Ema barak iha mundu taʼuk kona-ba funu nukleár tanba governu sira kontinua mantein no aumenta sira-nia armas nukleár. Ema hanoin barak tanba kuandu governu sira aumenta armas nukleár, neʼe mós aumenta oportunidade ba funu nukleár atu mosu. Ema balu mós taʼuk tanba se karik nasaun ida uza bomba nukleár kiʼik ida deʼit, neʼe bele loke dalan ba funu boot nukleár neʼebé sei estraga mundu tomak. Tuir Bulletin of the Atomic Scientists, ita moris durante tempu “perigu husi funu nukleár”.

 Tuir loloos, funu nukleár bele akontese ka lae? Se neʼe akontese, ita-nia planeta sei dura ka lae? Oinsá mak ita bele hamenus estrese se ita hanoin kona-ba funu nukleár? Saida mak Bíblia dehan kona-ba neʼe?

Iha informasaun neʼe

•  Bíblia fó-hatene nanis kona-ba funu nukleár ka lae?

•  Maromak sei husik funu nukleár akontese ka lae?

•  Planeta mundu sei dura ka lae?

•  Saida mak bele ajuda Ita tahan hasoru estrese kona-ba funu nukleár?

•  Bíblia dehan katak funu Armagedon sei inklui armas nukleár ka lae?

•  Saida mak Bíblia nia solusaun kona-ba funu?

•  Livru Apokalipse iha Bíblia refere ba funu nukleár ka lae?

 Bíblia fó-hatene nanis kona-ba funu nukleár ka lae?

 Bíblia la temi liafuan espesífiku kona-ba funu nukleár. Maibé, Bíblia fó-hatene nanis kona-ba ema nia atitude no akontesimentu seluk neʼebé bele kauza funu nukleár.

 Lee versíkulu sira tuirmai husi Bíblia no hanoin kona-ba buat neʼebé akontese agora daudaun iha mundu:

 Eskritura sira: Jesus nia dixípulu sira husu: “Sinál saida mak sei hatudu katak Ita toʼo ona mai no mundu neʼe nia rohan mai ona?” Jesus hatán: “Nasaun ida sei kontra nasaun seluk no ukun ida sei kontra ukun seluk.”—Mateus 24:3, 7.

 Akontesimentu iha mundu: Nasaun sira, inklui mós sira neʼebé iha armas nukleár, aumenta konflitu no funu.

 “Iha tinan hirak foin daudauk neʼe, iha violénsia barak liu iha mundu, no konflitu sira mós aumenta ba beibeik.”—The Armed Conflict Location & Event Data Project.

 Eskritura: “Iha tempu nia rohan, liurai súl sei dudu malu ho [liurai norte].”—Daniel 11:40.

 Akontesimentu iha mundu: Nasaun sira hamutuk ho nasaun seluk neʼebé apoia sira dudu, ka kompete malu, atu sai forsa boot liu iha mundu, hanesan Bíblia fó-hatene nanis. Ohin loron maski nasaun sira neʼebé iha armas nukleár barak liu la ataka malu diretamente, maibé sira nafatin aumenta sira-nia armas nukleár.

 “Ita haree katak konflitu entre nasaun sira aumenta durante tinan 10 neʼe nia laran, no neʼe inklui nasaun forsa boot sira apoia nasaun sira neʼebé kontra malu.”—The Uppsala Conflict Data Program.

 Eskritura sira: “Iha loron ikus sira sei iha problema barak neʼebé susar atu tahan. Tanba ema sei . . . la rona malu, koʼalia aat hodi hafoʼer ema seluk nia naran, la kontrola an, siʼak.”—2 Timóteo 3:1-3.

 Akontesimentu iha mundu: Hanesan ema barak ohin loron, dala barak ulun-naʼin sira diskute malu. Duké rezolve sira-nia problema ho dame, sira buka solusaun hodi ameasa ka ataka malu. Hahalok hanesan neʼe bele provoka ema atu halo funu nukleár.

 “Se la buka dalan atu rezolve hamutuk, konflitu sira sei aumenta no sai aat liután.”—S. Saran no J. Harman, World Economic Forum.

 Maromak sei husik funu nukleár akontese ka lae?

 Bíblia la fó resposta. Bíblia dehan katak “ema sei haree buat neʼebé halo sira taʼuk”, ka akontesimentu neʼebé halo ema sente taʼuk sei mosu ohin loron. (Lucas 21:11) Porezemplu, akontesimentu neʼebé halo ema taʼuk kuandu ema hatún bomba atómiku durante Funu Mundiál Segundu. Bíblia esplika tanbasá Maromak husik funu akontese. Atu aprende liután, haree vídeo ho títulu Tanbasá mak Maromak husik terus akontese?

 Planeta mundu sei dura ka lae?

 Sin. Maski karik ema uza fali armas nukleár, maibé Maromak sei la husik ida-neʼe atu harahun buat hotu iha mundu tomak. Bíblia hatete katak ita-nia planeta sei dura maski hasoru problema boot no mós ema sei moris iha mundu neʼe ba nafatin.

 Ema balu imajina katak, iha futuru, ema uitoan deʼit sei hela iha mundu no sira sei moris susar tebes tanba hela iha rai neʼebé estraga tiha no nakonu ho poluisaun tanba funu nukleár. Maibé, Bíblia hatete katak maski funu bele estraga mundu neʼe, Maromak sei hadiʼa kompletu fali.

 Ita-nia Kriadór halo mundu ho kapasidade atu rekupera an. Maibé, ikusmai, Maromak sei uza ninia kbiit atu hadiʼa mundu. No mundu neʼe sai ema nia hela-fatin neʼebé furak ba nafatin.—Salmo 37:11, 29; Apokalipse 21:5.

 Saida mak bele ajuda Ita tahan hasoru estrese kona-ba funu nukleár?

 Karik ema balu hanoin demais no estrese kona-ba funu nukleár no rezultadu husi funu hanesan neʼe. Promesa sira no konsellu iha Bíblia bele ajuda ema atu tahan hasoru estrese no hamenus sentimentu taʼuk. Oinsá?

 Bíblia esplika kona-ba futuru kapás ba mundu no ba ema. Aprende kona-ba esperansa neʼe bele sai nuʼudar “ankor . . . ba ita-nia moris” no hamenus estrese. (Ebreu 6:19) Ita mós bele hamenus estrese hodi fokus ba loron ida-idak no la hanoin demais kona-ba buat neʼebé bele akontese iha futuru. Hanesan Jesus dehan, “loron ida-idak iha ninia problema rasik”.—Mateus 6:34.

 Tuir loloos, ita hotu presiza tau matan ba ita-nia saúde mentál no emosionál. Ita bele halo ida-neʼe hodi hasees an husi informasaun neʼebé halo ita sente estrese, hanesan notísias, diskusaun, predisaun, no opiniaun kona-ba funu nukleár. Neʼe la dehan katak ita finje katak situasaun perigu la iha. Maibé, ita halo nuneʼe atu la hanoin demais kona-ba akontesimentu neʼebé ita labele kontrola no karik sei nunka mosu.

 Deskansa no la hanoin kona-ba notísias aat no fokus ba buat diʼak iha ita-nia moris.

 Aprende liután kona-ba Maromak nia promesa sira bele fó ita esperansa, ksolok no sente dame.

 Bíblia dehan katak funu Armagedon sei inklui armas nukleár ka lae?

 Ema balu hanoin katak Armagedon hanesan ho funu nukleár. Baibain sira mós imajina katak sei iha konsekuénsia oioin neʼebé aat tebes.

 Maibé, Bíblia, uza liafuan “Armagedon” atu refere ba funu ida entre “liurai sira iha mundu tomak,” ka ema nia governu sira, no Maromak. a (Apokalipse 16:14, 16) Armagedon laʼós funu neʼebé halakon arbiru deʼit ema no mundu, hanesan bomba nukleár halo. Iha funu Armagedon, Maromak sei halakon deʼit ema aat, no sei halo mundu neʼe iha dame no seguru.—Salmo 37:9, 10; Isaias 32:17, 18; Mateus 6:10.

 Saida mak Bíblia nia solusaun kona-ba funu?

 Maromak Jeová b sei uza ninia kbiit atu hapara nasaun sira-nia funu no halakon sira-nia armas. Atu halo ida-neʼe nia sei uza ninia Reinu, governu ida iha lalehan neʼebé sei ukun mundu.—Daniel 2:44.

 Maromak nia Reinu ka Ukun sei hanorin ema oinsá atu moris ho dame no unidade. Konflitu entre nasaun sira sei la iha tan, tanba iha governu ida deʼit neʼebé sei ukun mundu neʼe. No ema sei la aprende tan oinsá atu halo funu! (Miqueias 4:1-3) Rezultadu mak, “sira ida-idak sei tuur iha sira-nia uvas-hun okos no iha sira-nia ai-figeira hun okos, no sei la iha ema ida mak halo sira taʼuk”.—Miqueias 4:4.