Folo andro tafara ty niheregna i Jesosy tan-dagnitse agne, le nahazo fagnahy masigne i mpianatse rey. Pentekosta taogne 33 tamy izay. Nisy ndaty boake amy ty tane sambe hafa niavy ta Jerosalema agne mba hankalaza fete. Nisy mpiana i Jesosy 120 teo ho eo ka, nivory tamy ty efetse ambone amy ty tragno raike, tamo o fotoagne iohoe. Tampoke teo, le nisy raha mahagaga niseho. Nisy raha hoe lelan’afo niseho tambone ty loha ty mpianatse tsikiraike, sady nanjare nahay firehake sambe hafa iareo. Nisy feo mafe mitovy amy ty tiobey nagneno tamy i tragnoy ao.

Nisy ndaty hafa karazagne niavy ta Jerosalema ao tamy izay. Vaho naharey i feoy iareo, le nilay mbamy i tragnoy mbeo hagnente tie ino ty raha niseho. Gaga iareo naho fa naharey i mpianatse rey nirehake tamy ty fireha iareo. Le hoe iareo: ‘Boake a Galilia agne ty ndaty retoa. Akore ty nahaia iareo ty firehantikagne?’

Nitsangagne taloha i vahoakey eo ty Petera naho ty apostoly ila’e. Nagnazava tamy i ndaty rey ty Petera tie vinono ty Jesosy,  le nivelome i Jehovah indraike. Hoe ty Petera: ‘Fa ankavanan’Andrianagnahare an-dagnitse agne ty Jesosy amy hinane zao, sady nimea’e fagnahy masigne zahay, fa izay ty nampi- tamàe’e. Izay ty mahavy o fahagagagne zao.’

Nitohigne ty fo i ndaty rey naho fa naharey ty reha i Petera, le nagnontane iareo tie: ‘Ino ty raha toko’e hatao’ay?’ Le hoe reke tamy iareo: ‘Mila mibebake nareo sady hatao badisa amy ty agnara i Jesosy, le hahazo fagnahy masigne ka nareo.’ Ndaty 3 000 teo ho eo ty natao badisa tamy i andro ignehoe. Nanomboke tamy izay, le nihamaro ty mpianatse ta Jerosalema ao. Nampea i fagnahy masigney i apostoly rey, le afake nagnampe i mpianatse rey ho lasa fiangonagne sady nampianatse iareo ze raha nandilia i Jesosy.