Nagninofy ty Nebokadnezara Mpanjaka tie indraike. Tsy niazon- droro reke fa nandineke i nofỳ avao. Hoe reke tamo o ambiasa’e reo: ‘Hazavao’areo ty nofiko toy.’ Hoe iareo: ‘O mpanjaka, rehafo ama’ay ze nofi’o zay.’ Hoe ty Nebokadnezara: ‘Rehafo’areo amako hoe raho, tsy ndra hovonoeko nareo.’ Hoe indraike iareo: ‘Rehafo i nofi’oy hagnazava’ay ty dika’e.’ Hoe reke: ‘Mpamitake nareo. Rehafo i nofikoy!’ Hoe iareo: ‘Tsy misy ndaty mahay izay mpanjaka fa sarotse.’

Niboseke ty Nebokadnezara, le nandily ty hamonoagne ze ndaty hendre ta Babylona ao, agnisa izay ka ty Daniela, naho i Hebreo telo lahy rey. Faie nangatake andro tsy ampeampe tamy i mpanjakay hey ty Daniela, le nangatake fagnampeagne tamy i Jehovah reke naho i nama’e rey. Ino ty natao i Jehovah?

Natoro i Jehovah i Daniela tamy ty fahitagne i nofy i Nebokadnezaray naho ty dika’e. Ie nimaray igne, nandeha tamy i mpanompo i mpanjakay agne ty Daniela sady nirehake tie: ‘Ko vonoegne o ndaty hendreo, fa izaho ty hagnazava i nofy i mpanjakay.’ Nentegne mbamy i mpanjakay mbeo ty Daniela, le hoe reke: ‘Nambaran’Andrianagnahare tama’o ty miomba ty hoavy. Izao i nofi’oy: Nahatrea sare vongagne bey rehe. Volamena ty loha’e, volafotsy ty tratra’e naho ty handri’e, saba ty tro’e naho ty fe’e, vigne ty ranjo’e, vigne mifangaro tane lietse binokoboko ty tombo’e. Nisy vato niafake boake am-bohitsey nidosy ty tombo i sare vongagney. Namotepoteke aze zay, sady nente i tiokey i sare vongagney naho fa niavy eo. Nanjare vohitse bey i vatoy, le nameno ty tane toy.’

 Hoe ty Daniela: ‘Izao ty dika’e: Ty fanjakà’o i loha volamenay. Ty fanjakagne handimbe azo i volafotsỳ. Hisy fanjakagne hoe saba, hanjaka amy ty tane toy iaby. Afara izay hisy fanjakagne mahery hoe vigne. Fara’e, hisy fanjakagne hizarazara, ty ila’e hoe vigne ty faheri’e, fa ty ila’e hoe tane lietse binokoboko. I vato boake am-bohitseỳ, le ty Fanjakàn’Andrianagnahare. Hopotepotehe’e o fanjakagne rehoe fa ie haharetse nainai’e.’

Niankohoke tagnatreha i Daniela eo ty Nebokadnezara sady nirehake tie: ‘I Andrianagnahare’oy ty nampahafantatse azo izao. Tsy misy hoe’e Reke.’ Tsy vinono i mpanjakay ty Daniela, fa tinendre’e ho lahibey ty ndaty hendre naho ho mpifehe ty faritse i Babylona. Namale ty vavake nanoe i Daniela ty Jehovah.