Roe ty ana-dahy i Ely mpisorom-bey, le i Hofinia naho i Finehasa. Nanao asa fisorognagne tamy i tragno lay masigney ao iareo. Tsy nankatò ty lalà i Jehovah iareo fa nanao raty. Naho fa nanao sorogne hoahy i Jehovah o Israelitao, le jinobo iareo hoahy iareo ty soa i henay. Ndra tie nirey i Ely zay, le tsy nanare’e iareo. Nahavignetse i Jehovah ze raha zay.

Mbe nikede ty Samoela, faie tsy nagnorike ty natao i Hofinia naho i Finehasa, le nifale tama’e ty Jehovah. Niroro ty Samoela tie indraike hariva, le naharey feo nitoka aze. Nifoha reke, le nimbamy i Ely mbeo. Hoe reke: ‘Intoagne raho.’ Hoe ty Ely: ‘Tsy nitoka azo raho fa akia hiroro.’ Niroro indraike reke. Nitoka fagnintelo’e i feoy le nihay i Ely fa i Jehovah nitoka azeo. Rineha’e ty Samoela fa naho mbe mitoka indraike i feoy, le toko’e hamale reke tie: ‘Misaontsia Jehovah fa mitsanogne ty mpanompo’o toy.’

Niroro indraike ty Samoela. Nitoka i feoy tie: ‘Samoela! Samoela!’ Namale reke tie: ‘Misaontsia fa mitsanogne ty mpanompo’o toy.’ Hoe ty Jehovah: ‘Rehafo ty Ely fa ho sazeako reke naho o keleia’eo. Fanta’e fa nanao raha tsy mete tamy i tragnoko masigney ao o ana’e  reo, faie tsy nanare’e.’ Naho fa nimaraindray, le nanokake ty lala i tragno masigney ty Samoela. Natahora’e ty hirehake tamy i Ely ty raha nisaontsie i Jehovah. Nagnontenea i Ely reke tie: ‘Ino ty raha nisaontsie i Jehovah tama’o? Rehafo anake.’ Nambara’e amy izay.

Mbe niteà i Jehovah avao ty Samoela naho fa nihabey. Nifanta o ndatio iaby tie finily i Jehovah ho mpaminany naho ho mpitsara ty Samoela.