“Ita hotu hakarak moris normál fali.”—Angela Merkel, Primeiru Ministru husi rai-Alemaña.

 Karik Ita konkorda ho ninia liafuan tanba pandemia COVID-19 kontinua afeta ema nia moris iha mundu tomak. Maibé moris neʼebé “normál” katak sá? Saida mak ema hakarak halo?

•   Halaʼo moris hanesan uluk antes pandemia. Ema balu hakarak atu ransu fali ho ema oioin, hakoʼak malu, kaer liman, no mós bele halo viajen. Dr. Anthony Fauci a dehan katak ema hanoin katak “fila fali ba moris neʼebé normál” mak envolve “bá restaurante, sinema, [no] buat seluk tan”.

•   Iha moris neʼebé diʼak liu. Ema balu hakarak atu iha moris neʼebé diʼak liu fali uluk. Sira hanoin katak buat balu tenkesér troka, hanesan serbisu neʼebé gasta demais tempu no forsa, situasaun neʼebé la justisa, no ema barak liután neʼebé hetan moras mentál. Klaus Schwab, fundadór ba World Economic Forum dehan: “Pandemia fó oportunidade úniku mai ita atu analiza fali mundu nia situasaun no halo mudansa hodi hadiʼa problema oioin.”

 Ema balu neʼebé hasoru problema oioin tanba pandemia, hanoin katak moris sei nunka bele sai “normál” fali hanesan uluk. Porezemplu, ema barak lakon serbisu, hela-fatin, saúde neʼebé diʼak, ka aat liu mak ema neʼebé sira hadomi mate.

 La iha ema ida mak bele siʼik mundu nia situasaun sei sai oinsá loos depois pandemia neʼe remata. (Eclesiastes 9:11) Maski nuneʼe, Bíblia bele ajuda ita atu iha hanoin neʼebé loos kona-ba ita-nia futuru, no bele ajuda ita tahan hasoru buat naran deʼit neʼebé karik bele akontese ba ita. Laʼós neʼe deʼit, Bíblia mós esplika kona-ba futuru neʼebé karik Ita nunka imajina.

 Tinan barak liubá, Bíblia fó-hatene nanis katak moras neʼebé bele hadaʼet lalais ka “moras-peste oioin” sei mosu durante “mundu neʼe nia rohan”. (Lucas 21:11; Mateus 24:3) Se ita hanoin-hetan ida-neʼe bainhira ita hanoin kona-ba pandemia COVID-19, ita bele komprende katak neʼe mak akontesimentu ida husi akontesimentu importante oioin neʼebé Bíblia fó sai nanis, inklui mós funu, rai-nakdoko, no rai-hamlaha.

 Oinsá ida-neʼe bele ajuda ita: Maski karik situasaun pandemia sei sai diʼak, maibé Bíblia fó avizu katak ita moris iha tempu neʼebé “iha problema barak neʼebé susar atu tahan”. (2 Timóteo 3:1) Hodi hatene kona-ba neʼe, ajuda ita atu iha hanoin neʼebé loos kona-ba ita-nia moris iha tempu susar agora.

 Bíblia bele ajuda ita atu haree situasaun iha dalan neʼebé loos: Ita moris iha mundu neʼebé problema aumenta barak liután, no lakleur tan sei iha mudansa boot ida. Saida mak neʼe?

 Bíblia laʼós deʼit fó-hatene nanis kona-ba problema sériu oioin neʼebé ita hasoru daudaun, maibé Bíblia mós fó sai kona-ba futuru diʼak neʼebé lakleur tan sei sai loos. Futuru neʼebé Bíblia fó sai mak diʼak liu fali buat neʼebé ema nia governu bele halo, no só Maromak deʼit mak bele halo ida-neʼe. “Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”—Apokalipse 21:4.

 Maromak Jeová b promete: “Haree bá! Haʼu halo buat hotu sai foun.” (Apokalipse 21:5) Nia sei rezolve problema oioin iha mundu, inklui problema sira neʼebé sai aat liután tanba pandemia. Nia sei halo buat tuirmai:

•   Saúde fíziku no mentál neʼebé perfeitu. La iha tan moras no mate.—Isaias 25:8; 33:24.

•   Iha serbisu neʼebé lori ksolok neʼebé loos ba ema hotu, laʼós serbisu todan demais neʼebé halo ema estrese boot.—Isaias 65:22, 23.

•   Ema hotu bele iha moris neʼebé diʼak, la iha tan ema neʼebé moris kiak no hamlaha.—Salmo 72:12, 13; 145:16.

•   Sai livre husi laran-susar no trauma, no iha esperansa atu hasoru fali família no belun neʼebé sei moris-hiʼas.—Isaias 65:17; Apóstolu 24:15.

 Oinsá ida-neʼe bele ajuda Ita: Bíblia dehan: “Ita iha esperansa neʼe hanesan ankor neʼebé loos no metin ba ita-nia moris.” (Ebreu 6:19) Esperansa kapás hanesan neʼe bele hametin ita. Neʼe bele ajuda ita atu tahan hasoru susar oioin, hamenus laran-susar, no mantein ita-nia ksolok.

 Maibé Ita bele fiar duni ba Bíblia nia promesa ka lae? Haree informasaun ho títulu “Bíblia hatoʼo lia-loos neʼebé ita bele fiar”.

•   Hafolin moris

   Eskritura: “Matenek bele salva ninia naʼin nia moris”.—Eclesiastes 7:12.

   Oinsá Ita bele aplika ida-neʼe: Foti desizaun neʼebé matenek hodi hamenus risku atu kona moras. Buka-hatene kona-ba risku atu kona-ba moras iha Ita-nia área. Hanoin kona-ba lei no regra sira, no ema naʼin-hira mak kona moras no porsentu hira mak simu ona vasina iha Ita-nia área.

•   Kontinua matan-moris

   Eskritura: “Ema matenek kuidadu an didiʼak no hasees an husi hahalok aat, maibé ema beik la kuidadu no fiar an demais.”—Provérbios 14:16.

   Oinsá Ita bele aplika ida-neʼe: Kontinua halo buat oioin neʼebé bele proteje Ita-nia saúde. Matenek-naʼin sira hanoin katak virus korona sei kontinua iha ba tempu kleur.

•   Haree ba informasaun neʼebé Ita bele tau fiar

   Eskritura: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”—Provérbios 14:15.

   Oinsá Ita bele aplika ida-neʼe: Hili didiʼak matadalan neʼebé Ita atu halo tuir. Hanoin-hetan, desizaun neʼebé Ita halo mak importante, se Ita halo desizaun tuir informasaun neʼebé la loos, Ita bele estraga Ita-nia saúde.

•   Kontinua hanoin pozitivu

   Eskritura: “Keta dehan: ‘Tanbasá mak loron uluk nian diʼak liu fali agora?’ Ó la hatudu matenek bainhira husu ida-neʼe.”—Eclesiastes 7:10.

   Oinsá Ita bele aplika ida-neʼe: Hakaʼas an nafatin atu halaʼo moris ho kontente tuir Ita-nia situasaun agora. Labele hanoin katak moris uluk nian antes pandemia mak diʼak liu, no keta hanoin demais kona-ba buat sira neʼebé Ita labele halo tanba pandemia.

•   Hatudu respeitu ba ema seluk

   Eskritura: “Hatudu respeitu ba ema oioin”.—1 Pedro 2:17.

   Oinsá Ita bele aplika ida-neʼe: Ema ida-idak iha hanoin neʼebé la hanesan kona-ba pandemia no mós rezultadu husi pandemia. Respeita ema seluk nia opiniaun, maibé nafatin kaer metin ba Ita rasik nia desizaun diʼak. Hanoin kona-ba ema neʼebé la simu vasina, ema neʼebé idade ona, no iha problema saúde neʼebé sériu.

•   Hatudu pasiénsia

   Eskritura: “Domin mak pasiénsia no laran-diʼak.”—1 Korinto 13:4.

   Oinsá Ita bele aplika ida-neʼe: Hatudu laran-diʼak bainhira ema ruma fó sai sira-nia laran-susar kona-ba halaʼo fali atividade ruma hanesan uluk. Bainhira situasaun sai diʼak fali no Ita bele halo fali atividade oioin, hatudu pasiénsia ba Ita-nia an.

 Testemuña ba Jeová hetan kmaan husi Bíblia nia promesa oioin kona-ba futuru neʼebé kapás, no neʼe ajuda sira atu la tau fokus deʼit ba pandemia. Sira mós apoia malu liuhusi halo tuir Bíblia nia mandamentu atu halibur hamutuk beibeik hodi adora Maromak. (Ebreu 10:24, 25) Ema hotu bele asiste reuniaun husi Testemuña ba Jeová neʼebé halaʼo liuhusi vídeo konferénsia durante pandemia.

 Ema barak sente katak hodi asiste reuniaun husi Testemuña ba Jeová, neʼe ajuda sira durante tempu susar neʼe. Porezemplu, feto ida neʼebé kona COVID-19 simu konvite no tuir reuniaun husi Testemuña ba Jeová neʼebé halaʼo liuhusi vídeo konferénsia. Reuniaun sira-neʼe ajuda nia iha dalan emosaun, maski nia kontinua hasoru problema saúde tanba virus neʼe. Liutiha tempu balu, nia dehan: “Haʼu sente katak haʼu mós parte husi família neʼe. Lee Bíblia halo haʼu sente dame no kmaan. Neʼe ajuda haʼu atu tau fokus ba esperansa kona-ba futuru, duké fokus ba haʼu-nia problema sira. Obrigada tanba ajuda ona haʼu atu hakbesik ba Maromak neʼebé haʼu buka durante haʼu-nia moris tomak.”