Terake tamy ty tanàgne kedekede raike atimo ahandrefa i Nizeria agne raho tamy ty taogne 1948. Tamy izay ro natao badisa tamo o Vavolombelo i Jehovah-o ty Moustapha dadatoako naho i Wahabi tale’ay lahilahy. Naho fa ni-sive taogne raho le nimate ty babako. Tena nalahelo mafe raho faie mbe hahatrea aze indraike zahay hatasa i Wahabi satria mbe hovelomegne reke. Nampahery ahy zay, le nandrisike ahy hianatse Baiboly. Niarake natao badisa zahay amy rahalahiko telo rey tamy 1963.

Tamy 1965, le niarake tamy i Wilson zokeko ta Lagos tagne raho. Tena nahafale ahy ty niarake tamy ty mpisava lalagne manokagne tamy ty fiangona i Igbobi ao. Nandrisike ahy ty fifaleagne naho ty zotom-po iareo, le nanomboke niarake nanao mpisava lalagne tamy iareo raho tamy Janvie 1968.

Nandamigne fivoriagne manokagne niarake tama’ay tanora ty rahalahy Albert Olugbebi nanompo tamy betela ao, le nirehake tama’ay miomba tihoe mila mpisava lalagne manokagne ty amy ty faritse avara i Nizeria agne. Mbe tadidiko avao i reha’e tihoey: “Mbe tanora nareo le afake mampiasa soa ty fotoa’areo naho ty heri’areo hoahy i Jehovah. Maro ty asa mandigne anareo agne!” Te  hanahake ty toe-tsay Isaia raho, le nameno fangatahagne ho mpisava lalagne manokagne.​—Isaia 6:8.

Tamy Mey 1968, le nivoatendre hanao ty asa ty mpisava lalagne manokagne ta Kano, avara i Nizeria agne raho. Nisy aly ty tagne tamy ty taogne 1967-1970, le nimaro ty ndaty nimate naho nijale. Tafara izay le nikisake hatrake atignana i Nizeria agne ka i alỳ. Nisy rahalahy raike nandrese lahatse ahy mba tsy handeha amy i faritse avara i Nizeria agney satria tsy tea’e ho azon-draha agne raho. Faie hoe raho tama’e: “Misaotse azo amy ty fitretréza’o ahy. Faie naho tea i Jehovah hanompo aze agne raho, le matoky raho fa hiaro ahy reke.”

Tena nampalahelo ty nahatrea ty raha niseho tagnate i aly ta Kano agney. Nandrava raha maro tamy tanàgney ao i alỳ. Kindraike le nahita fate o ndaty tamy i alỳ zahay naho fa nanompo. Ndra tie nimaro aza ty fiangonagne ta Kano tagne, le maro tamo o rahalahio ty nilay. Mpitory latsake ty 15 ty nijanogne tao tamy izay, le tena natahotse naho tsy nanagne herim-po iareo. Mpisava lalagne manokagne enegne zahay ty niavy tagne, le tena nifale o rahalahio. Nampahery iareo zahay le nifale iareo. Nagnampe iareo mba hivory naho hitory ndraike zahay, le nalefa’ay amy sampagne agne ty tatetse miomba ty fanompoa iareo naho ty boke vaho gazete napetra iareo.

Nanomboke nianatse ty firehake Hausa zahay. Naho fa naharey ty hafatse miomba i Fanjakagney tamy ty fireha’e iareo, le maro ty nitsanogne. Faie tsy nitea ty asa fitoriagne natao’ay ty fivavahagne ta Kano tao. Nahavy anay nitao zay. Niheagne ty lahilahy raike reketse mesa zahay tie indraike. Faie tena nilay mafe zahay le tsy nahatratse anay reke! Ndra tie teo aza ze raha nagnoho-doza zay, le nanao raha ty Jehovah mba hahavy anay tsy ho “mahimahigne.” Voka’e nanjare nihanitombo i mpitorỳ. (Sal. 4:8) Amy hinane zao le mihoatse ty 500 ty mpitory manompo amy ty fiangonagne 11 a Kano agne.

Tamy Aogositra 1968, zane hoe volagne tsiampeampe tafara ty nihova’ay ta Kano agne, le  nalefa ta Niamey rova ty Repoblika i Niger agne raho niarake tamy ty mpisava lalagne manokagne roe. Agnisa ty tane fara’e zay ty mafana ty Niger, le ahandrefa i Afrika ty misy aze. Ankoatse tihoe nianatse niatreke i hafanagney, le nianatse ty firehake ofisialy agne ka zahay, le ty firehake Frantsay. Ndra tie teo ze raha sarotse zay, le natoky i Jehovah avao zahay sady nanomboke nitory tamy i toeragney ao niarake tamy ty mpitory tsiampeampe nitoboke tao. Tagnate ty fotoagne fohe, le maro ty nandrambe ty boke fianaragne Baiboly tihoe Ny Fahamarinana Izay Mitarika ho Amin’ny Fiainana Mandrakizay. Nisy amo o ndatio nipay anay satria te hanagne i bokey.

Nivoamare’ay naho fa nandeha ty fotoagne fa nalaigne o Vavolombelo i Jehovah-o o manam-pahefàgneo. Tamy Jolay 1969 ro nisy havoriambey faritse voaloha’e ty tagne, le nisy 20 ty mpagnatreke tamy izay. Nitrea’ay tie nahita vokatse zahay satria hisy mpitory vaovao roe hatao badisa amy io. Faie tamy ty andro voaloha’e amy havoriambeỳ, le nisy polisy niavy nampijanogne i fandaharagney. Nalae iareo o mpisava lalagne manokagneo naho i mpiandraikitse faritsey le nente iareo amy ty birò o polisio agne. Tafara ty nanoa iareo ankety anay, le nampiheregne iareo mbeo zahay ty maray igne. Nitsapa’ay tie te hagnakorontagne anay o manam-pahefàgneo, le nanao lahajaka badisa tamy ty tragno ty ndaty raike zahay, le avy eo natao badisa tsiela tamy ze renerano zay i aze hatao badisa rey.

Heregnandro tsiampeampe tafara izay, le nandroake ahy naho i mpisava lalagne dime rey hiala ty ao o manam-pahefàgneo. Nimea iareo roe andro zahay mba hialàgne ao. Nagnorike izay zahay le avy le nandeha amy ty birò ty sampa i Nizeria agne mba hahazo fanendreagne vaovao.

Nivoatendre ta Orisunbare tanàgne raike a Nizeria agne raho. Tena nahafale ahy ty nitory naho nitarike fampianaragne Baiboly niarake tamy ty antoko-pitory tsiampeampe nitoboke tagne. Faie enem-bolagne tafara izay, le nasae ty birò ty sampagne mba hiheregne a Niger agne indraike raho. Tamy ty voaloha’e, le tena nitampoke sady nampatahotse ahy zay faie nagniry ty hahatrea o rahalahy agne reo ka raho.

Niheregne ta Niamey agne raho. Andro raike tafara ty niaviako tagne, le nisy mpivarotse Nizeriana raike zay nahamareke tie Vavolombelo i Jehovah raho le nanomboke nagnontane miomba o Baibolio reke. Niarake nianatse Baiboly zahay, le tafara ty nijanogna’e tsy nifoke sigara naho ninon-toake sasa le natao badisa reke. Tena nahafale ahy ty niarake nitory tamy ty mpitory amy ty faritse sambe hafa ta Niger agne naho ty nahatrea ndaty maro nagneke i hamarenagney. Tamy tie raho niavy tagne voaloha’e, le ni-31 ty Vavolombelogne tao, faie naho fa niala tagne raho le nitombo 69 zay.

Tamy ty farapara ty taogne 1977, le niheregne a Nizeria agne raho mba hiofagne. Tamy ty fara i  telo heregnandro niofagnagney, le nimea i Malcolm Vigo, agnisa ty Komity ty Mpandrindra i Sampagney taratasy boake a Sierra Leone agne raho. Mipay rahalahy salama soa, mpisava lalagne mbe tsy manambaly sady mahay firehake Anglisy naho Frantsay afake manao ty asa ty mpiandraikitse faritse ty a Guinée agne. Nirehafe i rahalahy Vigo raho mba hiofagne amo o fanendreagne iohoe. Nihazavae’e tamako fa tsy mora io. Izao ty toroheve’e: “Dineho soa heike aloha ty hagnekea’o aze.” Le avy le hoe raho: “Satria i Jehovah ro magnirake ahy, le handeha raho.”

Nandeha ta Sierra Leone tagne raho le nifankatrea tamy ty rahalahy amy birò i sampagney ao. Hoe ty rahalahy raike agnisa ty Komity Sampagne agne tamako: “Tsy hai’ay tie manao akore ty rahalahy naho rahavave a Guinée agne.” Andraiky ty sampagne ty mikarakara ty asa fitoriagne amy ty tane magnodidigne i Guinée faie tsy niafake nifandrambe tamy ty mpitory tagne iareo noho ty olagne ara-politike. Nikezake mafe iareo nandefa rahalahy hitilike ty rahalahy a Guinée agne faie tsy afake nanao izay. Nangatake alalagne tamy ty manam-pahefàgne agne areke raho mba ho afake hipetrake agne.

Naho fa niavy ta Conakry agne raho, le nandeha tamy ty ambasadera o Nizerianao agne. Nirehafeko tama’e fa te hitory a Guinée ao raho. Tsy nenga’e hijanogne agne raho, satria hisy hitsepake sady hisy hijera raho naho manao izay. Hoe reke: “Miheregna a Nizeria agne le mitoria agne.” Faie hoe raho tama’e: “Fa tapa-kevetse ty hijanogne raho.” Nanoratse taratasy fangatahagne tamy ty manam-pahefàgne ta Guinée agne reke le nandrambe ahy i manam-pahefàgney.

Tafara izay, le niheregne tamy ty birò ty sampa i Sierra Leone agne raho sady nitantara tamy i rahalahy rey ty fanapahan-keve i manam-pahefàgney. Nifale zahay satria nitahie i Jehovah i lia nataokoy. Nengà o manam-pahefàgneo hijanogne a Guinée agne raho.

Nanomboke tamy 1978-1989, le nanao ty asa ty faritse ta Guinée naho ta Sierra Leone sady ni-mpiandraikitse faritse mpisolo toeragne ta Liberia agne raho. Tamy ty voaloha’e le narare mateteke raho. Kindraike le tamo o faritse mitokagneo agne ty nisehoa izay. Faie nente o rahalahio tan-dapotaly agne raho.

Tie indraike, le nivoa ty tazomokegne raho sady nisy soko. Naho fa nisitragne raho, le nireiko tie fa nirehake miomba ty toeragne handevegnagne ahy o rahalahio! Faie ndra tie teo zay, le tsy nieretseretse ty hiala amy i fanendreagne nimeagne ahỳ raho. Rese lahatse raho tie i Jehovah raike avao ro afake miaro ahy, satria ndra tie mate aza tika le mbe ho velome’e indraike.

Tamy 1988 raho, le nifankatrea tamy i Dorcas, rahavave mpisava lalagne tena tea i Jehovah sady niambane. Nifanambaly zahay, le niarake tamako nanao ty asa ty faritse reke. Niasa mafe niarake tamako tamy i fanendreagney reke sady nahafoe tegna hoahy i Jehovah. Dime amby roapolo kilometatse ty elagnela i fiangonagne nitilihe’ay rey sady  ninday entagne zahay naho fa nandeha tomboke mbeo. Feno fotake naho lavadavake i lalagney le nampiasa ze raha azo’ay nandehanagne zahay.

Tena bey herim-po ty Dorcas. Nisy fotoagne zao ohatse nitsake tamy ty rano feno voae zahay. Tamy zahay nanao lia tagnate ty dime androy, le nitapake i ragiragy hatae amy lalagney le tsy maintsy nampiasa lakagne zahay. Naho fa nijotso boake amy lakagney ao ty Dorcas, le nijorobogne agnate i rano lalekey ao. Tsy nisy nahay nilagno zahay, ie amy izao feno voae i ranoy. Soa avao fa nisy ajalahy tanora rey zay ty teo nahay nilagno, le nagnavotse aze. Kindraike le sambe nieretsere-draty miomba i raha raty niseho igne avao zahay, faie tsy niala amy fanendreagney.

Tamy ty voalohandoha ty taogne 1992, le nitampoke anay amy i Dorcas tie nivesatse reke. Hifaragne vao areke i fanompoagne marain-tsy hariva natao’aỳ? Tsapa’ay fa “nagnomey fagnomezagne anay ty Jehovah.” Natao’ay tihoe Jahgift (midika tihoe fagnomezagne boake amy i Jah) areke ty agnara i anak’ampela’aỳ. Efatse taogne tafara ty niteraha’ay i Jahgift, le niterake i Eric rahalahi’e ka zahay. Hoe fagnomezagne ara-pagnahy nimea i Jehovah anay iareo roe. Miasa tapa-potoagne amy ty birò fandikan-drehake mitokagne a Conakry agne ty Jahgift, le i Eric mpagnampe amy ty fiangonagne.

Ndra tie nijanogne tsy ho mpisava lalagne manokagne aza ty Dorcas, le mbe nanohy nanao ty asa ty mpisava lalagne maharetse avao sady nikarakara i ana’ay rey. Noho ty fagnampea i Jehovah, le mbe afake nanohy i fanompoagne marain-tsy hariva manokagney raho. Naho fa nibey i ana’ay rey, le niafake nanao ty asa ty mpisava lalagne manokagne indraike ty Dorcas. Amy zao zahay roe, le manao ty asa ty misionera a Conakry atoy.

Nandeha tamy ze toeragne tea i Jehovah hindesagne ahy raho. Mateteke zahay mirovaly ro nahatsapa tie niaro naho nitahy anay ty Jehovah. Ty fatokisantika i Jehovah ro fomba ahafahantika miatreke olagne naho ty raha maro manahiragne antika. Nianara’ay tamy ty raha niaigna’ay, fa i “Andrianagnahare mpagnavotsey” ro Foto ty fiarovagne azo antoke. (1 Tan. 16:35) Rese lahatse raho fa “hofognosen’Andrianagnahare soa agnate sake ty fiay” ze ndaty mitoky ama’e.​—1 Sam. 25:29.