Niala ta Italỳ agne i rae aman-dreneko rey tamy ty farapara ty taogne 1950, le nifindra a Kindersley, a Saskatchewan, Kanada agne. Nianatse ty hamaregnagne iareo tsiela tafara izay, le io ty nanjare lahibey tama’ay. Tsiaroko tie nanompo mateteke niarake tamo o keleiakò raho tamy tie iraho mbe nikede. Mateteke raho ro misole amy iareo tie valo taogne raho le fa “ni-mpisava lalagne mpagnampe.”

Fitsikombe amy ty fahafoezan-tegna hoahy i Jehovah i rae aman-dreneko rey ndra tie nahantra aza. Namarotse ty ankamaroa ty fanagna iareo ohatse iareo tamy ty taogne 1963, mba hahazoagne vola hagnatrehagne ty havoriambey iraisam-pirenena ta Pasadena a Kalifornia, Etazonia agne. Nifindra a Trail, Kolombia Britanike a Kanada agne zahay tamy 1972 mba hagnampe amy ty faritane Italiana. Arivo kilometatse eo ho eo boake ama’ay eo o toeragne iohoe. Mpagnalio magasin ty asa i babako. Tsy nagneke hanao asa fagnampe’e reke amy izay afake mifantoke amy ty fanompoagne.

Mankasitrake o rae aman-dreneko reo raho amy ty modely nimea iareo ahy naho i troke raike amako telo rey. Agnisa ty fampiofagnagne voaloha’e niazoko tamy ty fanompoagne i Jehovah zay. Tsy ombia hohalignoko ohatse ty raha nampianare iareo ahy toy: Naho fa iraho manao voalohan-draha i Fanjakagney, le hikarakara ahike ty Jehovah.​—Mat. 6:33.

Nanambaly i Debbie, rahavave ampelasoa sady managne tanjogne ara-pagnahy raho tamy 1980. Nanomboke nanao mpisava lalagne ty Debbie telo volagne tafara ty nifanambalia’ay satria te hanompo marain-tsy hariva zahay. Nifindra amy ze fiangonagne kedekede nipay fagnampeagne zay zahay tao’e  raike tafara ty nifanambalia’ay, le nanao mpisava lalagne niarake amy i valiko raho.

Nisy fotoagne zahay nikivy, le nanapa-kevetse ty handeha. Faie nirehake tamy ty mpiandraikitse faritse heike zahay. Bey hatea reke faie tsy niotakotake naho fa nirehake tie: “Mipay olagne nareo satria izay avao ty ifantoha’areo. Faie naho mifantoke amy ty raha soa nareo, le hotrea’areo zay.” Tena nilae’ay ze torohevetse zay. (Sal. 141:5) Le avy le nampihatse izay zahay. Nitrea’ay tie kay maro ty raha soa azo’ay nifantohagne. Maro amy ty mpiara-manompo amy fiangonagne eo ohatse ty te hahavita bey amy ty fanompoagne, agnisa izay o tanorao naho ty ila’e amo o manambaly tsy Vavolombelogneo. Lesogne lahibey ho anay igne. Nianatse nifantoke amy ty raha soa zahay, le nandigne i Jehovah hamaha i olagne natrehe’aỳ. (Mika 7:7) Nifale indraike zahay sady nihanilamigne ka i olagney.

Manompo an-tane hafa agne ty ila’e amy ty mpampianatse amy ty Sekoly ty mpisava lalagne natrehe’ay voaloha’e. Nitoroa iareo ty sare iareo zahay sady nirehafe iareo tama’ay ty raha sarotse naho ty fitahiagne niazo iareo. Nahavy anay hagniry ho misionera zay, le natao’ay tanjogne o karazam-panompoagne iohoe.

Mba hahafaha’ay magnatratse ze tanjogne zay, le nifindra amy ty fiangonagne Frantsay a Quebec agne zahay tamy 1984. Mahery ty 4 000 kilometatse miala a Kolombia Britanike agne ty misy aze. Tsy maintsy nianatse kolontsaigne naho firehake vaovao areke zahay. Mateteke tsy niampe vola zahay. Izay ty raha sarotse hafa natrehe’ay. Nisy fotoagne zahay nitimpogne ze pondetera sisasisa’e nenga o mpamboleo an-tete’ey mba hohane’ay. Nahatrea fomba sambe hafa handrahoagne i pondeteray ty Debbie! Ndra tie nisy raha sarotse aza, le nikezake ho falefale avao zahay. Nitsapa’ay ka tie tena nikarakara anay ty Jehovah.​—Sal. 64:10.

Nahazo antso tsy nampoize’ay zahay tie indraike zay. Nitokavegne hanompo amy ty Betela i Kanada agne zahay, ie amy izao fa nameno fangatahagne hanao ty Sekoly Gileada. Fale zahay faie sahiran-tsaigne ka. Faie neke’ay avao i fitokavagne anaỳ. Naho fa niavy agne zahay, le nagnontane i Rahalahy Kenneth Little, agnisa ty Komity Sampagne tie: “Manao akore i fangataha’ay hanao Sekoly Gileaday?”  Le hoe reke: “Ao fa mbe hotreantika ty hatao naho voantso nareo.”

Nivoantso vata’e zahay amy i Debbie heregnandro raike tafara izay. Nila nanapa-kevetse areke zahay. Hoe ty Rahalahy Little tie: “Ndra inogn’ino filie’areo, le tsy maintsy hirehake avao nareo indraike andro agne tie, tahake izay nanao i raikey fa tsy itoy. Tsy misy raty reo. Afake mitahy ze filiegne ty Jehovah.” Nagneke i fanasagne hanao Sekoly Gileaday areke zahay. Tagnate ty taogne maro, le nitrea’ay tie maregne i toroheve i Rahalahy Little-y. Mateteke ro rehafe’ay amy ty hafa i reha’ey naho fa iareo ty mifily ty fanendreagne hatao’e.

Tena nifale zahay fa ni-agnisa i mpianatse 24 tamy ty Sekoly Gileada kilasy faha-83-oy. Natao ta Brooklyn a New York agne o sekoly iohoe tamy Avrily 1987. I Rahalahy Ulysses Glass naho i Jack Redford ty tena ni-mpampianatse tamy i Sekolỳ. Tsiela avao le nivita i dime volagney. Nahazo diploma zahay tamy 6 Septambra 1987. Nivoatendre a Haiti agne zahay amy i John naho i Marie Goode.

Tsy nisy misionera sasa ty ta Haiti agne nanomboke tamy 1962 naho fa niroahegne tao ty misionera fara’e tao. Telo heregnandro tafara i fizaràgne diplomay, le nanompo niarake tamy ze fiangonagne raike kedekede misy mpitory 35 a Haiti agne zay zahay. Bey vohitse o toeragne iohoe. Tanora sady mbe tsy ampe traikefa zahay, le izahay avao ka ty tamy ty tragno o misionerao tao. Mahantra ty ndaty agne sady tsy mahay mamaky teny ty ankamaroa’e. Tamy tie zahay nanomboke nanao ty asa ty misionera voaloha’e tagne, le nisy aly, fanonganam-panjakagne, raha oroa o ndatio mba hanakanan-dalagne vaho tsikolony ty tagne.

 Niana-draha maro boake amo o rahalahy naho o rahavave natanjake sady falefale ta Haiti agne reo zahay. Sarotse ty fiaigna ty ankamaroa iareo, faie tea i Jehovah naho tea manompo iareo. Tsy mahay mamaky teny ty rahavave fa antetse raike, faie mahatadidy andinin-teny eo ho eo amy ty 150 reke. Vao mainke mahavy anay ho tapa-kevetse ty hitory ty hafatse miomba i Fanjakagney, ty raha trea’ay isan’andro. Io avao ty afake mamaha ty olagne mahazo o ndatio. Mahafale anay ty mahatrea ty ila’e amy i ndaty nampianare’ay Baiboly voalohandoha’e rey manjare mpisava lalagne maharetse, mpisava lalagne manokagne vaho androanavy.

Nifankatrea tamy i Trevor, tanora raike misionera Mormon raho tamy tie izahay ta Haiti agne. Afake niara-nidineke Baiboly zahay kindraike. Taogne maromaro tafara tatoy, le nahavoarae taratasy tsy nampoizegne boake ama’e raho. Izao ty nisorate’e: “Hatao badisa amo o havoriambey faritse hoavy io raho! Te hiheregne a Haiti agne raho, le hanao mpisava lalagne manokagne amy i toeragne naha misionera Mormon ahikey agne.” Nanao izay tagnate ty taogne maro iareo mirovaly.

Nitendregne hanompo tamy ty faritse ila’e ta Eropa agne zahay naho fa nisokake ty asa i Fanjakagney tagne. Niavy ta Ljubljana a Slovenia agne zahay tamy 1992. Narine io ty toeragne nahabey o rae aman-dreneko reo taloha ty nifindra iareo ta Italỳ agne. Mbe nisy aly avao ty tamy ty faritse Yugoslavia taloha. Ty sampa i Vienna Aotrisy, i Zagreb Kroasia, i Belgrade, Serbia ty niandraikitse ty asa tamy i faritsey agne. Sambe managne ty Betela’e o faritse rehoe tie amy izao.

Tsy maintsy mbe nianatse firehake naho kolontsaigne hafa indraike areke zahay. Mateteke mirehake ty ndaty an-toeragne eo tie: “Ježik je težek,” midika tihoe “Sarotse o firehake iohoe.” Tena maregne zay! Tena mahafale anay ty tsy fivaliha o rahalahy naho o rahavaveo. Vognogne hagneke ze fagnovàgne atao i fandaminagne iareo sady trea’ay tie tahie i Jehovah. Ie tena trea’ay tie magnitsy aman-katea sady amy ty fotoagne mete ty Jehovah. I taogne maro nihova’ay ta Slovenia agney, le vao mainke nagnamafe ty raha nianara’ay sady nampianatse lesogne vaovao anay.

 Faie mbe niovaova avao ty fiaigna’ay. Nivoatendre ta Côte d’Ivoire, an’Afrika ahandrefagne agne zahay tamy ty taogne 2000. Nafindra a Sierre Leone agne zahay tamy Novambra 2002 satria nisy aly ty tagne. Fa nisy aly tagnate ty 11 taogne ty tagne. Tsy mora ty niala i Côte d’Ivoire tampotampoke, faie nagnampe anay hofale avao i lesogne nianara’ay rey.

Nifantoke tamy ty vokatse amy i faritaney ey naho ty hatea o rahalahy naho o rahavaveo zahay. Niaretse i alỳ tagnate ty taogne maro iareo. Tsy le nanan-draha iareo faie tea nizara ze nanagna’e. Nisy rahavave raike zay nagnomey lamba i Debbie. Naho fa nisalasala ty handrambe i lamba rey ty Debbie, le nisisike avao reke sady nirehake tie: “Nanohagne anay avao o rahalahy boake amy ty tane hafao tagnate i alỳ. Anjara’ay ka hinane zao ty magnampe.” Natao’ay tanjogne areke ty hanahake iareo.

Niheregne ta Côte d’Ivoire agne zahay naho fa tafara tatoy, faie nisy korontagne indraike ty tagne noho ty olagne ara-politike. Nampilaisegne zahay, le nalefa helikoptera tamy Novambra 2004. Entagne folo kilò isa’e avao ty niazo’ay entagne. Nandre amy ty tane tamy ty tobe maramila Frantsay zahay tamy ty hale igne, le nandeha ta Soisa agne naho fa nimaray igne. Niavy amy sampagne ao zahay, tokotoko’e ho tamy i vaky mira halegney. Nandrambe soa anay ty Komity Sampagne naho ty Mpampianatse amy ty Sekoly Fampiofagnagne amy ty Fanompoagne reketse ty valy iareo. Namihigne anay iareo, le nagnomey hanegne mafana naho sokolà maro. Tena nifale ty fo’ay.

Voatendre hanompo tsy maharetse ta Ghana agne zahay, le boakeo niheregne ta Côte d’Ivoire agne naho fa nijanogne i gorevey. Nagnampe anay ty hasoa fagnahy o rahalahy naho o rahavaveo tamy i famindragne tampotampokey naho i fanendreagne tsy maharetse nimeagne anay rey. Rese lahatse zahay amy i Debbie tie, tsy hohamaivagne’ay ty hatea o rahalahy naho o rahavaveo ndra tie fa maha ie ty fandamina i Jehovah aza zay. Naho ty maregne, le fampiofagnagne lahibey ho anay i raha sarotse natrehe’ay rey.

Nahazo taratasy boake amy i foibey agne zahay tamy 2006. Nirehake ty fanendreagne vaovao niazo’ay ho amy ty firenena atignanagne agne i taratasỳ. Hiatreke fiaignagne, raha sarotse, firehake vaho kolontsaigne vaovao indraike areke zahay. Maro ty olagne ara-politike naho ty olagne ara-pivavahagne tamy i toeragne rey ao. Tena nitea’ay ty firehake sambe hafa tamy i fiangonagney tao. Nahafale anay ka ty nahatrea iareo miharo saigne noho ty fagnorihagne ty toromareke boake amy fandaminagne. Midera o rahalahio zahay satria tena managne herim-po iareo, le miaretse ty fanohera ty keleia’e, ty mpiara-mianatse ama’e, ty mpiara-miasa ama’e vaho ty mpiharo tanàgne ama’e.

Nagnatreke havoriambey vondrom-paritse manokagne ta Tel Aviv a Israely agne zahay tamy 2012. Io ty havoriambey voaloha’e natrehe ty vahoa i Jehovah nisy mpagnatreke maro tamo o faritse iohoe agne tafara i Pentekosta 33-oy. Fotoagne tsy hay halignovegne igne!

Nalefa nitilike ze firenena raike nisy fandraragne zay zahay tamo o taogne iohoe. Ninday boke naho  gazete tsiampeampe zahay sady nitory naho nanao havoriambey faritse kedekede. Nisy maramila ninday fitaovam-pialiagne naho nanao fisavagne ze nombagne. Faie nahatsapa ho voaaro zahay naho fa nitao, le niarake amy ty mpitory tsiampeampe.

Nahazo fanendreagne sambe hafa zahay tamy 2013. Nanompo amy ty sampa i Kongo Kinshasa zahay. Firenena soasoa io faie tena nahantra sady mateteke nisy aly. Tamy ty voaloha’e, le hoe zahay: “Haintika soa ty Afrika. Vognogne tikagne.” Faie mbe niana-draha maro avao zahay lohotsie naho fa nandeha amy ty lalan-draty naho tsy nisy ragiragy. Faie nahatrea raha soa maro azo’ay nifantohagne zahay, agnisa izay ty hatea naho ty fiareta o rahalahy naho o rahavaveo ndra tie niatreke olagne ara-bola aza iareo. Teo ka ty hatea iareo ty fanompoagne naho ty kezake natao iareo mba hivoriagne naho hagnatrehagne havoriambey. Nitrea’ay fa tena nandroso ty asa i Fanjakagney noho ty fanohagna i Jehovah naho ty fitahia’e. Nianatse lesogne lahibey naho nahatrea keleiagne maro zahay tagnate ty taogne maro nanompoa’ay marain-tsy hariva ta Kongo agne.

Mbe nahazo fanendreagne hafa tan’Afrika Atimo agne zahay tamy ty fara ty taogne 2017. Io ty sampagne fara izay ty lahibey nanompoa’ay sady ndra ty fanendreagne anay tamy Betela tao aza, le vaovao tama’ay. Niana-draha maro indraike zahay tie tagne faie mbe nagnampe anay avao i raha nianara’ay taloha rey. Tena tea’ay i rahalahy naho rahavave maro fa niaretse tam-polo’e taogne rey. Tena nahalatsa anay ka ty nahatrea i keleia i Betela rey mikezake miharo saigne ndra tie boake amy ty karazagne naho ty kolontsaigne sambe hafa aza. Voaporofo tie mitahy ty fiharoan-tsaigne misy amo o vahoa’eo eo ty Jehovah noho iareo mikezake hanagne toetse vaovao naho mampihatse ty toro lala ty Baiboly.

Tagnate ty taogne maro, le nahazo fanendreagne mahafinaritse zahay amy i Debbie sady nianatse kolontsaigne sambe hafa naho firehake vaovao. Tsy tihoe lava mora avao zay, faie nitsapa’ay tie maneho hatea tsy miovaova ama’ay amy ty alala i fandamina’e naho o rahalahy magneran-taneo ty Jehovah. (Sal. 144:2) Matoky zahay tie hahavy anay ho soa toetse i fampiofagnagne niazo’ay tamy ty fanompoagne marain-tsy hariva rey.

Tena sarobily amako ty raha nampianare o rae aman-dreneko reo ahy. Teo ka ty fanohagna i Debbie, i valiko teakoy naho ty ohatse fanjaka boake amo o keleiantika ara-pagnahy magneran-taneo. Mifantoke amy ty hoavy zao zahay mirovaly sady tapa-kevetse ty hampianare i Mpampianatse Lahibeỳ avao.