Asa o Apostolio 21:1-40
21 Tsy te ho nienga iareo zahay satria nalahelo, faie tsy maintsy nandeha. Nandeha sambo zahay, le nagnitsy mba Kosy mbeo. Ie nihamaray igne, le nandeha a Rodo agne. Niala ty ao ka zahay, le nandeha a Patara agne.
2 Nahatrea sambo ho a Fenisia agne zahay tie tao, le nijogne tama’e sady nandeha.
3 Naho fa nitalake’ay tankavia’ay teo ty tokonose Sipra, le niriogna’ay avao fa nandeha ta Siria agne zahay. Nijanogne ta Tiro tao zahay, satria nanjotso entagne tao i samboy.
4 Nipaliave’ay ty mpianatse tao, le nitrea’ay. Nijanogne tao fito andro zahay. Faie nitarihe i fagnahy masigney iareo, le lava nirehake i Paoly avao mba tsy handeha a Jerosalema agne.
5 Naho fa nitapetse ty fotoagne nijanogna’ay tao, le nanohy i lia’aỳ indraike zahay. Natere iareo hatrake ivela i tanàgney agne zahay. Nisy ajaja aman’ampela ty niarake tamy iareo nagnatetse anay. Nanongaleke tamy i fasekey eo zahay, le nivavake.
6 Nifanao veloma zahay tafara izay. Nijogne agnate sambo ao zahay fa iareo nandeha noly.
7 Nandeha sambo boake a Tiro ao zahay, le niavy ta Ptolemaisy agne. Nanalama i rahalahy tao rey zahay, le nijanogne andro raike tamy iareo eo.
8 Niala ty ao zahay naho fa nihamaray igne, le nandeha ta Kaisaria agne. Nandeha tan-tragno i Filipo mpitory i talily soay tagne zahay, le nijanogne tama’e tao. Agnisa i fito lahy rey reke.
9 Nanagne anak’ampela efatse reke. Mbe tsy nanambaly* iareo sady naminany ka.
10 Faie naho fa nijanogne tao tagnate ty andro maromaro zahay, le nisy mpaminany raike atao tihoe Agabo zay nizotso boake a Jodia agne.
11 Niavy tama’ay teo reke, le nalae’e i sentira i Paolỳ sady nafehe’e tamy ty tombo’e naho ty tagna’e, le hoe reke: “Izao ty rehafe i fagnahy masigney: ‘Hanahake izao ty handrohiza o Jiosy a Jerosalema agneo ty lahilahy tompo ty sentira toy sady hatolo iareo an-tagna o ndaty boake amy ty firenena hafao reke.’”
12 Naho fa naharey izay zahay naho i ndaty niarake tama’ay teo rey, le nihalale i Paoly mba tsy handeha a Jerosalema agne.
13 Le namale ty Paoly tie: “Nagnino nareo ro tomagny sady manao raha hagnakiviagne ahy? Ko matahotse nareo, satria raho fa vognogne ty horohizagne naho ty ho mate a Jerosalema agne noho ty agnara i Jesosy Tompo.”
14 Naho fa tsy nimete niresé’ay lahatse reke, lelia’e tsy nanohetse aze sasa* zahay fa nanao tihoe avao tie: “Lonike ty zoton’arofo i Jehovah ro hatao.”
15 Niomagne hanohy i lia’ay ho a Jerosalema agney zahay tafara izay, le nandeha.
16 Nisy mpianatse boake a Kaisaria agne ty niarake tama’ay mba hinday anay amy i Menasona agne, i boake a Sipra agney. Agnisa ty mpianatse voalohandoha’e reke. Tama’e tagne zahay ro nivantagne.
17 Naho fa niavy ta Jerosalema agne zahay, le tena nifale i rahalahy rey naho fa nandrambe anay.
18 Faie, ie nihamaray igne, le nandeha niarake tama’ay ho amy i Jakoba agne ty Paoly naho ze androanavy tagne iaby.
19 Nanalama iareo areke reke sady nirehafe’e tamy iareo tamy ty pitsopitso’e ty raha nataon’Agnahare hoahy o ndaty boake amy ty firenena hafao tagnate i asa fanompoagne natao’ey.
20 Naho fa naharey izay iareo, le nagnomey voninahitse an’Agnahare. Faie nirehake tama’e ka iareo tie: “Hita’o rahalahy, fa agnarivo’e ty Jiosy nanjare mpino, sady tena mafana fo amy ty fagnorihagne i Lalànay iareo iaby.
21 Faie naharey tsaho miomba azo iareo tie, nao zao rehe mampianatse o Jiosy amo o firenena hafao agneo mba tsy hagnoriha iareo i Lalà i Mosesỳ. Agnisa izay tihoe, tsy mila manapake ty ana iareo iareo naho tihoe, tsy mila magnorike i fombafomba fataontikagne rey.
22 Ino areke ty toko’e hataontikagne? Tsy maintsy horey iareo zao tie fa niavy eto rehe.
23 Anò areke ty raha rehafe’ay ama’o toy: Misy lahilahy efa-dahy nanao vava ty ama’ay eto.
24 Ento miarake ama’o iareo, le miliova nareo arake i Lalànay sady aloavo ka ty vola toko’e haloa iareo mba hagnitsifagne iareo. Amy izay hofanta o ndatio fa tsy misy maregne ndra raike, i tsaho nirehafegne miomba azo rey, satria soa ty fomba fiaigna’o sady magnorike i Lalànay rehe.
25 Fa nandefasa’ay taratasy misy ty fanapahan-kevetse nirambese’ay ka i ndaty boake amy ty firenena hafa nanjare mpino rey tie, toko’e hifaly ty raha natao sorogne hoahy ty sampy iareo, ty lio, ty biby mate boboke* naho ty fijangajangagne.”
26 Ie nihamaray igne, le nindese i Paoly i lahilahy rey, le nagnalio ty vata’e arake i Lalànay niarake tamy iareo reke. Nizilike tamy i Tempolỳ ao reke, le nampahafantatse ty andro hitampera i andro filiova iareoy, amy izay i mpisorogney hanolotse i fagnatetse boake amy iareo tsikiraidraikey.
27 Ie fa ho nitapetse i andro fahafito niliova iareoy, le nahatrea i Paoly tamy i tempolỳ ao o Jiosy boake a Azia agneo. Natao iareo ze hahavy i vahoakey iaby hikorontagne, sady tsinepa iareo ty Paoly.
28 Nikorakorake ka iareo tie: “O ry Israelita, miavia mbetoa malaky nareo! Intia i lahy mampianatse o ndatio mbaombao mba hanohetse o ndatintikagneo naho i Lalànantikagney vaho ty toeragne toỳ. Tsy izay avao fa mbe ninday ndaty grike hizilike amy i tempolỳ ao ka reke mba handoto ty toeragne masigne toy.”
29 Nirehake izay iareo, satria nitrea iareo niarake tamy i Paoly tamy i tanàgney ao ty Trofimo efesiana, le nihevetse iareo fa nampidire i Paoly tamy i tempolỳ ao ka reke.
30 Nikorontagne ty vahoake tamy i tanàgney ao naho fa naharey izay, le nilay malaky mbamy i Paoly mbeo iareo mba hitsepake aze sady nitaritarihe iareo ivela i tempolỳ agne reke. Le avy le nihiliagne ka i vavahady i tempolỳ.
31 Faie naho fa ho namono aze iareo, le nisy ndaty nirehake tamy i mpitari-tafikey tie misy korontagne ty a Jerosalema ao.
32 Le avy le ninday maramila naho maramila manam-boninahitse hilay mbamy iareo mbeo malaky reke. Naho fa nitrea iareo i mpitari-tafikey naho i maramila rey, le tsy jinera iareo sasa ty Paoly.
33 Nandeha mbamy iareo mbeo i mpitari-tafikey mba hangalake i Paoly hatao am-pirizò agne. Nagnomey baiko ka reke mba handrohizagne aze amy ty seny roe. Nagnontane reke naho fa niavy eo tie, ia reke, le ino ty raha natao’e.
34 Faie nagnorentsegne i vahoakey, le hafa ty raha nirehafe ty ila’e, fa ty ila’e nirehake raha hafa. Tsy nihay i mpitari-tafikey areke tie ino maregne ty raha tena nisy noho i korakorà iareoy, hafarà’e nampindese’e tamy i tobe maramila iareoy agne ty Paoly.
35 Faie naho fa niavy tamy i esikaliey eo reke, le nongaha i maramila rey satria tena niboseke i vahoakey.
36 Ty anto’e, nagnorike iareo avao i vahoakey sady nikorakorake tie: “Vonò agne reke!”
37 Naho fa ho nente i maramila rey nizilike tamy i tobe iareoy ao ty Paoly, le hoe reke tamy i mpitari-tafikey: “Misy raha mba teako horehafegne zay.” Le hoe reke: “Mahay mirehake grike vao rehe?
38 Tsy ihe vao i ndaty boake a Ejipta agne nitaogne o vahoakeo higoreve naho ninday lahilahy 4 000 mpialy tam-patrambey agne vaho tsy elay?”
39 Le hoe ty Paoly: “Jiosy boake a Tarsosy a Kilikia agne raho. Tompon-tane amo o tanàgne malaza iohoe ao raho. Mihalale ama’o areke raho mba hagnenga ahy hirehake amo o ndaty reo.”
40 Naho fa nimea i mpitari-tafikey alalagne ty Paoly, le nitsangagne tamy i esikalie ey eo, sady nanao fihetseke tamy ty tagna’e tamy i ndaty rey. Ie naho fa nitsigne iaby iareo, le nirehake tamy iareo tamy ty firehake hebreo reke tie:
