Fa ela o manam-pahaiagne miomba ty bibio ro nahatsikaritse tie tena mipiteke mafe amo o vatò naho amy ty vata o sambò vaho amy ty raha hafa ty karazan’akorandriake atao tihoe balanes. Le mbe mihoatse o koly namboare o ndatiò ty fipite i ranon-draha mipiteke aboa o balanes-oy. Vaho tsy ela ty nahafantara o manam-pahaiagneo tie akore ty ahafaha o biby iohoe mipiteke amy ty raha agnate rano agne.

 Dineho zao: Trea tamy ty fikarohagne natao tie magnente toeragne maromaro o balanes-o naho fa hifily ty toeragne hitoboha’e. Mamoake ranon-draha mipiteke karaza’e roe reke naho fa mandeha amy ty toeragne mete soa ama’e eo. Misy menake i ranon-draha mipiteke voaloha’ey. Magnafake ze rano amy i faritse hitoboha’ey eo igne sady apeta’e soa eo i ranon-draha mipiteke faharoe feno proteinay (atao tihoey phosphoprotéines).

 Manjare koly mafe bey o ranon-draha mipiteke roe rehoe naho fa mitambatse, le ndra o bakteriao aza tsy mahavita manimba aze. Tena paliae o balanes-o i tihoey mafe naho maharetse i ranon-draha mipiteke aboa’ey satria hitoboke eo avao reke amparake ty imateza’e.

 Bey pitsopitso’e tsy arake ty nieretseretagne aze ty fanoa o balanes-o i ranon-draha mipiteke aboa’ey. Mieke ze lahilahy raike agnisa ty mpikaroke nahatrea io zay tie tena hevetse soa io satria sarotse ty mametake koly amy ty raha agnate rano agne. Va’e hagnampe o mpikarokeo hamboatse koly azo ampiasaegne agnate rano agne io, ndra koly boake amo o raha finorogneo faie azo ampiasaegne amy ty fitaovagne elektronike ndra amy ty fitsaboagne.

 Akore ty heve’o? Nivoatse miandalagne vao i ranon-draha mipiteke boake amo o balanes-oy, sa nisy namorogne?