Talily Soa Nisorate i Jaona 17:1-26
17 Naho fa boake nirehake ze raha rezay ty Jesosy, le niandra i lagnitsey sady hoe reke: “O Baba, avy i fotoagney. Omeo voninahitse i ana’oy, amy izay reke hagnomey voninahitse azo ka.
2 Fa nimea’o fahefagne hanjaka amy ze kila nofotse iaby reke. Izay ty fomba agnomea’o voninahitse aze, amy izay reke hagnomey havelogne nainai’e hoahy ze ndaty nimea’o aze.
3 Izao ty fomba hahazoa iareo i havelogne nainai’ey: Mila mianatse iareo mba hahafantatse azo, ihe Andrianagnahare maregne naho i Jesosy Kristy, i nirahe’oy.
4 Fa nagnomey voninahitse azo tan-tane etoy raho satria fa nivitako i asa nampanoe’o ahỳ.
5 O Baba, omeo voninahitse ka areke raho hinane zao, le i voninahitse nanagnako tamy iraho tagnila’o teoy, tamy ty tontolo toy mbe tsy nisỳ.
6 “Fa nampahafantareko i ndaty nimei’o ahy amy ty tontolo toy eto rey i tahina’oy. Fanagna’o iareo, le nimei’o ahy sady orihe iareo ka ty saontsi’o.
7 Fa hay iareo ka fa boake ama’o i raha iaby nimei’o ahy rey.
8 Satria fa nambarako iareo ze raha nisaontsie’o tamako, le nirambese iareo sady tena hay iareo fa solontegna’o raho. Nino ka iareo tie irehe ty nagnirake ahy.
9 Mangatake ama’o hoahy iareo raho. Tsy hoahy ty tontolo toy ty angatahako fa hoahy i ndaty nimei’o ahy rey satria azo iareo.
10 Sady azo ze raha anagnako iaby, le ahy ka ze raha anagna’o iaby. Nimeagne voninahitse tamy iareo eo raho.
11 “Tsy ho amy ty tontolo toy eto sasa raho satria handeha ho ama’o agne. Fa iareo ro amy ty tontolo toy eto. O Rae Masigne, arovo o ndaty nimei’o ahy reo noho i tahina’oy. Amy izay iareo ho raike manahake antika.
12 Tamy iraho niarake tamy iareoy, le niaro o ndaty nimei’o ahy reo noho i tahina’oy. Narovako iareo, le tsy nisy ringagne ndra raike naho tsy i ana ty fandringanagney avao. Amy izay tanterake i raha nirehafe ty Soratse Masigney.
13 Handeha ama’o agne raho nihane zao, faie rehafeko o raha reo amy iraho mbe amy ty tontolo toy etò, amy izay hotsapa iareo i fifaleagne iaby nitsapakoy.
14 Fa nimeako iareo i saontsi’oy faie niheje ty tontolo toy iareo satria tsy agnisa ty tontolo toy, manahake ahy ka tsy agnisa ty tontolo toy.
15 “Tsy ty hagnafaha’o iareo amy ty tontolo toy eto ty angataheko ama’o fa ty mba hiarova’o iareo amy i ratỳ.
16 Tsy agnisa ty tontolo toy iareo manahake ahy ka tsy agnisa ty tontolo toy.
17 Hamasigno amy ty alala ty hamaregnagne iareo, satria ty saontsi’o ro hamaregnagne.
18 Manahake ty nagniraha’o ahy amy ty tontolo toy eto ty hagnirahako iareo ka amy ty tontolo toy.
19 Nanao ze hahavy ahy ho masigne avao raho noho iareo, amy izay iareo ho masigne ka amy ty alala i hamaregnagney.
20 “Tsy hoahy iretoagne avao ro angataheko fa hoahy ze mino ahy ka, naho fa boake nitsanogne ty raha nampianare iareo.
21 Amy izay iareo iaby Baba ho raike, manahake azo tafaharo raike amako, le iraho tafaharo raike ama’o. Iareo ka ho tafaharo raike amantika, amy izay hino ty tontolo toy tie ihe ty nagnirake ahy.
22 Nimeako voninahitse iareo, manahake ty nagnomea’o voninahitse ahy. Amy izay iareo ho raike avao, manahake ty maha raike antikagne.
23 Iraho tafaharo raike amy iareo, le irehe tafaharo raike amako, amy izay iareo tena hiharo raike. Hohay ty tontolo toy ka amy izay tie, irehe ty nagnirake ahy sady tea’o ka iareo manahake ty iteava’o ahy.
24 O Baba, teako hiarake amako amy i misy ahỳ agne ty ndaty nimei’o ahy retoa, amy izay iareo hahatrea i voninahitse nimei’o ahỳ. Ty anto’e, fa nitea ahy avao rehe taloha ty namorogna’o ty tontolo toy.
25 O Baba, manao ty maregne naho ty rare’e avao rehe. Tena tsy mahafantatse azo ty tontolo toy. Fa iraho mahafantatse azo, le ty ndaty nimei’o ahy retoa ka mahafantatse tie irehe ty nagnirake ahy.
26 Fa nampahafantareko iareo i tahina’oy sady mbe hampahafantareko avao ka. Amy izay iareo haneho hatea ty hafa, manahake ty nanehoa’o hatea tamako sady hahavy ahy ka ho tafaharo raike amy iareo.”
