1. Ino ty va’e ho anto’e nahavy i Jesosy hampitovy o mpanonjohy ty lia’eo amy ty agnondry?

NAMPITOVIE i Jesosy amy ty fifandrambesa o mpiarake agnondrio amy ty agnondri’e ty fifandrambesa’e amo o mpanonjohy ty lia’eo. (Jaona 10:14) Tena mete soa o fampitahagne iohoe. Mitsanogne naho magnorike ty raha rehafe i mpiarake azey o agnondrio. Hoe ze mpitete tane raike zay: “Nite hangalake kamerà i agnondry rezay zahay, le natao’ay ze hiharinea i agnondry rey anay. Faie tsy nimete i agnondry rey satria nihay iareo tie tsy feo i mpiarake azey o mitoka iareò. Faie naho fa i ajalahy kedekede mpiarake iareoy ty nitoka i agnondry rey, le avy le nagnatogne aze mbeo iareo.”

2-3. a) Akore ty ampisehoa o mpanonjohy ty lia i Jesosio tie mitsanogne ty feo’e iareo? b) Ino ty hodinehentikagne ato naho amy ty lahatsoratse magnarake?

² Maniahy antika ty raha nirehafe i Jesosy tamo o agnondri’eo, ndra o mpiana’eo, ty raha nitantarae o mpitete tane iohoe. Hoe ty Jesosy: ‘Hitsanogne ty feoko iareo.’ (Jaona 10:16) Fa an-dagnitse agne ty Jesosy tie amy izao. Akore ty ahafahantika mitsanogne o Tompontikagne iohoe? Fomba lahibey anoantikagne izay zao ty fampiharantikagne ze raha ampianare’e antika.—Mat. 7:24, 25.

³ Handineke ty raha ila’e nampianare i Jesosy tika amy ty lahatsoratse toy naho amo o magnarakeo. Hotreantika amy ireo ty raha nampianare i Jesosy tsy toko’e hataontika sasa naho ty raha toko’e hataontika. Izao tika le handineke ty raha roe nampianare i mpiarake soay fa tsy toko’e hataontika sasa.

4. Ino ty raha va’e ‘hampinekoneko antika bey loatse’, arake ty Lioka 12:29?

⁴ Vakio ty Lioka 12:29. Nirisihe i Jesosy o mpiana’eo mba ‘tsy hinekoneko bey loatse sasa’ miomba ty raha ilae iareo ara-nofo. Haintika fa lava mahasoa sady maregne avao ty toroheve i Jesosy. Teantika ty hampihatse o torohevetse iohoe, faie va’e tsy ho mora amantika ty manao izay kindraike. Fa nagnino?

5. Nagnino ty ndaty ila’e ro va’e hinekoneko miomba ty raha ilae’e ara-nofo?

 ⁵ Va’e hinekoneko miomba ty fomba hahazoa’e hanegne, akanjo, naho ty tragno hitobohagne ty ndaty ila’e. Va’e mahantra ty firenena misy iareo, le sarotse ty mahatrea asa. Ty voka’e, va’e tsy hanam-bola fire mba hiviliagne ze raha ilae ty keleia’e iareo. Ndra va’e nimate i ndaty mba tamaegne hamelogne iareoy, hafara’e tsy manam-bola i keleiagne nengà’ey. Maro ka ty ndaty nimontso asa noho ty voka-draty ty aretegne COVID-19. (Mpito. 9:11) Naho mahazo antika ty raike amy ireo ndra olagne hafa ty atrehentika, le akore ty hagnorihantika i toroheve i Jesosy manao tihoey ko minekoneko sasa?

6. Tantarao ty raha nahazo i apostoly Petera tie indraike.

⁶ Nandeha lakagne tamy ty Ria i Galilia agne ty apostoly Petera naho i apostoly nama’e rey tie indraike. Nisy tiobey tamy izay faie nitrea iareo ty Jesosy nandeha ambone rano ey. Hoe ty Petera: “O Tompo, naho toe ihe vata’e io, le tokavo ho mbama’o ambone rano ey raho.” Le hoe ty Jesosy: “Mbetoa areke!” Le nizotso malaky boake amy i lakagney ey ty Petera, le “nandeha tambone rano ey sady nimbamy i Jesosy mbeo.” Faie ino ty raha niseho tafara izay? “Natahotse ty Petera naho fa nahatrea i tiobeỳ. Nanomboke nilenteke reke, le nikolalaike ty toka tihoe: ‘Rombaho raho  Tompo!’” Naranga i Jesosy mbama’e mbeo i tagna’ey mba handrombahagne i Petera. Soa hotadidiegne fa nahavita nandeha tambone rano ey ty Petera tamy i reke mbe nifantoke tamy i Jesosỳ. Faie naho fa i tiobeỳ ro nifantoha’e, le nanjare natahotse naho nisalasala reke, hafara’e nanomboke nilenteke.—Mat. 14:24-31.

7. Ino ty ianarantika amy i Petera?

⁷ Ino ty lesogne ianarantika amy i Petera? Naho fa i reke nizotso boake agnate i lakagney ao sady nandeha ambone i riakey ey, le tsy nieretseretse tie hanjare hatahotse i tiobeỳ naho hilenteke agnate rano ao. Nitea’e aza naho nandeha ambone rano ey avao reke amparake ty hiavia’e amy i Tompo’ey ey. Faie tsy nitratse’e ze tanjo’e zay satria raha hafa ty nanjare nifantoha’e. Mazava hoaze fa tsy hahavita handeha ambone rano ey ara-bakiteny tika. Faie mila managne finoagne tika naho te hahavita hiatreke ty olagne mahazo antika. Naho ohatse areke tika manjare tsy mifantoke amy i Jehovah naho amy ty raha ampitamae’e sasa, le hanomboke hilenteke ara-pagnahy tika. Ndra inogn’inogne tiobey ndra olagne lahibey atrehentika, le mila mifantoke amy i Jehovah avao tika sady mila ataontika an-tsaigne avao fa ho vita’e ty hagnampe antika. Akore ty azontika anoagne izay?

8. Ino ty hagnampe antika tsy hinekoneko bey loatse miomba ty raha ilaentikagne ara-nofo?

⁸ Handrambe soa tika naho tsy minekoneko miomba ty olagne mahazo antika fa matoky i Jehovah. Tadidio fa magnomey toky antika ty Jehovah, i Babantikagne bey hateay tie hikarakara ze raha ilaentikagne ara-nofo reke naho itika manao voalohan-draha ty fanompoagne aze. (Mat. 6:32, 33) Nitanterahe i Jehovah avao ze fampitamà’e zay amparake izay. (Deot. 8:4, 15, 16; Sal. 37:25) O vorogneo naho o folerao zao karakarae i Jehovah. Tsy toko’e hinekoneko areke tika tie ino ty hohanentika ndra ino ty hagnisiantika. (Mat. 6:26-30; Fil. 4:6, 7) Ty hatea’e o ana’eo ty mahavy o rae aman-dreneo hagnomey ze raha paliae ty ana’e. Ty hatea’e o vahoa’eo ka ty mandrisike i Babantika an-dagnitse agney hagnomey ze raha ilae iareo ara-nofo. Ie, tena afake matoky tika fa hikarakara antika ty Jehovah.

9. Ino ty azo’o ianaragne amo o mpivaly raike iohoe?

⁹ Dineho ty tantara raike toy fa mampiseho tie mikarakara ze raha ilaentika ara-nofo ty Jehovah. Nangalake ze rahavave mitoboke amy ty tobe ty mpifindra monegne agne rezay ze mpivaly mpanompo marain-tsy hariva zay mba hinday i rahavave rey hivory. Ie amy izao lera’e raike ty angalagne i toeragney sady fa haehae ka i tobile iareoy. Hoe i rahalahỳ: “Tafara i fivoriagney le nitaone’ay hihinagne ama’ay agne i rahavave rey, ie amy izao tsy nanagne raha homeagne iareo zahay.” Akore ty hatao i mpivaly rey? Hoe indraike i rahalahỳ: “Naho fa niavy an-tragno agne zahay le nisy harom-bey roe feno hanegne zay nizoe’ay tan-dalan-tragno’ay teo. Tsy hai’ay tie ia ty nametrake aze teo. Trea’ay tamy igne tie tena mikarakara anay ty Jehovah.” Nisimba i tobile i rahalahỳ naho fa tafara tatoy. Tena nilae iareo io naho fa manompo faie tsy nanam-bola hamboaragne aze iareo. Naho fa nindese iareo amo o mpamboatseo ey i tobile iareoy mba hagnonteneagne tie fire ty amboara iareo aze, le nisy lahilahy zay nagnontane tie: “Ia ty tompo ty tobile toy?” Le hoe i rahalahỳ: “Izaho, faie simba le hamboaregne.” Hoe i ndatỳ tama’e: “Mipay tobile manahake itoy ty valiko sady tena tea’e ka ze o loko’e zao. Kera fire ty amarota’areo aze?” Nahazoa i rahalahỳ tobile vaovao ty vily i tobile’e fa simbay. Hoe reke: “Tena tsy haiko ty  nihafaleako tamy i andro igne. Nino zahay fa tsy kisendrasendra avao igne fa fagnampeagne boake amy i Jehovah.”

10. Nagnino ty raha rehafe ty Salamo 37:5 ro mandrisike antika tsy hinekoneko miomba ty raha ilaentika ara-nofo?

¹⁰ Naho itika mitsanogne ty feo i mpiarake soay sady tsy minekoneko loatse miomba ty fomba hahazoagne ty raha ilaentika ara-nofo, le azo antoke fa hikarakara antika ty Jehovah. (Vakio ty Salamo 37:5; 1 Pet. 5:7) Dineho ohatse i olagne nirehafegne amy i  fehentsoratse fahadime teo rey. Va’e o loha ty keleiagneo ndra ty sefontika ty nampiasae i Jehovah mba hagnampe antika hahazo ze raha ilaentika isan’andro. Naho ohatse tsy afake manao izay sasa i loha ty keleiagney ndra naho nimontso asa tika, le matoky tika fa hahavazoho fomba hafa hikarakaragne antika ty Jehovah. Andao tika handineke raha hafa nirisihe i mpiarake soay tie tsy toko’e hataontika sasa ka.

11. Ino ty raha nirehafe i Jesosy fa tsy toko’e hataontika sasa, arake ty Matio 7:1, 2? Le nagnino zay ro sarotse amantika kindraike?

¹¹ Vakio ty Matio 7:1, 2. Nihay i Jesosy tie mora mitsaratsara ty hafa tika satria tsy voririke. Izay ty nahavy aze nirehake tie: “Ko mitsaratsara sasa.” Va’e fa mikezake mafe tika mba tsy hitsaratsara o mpiara-manompo amantikagneo. Fa ie ze o rehafegne zao tie tsy voririke tika. Ino ty toko’e hataontika naho mahatsapa tika tie mora mitsaratsara kindraike? Tsanogno ty Jesosy, le mikezaha mafe mba tsy hitsaratsara sasa.

12-13. Nagnino ty fisaintsaignagne ty fivazohoa i Jehovah i Davida Mpanjaka ro magnampe antika tsy hitsaratsara ty hafa sasa?

¹² Hagnampe antika tsy hitsaratsara ka ty fisaintsaignagne ty raha atao i Jehovah. Ty toetse soa o ndatio ro ifantoha’e. Trea zay naho fa nanao fahotagne lahibey ty Davida Mpanjaka. Nijangajanga tamy i Batseba reke, le tsy vita izay avao fa mbe vinono’e ka i valy i Batsebay. (2 Sam. 11:2-4, 14, 15, 24) Nanjare nijale ty Davida naho o keleia’eo, agnisa izay i vali’e ila’e rey noho ze raha natao’e zay. (2 Sam. 12:10, 11) Trea ka tie tsy natoky i Jehovah ty Davida tie indraike naho fa nagnisake ty tafy o Israelio, ie amy izao ty Jehovah tsy nandily aze hanao izay. Va’e noho i reke te hirehareha naho hitoky amy ty hamaro o tafi’eo varagne ty nahavy aze nanao izay. Faie ino ka ty nivoka izay? Israelita 70 000 teo ho eo ty nimate ty arete-manjamagne tamy izay.—2 Sam. 24:1-4, 10-15.

¹³ Akore ty ho fihevera’o i Davida naho niaigne ta Israely agne rehe tamy izay? Ho nieretseretse vao rehe tie tsy toko’e havela i Jehovah ty helo’e? Tsy nieretseretse hoe izay ty Jehovah. Ty tsy fivaliha i Davida amparake izay naho i reke tena nibebakey ro nifantoha’e. Navela’e iaby areke i fahotagne lahibey natao i Davida rey. Ony i Jehovah fa tena tea Aze ty Davida sady te hanao ty soa ka reke. Tsy fale vao rehe mahafantatse tie ty toetse soantika ro vazohoe i Andrianagnaharentikagney?—1 Mpanj. 9:4; 1 Tan. 29:10, 17.

14. Ino ty hagnampe ty Kristiana tsy hitsaratsara sasa?

¹⁴ Tsy mitamà antika ho voririke ty Jehovah. Tsy toko’e hitamà ty hafa ho voririke ka areke tika, fa hifantoke amy ty toetse soa iareo. Mateteke ro mora ty mahatrea ty raha tsy mete atao ty hafa naho mitsaratsara iareo amy izay. Faie ty ndaty ara-pagnahy, le vognogne ty hiara-hiasa amy ty hafa avao ndra tie mahatrea i fahalemea iareo rey aza. Hoe raty zay ty magnente o diamào amy i reke mbe tsy niliovegney. Faie ty ndaty mandineke le mahay tie tena ho soa sady ho hita tie sarobily  vata’e o diamào naho fa liovegne. Manahake i Jehovah naho i Jesosy, le mila mifantoke amy ty toetse soa ty hafa tika fa tsy amy ty fahalemea iareo.

15. Nagnino ty fandinehagne ty raha iaigna ty hafa ro hagnampe antika tsy hitsaratsara iareo?

¹⁵ Ino ka ty raha hafa hagnampe antika tsy hitsaratsara ty hafa? Mikezaha hisaintsaigne ty raha iaigna iareo. Dineho ty ohatse raike toy. Nisy ampela vantotse raike zay nampipoke vola kedekede roe tamy ty boate fampipoham-bola tamy i tempolỳ ao tie indraike. Naho fa nahatrea izay ty Jesosy, le tsy nirehake tie: ‘Le igne avao ty mba nimei’e?’ Tsy nifantoke tamy ty hatsiampe ty vola nimey i ampelay ty Jesosy fa nifantoke tamy ty anto’e nandrisike i ampelay naho ty raha niaigna’e. Le nidera aze ty Jesosy noho i reke nanao ze vita’e.—Lioka 21:1-4.

16. Ino ty ianara’o amy i Veronica?

¹⁶ Tena ilaegne ze mandineke ty raha iaigna ty hafa zay naho henteagne ty tantara i rahavave Veronica. Nisy rene raike miteza irery ty ana-dahi’e zay ty amy fiangona iareo eo. Hoe ty Veronica: “Hoe tsy le nazoto nivory naho nandeha nanompo zay ty fahatreavako iareo. Nanjare raty areke ty fiheverako iareo. Faie naho fa nanompo niarake tamy i rahavavey raho, le nihazavae’e tie tsy mora ty raha atrehe’e satria managne arete-tsaigne i ana-dahi’ey. Mikezake mafe ka reke mba hahazoa iareo ze raha ilae iareo ara-nofo naho mba hahavy  iareo hifandrambe soa amy i Jehovah avao. Noho ze olagne mahazo i ana-dahi’e zay, le mivory amy ty fiangonagne hafa agne reke kindraike.” Hoe ty Veronica: “Tsy nihaiko tie miatreke raha sarotse hoe izay reke. Tena teako sady hajaeko zao o rahavave iohoe noho ty kezake iaby atao’e amy ty fanompoagne i Jehovah.”

17. Ino ty raha tsy maintsy ataontika, arake ty Jakoba 2:8? Le akore ty fomba hampiharantika izay?

¹⁷ Ino ty toko’e hataontika naho mahatsapa tika tie mitsaratsara o mpiara-manompo amantikagneo? Mila tadidientika fa tsy maintsy tea o rahalahintikagneo tika. (Vakio ty Jakoba 2:8.) Toko’e hivavake mafe amy i Jehovah ka tika mba hampea’e tsy hitsaratsara sasa. Mila manao raha mifagnarake amy i vavake ataontikagney tika naho fa avy eo, le manokagne fotoagne mba hirehafagne amy i ndaty tsaratsaraentikagney. Hahafantatse soa aze tika amy izay. Ndra azontika atao ka ty mitaogne aze hanompo miarake amantika ndra hihinagne amantikagne agne. Naho itika mikezake hahafantatse soa o rahalahintikagneo, le trea tie mikezake manahake i Jehovah naho i Jesosy. Hahavita hifantoke amy ty toetse soa iareo tika amy izay. Atorontika amy izay ka tie mitsanogne i lily i mpiarake soay manao tihoey tika tie ko mitsaratsara ty hafa sasa.

18. Akore ty ampisehoantika fa mitsanogne ty feo i mpiarake mahaỳ tikagne?

¹⁸ Mitsanogne ty feo i mpiarake azey o agnondrio. Hoe izay ka fa mitsanogne ty feo i Jesosy o mpanonjohy ty lia’eo. Naho itika mikezake mafe tsy hinekoneko bey loatse sasa miomba ty raha ilaentika ara-nofo naho tsy mitsaratsara sasa, le hitahy ty kezake ataontika ty Jehovah naho i Jesosy. Lonike abey tika mba hitsanogne ty feo i mpiarake soay, ndra agnisa ty “agnondry tsy ampe” tika ndra agnisa ty “agnondry hafa.” (Lioka 12:32; Jaona 10:11, 14, 16) Amy ty lahatsoratse magnarake tika, le handineke raha roe hafa nirehafe i Jesosy fa toko’e hatao o mpanonjohy ty lia’eo ka.