Mpandrambe anjara tamy ty tantara raike nirehafe i Jesosy i lahilahy mpagnarivoy naho i Lazarosy. (Lioka 16:19-31) Manondro ndaty roe sambe hafa iareo amy i tantaray ao: 1) Mpitarike fivavahagne Jiosy nagnambone tegna tamy ty andro i Jesosy naho 2) ndaty tso-po nagneke ty hafatse nitorie i Jesosy.

Hotreantikagne ato:

•  Ino ty nirehafe i Jesosy miomba i lahilahy mpagnarivoy naho i Lazarosy?

•  Tena nisy vao o tantara iohoe?

•  Magnaporofo vao o tantara iohoe tie misy ty afobey?

•  Ino ty dika o tantara iohoe?

 Mirehake miomba ty lahilahy roe ty Jesosy amy Lioka 16 ao. Le tantarae’e ao tie nisy fiovagne lahibey ty tamy ty fiaigna iareo.

 Izao ty famintignagne i tantaray: Mpagnarivo bey ty lahilahy raike, le tena niadagne. Nisy mpangatake atao tihoe Lazarosy nitoboke tam-bavahadi’e teo. Nitamà reke fa hihinagne amy ty hanegne poke boake an-databa i lahilahy mpagnarivoy. Nimate ty Lazarosy naho fa tafara tatoy le nandese ty anjely raike mba ho agnila i Abrahama eo. Nimate ka i mpagnarivoy le nalevegne. Sambe mahatsiaro saigne iareo roe amy i tantaray ao, ndra tie fa nimate aza. Nijale tagnate afo mirebareba i lahilahy mpagnarivoy, le nangatake tamy i Abrahama reke mba hagnirake i Lazarosy hampanintsinintsy ty lela’e amy ty rano mitete boake amy ty tagna’e. Faie tsy nimete ty Abrahama sady nirehake tamy i lahilahy mpagnarivoy tie sambe fa niova ty fiaigna iareo le fa nisiagne hantsagne mampisarake iareo roe.

 Aha’a. Fagnoharagne natao i Jesosy avao io satria misy lesogne tea’e hampianaregne. Magneke izay ka o manam-pahaiagneo. Mirehake ohatse ty lohan-drehake kedekede amy ty Baiboly i Luther tamy 1912 fa fagnoharagne avao io. Nisy fagnamarehagne ambane peje ka ty amy i Baiboly Katolika atao tihoe Baiboly i Jerosalemay tie “fagnoharagne io faie hoe tantara ty nanoagne aze, sady tsy tena nisy ka i ndaty amy i tantaray ao.”

 Te hampianatse miomba ty fiaignagne afara ty imatezagne vao ty Jesosy? Te hirehake vao reke tie naho fa mate o ndatio le mijalejale agn’afobey agne sady nandeha mban-dagnitse agne vao ty Abrahama naho i Lazarosy? Maro ty porofo magnamaregne fa tsy mitombegne zay.

 Eretsereto zao:

•   Naho toe tagnate afo mirebareba vata’e i lahilahy mpagnarivoy, tsy ho nanjare setroke vao i rano tamy i tagna i Lazarosỳ?

•   Ndra tie tsy ho nanjare setroke i ranoy, ho niampe hampanintsinintsigne ty fiai’e agnate i afoy ao vao i rano kedekedekey?

•   Mitombegne vao tihoe tan-dagnitse agne ty Abrahama, ie amy izao ty Jesosy nirehake tie mbe tsy nisy ndaty niakatse tan-dagnitse agne tamy ze fotoagne zay?​—Jaona 3:13.

 Aha’a. Ndra tie tsy tena nisy aza o tantara iohoe, le misy ty mirehake tie te hirehake io fa mandeha an-dagnitse agne ze ndaty soa fagnahy le mijalejale agn’afobey a agne ze ndaty raty fagnahy.

 Faie tsy mitombegne zay.

 Tsy mifagnarake amy ty raha rehafe ty Baiboly miomba ty ndaty mate ty fampianaragne tihoe misy ty afobey. Tsy mampianatse ohatse ty Baiboly tie manjare sambatse an-dagnitse agne iaby ze ndaty soa fagnahy naho fa mate le ampijalégne agnate ty afobey agne ze ndaty raty fagnahy. Rehafe ty Baiboly mazava tie: “Fanta ty ndaty velogne fa ho mate reke, fa ty mate tsy misy raha rendre’e.”​—Mpitoriteny 9:5.

 Atoro o tantara iohoe fa misy ndaty roe sambe hafa hiova ty fiaigna’e.

 Manondro o mpitarike fivavahagne Jiosy “tea volao” i lahilahy mpagnarivoy. (Lioka 16:14) Nitsanogne i Jesosy iareo faie tsy nagneke ty hafatse nitorie’e. Nagnambane ty ndaty tsy nitovy tamy iareo ndra ty ndaty managne fiaignagne tsotra ka iareo.​—Jaona 7:49.

 I Lazarosy ka, manondro o ndaty managne toe-po soa magneke i hafatse nitorie i Jesosỳ sady nambanembané o mpitarike fivavahagne Jiosio.

 Niova bey ty fiaigna o ndaty sambe hafa reo.

•   Nieretseretse o mpitarike fivavahagne Jiosio tie nankasitrahan’Andrianagnahare iareo. Faie naho fa nilieren’Andrianagnahare iareo naho ty fanompoa iareo noho iareo tsy nagneke i hafatse nitorie i Jesosỳ, le mitovy amy tihoe nimate. Nampijale iareo ka i hafatse nitorie i Jesosy naho ty mpanonjohy ty lia’e rey.​—Matio 23:29, 30; Asan’ny Apostoly 5:29-33.

•   Nanjare nihasoa ty fiaigna o ndaty tso-po tsy nidarea o mpitarike fivavahagne tagnate ty taogne maro reo. Maro ty nagneke i hafatse nitorie i Jesosỳ sady nandrambe soa boake amy izay. Afake mahazo ty fankasitrahan’Andrianagnahare nainai’e ka zao iareo.​—Jaona 17:3.