Talily Soa Nisorate i Jaona 1:1-51
1 Tam-boaloha’e tagne, le fa teo ty Saontsy.* Niarake taman’Andrianagnahare ty Saontsy, sady andrianagnahare ka o Saontsy iohoe.
2 Nanomboke tam-boaloha’e tagne reke, le fa niarake taman’Andrianagnahare.
3 Tamy ty alala’e ty nampisy ze kila raha. Naho tsy teo reke, le tsy ho nisy ndra raike reo.
Tsy ho nisy
4 o fiaignagneo naho tsy tamy ty alala’e, le i fiaigna’ey ro hazavagne hoahy o ndatio.
5 Mamilepiletse agnate i iegney ao i hazavagney, faie tsy naharese i hazavagney i iegney.
6 Nisy lahilahy raike zay nirahen’Agnahare hisolontegna aze. I Jaona ty agnara’e.
7 Niavy o lahilahy iohoe mba hagnambara i hazavagney, amy izay ze kila ndaty hino aze.
8 Tsy ireke i hazavagney fa vavolombelogne hagnambara i hazavagney avao reke.
9 Fa narine ho avy amy ty tontolo toy eto, i tena hazavagne hamilepiletse amy ze kila ndatỳ tamy izay.
10 Naho ty maregne, le fa tamo o ndatio* teo reke sady tamy ty alala’e ty nampisy o ndatio. Faie tsy nifanta o ndatio reke.
11 Niavy tan-tanendraza’e agne reke faie niliere ty ndaty tagne.
12 Faie ze nandrambe aze, le nampea’e mba hanjare ho anan’Agnahare satria naneho finoagne aze.*
13 Naterake iareo faie tsy boake amy ty lio ndra boake amy ty nofotse ndra boake amy ty sitrapo o ndaty fa boake aman’Agnahare.
14 Nanjare nofotse areke ty Saontsy sady niarake nitoboke tama’ay. Nitrea’ay ka ty voninahi’e. Ty voninahi’e, le manahake ty voninahitse omey ty rae ty ana’e bakotokagne. Tena tea aze ty Andrianagnahare sady ama’e ao iaby ty hamaregnagne.
15 (Nirehake ty miomba aze tamo o ndatio ty Jaona. Ie, ireke i nikoike tihoey tie: “Io i nirehafeko tihoey tie: ‘I ndaty ho avy afarakoy, le fa nanjare alohako eo satria reke fa nisy talohako.’”)
16 Feno hasoa fagnahy miambake reke, le mahazo hasoa fagnahy miambake lognandro tika.
17 Nimeagne tamy ty alala i Mosesy i Lalànay fa i hasoa fagnahy miambakey naho i hamaregnagney, niazontika boake amy i Jesosy Kristy.
18 Mbe tsy nisy ndaty ndra raike nahatrea an’Agnahare. Fa i andrianagnahare bakotokagne tagnilan-dRae’e eoy avao ro nagnazava ty miomba Aze.
19 Nirahe o Jiosio mbamy i Jaona mbeo i mpisorogne naho i Levita boake a Jerosalema agne rey mba hagnontane aze tihoe tie: “Ia ireheo?”
20 Tsy nisalasala reke ty namale tie: “Tsy i Kristy raho.”
21 Le hoe iareo tama’e: “A vaho ia areke iheo? I Elia?” Le namale reke tie: “Aha’a, tsy ie raho.” “A ihe vao i Mpaminany ho avỳ?” Le hoe reke: “Aha’a!”
22 Hoe areke iareo tama’e: “Ia zane iheo? Rehafo ama’ay mba hambara’ay i nagnirake anay rey. Ambarao anay ty miomba azo.”
23 Le hoe reke: “Izaho i feo o ndaty mikoike am-patrambey agne tihoey tie: ‘Anò mahitsy ty lala i Jehovah’, arake i nirehafe i Isaia mpaminanỳ.”
24 O Fariseò ty nagnirake i ndaty rey.
25 Nagnontane i Jaona iareo tie: “Nagnino areke rehe ro manao badisa, ie amy izao rehe tsy i Kristy ndra i Elia ndra i Mpaminanỳ?”
26 Le hoe ty navale i Jaona iareo: “Iraho manao badisa amy ty rano. Faie misy ndaty raike mitsangagne ama’areo eo zay tsy fanta’areo.
27 Ireke i ho avy afarakoy, le ndra iraho aza tsy fagneva hagnafake ty kapa’e.”
28 Ta Betania* atignana i Renerano i Jordanay agne, amy i nanoa i Jaona badisay agne ty nisehoa o raha rehoe.
29 Ie nihamaray igne, le nitrea’e nandriogne ty Jesosy sady hoe reke: “Igne i Anak’agnondrin’Andrianagnaharey, i hagnafake ty fahotà ty ndaty iabỳ!*
30 Ireke i nirehafeko tihoey tie: ‘I ho avy afarakoy, le nanjare alohako eo satria reke fa nisy talohako.’
31 Ndra izaho aza tsy nahafantatse aze. Faie nanao badisa amy ty rano raho mba hampahafantaragne o Israelio tie ia reke.”
32 Hoe ka ty nambara i Jaona: “Nitreako nizotso boake an-dagnitse agne manahake o voromahilalao i fagnahy masigney, le nipetake ama’e eo.
33 Ndra izaho aza tsy nahafantatse aze, fa i Andrianagnahare nagnirake ahy hanao badisa amy ty ranoy ro nisaontsy tamako tie: ‘Ze trea’o izotsoa i fagnahy masigney sady ijanogna’e, le ireke i hanao badisa amy ty fagnahy masigney.’
34 Le ty masoko ty nahatrea ze raha zay. Izay ty nahavy ahy nijoro ho vavolombelogne tie, ie i Anan’Agnaharey.”
35 Ie nihamaray i andro ignehoe ka, tamy i Jaona nitsangagne niarake tamy i mpiana’e roe lahy reỳ,
36 le nitrea’e nandriogne ty Jesosy sady hoe reke: “Igne i Anak’agnondrin’Andrianagnaharey!”
37 Naho fa naharey izay i mpianatse roe lahy rey, le norihe iareo ty Jesosy.
38 Nitolike areke ty Jesosy, le nahatrea iareo nagnorike aze sady hoe reke tamy iareo: “Ino o paliae’areò?” Le hoe iareo tama’e: “O Raby (“Mpagnanatse” ty dika o rehake iohoe), mitoboke aia iheo?”
39 Le hoe reke tamy iareo: “Andao nareo hiarake amako, amy izay hotrea’areo ty misy ahy.” Nandeha nagnorike aze areke iareo, le nitrea iareo ty nisy aze. Nijanogne niarake tama’e tao iareo tamy i andro ignehoe. Tokotoko’e ho tamy lera fahafolo* teo ho eo tamy izay.
40 I Andrea rahalahy i Simona Petera ty raike amy i mpianatse naharey i reha i Jaonaỳ sady nagnorike i Jesosỳ.
41 Le avy le nandeha tamy i Simona rahalahi’e agne reke sady nirehake tama’e tie: “Nitrea’ay i Mesiay” (“Kristy” ty dika o rehake iohoe).
42 Nente’e mbamy i Jesosy mbeo ka ty Petera. Naho fa nagnente i Petera ty Jesosy, le hoe reke tama’e: “O Simona ana i Jaona, manomboke androany rehe, le hotokavegne tihoe Kefasy” (“Petera” ty dika o rehake iohoe”).
43 Nite handeha ho a Galelia agne ty Jesosy naho fa nihamaray igne. Nahatrea i Filipo reke, le nirehake tama’e tie: “Andao hagnorike ahy.”
44 A Betsaida agne ty niavia i Filipo, amy i tanàgne niavia i Andrea naho i Peteray agne.
45 Nahatrea i Natanaela ty Filipo, le nirehake tama’e tie: “Nitrea’ay i ndaty nirehafegne amy i Lalà i Mosesy aoy naho i nisorate o Mpaminanioy. Kay toe i Jesosy, i ana i Josefa boake a Nazareta agney.”
46 Faie hoe ty Natanaela tama’e: “Mba misy raha soa avao vao kahe ty boake a Nazareta agne?” Le hoe ty Filipo tama’e: “Andao moa rehe hagnente aze.”
47 Naho fa nahatrea i Natanaela nandeha mbama’e mbeoy ty Jesosy, le izao ty raha nirehafe’e miomba aze: “Israelita vata’e zao sady tsy manao soa miatreke.”*
48 Hoe ty Natanaela tamy i Jesosy: “Akore ty nahaia’o ahy?” Le hoe ty navale i Jesosy aze: “Taloha i nitokava i Filipo azoy, le fa nitreako irehe nitoboke tambane i fihamỳ* eoy.”
49 Le hoe ty Natanaela: “O Raby, Anan’Agnahare vata’e rehe, ihe i Mpanjaka o Israelioy.”
50 Le hoe ty navale i Jesosy aze: “Iraho nirehake tama’o tie nitreako nitoboke ambane i fihamỳ eo rehey vao o mahavy azo mino ahio? Mbe hahatrea raha mahagaga ambone izay aza rehe.”
51 Hoe ka ty Jesosy naho fa niavy eo: “Volagneko ama’areo* iaby, fa hahatrea i lagnitsey misokake nareo, le hahatrea o anjelin’Agnahareo hizotso boake an-dagnitse agne ho amy i Ana o ndatỳ mbeo, sady hahatrea i anjely rey ka hiheregne mban-dagnitse mbeo.”
Fagnamarehagne ambane peje
^ I Jesosy ty teagne horehafegne amy tihoe “ty Saontsy”, satria ireke ty lahibey ty mpinday ty hafan’Agnahare.
^ Abt: “ty tontolo toy.”
^ Abt: “ty agnara’e.”
^ Tsy i Betania marine i Jerosalemay ty teagne horehafegne eto.
^ Abt: “ty tontolo toỳ.”
^ Ndra: “tamy efatse folakandro teo ho eo.”
^ Ndra: “tsy misy fitake.”
^ Ndra: “aviavỳ.”
^ Abt: “Volagneko ama’areo to vata’e.”
