Triste tebes katak iha 29 Marsu 2022, irmaun-irmán naʼin-7 tan mate iha sidade Mariupol. Sura hamutuk, irmaun-irmán naʼin-17 mak mate iha Ukránia.

Komisaun ba dezastre iha Ukránia kontinua serbisu makaʼas hodi prepara buat oioin atu ajuda irmaun-irmán sira, no sira tau sira-nia moris iha perigu laran hodi buka maluk fiar-naʼin sira iha área neʼebé hetan estragu boot husi funu.

Porezemplu, irmaun sira husi komisaun ba dezastre konsege lori hahán, ai-moruk, no buat seluk ba sidade sira neʼebé hetan estragu boot, hanesan Kharkiv, Kramatorsk, no Mariupol. Irmaun ida husi komisaun neʼe halo viajen loron ida kilómetru 500 hodi liu militár nia checkpoint barak atu lori hahán no ai-moruk ba irmaun-irmán sira maizumenus naʼin-2.700.

Komisaun ba dezastre mós organiza transporte atu salva irmaun-irmán sira iha área funu. Irmaun ida husi komisaun ba dezastre iha Chernihiv dehan: “Kuandu tropa hahú tiru bomba iha área rezidénsia, ami rekoñese katak perigu demais atu kontinua hela iha sidade neʼe. Tanba la iha eletrisidade no internét, durante ema tiru bomba, katuas sira bá lalais atu fó-hatene irmaun-irmán sira neʼebé subar iha rai okos katak iha ona transporte atu halai sai husi sidade.”

Kompañia transporte ida nia naʼin konkorda atu uza ninia karreta no bís sira, no nia hodi karreta bá-mai dala sia atu tula irmaun-irmán naʼin-254 husi Chernihiv. Dala ida, nia mós uza mákina boot atu hadiʼa dalan hodi bís bele liu. Irmaun-irmán sira agradese tebes ba ajuda neʼe.

Ita hanoin tebes sira neʼebé lakon ona sira-nia família ka belun diʼak tanba funu neʼebé akontese daudaun. Ita hotu hein namanas ba tempu neʼebé mate sei la iha tan no ema sei la triste tan hodi tuir promesa husi Maromak nia Liafuan.—Apokalipse 21:3, 4.

Iha loron 29 Marsu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun iha neʼebá. Maibé, karik loloos sei iha barak liután, tanba susar atu komunika ho área hotu iha Ukránia.

• Irmaun-irmán naʼin-17 mate

• Irmaun-irmán naʼin-35 hetan kanek

• Irmaun-irmán naʼin-36.313 husik sira-nia uma hodi halai ba fatin seluk neʼebé seguru liu

• Uma 114 rahun hotu

• Uma 144 hetan estragu boot

• Uma 612 hetan estragu uitoan

• Reuniaun-Fatin 1 rahun

• Reuniaun-Fatin 7 hetan estragu boot

• Reuniaun-Fatin 23 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-34.739 atu hetan hela-fatin iha área neʼebé seguru liu

• Irmaun-irmán naʼin-16.175 halai ona ba nasaun seluk no irmaun-irmán husi nasaun sira-neʼe ajuda sira