Talily Soa Nisorate i Matio 12:1-50
-
“Tompo o Sabatao” ty Jesosy (1-8)
-
Lahilahy mate tagnagne nisitragnegne (9-14)
-
Mpanompo ikokoan’Andrianagnahare (15-21)
-
Boake amy ty fagnahy masigne ty androahagne demonia (22-30)
-
Fahotagne tsy ahazoagne famelan-keloke (31, 32)
-
Ty voa’e ty amantaragne o hataeo (33-37)
-
Famantaragne tamy i Jona (38-42)
-
Naho fa miheregne o demoniao (43-45)
-
I rene i Jesosỳ naho i rahalahi’e rey (46-50)
12 Tie indraike zay, le nandalo tamy ze horake zay ty Jesosy naho i mpiana’e rey. Sabata i androy tamy izay. Nikeré i mpiana’e rey, hafarà iareo nandrofotse voam-bare, le nihane iareo.
2 Naho fa nahatrea izay o Fariseò, le hoe iareo tamy i Jesosy: “Henhenke i mpiana’o rey fa manao ty raha tsy azo atao amy ty andro Sabata!”
3 Le hoe reke tamy iareo: “Mbe tsy nivakie’areo tamy i Soratse Masigney ao vao ty raha natao i Davida naho i lahilahy niarake tama’e rey naho fa nikeré iareo?
4 Nizilike tamy i anjomban’Agnaharey ao iareo, le nihinagne tamy i mofo masigney.* Ie amy izao naho i Lalànay ro henteagne, le tsy mahazo mihinagne amy i mofoy iareo, fa o mpisorogneo avao ro mahazo mihinagne aze.
5 Mbe tsy nivakie’areo tamy i Lalànay ao ka vao tie, miasa amy i tempolỳ ao avao o mpisorogneo ndra tie Sabata aza, faie tsy atao tie mandika i Lalàna miomba ty Sabatay iareo?
6 Faie rehafeko ama’areo, fa misy lahibey ambone i tempolỳ ty eto.
7 Naho niazo’areo ty teà ty Soratse Masigne horehafegne amy i tihoey tie: ‘Ndaty mamindra fo ro teako fa tsy ndaty manao sorogne’, le tsy ho natao’areo tie mandika lalàna o ndaty tsy nanao raha ratio.
8 Mirehake izay raho satria i Ana o ndatỳ ty Tompo o Sabatao.”
9 Niala ty eo reke naho fa niavy eo, le nizilike tamy ze sinagoga zay ao.
10 Nisy lahilahy raike mate tagnagne ty tao. Nisy ndaty te hamandrike i Jesosy, le nagnontane aze hoe izao: “Mete vao ty magnasitragne amy ty andro Sabata?”
11 Le hoe reke tamy iareo: “Naho ohatse nareo managne agnondry raike, faie mijogne agnate lavake agne amy ty andro Sabata, le henga’areo ao avao vao i agnondri’areoy satria Sabata i androy?
12 Faie o ndatio, le sarobily lavitse naho ampitahaegne amo o agnondrio. Azo atao areke ty manao soa amy ty andro Sabata.”
13 Hoe reke tamy i lahilahy mate tagnagney naho fa niavy eo: “Ahitsio i tagna’oy.” Naho fa nahitsy i lahilahỳ i tagna’ey, le nisitragne sady nitovy tamy i raikey ka.
14 Le avy le niakatse o Fariseò tafara izay sady nipay hevetse mba hamonoagne i Jesosy.
15 Naho fa nihai’e ze raha zay, le avy le niala ty eo reke. Maro ka ty ndaty nagnorike i Jesosy, le nisitragne’e iaby ze narare tamy iareo.
16 Faie rinara’e mafe iareo mba tsy hagnambara ty miomba aze ama o ndaty,
17 amy izay hotanterake i raha nampisaontsien’Andrianagnahare i Isaia mpaminany tihoey tie:
18 “Io i Mpanompo jinoboko naho ikokoakoy sady mahafale ahy ze raha atao’e! Homeako ty fagnahiko reke sady hampahafantare’e o ndaty firenena hafao ty atao tihoe rare’e.
19 Tsy hialy reke ndra hikorakorake, le tsy hisy ndaty haharey ty feo’e ka ty an-dalagne ey.
20 Tsy hofolahe’e o bararata fa misy handra’eo, le tsy hovonoe’e o jiro fa milirelireo. Hanao hoe izay avao reke amparake ty hagnitsia’e ze tsy rare’e iaby.
21 Ty agnara’e ro hotamae ze kila ndaty.”
22 Ie tie indraike, le nisy lahilahy nisy demonia zay nente ty ndaty tama’e teo. Nampanjaré i demoniay goa naho moagne o lahilahy iohoe. Faie niroahe i Jesosy i demoniay mba hagnasitragnagne i lahilahỳ, le nahay nirehake naho nahatrea reke.
23 Nigaga i vahoakey naho fa nahatrea izay, le hoe iareo: “Va’e io varagne ze o Ana i Davida zao!”
24 Naho fa naharey izay o Fariseò, le nirehake tie: “Tsy ho nahavita nandroake demonia ty lahy tia naho tsy nahazo alalagne boake amy i Belzeboba, i lahibey o demoniaoy.”
25 Faie nihay i Jesosy ze eretsere iareo zay, le hoe reke tamy iareo: “Ze fanjakagne mialy an-tragno, le horava. Le ze tanàgne ndra ze keleiagne mialy an-tragno, le tsy haharetse.
26 A naho i Satana avao ro mandroake o demonia’eo, le mialy an-tragno iareo. Tsy haharetse areke ty fanjakà’e naho izay ty raha misy.
27 Le izao ka: Naho boake amy i Belzeboba ty fahefagne ahafahako mandroake demonia, le boake amy ia ty fahefagne ahafaha o mpiana’areò* mandroake demonia? O mpiana’areò avao areke ro hitsara anareo amy i reha’areo teoy.
28 Fa naho amy ty alala ty fagnahy masin’Andrianagnahare ty androahako demonia, le fa ama’areo eto vata’e i Fanjakàn’Andrianagnaharey faie tsy fanta’areo.
29 Misy ndaty vao afake mizilike an-tragno ty lahilahy raike matanjake ao mba hangalake ty fanagna’e naho tsy arohi’e hey reke? Arohi’e hey i lahilahy matanjakey vaho izay reke afake mangalake ze raha an-tragno’e ao.
30 Ze tsy manohagne ahy, le manohetse ahy, le ze tsy mamory miarake amako, le mampiparitake.
31 “Izay ty mahavy ahy mirehake ama’areo tie, ze fahotagne naho ze fanivetiveagne atao o ndatio, le hahazoa’e famelan-keloke. Fa ze manivetive i fagnahy masigney, le tsy hahazo famelan-keloke.
32 Ze manivetive i Ana o ndatỳ zao ohatse, le hahazo famelan-keloke. Fa ze manivetive i fagnahy masigney, le tsy hahazo famelan-keloke ndra amy izao zay ndra amy i tontolo vaovao ho avỳ.
33 “Naho soa ty hatae ambolé’areo, le hamoa voa soa. Fa naho hatae raty, le hamoa voa raty. Ty voa’e ty amantaragne ty hatae raike tie soa ndra raty.
34 O ry tarana o meregne misy poizigneo, akore ty ahafaha’areo mirehake raha soa, ie amy izao nareo raty fagnahy? Ze raha mameno ty fo o ndatio anio ro rehafe’e.
35 Ty ndaty soa, le mirehake raha soa satria raha soa ty mameno ty fo’e. Le ty ndaty raty mirehake raha raty satria raha raty ty mameno ty fo’e.
36 Rehafeko ama’areo, fa hotsaraen’Agnahare amy i Andro Fitsaragney ze mirehake raha tsy misy dika’e.
37 Satria arakarake ty raha rehafe’areo ro hanoan’Agnahare anareo tihoe ndaty maregne ndra ndaty raty.”
38 Le hoe o mpampianatse lalànao naho o Fariseò tamy i Jesosy: “O Mpagnanatse, mba te hahatrea famantaragne* boake ama’o zahay.”
39 Le hoe ty navale i Jesosy iareo: “Lava mangatake famantaragne avao o taranake raty fagnahy naho mpagnitsakitsa-balio. Faie tsy misy famantaragne homeagne iareo naho tsy i famantaragne tamy i Jona mpaminanỳ avao.
40 I Jona zao nijanogne tan-tro i fiam-beỳ ao tagnate ty telo handro naho telo halegne. I Ana o ndatỳ ka areke, le hijanogne telo handro naho telo halegne an-kibory* ao.
41 Amy i Andro Fitsaragney ka, le hovelomegne amy ty mate miarake amy ty taranake toy ty ndaty ta Ninive agne, le hanoro amy ty taranake toy tie diso iareo. Ty anto’e, nibebake iareo naho fa nitory tamy iareo ty Jona. Faie misy lahibey ambone i Jona ty eto.
42 Amy i Andro Fitsaragney, le hovelomegne amy ty mate miarake amy ty taranake toy i mpanjakavave i atimoy,* le hanoro amy ty taranake toy tie diso iareo. Ty anto’e, lavitse ty nisy aze faie le niavy amy i Solomona agne reke, mba hitsanogne ty fahendrea’e. Faie misy lahibey ambone i Solomona ty eto.
43 “Naho misy demonia miala amy ty ndaty raike, le mandeha am-patrambey agne reke mba hipay toeragne hitofatofagne. Ie reke tsy nahatrea toeragne,
44 le izao ty nirehafe’e: ‘Hiheregne amy i tragno nialàkoy agne raho.’ Ie reke niavy ao, le aheo’e naho tsy misy ndaty mitoboke ty ao, faie malio soa sady mihengo soa i tragnoy.
45 Le mandeha reke mipay demonia fito hafa mbe raty ambone’e, le mizilike amy i tragnoy ao iareo sady lelia’e mijanogne ao. Mbe ho raty ambone i talohay areke ty ho fiaigna ze ndaty zay. Hanao hoe izay ka ty taranake raty fagnahy toy.”
46 Tamy i Jesosy mbe nirehake tamy i vahoakeỳ, le niavy ty rene’e naho i rahalahi’e rey faie nitsangagne tan-tane ao avao. Nite hirehake ama’e iareo.
47 Le nisy ndaty nirehake tamy i Jesosy tie: “Ao ty rene’o naho i rahalahi’o rey mitsangagne an-tane ao te hirehake ama’o.”
48 Le hoe ty navale’e i ndatỳ: “Ia moa ty reneko, le ia ty rahalahiko?”
49 Le nitondroe i Jesosy i mpiana’e rey, le hoe reke: “Ireo ty reneko naho ty rahalahiko.
50 Ty anto’e, ze manao ty zoton’arofo i Raeko an-dagnitse agney, ro rahalahiko naho rahavaveko vaho reneko.”
Fagnamarehagne ambane peje
^ Abt: “mofo atoro.”
^ Ndra: “o ana’areò.”
^ Ndra: “fahagagagne.”
^ Abt: “am-po tane.”
^ Ndra: “i mpanjakavave i Shebay.”
