Heve-diso: Tsy mankalaza Krismasy o Vavolombelo i Jehovah-o satria iareo tsy mino i Jesosy.

 Ty maregne: Kristiana zahay. Eké’ay tie tsy ho voavonje ty ndaty raike naho tsy mino i Jesosy Kristy.​—Asan’ny Apostoly 4:12.

 Heve-diso: Mampivibìke keleiagne nareo satria risihe’areo tsy hankalaza Krismasy ty ila’e amy iareo.

 Ty maregne: Tena tea’ay ho sambatse o keleiagneo, le mampianatse Baiboly iareo zahay mba hahavy iareo hifankatea vata’e.

 Heve-diso: Mifagnomey fagnomezagne o ndatio naho fa Krismasy, mikezake mampisy filongoagne sady sambe mikezake ho soa fagnahy amy ty hafa iaby. Faie iareo tsy manao Krismasy le tsy mahatsapa ze raha rezay iaby.

 Ty maregne: Mikezake mba hatarike naho hilongo soa amo o ndatio avao zahay isan’andro. (Ohabolana 11:25; Romanina 12:18) Mikezake mba hagnorike ty reha i Jesosy toy ohatse zahay naho fa miarake mivory naho mitory: “Fa nahazo maimaim-poagne nareo, le magnomea maimaim-poagne.” (Matio 10:8) Torie’ay amo o ndatio ka tie ty Fanjakàn’Andrianagnahare avao ty tena hinday fiadanagne ambone tane etoy.​—Matio 10:7.

•   Ty nimateza’e ro nasae i Jesosy ho tsiarovegne fa tsy ty niterahagne aze.​—Lioka 22:19, 20.

•   Tsy nankalaza Krismasy i apostoly i Jesosy rey naho o Kristiana tamy ty taonjato voaloha’eo. Mirehake ty Fangalan-kilala Katolika Vaovao (angilé) fa “tamy ty taogne 243 A.K. vaho nanomboke nankalaza ty niterahagne i Jesosy o ndatio”, ty dika izay 100 taogne mahery tafara ty nimateza ty apostoly fara’e.

•   Tsy misy porofo magnamaregne ka tie tamy 25 Desambra ty Jesosy ro naterake. Tsy rehafe ty Baiboly ty date niterahagne aze.

•   Mino zahay fa tsy tean’Andrianagnahare hankalaza Krismasy ty Kristiana, satria boake amy ty fombafomba ty mpanompo sampy o fete iohoe.​—2 Korintianina 6:17.

 Maro ty mbe manao Krismasy avao ndra tie fa hai’e aza tie boake amy ty mpanompo sampy sady tsy mifagnarake amy ty Baiboly o fete iohoe. Toko’e handineke i ndaty rey tie: Nagnino ty Kristiana ro tsy mankalaza Krismasy ndra tie tsy tea o ndatio aza iareo noho ze raha zay?

 Mandrisike antikagne mba ‘hampiasa saigne’ ty Baiboly. (Romanina 12:1, 2) Maregne fa va’e hisy voka’e ama’ay ty fomba fihevera ty hafa anay. Faie mirehake ty Baiboly tie ty hamarenagne ro toko’e ho lahibey amantikagne. (Jaona 4:23, 24) Mankatò ty toro lala ty Baiboly avao areke zahay ndra tie hahavy anay tsy ho tea o ndatio zay.

 Maregne fa tsy manao Krismasy zahay. Faie eké’ay tie anjara ty tsikiraidraike ty manapa-kevetse tie hankalaza Krismasy vao reke sa tsy hankalaza. Tsy mikalagne ty hafa tsy hankalaza Krismasy zahay.