Testemuña ba Jeová iha website ofisiál iha internét ba tinan 25 ona. Ita-nia Serbisu Kristaun Novembru 1997 fó sai informasaun ho títulu “Liafuan diʼak iha internét” no koʼalia kona-ba website foun watchtower.org. Informasaun neʼe esplika: “Ita-nia organizasaun uza internét hodi tau informasaun neʼebé loos kona-ba Testemuña ba Jeová nia fiar no atividade sira. . . . Ita-nia website nia objetivu mak laʼós atu fó sai publikasaun foun, maibé atu fahe informasaun iha dalan eletróniku ba públiku.”

Husi tempu neʼebá, ema bele download panfletu, broxura, Livru Haklaken, no Matan-moris bá! husi watchtower.org. Ami fó sai website watchtower.org ba públiku iha 15 Janeiru 1997. Ikusmai, ami mós fó sai jw-media.org iha tinan 1999. Website neʼe fó sai informasaun neʼebé loos ba média kona-ba akontesimentu sira neʼebé iha relasaun ho Testemuña ba Jeová, inklui mós kona-ba kazu legál sira no organizasaun nia atividade seluk.

Iha tinan 2005, ami fó sai jw.org, no lakleur, ema bele uza website neʼe atu download publikasaun no gravasaun áudio.

Iha Agostu 2012, website tolu neʼe sai ida deʼit iha jw.org. Kona-ba mudansa ba website neʼe, Ita-nia Serbisu Kristaun Dezembru 2012 dehan: “Maizumenus porsentu 33 husi populasaun iha mundu uza internét. Ema barak, liuliu joven sira uza internét atu buka informasaun. . . . Liuhusi internét, liafuan diʼak bele habelar ba fatin neʼebé ema ladún iha oportunidade atu rona mensajen kona-ba Maromak nia Ukun.”

JW.ORG aumenta informasaun barak liután, inklui mós áudio no vídeo. Ami prepara publikasaun atu download iha língua 411. Maizumenus liutiha tinan 7 husi 2012, jw.org fó sai publikasaun sira iha língua 1.000, inklui língua jestuál 100.

Website JW.ORG sai folin-boot liután bainhira pandemia COVID-19 hahú, tanba ema labele halibur malu atu halaʼo reuniaun no sai susar atu print no fahe publikasaun sira. No iha loron 7 Abríl 2020, neʼe mak loron Memoriál ba Jesus nia mate, website neʼe hetan asesu husi ema naʼin-7.000.000, no neʼe mak ema barak liu durante tempu hotu. Iha tinan 2019, ema naʼin-800.000.000 mak vizita website neʼe, maibé iha tinan 2020 nia laran, ema naʼin-1.000.000.000 liu mak vizita. Husi Janeiru 2022, website neʼe hetan asesu maizumenus dala 3.000.000 kada loron.

Informasaun neʼebé loos iha jw.org ajuda duni ema atu la hanoin sala kona-ba Testemuña ba Jeová. Porezemplu, Tenesha Gordon dehan: “Haʼu agradese tanba fasil tebes atu asesu informasaun kona-ba Testemuña sira, porezemplu sira mak ema hanesan saida, sira fiar saida, no sira-nia fiar bazeia ba saida. Neʼe ajuda haʼu atu komprende ho klaru no halakon hanoin neʼebé sala.”

Tenesha hetan batizmu iha tinan 2017, no agora serbí nuʼudar voluntáriu iha Betel iha Jamaika.

Irmaun Clive Martin, neʼebé tau matan ba departamentu neʼebé mantein website, dehan: “Ami kontente tebes atu haree oinsá mak Jeová uza jw.org atu hatoʼo liafuan diʼak kona-ba Maromak nia Ukun ba ema barak husi situasaun moris oioin iha mundu tomak.”

Ita agradese ba Jeová tanba ekipamentu neʼe ajuda ita atu halaʼo serbisu haklaken, hetan informasaun kona-ba organizasaun, no halo ita unidade iha mundu tomak. Buat hotu neʼe lori hahiʼi ba Maromak Jeová.—Salmo 145:1, 2.