Talily Soa Nisorate i Lioka 10:1-42
10 Tafara izay, le nijobogne mpianatse hafa 70 ka ty Jesosy,* le nirahe’e kiroedroe iareo mba hialoha aze amy ze tanàgne naho toeragne handehana’e.
2 Le hoe reke tamy iareo: “Maro i vokatsey fa i mpiasay ro tsy ampe. Angataho’areo areke i Tompo i vokatseỳ, mba hagnirake mpiasa maro hamory i vokatsey.
3 Mandehana areke nareo! Faie mitaoa satria manahake ty anak’agnondry agnivo o amboahakò eo nareo.
4 Ko minday kitapom-bola ndra raha fisiagne hanegne ndra kapa. Ko manalama ndra ia ndra ia ka naho fa an-dalagne ey.
5 Ndra aia ndra aia tragno idira’areo, le izao ty raha rehafo’areo voaloha’e: ‘Lonike abey mba ho feno fiadagnagne ty amy ty tragno toy!’
6 Naho misy ana ty fiadagnagne ty ao, le hijanogne ama’e ao i fiadagna’areoy. Fa naho tsy izay, le hiheregne ama’areo i fiadagna’areoy.
7 Mijanogna amo o tragno iohoe ao avao areke nareo, fa ko mifindrafindra tragno, le hano naho inomo ze raha omey iareo anareo, satria fagneva hahazo ty karama’e o mpiasao.
8 “Ndra aia ndra aia ka tanàgne idira’areo sady mandrambe anareo, le hano’areo ze raha aroso iareo ho anareo.
9 Sitragno ze marare ao, le rehafo’areo iareo tie: ‘Fa marine anareo i Fanjakàn’Andrianagnaharey.’
10 Ndra aia ndra aia ka tanàgne idira’areo, faie tsy mandrambe anareo, le mandehana amy ty arabey i tanàgney eo sady mirehafa tihoe:
11 ‘Ndra ty lemboke boake amy ty tanà’areo toy mipiteke amy ty tombo’ay aza, le ahintsa’ay ama’areo eto. Faie soa hohai’areo tie fa marine i Fanjakàn’Andrianagnaharey.’
12 Rehafeko ama’areo, fa ndra mbe ho moramora ka ty hanjò i Sodoma amy ze andro zay ta ty raha hanjò ze tanàgne zay.
13 “Hoazon-doza rehe Korazina! Hoazon-doza ka rehe Betsaida! Satria naho ta Tiro naho ta Sidona agne ty nanoagne i fahagagagne natao tama’o teo rey, le fa ela ty ndaty agne ro ho nibebake sady nitoboke nagnisy akanjo fisaognagne naho nihosotse lavenoke.
14 Mbe ho moramora ka areke ty raha hanjò i Tiro naho i Sidona amy i fitsaragney ta ty raha hanjò anareo.
15 A ihe ka Kapernaomy, hasondrotse mban-dagnitse mbeo vao rehe? Hizotso mbamy i Kiborỳ mbeo rehe!
16 “Ndra ia ndra ia mitsanogne anareo, le mitsanogne ahy. Fa ndra ia ndra ia mandietse* anareo, le mandietse ahy ka. Le ndra ia ndra ia mandietse ahy, le mandietse i nagnirake ahỳ ka.”
17 Nifale i mpianatse 70 rey naho fa niheregne, le hoe iareo: “O Tompo, naho fa nampiasa i agnara’oy zahay, le nagneke anay iaby hatrake amo o demoniao.”
18 Le hoe ty Jesosy tamy iareo: “Fa nitreako ty fitonta i Satana boake an-dagnitse agne manahake o helatseo.
19 Fa nimeako fahefagne nareo mba handialia o meregneo naho o kalengò* sady handrese ty fahavalo’areo iaby. Tsy hisy raha ka hagnoho-doza anareo.
20 Faie izao, ko mifale nareo satria magneke anareo o demoniao, fa mifalea satria voasoratse an-dagnitse agne ty agnara’areo.”
21 Tena nifale ty Jesosy tamy izay sady nifeno fagnahy masigne, le nirehake tihoe: “O Baba, i Tompo i lagnitsey naho ty tane toỳ, midera azo agnatreha ty ndaty retoagne eto raho, satria naeta’o amo o ndaty mahilalao naho o mahay rahao ze raha rezay fa nabaribari’o amo o ajajao. Toe izay anio Baba ty zoton’arofo’o!
22 Fa nimein-dRaeko ahy iaby ze kila raha. Tsy misy mahafantatse ahy* naho tsy i Raeko* avao. Tsy misy mahafantatse an-dRaeko naho tsy iraho avao naho ze ndaty teako hampahafantaregne aze.”
23 Izao ty raha nirehafe i Jesosy tamy i mpiana’e rey naho fa iareo avao ty teo: “Sambatse ze maso mahatrea ty raha trea’areo.
24 Rehafeko ama’areo, fa maro ty mpaminany naho ty mpanjaka nagniry hahatrea naho haharey ze o raha trea’areo naho rei’areo zao, faie tsy nahatrea naho tsy naharey.”
25 Nisy lahilahy nahay Lalàna zay nimbama’e mbeo mba hitsapa hevetse aze. Le hoe reke: “O Mpagnanatse, ino ty raha tsy maintsy ataoko mba hahazoako* i havelogne nainai’ey?”
26 Hoe ty Jesosy tama’e: “Ino ty voasoratse amy i Lalànay ao, le akore ty fahazoa’o aze?”
27 Hoe ty navale i lahilahỳ aze: “‘Teavo ty Jehovah Andrianagnahare’o amy ty fo’o iaby, amy ty tegna’o iaby, amy ty heri’o iaby vaho amy ty sai’o iaby’, naho tihoe ‘teavo manahake ty vata’o ty nama’o.’”
28 Le hoe ty Jesosy tama’e: “Maregne ze toin-dreha’o zay. Anò avao ze raha rezay, le hahazo i havelogney rehe.”
29 Faie te hagnaporofo reke tie ndaty maregne, le hoe reke tamy i Jesosy: “Ia maregne moa ty namako?”
30 Le hoe ty navale i Jesosy aze: “Nisy lahilahy raike boake a Jerosalema agne zay nizotso mba Jeriko mbeo, le nitafihe ty malaso. Nafaha iareo i akanjo’ey, le jinera iareo reke. Ie reke fa ho nimate vaho izay nenga iareo.
31 Nisy mpisorogne boake a Jerosalema agne nandalo tamy i lalagne ignehoe tafara izay. Faie naho fa nahatrea i lahilahỳ reke, le tsy nandeha tamy i sisi’e tandrife i lahilahỳ fa niala aze.
32 Nisy Levita raike zay ka nandalo tamo o lalagne iohoe. Faie naho fa nahatrea i lahilahỳ ka reke, le tsy nandeha tamy i sisi’e tandrife i lahilahỳ fa niala aze.
33 Tafara izay, le nisy lahilahy Samaritana zay nandalo tamo o lalagne iohoe. Faie naho fa nahatrea i lahilahỳ reke, le niferenaigne aze.
34 Nandeha mbamy i lahilahỳ mbeo areke reke, le nisia’e menake naho divay ze naratse tama’e sady nifognose’e lamba. Nampitingire’e ambone i birike’ey ey reke naho fa niavy eo, le nagnofa’e tragno amo o hotelio agne sady nikarakarae’e.
35 Ie nihamaray igne, le nimea’e denaria roe i tompo i hotelỳ sady hoe reke: ‘Karakarao reke. Naho ohatse mihoatse itoy ty lany, le mbe haloako naho fa miheregne raho.’”
36 Le hoe ty niontane i Jesosy aze: “Ia amy iareo telo ty hevere’o tie nama i lahilahy nitafihe ty malasoy?”
37 Le hoe i lahilahy nahay Lalànay: “I raike niferenaigne azey.” Le hoe ty Jesosy tama’e: “Mandehana, le manoa hoe izay ka.”
38 Naho fa nandeha iareo, le niavy tamy ze tanàgne raike zay. Nisy ampela raike tao zay nandrambe i Jesosy ho ambahini’e an-tragno’e agne. I Marta ty agnara’e.
39 Nanagne rahavave atao Maria zay ty Marta. Nitoboke tan-tombo i Tompo eo ty Maria, le nitsanogne ty raha nirehafe’e.*
40 Fa i Marta tsy nifantoke, satria maro loatse ty raha nomane’e hoahy i Jesosy. Nandeha mbamy i Jesosy mbeo areke reke, le nirehake tihoe: “O Tompo, tsy mampagnino azo vao o rahavavekò ie mienga ahy hiasa irery avao ty raha maro toao? Rehafo reke mba hagnampe ahy.”
41 Le hoe ty navale i Tompo aze: “Marta a, Marta, miasa loha amy ty raha maro loatse rehe.
42 Ie amy izao raha tsy ampeampe avao ty ilaentikagne. Ie, raha raike avao aza le fa ampe. Fa i Maria nijobogne ty raha tena lahibey, le tsy hafahagne ama’e zay.”
Fagnamarehagne ambane peje
^ Abt: “Tompo.”
^ Ndra: “tsy mitsanogne.”
^ Ndra: “halafiagne.”
^ Abt: “i Anakey.”
^ Abt: “Rae.”
^ Abt: “handovako.”
^ Ndra: “ty fampianara’e.”
