Maro ty Israelita noly ta Jerosalema agne. Faie mbe nisy Israelita nipetrake avao ty tamo o Fanjakagne Persianao agne, 70 taogne teo ho eo tafara izay. Agnisa’e ty Ezra mpisorogne sady mpagnanatse ty Lalà i Jehovah. Nirey i Ezra fa tsy nankatò ty Lalà i Jehovah sasa ty ndaty ta Jerosalema agne, le te hagnampe iareo reke. Hoe ty Artaksersesy mpanjaka i Persa tama’e: ‘Nampean’Andrianagnahare hahay hampianatse ty Lalà’e rehe. Akia areke sady indeso miharo ama’o ze te hiheregne a Jerosalema agne.’ Navory i Ezra ze te holy a Jerosalema agne, le nivavake tamy i Jehovah iareo mba harova’e naho fa an-dalagney. Le nandeha iareo.

Niavy ta Jerosalema agne iareo naho fa afake efa-bolagne. Hoe i mpifehe rey tamy i Ezra: ‘Tsy nankatò i Jehovah o Israelitao fa nanambaly ampela mpanompo sampy.’ Nitongaleke tagnatreha i vahoakey eo ty Ezra, le nivavake tie: ‘O Jehovah! Soa fagnahy tama’ay rehe, faie izahay ro mbe nanota tama’o avao.’ Le nifogne i ndaty rey, faie mbe nanao raty avao. Nifily androanavi-pagnahy naho mpitsara hagnampe iareo areke ty Ezra. Ie niafake telo volagne, le niroahegne ze tsy nimete hivavake tamy i Jehovah.

Nivita voatse i manda i Jerosalemay naho fa afake 12 taogne. Navory i Ezra i vahoakey. Nitsangagne iareo naho fa sinoka’e ty boke misy i Lalàn’Andrianagnaharey. Nidera i Jehovah ty Ezra, le natsanga i vahoakey ty tagna iareo. Vinaky i Ezra i Lalànay sady nihazavae’e. Nitsanogne soa i vahoakey sady nifogne, satria nivalike tamy i Jehovah, le nitagny iareo naho fa niavy eo. Mbe namaky i Lalànay tamo o ndatio avao ty Ezra naho fa nihamaray igne. Le nanjare fanta iareo fa toko’e hanao ty Fete ty Tragno Ratsankazo iareo. Le avy le niomagne hanao i fetey iareo.

 Naharetse fito andro i fetey. Fale iaby o ndatio sady nisaotse i Jehovah, fa maro i vokatsey. Mbe tsy nisy fete hoe izay ty ta Israely agne, tafara ty andro i Josoa. Nivory indraike i vahoakey tafara i fetey, le nivavake ty Ezra tamy izay tie: ‘O Jehovah! Nafaha’o tsy ho ndevo zahay, le nimea’o hanegne tan-tane efetse agne sady nimea’o ty tane fanjaka toy. Nagniraha’o mpaminany ka zahay hagnanatse anay, faie izahay ro tsy nankatò azo. Nandefera’o zahay, satria tsy mivalike amy ty saontsi’o tamy i Abrahama rehe. Manao vava zahay fa hankatò azo lognandro.’ Natao iareo an-taratasy i vava nanoe iareoy, le nisia i ndaty ambone rey naho o Levitao vaho o mpisorogneo tampò.