HISY ndaty tsy hivalike aman’Andrianagnahare vao naho iharam-pitsapagne fara izay ty mafe, sady ndra tie le hoe tsy misy soa azo aza ty fankatoavagne an’Andrianagnahare? Niboake tamy ty andro i Joba, longo i Abrahama, o fagnonteneagne iohoe sady nivoavale tamy ze fotoagne zay avao ka.

Nitoboke ta Arabia agne ty Joba, tamo o ana o Israelio mbe ta Ejipta agney. Nivory tan-dagnitse agne o anjelio tie tamy izay, agnisa izay ka ty Satana mpigoreve. Nisaontsy tagnatreha iareo eo ty Jehovah tie natoky i Joba mpanompo’e. Nisaontsy ka reke fa tsy misy ndaty manahake i Joba naho tsy fivalihagne ro rehafegne. Faie nizizo ty Satana tie matoa ty Joba manompo an’Andrianagnahare, le satria nitahie’e naho narova’e. Nirehake ka reke fa hagnozogne an’Andrianagnahare ty Joba naho afahagne ama’e iaby ze raha anagna’e.

Nengà i Jehovah hitsapa i Joba areke ty Satana, le natao’e tsy nisy i fanagna’ey sady nivonoe’e i ana’e rey. Natao’e ka ze hamparare aze. Tsy fanta i Joba tie nagnino ty Andrianagnahare ro nagnenga aze hihara ze raha rezay iaby, satria tsy hai’e tie i Satana ty nahavy izay. Tena tsy nivalike reke.

Nitilike i Joba ty ragne’e telo lahy tafara izay. Le mahafeno peje maro amy boke i Joba ao ty reha i ragne’e saretsare’e rey. Tea iareo hino ty Joba tie nagnasaze aze ty Andrianagnahare satria nanao fahotagne mietake reke. Nirehake aza iareo tie tsy mba fale amy ty mpanompo’e ty Andrianagnahare sady tsy matoky iareo. Tsy nagneke ze heve-diso’e zay ty Joba. Nandietse mafe reke fa tsy hivalike amparam-pahafate’e!

Faie diso ka ty Joba satria ty hagnamaregne ty tegna’e ty tena nieretserete’e. Nagnitsy aze ty Eliho, lahilahy tanora nitsanogne ty reha iareo efa-dahy. Nihazavae’e fa ty fagnamaregnagne ty zo i Jehovah hinday ro raha lahibey mandikoatse ty fagnaporofoagne tie ndaty maregne ty ndaty raike. Nanare’e mafe ka iareo telo lahy.

Nagnitsy ty fomba fisaigna i Joba ty Jehovah Andrianagnahare naho fa niavy eo. Nampandinehe’e o raha finorogne maro mahaveregneo ty Joba mba hahatreava’e fa tena tsisy dika’e o ndatio naho oharegne aman’Andrianagnahare. Niambane ty Joba, le nagneke hahitsy. Nagnasitragne aze areke ty Jehovah, noho ireke ‘bey hatea sady mamindra fo.’ (Jakoba 5:11) Nagnomey aze anake folo naho fanagnagne indroe i nanagne talohay reke. Tsy nivalike tamy i Jehovah ty Joba ndra tie nihara ty fitsapagne fara izay ty mafe aza. Voaporofo’e areke tamy izay fa diso i reha i Satana tihoey hivalike aman’Andrianagnahare o ndatio naho iharam-pitsapagne.

​—Boake amy ty boke i Joba ao.