Tafara ty 1920 ty babako naho i reneko ro nianatse ty hamarenagne. Mbe tsy nivaly iareo tamy izay. Tamy 1939 ty niterahagne ahy. Nipetrake ta Angletera agne zahay tamy izahay mbe nikede. Niarake tamy ry babako nandeha nivory avao raho, le tafara tatoy raho nandrambe anjara tamy ty Sekoly ty Fanompoagne. Tsy halignoko iraho nanao anjara voaloha’e zay. Enen-taogne raho tamy izay. Tsy maintsy nitsangagne tambone ze borotse zay eo areke raho satria takona i pilopitray fa mbe nikedekede. Tena natahotse raho tamy izay, satria ndaty fa bey iaby ty nagnente ahy.

Tamy izaho nivalo taogne ty nitory voaloha’e. Nisorate i babako tamy ty taratasy ty raha horehafeko, le igne ty ampamakieko o ndatio. Tena fale raho naho fa namaky i taratasỳ i ndaty nitoriako zay sady le avy le nagneke naho fa nimeiko ty boke tihoe ‘Toko’e ho Fantatse tie i Andrianagnahare ro Maregne’ (angilé). Le nilay mbamy i babako mbeo raho sady nitantaraeko tama’e zay. Nahavy ahy ho falefale avao ty fanompoagne naho ty fagnatrehagne fivoriagne sady nagnampe ahy hagniry hanompo i Jehovah marain-tsy hariva.

Vao mainke nitombo ty hateako ty hamarenagne naho fa nagnafara i babako Fitalakesan-davitse raho. Le avy le nivakieko ze Fitalakesan-davitse niavy. Fa tsy niligneko aza ty niavia ty magnarake. Ty voka’e, nitombo ty fatokisako i Jehovah, le nagniry hanokan-tegna ho aze raho.

Namonje havoriambey ta New York agne zahay amy ry babako tamy 1950. Izao ty nifoto-keve o havoriambey iohoe: “Fitomboa ty Asan’Andrianagnahare.” Le “Andro o Misionerao” ty foto-kevetse tamy ty andro Kamisy o havoriambey iohoe. I Rahalahy Carey Barber, niagnisa ty Filan-keve-pitantanagne ty nanao lahajaka ty badisa tamo o andro iohoe. Naho fa nivita i lahajaka’ey, le nametrake i fagnonteneagne roey apetrake amo o ndaty atao badisaoy  reke. Le agnisa ty nitsangagne raho sady namale tie: “Eka!” Mbe ni-11 taogne raho tamy izay, faie nitakako tie dingagne lahibey o nataoko iohoe. Natahotse raho naho fa nandeha mbamy i piscine-y mbeo, satria tsy mahay milaogne raho. Le niarake tamako ty dadatoako sady nirehake tamako tie: “Ao fa tsy raha magnahy izao io.” Mbe tsy niavy amy fara’e ambane amy i piscine-y agne raho, le fa nilipotse. Roe ty rahalahy nitagne ahy tamy izay, faie ty raike amy iareo avao ty nandipotse ahike. Andro lahibey ho ahy o andro nanoagne badisa ahike tamy 3 Aogositra 1950 iohoe. Nanomboke tamy izay, le natao i Jehovah avao ze hahatomombagne ty fiaignako.

Te ho nanao mpisava lalagne raho naho fa niafake baka. Faie nandrisike ahy hianatse amy i oniversitey ey i ramose nampianatse ahy rey. Tsy nahatohetse iareo raho, le hafarako nandeha nianatse tamy oniversite egne avao. Faie nitakako tsiela tafara izay tie tsy ho vitako ty hagnorike ty hamarenagne ro sady hifantoke amy i fianarakoy. Nanapa-kevetse areke raho fa hijanogne. Nivavake tamy i Jehovah miomba izay raho, le naho fa avy eo nanoratse taratasy tamy i ramoseko rey. Nihazavaeko tao ty anto’e nahavy ahy hijanogne tsy hianatse sasa. Le nijanogne raho naho fa nitapetse o taogne iohoe. Nitoky tamy i Jehovah raho, le avy le nanao mpisava lalagne tafara izay.

Ta Wellingborough agne ty nanoako fanompoagne marain-tsy hariva voaloha’e tamy Jolay 1957. Nagnontane ty rahalahy tamy i Betela i Londres tagne raho tie: ‘Kera misy mpisava lalagne fa za-draha afake ho namako?’ Le i rahalahy Bert Vaisey ty niarake tamako tagne tamy izay. Tena mafana fo reke sady nagnampe ahy mba hahay handamigne ty fotoako. Nisy valo ty isa’ay tamy i fiangonagney teo: Enegne ty rahavave, le izaho naho i Vaisey ty rahalahy. Tena nagnampe ahy hatoky i Jehovah ty fagnomanako naho fagnatrehako fivoriagne sady nanjare nanagne fahafahagne hagnomey toin-drehake ka raho.

Tsy nimete hanao maramila raho, le nigadraegne tagnate ty fotoagne kedekede. Tafara izay raho, le nifankatrea tamy i Barbara. Mpisava lalagne manokagne reke. Nivaly zahay tamy 1959. Nivognogne avao zahay ndra aia ndra aia toeragne anendreagne anay. Ta Lancashire, avaratse ahandrefa i Angletera agne ty nanendreagne anay voaloha’e. Ie tamy 1961, le nasaegne hagnatreke ty Sekoly ty Fanompoagne i Fanjakagney ta Betela i Londres tao tagnate ty vola’e raike zahay. Tsy nampoizeko fa tinendre ho mpiandraikitse faritse raho naho fa nivita i sekolỳ. Le niofagne niarake tamy i mpiandraikitse faritse fa za-draha rey zay tamy ty tanà i Birmingham agne tagnate ty roe heregnandro raho. Niarake tamako tagne ka ty Barbara tamy izay. Nitilike fiangonagne ta Lancashire naho ta Cheshire tagne zahay tafara izay.

Nahazo taratasy boake amy i Sampagne zahay tamy izahay nanao vakansy tamy Aogositra 1962. Naho fa nisokafe’ay i valope nisy azey, le nitrea’ay tie kay fangatahagne hanao Sekoly i Gileada ty tagnate’e tao. Naho fa boake nivavake tamy i Jehovah miomba igne zahay, le nifenoe’ay amy i Barbara i taratasy fangatahagney, le nahere’ay tamy sampagne agne malaky. Ie dime volagne tafara tatoy vaho nivale i fangataha’aỳ. Le nandeha a Brooklyn, a New York agne zahay mba hagnatreke ty Sekoly i Gileada kilasy faha-38. Tagnate ty folo volagne ty nanoagne o sekoly iohoe.

 Tsy ty Saontsin’Andrianagnahare naho ty miomba i fandamina’e avao ty nianara’ay tamo o Sekoly iohoe fa ty kezake atao o rahalahy naho o rahavaventika magneran-taneo ka mba hanompoagne i Jehovah. Niana-draha maro tamy i rahalahy naho i rahavave niarake nagnatreke sekoly tama’ay rey zahay. Nanagne tombotsoa nanao ty asa i Betela niarake tamy i Rahalahy Fred Rusk, agnisa ty mpagnanatse anaỳ ka raho isan’andro. Nisy lesogne lahibey raike zay nianarako tama’e, le tihoe toko’e ho maregne soa avao ty torohevetse meintika ty hafa. Ty dika izay, toko’e hioregne amy ty Soratse Masigne avao. Rahalahy fa za-draha iaby ka ty rahalahy nampianatse anay tao, agnisa izay ty Rahalahy Nathan Knorr, i Rahalahy Frederick Franz, naho i Rahalahy Karl Klein. Niana-draha boake amy i Rahalahy A. H. Macmillan ka zahay. Tena niambane reke. Nampianare’e anay ka tie akore ty fomba nagnampea i Jehovah ty vahoa’e tagnate i fotoam-pitsapagne nahazo o rahalahintikagneo nanomboke tamy 1914 hatrake amy ty voalohan-doha ty taogne 1919.

Naho fa nivita i sekolỳ, le nirehake ama’ay amy i Barbara ty Rahalahy Knorr tie a Burundi Afrika agne ty faritane’ay. Le avy le nanao fikarohagne tamo o Diarintikagneo ao zahay naho fa niavy eo mba hahafantara’ay tie fire ty isa ty mpitory agne. Faie tsy nahatrea zahay. Nihai’ay areke tie faritane vaho ho sokafegne o Burundi iohoe. Le nandeha Afrika agne zahay, ndra tie kedekede avao aza ty raha nifanta’ay miomba aze. Tena ninekoneko mafe zahay, faie nagnampe anay ho tony ty vavake natao’ay.

Tena tsy nitovy tamy ty raha fa nahazatse anay ty raha niaigna’ay ta Burundi tagne. Vaovao tama’ay zao ty toets’andro naho ty kolontsaigne vaho ty firehake tagne. Tsy maintsy nianatse rehake frantsay ohatse zahay. Tsy nimora tama’ay ka ty nahatrea tragno hitobohagne. Roe andro tafara ty niavia’ay ta Burundi tagne, le nitilike anay ty Harry Arnott tamy ireke niheregne a Zambia agney. Niarake nanao Sekoly i Gileada tama’ay reke. Ie ty nagnampe anay hahatrea tragno hitoboha’ay. Le ze tragno natoro’e anay zay ty nitoboha’ay voaloha’e ta Burundi tagne. Tsy le nahay fire miomba o Vavolombelo i Jehovah-o ty fitondragne tagne tamy izay, le nanohetse anay. Fa nanomboke nahatrea tsiro’e tamy i fanendreagne anaỳ zahay tamy izay. Faie nirehake tama’ay i fanjakagney tie tsy mahazo mijanogne a Burundi agne zahay, satria tsy managne taratasy fahazoan-dalagne hipetrake tagne. Tsy maintsy niala ta Burundi tagne areke zahay, le nifindra ta Oganda agne.

Natahotse zahay naho fa nandeha a Oganda agne satria tsy nanagne taratasy fahazoan-dalagne hipetrake agne. Faie nitoky tamy i Jehovah zahay, le nisy  rahalahy Kanadiana nagnitatse faritane tagne zay nagnampe anay. Ie ty nagnazava tamy i lahilahy mpikarakara o ndaty mpifindra monigne a Oganda agneo ty miomba anay. Le nirehake tama’ay o lahilahy iohoe tie afake mipetrake a Oganda agne zahay agnate ty volagne tsiampeampe, amparake ty ahavità’ay taratasy fahazoan-dalagne hipetrake agne. Trea’ay tamy igne fa tena nagnampe anay ty Jehovah.

Tena tsy nitovy tamy ty raha nisy ta Burundi tagne ty raha nisy ta Oganda tagne. Mba fa nisy mpitory 28 ohatse ty tagne tamy izahay vaho niavy tagney. Nisy faritane raike tagne zay maro ndaty mirehake angilé. Faie nitaka’ay tsiela tafara izay tie naho tea’ay ty hagnampe o ndaty liagneo handroso ara-pagnahy, le mila mianatse firehake raike amo o firehake maro ampiasaegne a Oganda agneo zahay. Farafahatsiampe’e raike. Le nanomboke nitory ta Kampala tagne zahay. Luganda ty firehake ampiasae ty ankamaroa ty ndaty agne. Nanapa-kevetse areke zahay fa hianatse o firehake iohoe. Faie ela zahay vaho nahay o firehake iohoe. Tena nagnampe anay hahatrea vokatse maro tamy ty fanompoagne ty fahaia’ay o firehake iohoe. Nanjare hai’ay ka tie ino ty raha mila agnampeagne o ndaty ampianare’ay Baibolio. Naho fa nitrea iareo tie tena tea’ay iareo, le nanjare natoky anay iareo sady nankasitrake ty raha nianara iareo.

Tena mahafale anay ty magnampe o ndatio hahafantatse ty hamarenagne. Vao mainke tena nifale areke zahay, naho fa tinendre hanao asa ty faritse a Oganda agne. Nagnirake anay ty Sampa i Kenya tamy izay mba hagnente tie aia ty toeragne mila asiagne mpisava lalagne manokagne. Io ty Sampagne niandraikitse i Oganda. Mateteke ro ndaty mbe lia’e naho nahatrea Vavolombelo i Jehovah ty nandrambe anay naho fa nagnente i toeragne rey zahay. Tena nirambese iareo soa zahay sady nahandroa iareo.

Nandeha tamy ty toeragne hafa ka zahay naho fa niavy eo. Niala ta Kampala agne zahay, le nandeha a Mombasa a Kenya agne. Lamasina ty nandehana’ay tamy izay, le roe andro zahay vaho niavy agne. Ie zahay naho fa niavy eo, le nandeha a Seychelles agne. Tokonose raike amy ty Oseana Indiana agne io. Le niarake nitilike mateteke i Seychelles zahay amy i Barbara nanomboke tamy 1965 hatrake tamy 1972. Roe avao ty mpitory tagne tamy ty voaloha’e. Faie naho fa nandeha ty fotoagne, le nanjare nisy antoko mpitory naho fiangonagne ty tagne. Nitilike ty rahalahy ta Érythrée naho a Etiopia vaho a Soudan agne ka zahay.

Niova ty fitondragne ta Oganda tagne, le maramila ty nanjare nifehe i tanàgney. Tena nampatahotse ty raha niaigna’ay tagne tagnate ty taogne maro. Faie nianarako tie ilaegne avao ty mankatò i lilin’Andrianagnahare tihoey: “Aloao amy i Kaisara ze ahy i Kaisara.” (Mar 12:17) Nasaegne handeha tamy i birò o polisio agne ze ambahiny tamy i tanàgney tie indraike. Narine i tragno’aỳ ty nisy o birò iohoe. Le avy le nandeha agne zahay. Ie andro tsiampeampe tafara izay, le nisy polisy rey zay nisakagne ahy naho i misionera niarake tamakoy tamy izahay nandehandeha tobile ta Kampala agney. Tena natahotse zahay tamy izay. Nirehafe iareo zahay tie nao mpitsikilo zao, le hindese iareo amy i birò iareo agne. Faie nirehafe’ay tamy iareo tie misionera zahay fa tsy mpitsikilo zao. Nirehafe’ay ka iareo tie fa managne taratasy fahazoan-dalagne boake amy i lahibey iareoy zahay fa tsy nitsanogna iareo. Le nitsepahe iareo zahay sady nindese iareo tamy i birò iareo agne. Faie tena nifale zahay naho fa niavy agne, satria i lahibey iareo nizoe’ay taoy, le fa nahafantatse tie fa managne taratasy fahazoan-dalagne hipetrake agne zahay. Nirehafe’e ka i polisy rey mba hamotsotse anay.

 Mateteke zahay ro nisakagne o maramilao, lohotsie naho fa iareo mamo tampegne zay. Faie nivavake zahay isake niseho ty raha hoe izay. Ty voka’e, nanjare tony zahay naho fa mandalo amy iareo sady votsora iareo avao ka. Tamy 1973 le nampoliegne tamy ty tane’e agne iaby ze misionera ta Oganda tagne.

Le tinendre ta Côte d’Ivoire, ahandrefa i Afrika agne zahay. Tena fiovagne lahibey tama’ay ka io. Ty anto’e, nila nianatse kolontsaigne vaovao naho niheregne nirehake frantsay indraike zahay. Nila nagnova ty fahazara’ay ka zahay, satria nisy misionera boake amy ty tane sambe hafa ty niarake tama’ay tagne. Faie ndra tie teo zay, le trea’ay tie nitahy anay ty Jehovah. Ty anto’e, maro ty ndaty tso-po le avy le nagneke i talily soay. Nitsapa’ay mirovaly tie natao i Jehovah vata’e ze hahatomombagne ty fiaigna’ay noho izahay nitoky tama’e.

Niazo ty kansera tampoke ty Barbara, le niheregne ta Eoropa agne mateteke zahay tamy izay mba hitsaboagne aze. Faie nitsapa’ay tamy 1983 tie tsy ho afake hanohy i fanompoa’ay ta Afrika agney sasa zahay. Tena nalahelo zahay tamy izay.

Vao mainke niharaty i arete i Barbaray tamy izahay nanompo tamy i Betela i Londres tagney, hafara’e reke nimate. Tena nanohagne ahike o keleia i Betelao tamy izay. Nisy mpivaly raike tao zay nagnampe ahy hagneke ty raha misy naho hitoky amy i Jehovah avao. Nahatrea ze rahavave raike niasa an-tsitrapo tamy i Betela tao zay raho naho fa tafara tatoy. I Ann ty agnara’e. Fa ni-mpisava lalagne manokagne reke tie taloha sady tena tea i Jehovah ka. Nivaly zahay tamy 1989, le nanompo tamy i Betela i Londres tao nanomboke tamy izay.

Nanagne tombotsoa hisolo tegna i foibey raho nanomboke tamy 1995 hatrake tamy 2018. Eo ho eo amy ty 60 latsake ty tane fa nandehanako tagnate ze taogne maromaro zay. Le isake ty nitilike i sampagne rey raho, le treako tie mikarakara o vahoa’eo ty Jehovah ndra inogn’inogne raho manjò iareo.

Nitilike ty Sampagne ila’e ta Afrika agne zahay tamy 2017. Le nindeseko a Burundi agne ty Ann. Tena nifale raho naho fa nirehake tama’e tie: ‘Ie toa o Burundi zao.’ Tena nahalatsa anay ka ty nahatrea tie fa maro ty ndaty lasa mpanompo i Jehovah tagne tamy izay. Tamy i toeragne nitoriako tamy 1964 zay ty misy ty Betela i Burundi amy hinane zao, le fa losotse ty 15500 ty isa ty mpitory agne.

Tena nifale ka raho naho fa nahazo ty lisita ty sampagne hotiliheko tamy 2018. Ty anto’e, nitreako tamy i lisitay tao ty Côte d’Ivoire. Naho fa niavy Abidjan, rovabey raike a Côte d’Ivoire agney raho, le manahake o ndaty avy amy ty tanàgne misy azeo. Naho fa nagnente ty lisita ty nimerò ty rahalahy miasa amy i Betela ao ka raho, le nivoamareko tie i rahalahy Sossou ty mipetrake amy i tragno marine i tragno fandrambesagne ambahiny nisy anaỳ. Tadidiko o rahalahy iohoe, satria agnisa ty mpiandraikitse ty tanàgne ta Abidjan tagne reke. * Faie kay tsy ie io, fa ty ana-dahi’e.

Tena mitagne ty saontsi’e vata’e ty Jehovah. Treako tamy i raha sarotse natreheko rey tie naho itika mitoky amy i Jehovah, le hatao’e vata’e ze hahatomombagne ty fiaignantika. Tena irientika ty hanompo i Jehovah avao, satria haintika tie misy raha fanjaka nomane’e ho antika ty amy tontolo vaovao agne.​—Ohab. 4:18.