Asa o Apostolio 8:1-40
8 Nanohagne ty famonoagne i Stefana ka ty Saoly.
Tamy ze andro zay, le nenjehegne mafe ty fiangonagne ta Jerosalema agne. Hafarà’e niparitake nagneragne ty faritse i Jodia naho i Samaria iareo, ankoatse i apostoly rey.
2 Faie nisy lahilahy natahotse an’Agnahare rezay, ninday i fate i Stefanay sady nandevegne aze. Nangoihoy ty tagny iareo satria tena nalahelo aze.
3 Fa i Saoly nandravarava i fiangonagney. Nitsoehe’e isan-tragno iareo, le tinaritari’e boake agne ndra lahilahy ndra ampela, sady nindese’e mbam-pirizò mbeo.
4 Faie ze nilay, le nitory i talily soay tamy ze tane nilaisa iareo.
5 Nandeha tamy ty tanà i Samaria agne ty Filipo, le nitory miomba i Kristy tamy iareo.
6 Nifantoke soa i vahoakey naho fa nitsanogne ty raha nirehafe i Filipo sady nihentea iareo ka ty famantaragne natao’e.
7 Ty anto’e, maro tamy iareo ty nisy demonia, le nikorakorake mafe i demonia rey naho fa niakatse boake amy i ndaty rey ao. Maro ka ty ndaty naleme naho nanan-kandra nisitragne.
8 Tena nifale vata’e areke ty ndaty tamo o tanàgne iohoe ao tamy izay.
9 Nisy lahilahy raike atao Simona zay ty tamo o tanàgne iohoe ao. Mpanao mazy reke, le nieke aze iaby ty ndaty ta Samaria ao satria reke nitsiriry ty vata’e tie ndaty miambake.
10 Nitsanogne aze soa iaby ty ndaty tagne ndra bey ndra kede, sady nirehake tie: “Herin’Agnahare ty lahilahy tia, i tokavegne tihoe Lahibeỳ.”
11 Nitsanogne aze soa areke iareo, satria tena nampieke iareo ty fahaia’e manao mazy.
12 Faie naho fa nino ty raha nirehafe i Filipo iareo, i nitory ty talily soa miomba ty Fanjakàn’Andrianagnahare naho i miomba ty agnara i Jesosy Kristỳ, le natao badisa iaby ndra lahilahy ndra ampela.
13 Ndra i Simona ka aza nanjare mpino, le natao badisa sady niarake tamy i Filipo avao tafara izay. Nigaga reke naho fa nahatrea ty famantaragne naho ty fahagagagne miambake natao i Filipo.
14 Naho fa nirey i apostoly ta Jerosalema agne rey tie nandrambe soa ty Saontsin’Andrianagnahare ty ndaty ta Samaria agne, le nirahe iareo tagne ty Petera naho i Jaona.
15 Nandeha nizotso tagne iareo roe lahy, le nivavake hoahy iareo mba hahazoa iareo i fagnahy masigney.
16 Ty anto’e, mbe tsy nisy nahazo fagnahy masigne iareo fa natao badisa tamy ty agnara i Jesosy Tompo avao.
17 Naho fa boake nametra-tagnagne tamy iareo iareo roe lahy, le nahazo fagnahy masigne iareo.
18 Naho fa nitrea i Simona tie, nahazo fagnahy masigne ze nametraha i apostoly rey tagnagne, le nimea’e vola iareo
19 sady hoe reke: “Mba omeo’areo ze fahefagne zay ka raho, amy izay mahazo fagnahy masigne ze ametrahako tagnagne.”
20 Faie hoe ty Petera tama’e: “Ho levogne reketse azo ka o vola’ò, satria rehe mihevetse tie azo viliem-bola i fagnomezagne maimaim-poagne boake aman’Agnaharey.
21 Tsy managne anjara amy izay rehe sady tsy ombia hanagne anjara amy izay ka satria rehe tsy mahitsy fo agnatrehan’Andrianagnahare eo.
22 Mibebaha areke rehe, le mihalalea amy i Jehovah, kera reke hamela azo amy ze raha raty agnate fo’o ao tea’o hatao zay.
23 Satria treako tie manahake o poizigne mafaitseo rehe sady ndevo ty tsy hamaregnagne.”
24 Hoe ty Simona tamy iareo: “Mba ihalaleo’areo amy i Jehovah raho, amy izay tsy hisy hanjò ahy i raha nirehafe’areo teo rey.”
25 Naho fa boake nitory nagneneke i taney iareo sady nirehake ty saontsy i Jehovah, le niheregne ta Jerosalema agne. Tamy iareo nolỳ, le maro ka ty tanàgne kedekede nisy o Samaritanao nitoria iareo i talily soay.
26 Faie nisy anjely i Jehovah zay nirehake tamy i Filipo tie: “Mitsangana rehe, le mandehana magnatimo amy i lalagne mizotso boake a Jerosalema mandeha mba a Gaza mbeoy.” (Am-patrambey agne ty misy o lalagne iohoe.)
27 Nitsangagne areke ty Filipo, le nandeha. Nahatrea ze manam-pahefagne ambone* etiopiana zay reke naho fa niavy eo. Tambane fahefa i Kandasy, i mpanjakavave o Etiopianaoy, o lahilahy iohoe sady ireke ty niandraikitse ty fanagna’e iaby. Nandeha ta Jerosalema agne reke mba hivavake.
28 Fa an-dalagne holy reke tamy io. Nitoboke tagnate i sareten-tsovala’ey ao reke sady namaky mafe ty boke i Isaia mpaminany.
29 Le hoe i fagnahỳ tamy i Filipo: “Akia iharineo mbeo ty sareten-tsovala roy.”
30 Nilay mbamy i sareten-tsovalay mbeo ty Filipo sady naharey aze namaky mafe ty boke i Isaia mpaminany. Le hoe ty Filipo tama’e: “Azo’o soa vao o raha vakie’ò?”
31 Le hoe reke: “Akore moa ty hahazoako aze naho tsy misy ndaty manoro ahy?” Nampanganihe’e areke ty Filipo mba hitoboke agnila’e eo.
32 Hoe izao ty rehafe i andine’e amy ty Soratse Masigne ao nivakie’ey: “Manahake o agnondry indesegne hovonoegneo reke sady manahake ty anak’agnondry tsy mibegne agnatreha ty mpagnitsike aze eo fa mitsigne avao.
33 Tsy mba nimeagne rare’e reke tamy i fotoagne nagnambanembaneagne azey. Ia ty hirehake ty pitsopitso’e miomba ty taranake niavia’e? Ty anto’e, ty fiai’e aza nafahagne tsy ho an-tane etoy.”
34 Le hoe i lahilahy manam-pahefagne amboney tamy i Filipo: “Inao hey, ia ty tea o mpaminany iohoe horehafegne? Ty vata’e vao sa ndaty hafa?”
35 Le nirehake indraike ty Filipo sady i andine’e teoy ty nanomboha’e nitory ty talily soa miomba i Jesosy tama’e.
36 Naho fa nandeha avao iareo, le nahatrea toeragne nisy rano. Le hoe i manam-pahefagney: “Intia misy rano, ino ty mikalagne ahy tsy hatao badisa?”
37 ——
38 Nampijanògne i manam-pahefagney i sareten-tsovalay, le nizotso iareo amy i Filipo, le nandeha mban-drano mbeo, le natao i Filipo badisa reke.
39 Naho fa boake niakatse agnate rano ao iareo, le nente i fagnahy i Jehovah-y niala ty eo malaky ty Filipo, le tsy nitrea i manam-pahefagney sasa. Faie nanohy i lia’ey avao i manam-pahefagney sady nifale.
40 Fa i Filipo niavy ta Asdoda agne sady nandeha nagneneke o faritse iohoe. Nitoria’e i talily soay ze tanàgne tagne iaby, amparake ty niavia’e ta Kaisaria agne.
Fagnamarehagne ambane peje
^ Abt: “ionoka.” Henteo ty Fagnazavagne Rehake.
