe i Jesosy mialoha tie hanendre “mpanompo mahihitse naho mahimbagne” reke amy ty andro fara’e mba hagnomey hanegne ara-pagnahy o vahoa’eo. Fa ampoizentika areke tie hiasa mafe o mpanompo iohoe amo o androntikagne zao. Magnamaregne izay toy. Nampiasa lahilahy voahosotse tsiampeampe i mpitarike antikagney mba hagnomey hanegne ara-pagnahy “amy ty fotoagne mete” o vahoa i Jehovah-o naho o ndaty liagne amy ty hamarenagneo. Tsy mihevetse ty vata’e ho tompo ty finoa ty hafa o lahilahy rehoe. (2 Kor. 1:24) Iareo aza magneke fa i Jesosy Kristy ro “mpitarike naho mpitondra” o vahoa’eo.​—Isaia 55:4.

10. Inogne amy i boke atoro amy i sarey eo rey ty nandrese lahatse azo handeha mbamy i lalagne mbamy i havelogne nainai’e mbeoy?

¹⁰ Nanomboke tamy 1919 o mpanompo mahihitseo ro nampiboake fitaovagne sambe karaza’e mba hahafaha o ndaty liagneo hianatse ty hamarenagne amy ty Saontsin’Andrianagnahare ao. Tamy 1921 ohatse le nampiboake ty boke tihoe Ty Harpan’Andrianagnahare o mpanompo mahihitseo mba hagnampeagne o ndaty liagneo hahay ty hamarenagne fototse amy ty Baiboly ao. Nisy boke hafa ka naboake naho fa nandeha ty fotoagne. Ty aia amy ty fitaovagne retoa ty nagnampe azo hahafantatse naho ho tea i Raentika  an-dagnitse agney? Ty boke tihoe “Hotrea fa Maregne ty Andrianagnahare” (angilé) vao? Sa I Hamarenagne Mitarike amy i Lalagne Mbamy i Havelogne Nainai’ey Mbeoy (angilé)? Sa ty boke tihoe Azonao Atao ny Hiaina Mandrakizay ao Amin’ny Paradisa eto An-tany? Sa ty Fahalalana Izay Mitarika ho Amin’ny Fiainana Mandrakizay? Sa ty boke tihoe Inogne Vata’e ty Raha Ampianare ty Baiboly? Sa ty boke tihoe Inogne ty Ampianare ty Baiboly Antikagne? Sa i fitaovantikagne vaovao manao tihoey tie Ankamamio Nainai’e o Fiaignagneo!? Natao mba hagnampeagne antika hanao o mpianatse o fitaovagne rehoe, sady tena amy ty fotoagne nipaliantikagne aze ty niboaha’e.

11. Nagnino tika iaby ro mila mihinagne venten-kanegne ara-pagnahy?

¹¹ Faie tsy o ndaty liagne amy ty hamarenagneo avao ro mila managne fahalalagne laleke miomba i Jehovah naho ty Baiboly fa itika iaby. Hoe ty apostoly Paoly: “Faie ty venten-kanegne, le hoahy ty ndaty matotse.” Nirehake ka ty Paoly tie ze karazan-kanegne ara-pagnahy zay le hagnampe antika “hahay hagnambake ty soa naho ty raty.” (Heb. 5:14) Tena sarotse ty magnorike ty fitsipy i Jehovah amy izao, satria tsy midare izay ty ankamaroa o ndatio. Fa hay i Jesosy ze raha zay, le atao’e azo antoke tie mahazo ty hery ilaentikagne boake amy i hanegne ara-pagnahy meagne antikagne rey tika. Ty Saontsin’Agnahare ndra ty Baiboly ty foto o hanegne ara-pagnahy rehoe. Le o mpanompo mahihitseo ty mikarakara naho mizara o hanegne ara-pagnahy iohoe, ambane ty fitariha i Jesosy.

12. Akore ty nagnomeantikagne voninahitse i tahinan’Andrianagnaharey manahake ty natao i Jesosy?

¹² Magnomey engegne ty tahinan’Agnahare manahake i Jesosy tika. (Jaona 17:6, 26) Tamy 1931 ohatse le nandrambe i agnaragne amy Soratse Masigne ao tihoe Vavolombelo i Jehovah-y tika. Ty fanoantikagne izay le nampiseho tie lahibey amantika i tahinan’Agnaharey,  sady teantika naho tognonegne amo o tahinan-dRaentikagne iohoe tikagne. (Isaia 43:10-12) Nanomboke tamy Oktobra 1931 ka, le nisiagne o tahinan’Agnahare iohoe ty fogno ty gazete toy. Fagnampe izay, le naheregne tamy ty pilasy toko’e hisy aze ty tahinan’Andrianagnahare amy ty Soratse Masigne Dikan-drehake Tontolo Vaovao ao. Tsy hoe izay ty raha natao o fivavahagne mirehake ty vata’e ho Kristianao, satria nafaha iareo amy ze Baiboly nadika iareo ao i tahinagne tihoe Jehovah-y.

13. Nagnino rehe ro rese lahatse fa mampiasa o “mpanompo mahihitse naho mahimbagneo” ty Jesosy amy izao? (Jaona 6:68)

¹³ Nandamigne o mpanonjohy ty lia’eo agnate ty fandaminagne raike miambake ambone tane eto amy ty alala o “mpanompo mahihitse naho mahimbagneo” ty Jesosy amo o androntika zao mba hanao fanompoam-pivavahagne maregne. Ino ty tsapa’o miomba o fandaminagne iohoe? Naho fa hamale io rehe, le va’e ho avy an-tsai’o ao ty reha i apostoly Petera tamy i Jesosy toy. Hoe reke: “O Tompo, ho amy ia agne moa zahay? Ty rehake rehafe’o ro hahazoagne i havelogne nainai’ey.” (Jaona 6:68) Ho taia koahe ty nisy antika naho tsy nizilike tamy ty fandamina i Jehovah toy ato? Amy ty alala io ty agnomea i Kristy antika hanegne ara-pagnahy. Ampiofagne’e ka tika amy izay afake magnatanterake soa ty fanompoantika. Ankoatse izay, le ampea’e tika mba hiakanjo i “toetse vaovaoy”, amy izay hampifale i Jehovah ty fomba fiaignantikagne.​—Efes. 4:24.

14. Ino ty soa niazo’o tagnate ty arete-manjamagne COVID-19 toy noho irehe agnisa ty fandamina i Jehovah?

¹⁴ Magnomey tari-dalagne feno hilala ty Jesosy naho fa misy raha sarotse. Trea zay naho henteagne ty raha nisy naho fa nanomboke niparitake i COVID-19-y. Ty ankamaroa ty ndaty tamy  ty tontolo toy eto zao nisalasala tie ino ty raha hatao naho fa niavy i aretegney. Faie itika natao i Jesosy azo antoke tie mahazo tari-dalagne mazava soa mba hiarovagne ty fiaignantikagne. Nirisihegne zao tika mba hanao arovava naho orogne naho fa miboake sady hagnaja elagnelagne ka. Nitiahivegne o androanavi-pagnahio mba hifandrambe tsy tapake amo o fiangonagneo naho hamantatse ty raha paliae iareo ara-nofo naho ara-pagnahy. (Isaia 32:1, 2) Nahazo tari-dalagne fagnampe’e naho fampaherezagne boake amy i video Vaovao Fara’e Boake amy i Filan-keve-pitantanagney ka tika.

15. Ino ty tari-dalagne nimeigne antika miomba ty fivoriagne naho ty asa fitoriagne tagnate ty arete-manjamagne toy, le ino ty nivoka’e?

¹⁵ Nahazo tari-dalagne mazava soa miomba ty toko’e hanoagne fivoria ty fiangonagne naho ty asa fitoriagne tika tagnate ty arete-manjamagne toy. Tsy ela tafara ty nisia i aretegney ohatse, le fa nanomboke nagnatreke fivoriagne, havoriambey faritse naho vondrom-paritse tamy ty alala ty vidéoconference tika. Nanomboke nitory an-taratasy naho an-telefony ka ty ankamaroantikagne. Nitahie i Jehovah vao ty kezake nataontika? Ie. Maro ty sampagne nirehake tie tena nihamaro ty isa ty mpitory amy iareo agne. Maro amo o mpitorio ka ty managne fitantaragne mampahery tagnate i aretegney.​—Henteo ty efajoro tihoe “ Mitahy ty Asa Fitoriagne Ataontika ty Jehovah.”

16. Ino ty raha azontikagne atokisagne?

¹⁶ Misy ndaty va’e hieretseretse tie mitao loatse ty fandaminagne amy ty arete-manjamagne toy. Faie naho fa mandeha ty fotoagne, le trea tie tena mete soa i tari-dalagne nimeigne antika rey. (Mat. 11:19) Naho fa misaintsaigne ty fomba itariha i Jesosy o vahoa’eo tika le trea tie bey hatea reke. Mahavy antika hatoky zay tie ndra inogn’ino raha va’e hiseho hamaray, le tsy hienga antika ty Jehovah naho i Ana-dahi’e ikokoa’ey.​—Vakio ty Hebreo 13:5, 6.

17. Inogne ty tsapa’o noho ihe agnisa i fandaminagne tarihe i Jesosỳ?

¹⁷ Tena fale tika managne i Jesosy ho mpitarike antikagne. Tsy voazarazara ty kolontsaigne, ty firenena, naho ty firehake sambe hafa ty fandaminagne misy antikagne toy. Mahazo hanegne ara-pagnahy tsiefa tika sady ampe fitaovagne hanoagne ty asa fitoriagne. Ankoatse izay, le ampianaregne mba hiakanjo i toetse vaovaoy tika, sady mikezake ty hifankatea ka. Le vata’e maro ty anto’e toko’e hireharehantikagne amy i mpitarike antikagney, le i Jesosy.