Talily Soa Nisorate i Jaona 18:1-40
-
Nifotetse i Jesosy ty Jodasy (1-9)
-
Nampiasa mesabey ty Jesosy (10, 11)
-
Nentegne tamy i Anasy agne ty Jesosy (12-14)
-
Nandietse voaloha’e ty Petera (15-18)
-
Tagnatreha i Anasy eo ty Jesosy (19-24)
-
Nandietse fagnindroe’e naho fagnintelo’e ty Petera (25-27)
-
Tagnatreha i Pilato eo ty Jesosy (28-40)
-
“Tsy agnisa ty tontolo toy ty Fanjakàko” (36)
-
18 Naho fa boake nirehake ze raha rezay ty Jesosy, le nandalo tamy ty vavasaka i Kidrona iareo amy i mpiana’e rey, mba handeha amy ze tonda raike zay.
2 Nihay i Jodasy, i hifotetse azey o toeragne iohoe, satria mpandeha agne mateteke ty Jesosy naho i mpiana’e rey.
3 Ninday maramila maro naho i mpiambegne i tempolỳ nirahe o lahibey ty mpisorogneo naho o Fariseò rey ty Jodasy. Ninday jiro naho fitaovam-pialiagne iareo.
4 Fa nihay i Jesosy i raha hiseho ama’e rey, le nimbamy iareo mbeo reke sady nirehake tamy iareo tie: “Ia o paliae’areò?”
5 Le namale iareo tie: “I Jesosy te Nazareta.” Le hoe reke tamy iareo: “Iraho o ndaty paliae’areo zao.” Nitsangagne niarake tamy i ndaty rey teo ka ty Jodasy, i nifotetse azey tamy izay.
6 Faie naho fa nirehake tamy iareo ty Jesosy tie: “Iraho o ndaty paliae’areò”, le nihemotse iareo, le nitonta tan-tane eo.
7 Le hoe indraike ty Jesosy tamy iareo: “Ia o paliae’areò?” Le hoe iareo: “I Jesosy te Nazareta.”
8 Le hoe ty Jesosy: “Fa nirehafeko tama’areo tie iraho o ndaty paliae’areo zao. Naho iraho areke o paliae’areò, le engao’areo handeha ty lahilahy retoa.”
9 Niseho zay, amy izay tanterake i raha nirehafe’e tihoey tie: “Tsy nisy nimontso ndra raike ty ndaty nimei’o ahy retoa.”
10 Nanagne mesabey ty Simona Petera. Sinari’e i mesabei’ey, le finatsi’e i mpanompo i mpisorombeỳ, le nihifike mberoagne agne ty sofi’e havana. I Malko ty agnara o mpanompo iohoe.
11 Faie hoe ty Jesosy tamy i Petera: “Aziliho amy i tragno’ey ao i mesabei’oy. Tsy hinogne amy i kope nimein-dRaeko ahỳ vao raho?”
12 Le nitsepahe i maramila rey naho i mpitari-tafike rey vaho i mpiambegne o tempolio nirahe o Jiosio rey ty Jesosy sady narohy iareo.
13 Le nindese iareo tamy i Anasy agne hey reke satria nirafoza i Kaiafa, i mpisorombey tamy ze taogne zaỳ ty Anasy.
14 I Kaiafa i nanoro hevetse o Jiosio tihoey tie, vao mainke mahasoa iareo naho lahilahy raike ro mate mba hagnavotagne i vahoakey.
15 Nagnorike i Jesosy ty Simona Petera naho ze mpianatse raike zay tamy izay. Fanta i mpisorombeỳ o mpianatse iohoe. Nizilike tamy i kiririsa i mpisorombeỳ ao niarake tamy i Jesosy reke,
16 fa i Petera nitsangagne ambaly i vavahadỳ ao. Nandeha mbamy i mpiambegne vavahadỳ mbeo areke i mpianatse fanta i mpisorombeỳ mba hirehake ama’e hanjilike i Petera. Le nindese’e nizilike ty Petera.
17 Le hoe i mpanompovave mpiambegne i vavahadỳ tamy i Petera: “Ataoko mpiana o lahilahy iohoe ka iheo?” Le hoe ty Petera: “Aha’a.”
18 Nitsangagne nagnodidigne i afo narehe iareo mba hamindroa iareoy i mpanompo rey naho i mpiambegne i tempolỳ rey, satria nanintsigne i androy. Nitsangagne niarake tamy iareo teo ka ty Petera mba hamindro.
19 Le nagnontenea i lahibey ty mpisorogney miomba i mpiana’e rey naho ty fampianara’e ty Jesosy.
20 Hoe ty navale i Jesosy aze: “Nitory tagnatreha o ndaty marò eo raho. Lava nampianatse tamy i sinagogay agne naho tamy i tempolỳ ao ka raho, i toeragne fivoria o Jiosioy. Tsisy raha naetaketako raho naho fa nirehake.
21 Nagnino areke rehe ro magnontane ahy? Agnonteneo i ndaty naharey ty raha nirehafeko tamy iareo rey fa hay iareo ty raha nirehafeko.”
22 Naho fa boake nirehake izay ty Jesosy, le nitakapike aze ty raike amy i mpiambegne i tempolỳ nitsangagne teo rey sady hoe reke: “Le izay vao ty navale’o i lahibey ty mpisorogney?”
23 Hoe ty navale i Jesosy aze: “Naho misy diso i raha nirehafeko teo rey, le ambarao ahy. Fa naho maregne, le nagnino rehe ro mitakapike ahy?”
24 Le nampindese i Anasy amy i Kaiafa mpisorombey agne reke. Mbe nirohy ty tagna i Jesosy tamy ireke nindese iareoy.
25 Mbe nitsangagne tamy i afo namindroa’ey eo ty Simona Petera tamy izay. Le hoe iareo tama’e: “Hoe mbe agnisa ty mpiana o lahilahy iohoe ka rehe?” Le nandietse ty Petera sady nirehake tie: “Aha’a.”
26 Le nisy mpanompo i mpisorombeỳ raike zay, longo i lahilahy tinapa i Petera ty sofi’ey nirehake tihoe: “Nitreako niarake tama’e tamy i tonday agne ka rehe?”
27 Faie le mbe nandietse indraike ty Petera. Le avy le nisy akoho nikekeo tamy izay.
28 Niala boake amy i Kaiafa ao iareo, le nente iareo amy i tragno i governoray agne ty Jesosy. Maraindray bey tamy izay. Faie tsy nizilike amy i tragno i governoray ao iareo, amy izay tsy maloto sady ho afake hihinagne i hanegne amy i Pasakeỳ.
29 Niboake ivela’e ao areke ty Pilato sady hoe reke tamy iareo: “Ino ty raha raty natao ty lahilahy tiagne, ie indesa’areo aze atoio?”
30 Le hoe ty navale iareo aze: “Naho tsy nanao raha raty reke, le tsy ho natolo’ay azo.”
31 Hoe areke ty Pilato tamy iareo: “Indeso’areo ama’areo agne areke reke, le tsarao’areo arake i lalàna’areoy.” Le hoe o Jiosio tama’e: “Tsy mahazo mamono ndaty zahay.”
32 Niseho ze raha zay, amy izay tanterake i raha nirehafe i Jesosy tie hanjò aze naho fa ireke hovonoegney.
33 Nizilike tan-dapa’e agne indraike ty Pilato governora, le nitokave’e ty Jesosy sady hoe reke tama’e: “Ihe vao ty Mpanjaka o Jiosio?”
34 Hoe ty navale i Jesosy aze: “Heve’o manokagne vao zay sa nisy ndaty nitalily tama’o ty miomba ahy?”
35 Hoe ty navale i Pilato: “Tsy raha Jiosy anio o ahò? O ndaty firenena raike ama’ò naho o lahibey ty mpisorogneo o nanolotse azo amakò. Ino o raha natao’ò?”
36 Hoe ty navale i Jesosy: “Tsy agnisa ty tontolo toy ty Fanjakako. Fa naho niagnisa ty tontolo toy ty Fanjakako, le ho nialy o vahoako reo mba hahavy ahy tsy hatolotse an-tagna o Jiosio eo. Faie fa nirehafeko teo tie, tsy boake amy ty tontolo toy ty Fanjakako.”
37 Hoe areke ty Pilato tama’e: “Mpanjaka zane rehe?” Le hoe ty navale i Jesosy aze: “Fa ie ze tsarae’o zay. Mpanjaka raho. Izao ty anto’e niterahagne ahy naho ty niaviako tamy ty tontolo toy eto, le ty hagnambara ty maregne. Ze ndaty manohagne ty maregne, le mitsanogne ty feoko.”
38 Hoe ty Pilato tama’e: “Maregne ino izaò?”
Naho fa boake nirehake izay ty Pilato, le nandeha niboake mbamo o Jiosio mbeo indraike sady hoe reke tamy iareo: “Tsy treako ty hadisoa’e.
39 Faie arake i fombafomba’areoy ka, le mamotsotse ndaty raike raho naho fa Pasake. Tea’areo vao naho votsorako i Mpanjaka o Jiosioy?”
40 Le nikorakorake indraike iareo tie: “Aha’a, tsy o lahilahy iohoe ro votsoro fa i Barabasy!” I Barabasy amy io malaso.
