Talily Soa Nisorate i Matio 15:1-39
15 Tafara izay, le nisy Fariseo naho mpampianatse lalàna boake a Jerosalema agne nimbamy i Jesosy mbeo. Le hoe iareo:
2 “Nagnino o mpiana’ò ie tsy magnorike fomban-drazagneo? Iareo zao ohatse tsy mba manasa tagnagne naho fa hihinagne.”
3 Le hoe ty navale’e iareo: “A nagnino ty lilin’Andrianagnahare tsy orihe’areo fa ndra ty fomban-draza’areo ro orihe’areò?
4 Nisaontsy zao ohatse ty Andrianagnahare tie: ‘Hajao ty rae’o naho ty rene’o,’ naho tihoe: ‘Ze miteratera ty rae’e ndra ty rene’e, le fagneva ty hovonoegne.’
5 Faie hoe nareo: ‘Ze mirehake amy ty rae’e ndra ty rene’e tie: “Fa natokako ho an’Andrianagnahare ze raha iaby ahafahako ho nagnampeagne anareo,”
6 le tsy voatere magnaja ty rae’e sasa.’ Tena tsy asia’areo dika’e areke ty saontsin’Agnahare fa i fomban-draza’areoy ro lahibey ama’areo.
7 Ry mpanao soa miatreke, maregne vata’e i faminaniagne nirehafe i Isaia mpaminany miomba anareo tihoey tie:
8 ‘Am-bava’e eo* avao ty agnajà ty vahoake retoagne ahy fa ty fo iareo lavitse ahy.
9 Tsisy dika’e areke ty fanompoa iareo ahy satria lily o ndaty ro ampianare iareo.’”
10 Ie naho fa niavy eo, le nampagnarine’e aze i vahoakey. Le hoe reke tamy iareo: “Tsanogno’areo soa toy, le fantaro’areo ty dika’e.
11 Tsy ty raha hane* o ndatio ro mandoto aze fa ty rehake aboa ty vava’e.”
12 Tafara izay, le nimbama’e mbeo i mpiana’e rey sady nirehake tie: “Hai’o vao fa niboseke o Fariseò naho fa naharey i reha’oy?”
13 Le hoe ty navale i Jesosy iareo: “Ze hatae tsy nambolé i Raeko an-dagnitse agney, le hombotagne.
14 Engao agne hiboseha iareo, fa toe goa mpitari-dalagne iareo. Le naho ty ndaty goa ro mitarike goa, le sambe hotonta an-davake agne iareo.”
15 Le nirehake ty Petera tie: “Mba hazavao ama’ay ty dika i fagnoharagne nirehafe’o taloha teoy.”
16 Le hoe ty Jesosy: “Ndra inareo ka vao le mbe tsy mahazo igne?
17 Tsy hai’areo vao fa ze raha hane o ndatio, le mizilike an-tro’e ao, le avy eo miakatse boake amy i vata’ey ao?
18 Fa ze rehake aboa ty vava o ndatio, le boake am-po’e ao. Irey ro mandoto aze.
19 Boake am-po o ndatio ao ohatse ty iboaha ty eretsere-draty retoa: Vono ndaty, fagnitsakitsaham-baly, fijangajangagne, halatse, vavolombelogne mavande, naho o fanivetiveagneo.
20 O raha rehoe ro mandoto o ndatio. Fa ty mihinagne amy ty tagnagne tsy misasa tsy mandoto aze.”
21 Niala ty eo ty Jesosy, le nandeha ta Tiro naho ta Sidona agne.
22 Le nisy ampela raike fenisiana nitoboke tagne zay, nimbamy i Jesosy mbeo. Nangatake tamy i Jesosy reke tie: “Mba iferegneso raho Tompo, ihe Ana i Davida! Mijale mafe ze anak’ampelako zay satria misy demonia.”
23 Faie tsy mba nitoigne’e ndra raike i ampelay. Le nimbamy i Jesosy mbeo i mpiana’e rey sady nirehake tie: “Roaho agne ty ampela tia fa mamantsigne afarantikagne ao avao!”
24 Le hoe ty Jesosy: “Amo o agnondry nimontso amo o tarana o Israelio eo avao ro nagnirahagne ahy.”
25 Faie le mbe nimbama’e mbeo avao i ampelay, le niankohoke tama’e teo sady nirehake tie: “O Tompo, mba ampeo raho!”
26 Le hoe ty navale i Jesosy aze: “Tsy mete naho alaegne ty mofo o ajajao, le atorake amo o anak’amboao eo.”
27 Le hoe i ampelay: “Maregne zay Tompo. Faie o anak’amboao anio mihinagne ty pote mofo mipoke boake ambone i lataba i tompo iareoy ey.”
28 Le hoe ty Jesosy tama’e: “Tena manam-pinoagne rehe rampela. Lonike mba hotanterake ama’o i raha irie’oy.” Le nisitragne tamy ze lera zay i anak’ampela’ey.
29 Naho fa niala teo ty Jesosy, le nandeha agnila ty Ria i Galelia agne. Ie reke niavy agne, le nanganike tamy ze vohitse zay, le nionjogne tamy ty toeragne aboabo tey.
30 Naho fa niavy eo, le nisy ndaty maro ty nimbama’e mbeo ninday ndaty kepeke, manan-kandra, goa, moagne naho ty maro hafa. Le natao iareo an-tombo i Jesosy eo rey, le nisitragne’e.
31 Nigaga i ndaty maroy naho fa nahatrea i moagne rey nirehake, i ndaty manan-kandra rey nisitragne, i kepeke rey nandeha naho i goa rey nahatrea. Le nagnomey voninahitse i Andrianagnahare o Israelioy iareo.
32 Faie nitokave i Jesosy i mpiana’e rey, le hoe reke tamy iareo: “Mahaferenaigne ahy ty vahoake retoa satria fa telo andro zay iareo ro nijanogne tetoa, hafarà iareo fa tsy misy raha hohanegne. Faie tsy teako hampoliegne keré iareo tsy mone hofanegne an-dalagne ey avao.”
33 Faie hoe i mpiana’e rey tama’e: “Aia ty hahatreavantikagne mofo hahaeneke ty ndaty maro retoa amy ty toeragne mitokagne toy?”
34 Le hoe ty Jesosy tamy iareo: “Fire ty mofo ama’areo agne?” Hoe ty navale iareo: “Fito, le misy fiagne madineke tsiampeampe ka.”
35 Nirehafe i Jesosy i vahoakey mba hitoboke amy i taney eo. Tafara izay,
36 le nalae’e i mofo fitoy naho i fiagney. Ie naho fa boake nisaotse an’Agnahare reke, le nitapatapahe’e i mofoy, le nimea’e i mpiana’e rey. Le i mpiana’e rey ka ty nizara aze tamy i vahoakey.
37 Nihinagne ze ndaty teo, le nivontsy.* Naho fa navory i mpiana’e rey ty sisa tsy nilany tamy i mofoy, le nahafeno vaha bey fito.
38 Lahilahy 4 000 ty nihinagne teo tamy izay, ankoatse ty ajaja aman’ampela.
39 Ie naho fa boake nandrava i vahoakey reke, le nijogne agnate lakagne ao. Nandeha iareo, le niavy amy ty faritse a Magadana agne.
Fagnamarehagne ambane peje
^ Abt: “An-tsogni’e eo.”
^ Abt: “raha ampidire’e am-bava’e eo.”
^ Ndra: “nivoky.”
