Hoahy o Romanao 1:1-32
1 Boake amy i Paoly mpanompo i Kristy Jesosy sady tinoka ho apostoly naho natokagne mba hagnambara ty talily soan’Agnahare ty taratasy toy.
2 Fa nampitamae’e mialoha o talily soa iohoe tamy ty alala o mpaminani’eo tagnate Soratse Masigne ao.
3 Mirehake miomba i Ana-dahi’ey ze talily soa zay. Naho arake ty nofotse, le boake amy ty tarana i Davida reke.
4 Trea tie Anan’Agnahare vata’e reke, satria nampiasa ty heri’e ndra i fagnahy masigney ty Andrianagnahare mba hamelomagne aze amy ty mate. I Jesosy Kristy Tompontikagne o Anan’Agnahare iohoe.
5 Tamy ty alala’e ro nahazoa’ay hasoa fagnahy miambake naho ty fanendreagne ho apostoly mba hagnampe ty ndaty amy ty firenena iaby, amy izay iareo haneho finoagne naho hankatò vaho hagnomey voninahitse i agnara’ey.
6 Boake amo o firenena iohoe nareo, le tinoka mba hanonjohy ty lia i Jesosy Kristy.
7 Ho anareo iaby a Roma agneo ty anoratako itoy. Tean’Andrianagnahare nareo sady tokavegne tihoe ndaty masigne.
Lonike abey ty Andrianagnahare Raentikagne naho i Jesosy Kristy Tompo mba haneho hasoa fagnahy miambake ama’areo naho hagnomey fiadagnagne anareo.
8 Voaloha’e, misaotse i Andrianagnaharekoy amy ty alala i Jesosy Kristy raho noho ty ama’areo, satria rehafegne magneran-tane ty finoa’areo.
9 Manao fanompoagne masigne ho an’Andrianagnahare amy ty foko* iaby raho, le izay ty mahavy ahy mitory ty talily soa miomba i Ana-dahi’ey. I Andrianagnahare ty vavolombelogne fa lava mivavake ho anareo avao raho.
10 Mangatake aman’Agnahare ka raho mba ho tolisoa ama’areo agne naho zoton’arofo’e,
11 satria fa tsy ligneko ty hahatrea anareo, le hizara fagnomezagne ara-pagnahy ama’areo mba hahavy anareo hioregne soa.
12 Faie naho ty maregne ka, le mba hifampahery tikagne. Ty finoa’areo hampahery ahy, le ty finoako hampahery anareo.
13 Teako hohai’areo ry rahalahy fa mateteke raho ro te handeha ama’areo agne, amy izay raho mahatrea vokatse ama’areo eo, manahake ty nataoko tamo o firenena hafao agne. Faie lava misy raha misakagne ahy avao hatrake amy izao.
14 O Grikeo naho o tsy Grikeo, o ndaty mahilalao naho o ndaty tsy mahilalao, le managne trosa amako.
15 Fa tsy ligneko areke ty hagnambara i talily soay ama’areo a Roma agne ka.
16 Ty anto’e, tsy megnatse noho i talily soay raho. Naho ty maregne aza, le io ty fomba ampiasaen’Agnahare hanoroagne ty heri’e mba hagnavotagne ze kila ndaty manam-pinoagne, le o Jiosio hey vaho izay o Grikeo.
17 Satria amy ty alala io ty ampibaribariagne ty hamaregnan’Andrianagnahare noho ty finoagne naho mba hagnatanjahagne finoagne, arake i voasoratse tihoey tie: “Fa ze ndaty maregne, le hovelogne noho ty finoa’e.”
18 Ty havigneran’Agnahare, le habaribary boake an-dagnitse agne amy ze ndaty tsy matahotse aze naho amy ze tsy manao ty maregne. Ty anto’e, manao raha iareo mba hikalagnagne o ndatio tsy hahafantatse i hamaregnagney.
19 Toko’e hahafantatse ty miomba an’Agnahare iareo, satria maro ty fomba nampibaribaria’e izay tamy iareo. Nampahafantaren’Agnahare iareo mazava soa zay.
20 I toetse’e tsy trea maso rey, le trea mazava soa nanomboke tamy ty namorogna’e ty tontolo toy, satria trea amy ty raha finoro’e zay. Ndra ty heri’e naho ty maha Andrianagnahare aze aza, le trea mibaribary amy i raha rey. Tsy managne fialan-tsiny areke iareo.
21 Ndra tie mahafantatse an’Andrianagnahare aza iareo, le tsy magnomey voninahitse aze sady tsy misaotse aze. Iareo aza nanjare tsy misaigne sady nanjare naiegne i fo iareo gagney.
22 Ndra tie manao ty vata’e ho mahilala aza iareo, le nanjare gege naho ty maregne.
23 I voninahitse toko’e homea iareo i Andrianagnahare tsy mete mateỳ, ndra nimea iareo o sare o ndaty mete lo naho o sare vorogne naho o sare biby managne tomboke efatse vaho o sare biby milalio.
24 Nengan’Andrianagnahare hanao i raha maloto irie ty fo iareoy areke iareo, amy izay ho afa-baraka ty vata iareo.
25 Natakalo iareo vande ty hamaregnagne miomba an’Agnahare. O raha finorogneo ro nitompoe iareo naho nanoa iareo fanompoagne masigne fa tsy i Mpamorogney, i fagneva ty hoderaegne nainai’ey. Amena.
26 Izay ty nahavy an’Andrianagnahare hagnenga iareo hagnaram-po amy ty filagne mampangorigne. Nialà ty ampela amy iareo eo i filagne voajagnaharey, fa nanao raha mifanohetse amy izay iareo.
27 Nialà ty lahilahy amy iareo eo ka i filagne voajagnahare toko’e hatao amy ty ampelay, fa ndra nanao raha mifanohetse amy izay iareo. Ty fagniriagne hila lahilahy ro tena nirehetse am-po iareo, le nanao ze raha tena raty zay iareo. Faie hahazo saze mafe mifanandrife amy ze raha raty atao iareo zay iareo.
28 Satria tsy hita iareo ty anto’e ilagne ty fahafantaragne ty maregne miomba an’Agnahare,* le nengan’Agnahare hanagne toe-tsaigne tsy ankasitraha’e iareo, amy izay manao ty raha tsy toko’e hatao.
29 Feno ze hene tsy hamaregnagne iareo, raty fagnahy, tsy mete afa-po, mpanao raha raty, bey fialognagne, mpamono ndaty, tea mifanointoigne, mpamitake, malaigne ndaty, mpitsikotsiko,
30 mpandratiraty, malaigne an’Andrianagnahare, magnompa, magnambone tegna, miebotsebotse, mpikotroke raha raty, tsy mankatò rae aman-drene,
31 tsy misaigne,* tsy magnaja fifagnarahagne, tsy tea ty keleia’e, naho tsy miferenaigne.
32 Hay iareo soa fa misaontsy ty Andrianagnahare tie fagneva ty hovonoegne ty ndaty manao o raha rehoe. Faie tsy vita tie manao o raha raty rehoe avao iareo, fa mahafale iareo ka ty mahatrea ndaty manao o raha rehoe.
Fagnamarehagne ambane peje
^ Abt: “amy ty fagnahiko.”
^ Abt: “tsy tea iareo ty hitagne ty hamaregnagne miomba an’Agnahare.”
^ Ndra: “tsy soa fagnahy.”
