Organizasaun neʼebé buka dame bele hetan susesu ka lae?

LOKE

Agora daudaun, funu no konflitu akontese beibeik iha mundu tomak. Tan neʼe, Nasoins Unidas no organizasaun sira seluk buka atu lori dame ba rai neʼebé funu no konflitu sira-neʼe mosu. Sira iha objetivu atu halo dame iha fatin neʼebé iha violénsia. Sekretáriu Jerál Nasoins Unidas naran António Guterres hatete: “Nasoins Unidas nia serbisu-naʼin sira neʼebé hakarak lori dame, sira mak parte importante atu halaʼo ami-nia objetivu hodi haburas dame iha mundu.”

Ba tinan barak ona, organizasaun sira neʼebé serbisu atu lori dame hetan susesu balu. Porezemplu, sira konsege proteje povu, lori fali refujiadu ba sira-nia rai rasik, fó ajuda umanitária, no harii fali fatin oioin neʼebé hetan estragu tanba konflitu. Maski nuneʼe, organizasaun sira neʼebé hakarak lori dame hasoru dezafiu boot oioin neʼebé hanetik sira atu hetan susesu neʼebé loos. Ita bele hetan solusaun neʼebé lori dame ba mundu tomak ka lae? Saida mak Bíblia dehan kona-ba neʼe?

Dezafiu neʼebé organizasaun sira hasoru, no Bíblia nia solusaun

Dezafiu: ema lakohi serbisu hamutuk. Susar ba organizasaun militár no organizasaun seluk iha rai oioin atu serbisu hamutuk ho unidade. Baibain organizasaun sira-neʼe hetan problema tanba iha hanoin no hakarak neʼebé la hanesan.

Bíblia nia solusaun: “Maromak iha lalehan sei harii ukun ida . . . no halakon liurai sira-neʼe hotu nia ukun [ema nia governu], no ukun neʼe mesak mak sei hamriik ba nafatin.”—Daniel 2:44.

Lakleur tan, Maromak sei halakon funu hotu no lori dame ba mundu tomak. (Salmo 46:8, 9) Nia sei troka governu hotu iha mundu ho governu ida deʼit: Neʼe mak Maromak nia Ukun ka governu. Governu perfeitu neʼe sei ukun husi lalehan, no mundu sei la iha tan funu, no ema sei la presiza tan organizasaun sira neʼebé buka atu lori dame.

Dezafiu: osan no serbisu-naʼin la toʼo. Organizasaun neʼebé hakarak lori dame la iha ema, osan ka sasán neʼebé natoon, tan neʼe hanetik sira atu bele halaʼo sira-nia objetivu. Organizasaun sira-neʼe mós presiza halaʼo sira-nia serbisu iha fatin neʼebé susar no perigu.

Bíblia nia solusaun: “Ita-nia Naʼi Jesus Kristu nia Maromak . . . husik [Jesus] tuur iha ninia liman sorin loos iha lalehan, aas liu fali governu hotu, ukun-naʼin hotu, podér hotu.”—Éfeso 1:17, 20, 21.

Maromak Jeová a neʼebé aas liu hotu, fó ba Jesus buat hotu neʼebé nia presiza nuʼudar Liurai ba Maromak nia Ukun. (Daniel 7:13, 14 b) Maromak fó ona ba Jesus podér, kbiit atu tetu didiʼak, koñesimentu, no matenek neʼebé aas liu fali ema nia governu ka organizasaun iha mundu tomak. (Isaias 11:2) Jesus mós iha anju sira neʼebé forsa boot rihun ba rihun neʼebé prontu atu halaʼo ninia hakarak. (Apokalipse 19:14) La iha problema neʼebé susar ka todan liu ba nia atu rezolve.

Jesus sei uza buat hotu neʼebé nia iha inklui kbiit husi Maromak atu hapara funu hotu. Maibé laʼós neʼe deʼit, Jesus mós sei halo mundu hakmatek, seguru no lori dame ba ema hotu neʼebé moris iha Maromak nia Ukun okos.—Isaias 32:17, 18.

Dezafiu: lei neʼebé tau limite. Dala ruma, ema neʼebé serbisu ba organizasaun neʼebé lori dame labele halo buat neʼebé sira presiza halo tanba la simu matadalan neʼebé klaru kona-ba saida mak sira presiza ka bele halo, ka tanba lei iha rai neʼe mak hanetik sira. Lei sira-neʼe bele taka dalan ba sira atu proteje ema ka kumpre sira-nia objetivu.

Bíblia nia solusaun: “Kbiit tomak iha lalehan no rai entrega ona [ba Jesus].”—Mateus 28:18.

Maromak fó ona mandamentu ba Jesus atu lori dame ba mundu tomak no Jesus iha autoridade hotu atu kumpre ida-neʼe. (João 5:22) Jesus sei ukun ho justisa no sei nunka halo korrupsaun. (Isaias 11:3-5) Tan razaun neʼe mak, Bíblia bolu Jesus nuʼudar “Ulun-Naʼin Dame nian”, no ninia ukun sei iha “justisa no hahalok loos”.—Isaias 9:6,7.

Maromak nia Ukun deʼit mak sei lori dame neʼebé loos

Ema nia organizasaun bele hakaʼas an atu lori dame no karik hapara funu iha fatin balu. Maibé sira labele halakon violénsia nia hun, neʼe mak sentimentu odi neʼebé ema barak sente iha laran ba ema seluk.

“Problema neʼebé boot liu mak organizasaun sira neʼebé hakarak halo dame labele kumpre ida-nee.”—Dennis Jett, eis-embaixadór ba Estadus Unidus.

Maski nuneʼe, Maromak nia Ukun bele halo dame neʼebé loos tanba ida-neʼe ajuda ema halakon odi husi sira-nia laran. Porezemplu, bainhira Jesus iha mundu, nia hanorin ema liuhusi ninia liafuan no ezemplu kona-ba oinsá mak sira bele halo dame no hatudu domin:

“Ksolok ba sira neʼebé buka dame.”—Mateus 5:9.

“Imi tenke hadomi imi-nia maluk hanesan imi-nia an rasik.”—Marcos 12:29-31.

“Hatama fali ó-nia surik ba ninia fatin, tanba ema hotu neʼebé kaer surik sei mate ho surik.”—Mateus 26:52.

“Kuandu ema koʼalia liafuan kroʼat ba [Jesus], nia la koʼalia fali liafuan kroʼat ba sira. Kuandu nia hetan terus, nia la ameasa sira neʼebé fó-terus ba nia.”—1 Pedro 2:23.

Jesus mós dehan katak ema sei rekoñese sira neʼebé moris tuir Maromak nia ukun tanba sira hatudu domin ba ema seluk. Bíblia hatete ho klaru katak ema neʼebé la hatudu domin ba ema seluk, Maromak sei la husik sira moris iha ninia Ukun okos:

“Se imi hadomi malu, ema hotu sei hatene katak imi mak haʼu-nia dixípulu.”—João 13:34, 35.

“Ema hotu neʼebé odi ninia maluk, ema neʼe mak ohodór.”—1 João 3:15.

“Ema neʼebé hadomi Maromak tenke hadomi mós ninia maluk.”—1 João 4:20, 21.

Tanba Maromak Jeová mak kria ema, nia hatene dalan diʼak liu hotu atu lori dame ba mundu neʼe. Só ninia Ukun deʼit mak sei hetan susesu, la hanesan ho ema nia organizasaun sira neʼebé koko atu lori dame, maibé la susesu.

a Jeová mak Maromak nia naran rasik. (Salmo 83:18) Lee informasaun “Sé mak Jeová?”

b Iha Daniel 7:13, 14, liafuan “oan-mane husi ema” koʼalia kona-ba Jesus Kristu.—Mateus 25:31; 26:63, 64.

Agora daudaun mós, Maromak nia Ukun ajuda lori dame no unidade

Iha futuru, Maromak nia Ukun sei lori unidade ba ema hotu iha mundu tomak tanba sira sei halo tuir Maromak nia matadalan kona-ba dame. (Isaias 2:4; 11:9) Maibé agora mós Maromak nia Ukun neʼebé harii ona iha lalehan, lori daudaun dame no unidade ba ema rihun ba rihun neʼebé simu treinu husi nia.

Loke vídeo Bainhira mak domin ho laran-metin sei manán hasoru odi? atu haree oinsá Bíblia ajuda mane naʼin-rua hasai odi malu husi sira-nia laran maski ema Judeu no Arabi odi malu kleur ona.

Deskulpa, média player labele loke.Download vídeo ne'e

Geng nia ulun-naʼin ida neʼebé gosta halo violensia no polísia ida neʼebé hirus-teen, uluk odi malu tebes. Loke vídeo Inimigu neʼebé sai fali belun atu hatene oinsá Bíblia nia hanorin ajuda sira sai belun diʼak.