Talily Soa Nisorate i Lioka 24:1-53
24 Faie tamy i andro voaloha’e amy ty heregnandroy, le nandeha an-kibory agne maraindray bey iareo sady ninday i raha magnitse nomane iareoy.
2 Faie aheo iareo naho fa tsy tamy i kiborỳ eo i vato hili’ey.
3 Naho fa nizilike tagnate i kiborỳ ao ka iareo, le tsy nahatrea i fate i Jesosy Tompoy.
4 Tamy iareo mbe nidaban-drahay, le nisy lahilahy roe nagnisy akanjo mamilepiletse nitsangagne ty tagnila iareo eo.
5 Natahotse areke i ampela rey, le tsy nahavany nagnente iareo fa niondreke. Le hoe i lahilahy rey tamy iareo: “Nagnino ro amy ty mpisy o mateo atoy ro ipaliava’areo i velogney?
6 Tsy ato reke fa nivelomegne amy ty mate. Tsy tsiaro’areo vao i raha nirehafe’e tama’areo tamy ireke mbe ta Galelia agney?
7 Nirehake reke tamy izay tie, hatolotse amo o mpanotao i Ana o ndatỳ, le hovonoe iareo amy ty boda-katae faie hovelogne reke amy ty andro fahatelo.”
8 Izay vaho nigadogne an-tsay iareo ao i reha’ey.
9 Niala boake an-kibory eo areke iareo, le nitalily ze raha rezay tamy i 11 lahy rey naho tamy ty mpianatse hafa.
10 I Maria Magdalena naho i Johana vaho i Maria rene i Jakoba naho ty ampela hafa niarake tamy iareo ty nitalily o raha rehoe tamy i apostoly rey.
11 Faie tsy ninoa iareo ty reha o ampela rehoe satria atao iareo ho nirehadrehake avao.
12 Faie nitsangagne ty Petera, le nilay an-kibory agne. Nibotreke ty Petera naho fa nizilike tan-kibory ao, faie aheo’e naho i lamba rongony namognosagne i fate i Jesosỳ avao ty tao. Le nandeha reke sady nandineke ty raha va’e niseho tao.
13 Tamy i andro ignehoe avao, le nisy mpianatse roe lahy nandeha amy ze tanàgne kedekede atao tihoe Emaosy zay. Raike amby folo kilometatse eo ho eo miala i Jerosalema ty misy o tanàgne iohoe.
14 Tamy iareo tan-dalagne eỳ, le nifampirehake i raha niseho rey iaby.
15 Tamy iareo mbe nirehake i raha nisehoỳ, le nimbamy iareo mbeo ty Jesosy sady niharo lia tamy iareo.
16 Nitrea iareo reke faie tsy nihay iareo.
17 Le hoe ty Jesosy tamy iareo: “Ino o raha debagne’areo an-dalagne etoy zao?” Le nijanogne iareo sady trea tie nalahelo vata’e.
18 Faie namale ty raike amy iareo, i tokavegne tihoe Kleopasỳ tie: “Ambahiny mitoboke irery a Jerosalema ao v’iheo, ie tsy mahay i raha niseho tao vaho tsy elaio?”
19 Le hoe reke tamy iareo: “Raha ino izaò?” Le hoe iareo tama’e: “Ty raha nanjò i Jesosy te Nazareta. Natoro’e tamy ty raha natao’e naho tamy ty raha nirehafe’e tagnatrehan’Agnahare eo vaho tagnatreha o ndatio eo iaby fa mpaminany miambake reke.
20 Natolo o lahibey ty mpisorogneo naho o manam-pahefagneo mba hovonoegne reke, le nipehe iareo tamy ty boda-katae ka.
21 Ie amy izao zahay nitamà tie ireke i hagnavotse o Israelioy. Telo andro androany zay ty nisehoa o raha rehoe.
22 Ankoatse izay ka, nisy ampela nama’ay rezay tena nahagaga anay ty raha nirehafe iareo. Nandeha tan-kibory agne iareo tamy i maraindray beỳ.
23 Ie naho fa tsy nitrea iareo tao i fate’ey, le nirehake iareo tie nao nahatrea anjely nirehake tamy iareo tie nivelomegne ty Jesosy.
24 Nandeha tan-kibory agne ka ty ila’e ama’ay faie mbe nitovy amy ty raha nirehafe i ampela rey avao ty raha nitrea iareo. Tsy nahatrea aze tao iareo.”
25 Hoe areke ty Jesosy tamy iareo: “Mba tsy mahataka-draha inareò! Tsy le avy le inoa’areo* ka ze raha nirehafe o mpaminanio!
26 Fa nirehafe iareo tie tsy maintsy hijale hey ty Kristy vaho izay hahazo i voninahi’ey.”
27 Nihazavae’e tamy iareo ka ze raha iaby rehafe ty Soratse Masigne miomba aze, nanomboke tamy ty raha nisorate i Mosesy hatrake amo o Mpaminanio iaby.
28 Naho fa narine i tanàgne handehana iareoy eo iareo, le nanao sare nanohy ty lia’e avao ty Jesosy.
29 Faie niresé iareo lahatse reke tie: “Mijanogna miarake ama’ay rehe satria fa hohariva i androy.” Nandeha an-tragno iareo agne niarake tamy iareo areke reke.
30 Naho fa niarake nihinagne tamy iareo reke, le nalae’e i mofoy sady nivavake reke. Nitapahe’e i mofoy naho fa niavy eo, le nimea’e iareo.
31 Tamy izay vaho nibeake ty maso iareo, le nihay iareo tie ia reke. Faie le avy le nanjavogne reke.
32 Le nifampirehake iareo tie: “Tsy hoe nisy afo nirehetse vao ty tam-pontikagne ao naho fa nihazavae’e tamantikagne soa i Soratse Masigney, tamy ireke nifampirehake tamantikagne tan-dalagne eỳ?”
33 Le avy le nitsangagne iareo roe lahy tamy i lera ignehoe avao, le niheregne ta Jerosalema agne. Nitrea iareo i 11 lahy rey naho i mpianatse ila’e rey.
34 Le nirehake tamy iareo roe lahy iareo tie: “Nivelomegne tamy ty mate vata’e ty Tompo, sady fa niseho tamy i Simona ka reke!”
35 Le nitantarae i mpianatse roe lahy rey ty raha nisy tamy iareo tan-dalagne eỳ. Nirehafe iareo ka fa tamy ireke nanapake i mofoỳ ty nahaia iareo aze.
36 Tamy iareo mbe nirehake ze raha rezaỳ, le nitsangagne tagnivo iareo eo tampoke reke sady hoe reke tamy iareo: “Fiadagnagne abey ho anareo.”*
37 Le niendrake iareo sady natahotse satria nieretseretse tie anjely o trea iareò.
38 Hoe areke ty Jesosy tamy iareo: “Nagnino nareo ie matahotseo? Nagnino ka nareo ro misalasala am-po’areo ao?
39 Izaho avao anio itoio! Henteo’areo moa ty tagnako naho ty tomboko. Tsapao’areo raho, le henteo’areo fa o anjelio tsy mba managne nofotse naho taolagne manahake ahy trea’areo zao.”
40 Tamy ireke nirehake izaỳ, le natoro’e iareo i tagna’ey naho i tombo’ey.
41 Faie noho ty halatsà iareo naho ty hafalea ty fo iareo, le mbe tsy nino avao iareo. Hoe areke ty Jesosy tamy iareo: “Misy raha azo hanegne vao ty ama’areo ato?”
42 Le nimea iareo fiagne mbe mafana zay reke.
43 Nirambese’e i fiagney, le nihane’e ta maso iareo eo.
44 Hoe reke tamy iareo: “Tamy iraho mbe niarake tama’areoy, le nirehake tie tsy maintsy hotanterake ze raha iaby nisorategne miomba ahy tamy i Lalà i Mosesỳ ao naho o Mpaminanio vaho amy Salamo ao.”
45 Le nisokafe’e soa ty say iareo mba hahatakara iareo ty heve o Soratse Masigneo.
46 Le hoe ka reke tamy iareo: “Voasoratse tie: Hijale ty Kristy sady hovelomegne amy ty mate amy ty andro fahatelo.
47 Amy ty agnara’e ka ty hitoriagne amy ty firenena iaby ty hafatse tihoe toko’e hibebake ze kila ndaty amy izay mahazo famelan-keloke. Le a Jerosalema eto ty hanombohagne izay.
48 Inareo ty ho vavolombelo o raha rehoe.
49 Halefako ama’areo i raha nampitamaen-dRaekoy. Faie amparake ty hahazoa’areo i hery boake ambone agney, le mijanogna an-tanàgne eto avao nareo.”
50 Nente’e niala i tanàgney iareo, le niavy a Betania agne tamy ty fara’e. Naranga’e ambone i tagna’ey sady nitsodrano iareo reke.
51 Tamy ireke nitsodrano iareoy, le nisarahegne tamy iareo sady nakaregne mban-dagnitse mbeo.
52 Le niankohoke tagnatreha’e eo iareo. Niheregne ta Jerosalema agne iareo naho fa niavy eo sady tena nifale.
53 Nandeha tamy i tempolỳ ao isan’andro ka iareo mba hidera an’Agnahare.
Fagnamarehagne ambane peje
^ Abt: “malaogne ty fo’areo vaho izay mino.”
^ Fomba fanalamà o Jiosio o rehake iohoe.
