Sinere hiasa mafe manahake ty ndevo o Israelitao. Nampirehafe i Jehovah tamy i Farao ty Mosesy naho i Arona tie: ‘Votsoro hanompo ahy an-tane efetse agne o vahoakò.’ Nizesita ty Farao namale tie: ‘Tsy raharahaeko inogne o Jehovah zao, sady tsy halefako o Israelitao.’ A tie ndra natao i Farao mafe indraike aia ty asa iareo! Engao hagnanarako aze hoe ty Jehovah. Ino ty natao’e? Nandefasa’e loza folo ty Ejipta. Nisaontsy tamy i Mosesy ty Jehovah tie: ‘Tsy mitsanogne ahy i lahy Faraoy. Ho amy ty Renerano i Neily agne ty Farao naho maraindraigne. Le rehafo ama’e tie hanjare lio ty rano i Neily toy, satria tsy nenga’o handeha o vahoakò.’ Nandeha mbamy i Farao mbeo amy izay ty Mosesy. Trea i Farao ty niovà i rano i Neilỳ ho lio naho fa jinera i Arona. Nanjare naimbo i ranoy sady tsy nihay ninomegne. Nimatemate iaby ze fiagne tao. Faie mbe tsy navotso i Farao avao o Israelitao.

 Fito andro tafara izay, le nirahe i Jehovah ho amy i Farao agne ty Mosesy hirehake tie: ‘Naho tsy enga’o handeha o vahoakò, le ho feno boketrake ndra sahogne ty Ejipta.’ Natsanga i Arona nagnambone i kobai’ey, le nanjare feno boketrake ty Ejipta. Sambe feno iaby ty tragno, ty fandreagne naho ty bole. Boketrake avao ze ombagne! Nampangatahe i Farao i Mosesy ty Jehovah hampijanogne i lozay, fa halefa’e handeha o Israelitao. Najano i Jehovah i lozay faie o Ejipsiana reo ty nandraoke ty fate i boketrake rey. Naimbo indraike i tanàgney, faie le mbe tsy nalefa i Farao handeha avao o Israelitao.

Hoe indraike ty Jehovah tamy i Mosesy: ‘Ampijerao i Arona amy i kobai’ey o taneo fa hanjare mokegne o lembokeo.’ Le avy le feno mokegne ty Ejipta. Hoe ty mpiasa i Farao tama’e: ‘Loza boake amy i Jehovah toa!’ Faie le mbe tsy nimete avao ty Farao.