Iha fulan-Janeiru 2021, Grupu Administradór fó sai livru foun ho naran Moris Haksolok ba Nafatin. a Ita sente oinsá bainhira rona avizu neʼe? Matthew husi rai-Kanadá hatete: “Haʼu kontente loos. Haʼu sente kontente liután bainhira haʼu rona diskursu sira no haree vídeo sira neʼebé esplika tanbasá sira halo publikasaun foun neʼe no oinsá sira balu koko ona publikasaun neʼe. Haʼu hein namanas atu hetan no uza ida-neʼe.”

 Uza livru Moris Haksolok ba Nafatin mak métodu foun atu dirije estuda Bíblia ho ema. Maibé mós iha tan buat seluk neʼebé halo publikasaun neʼe la hanesan ho publikasaun sira seluk neʼebé uluk ita uza atu hanorin. Se Ita uza livru Moris Haksolok ba Nafatin neʼebé print, Ita bele nota kedas diferensa. Mai ita buka-hatene kona-ba prosesu atu prodús livru neʼe.

 Surat-tahan neʼebé mahar liu. Tanbasá neʼe importante? Livru Moris Haksolok ba Nafatin iha dezeñu ho kór oioin hamutuk 600 liu. Neʼe barak liu fali livru Komprende Bíblia dala sanulu. Livru foun neʼe mós iha fatin mamuk iha pájina nia ninin. Maibé buat rua neʼe hamosu problema. Bainhira surat-tahan mihis, ita bele haree borus dezeñu ka buat neʼebé hakerek iha pájina sorin. Atu rezolve problema neʼe, irmaun sira iha Departamentu Print Internasionál iha Betel Wallkill, Novaiorke, Estadus Unidus koko surat-tahan modelu haat neʼebé ita-nia organizasaun uza daudaun atu print publikasaun sira. Komisaun Hakerek nian husi Grupu Administradór haree didiʼak ezemplu husi surat-tahan ida-idak no tuirmai sira hili surat-tahan neʼebé mahar natoon. Maski surat-tahan ho modelu neʼe karun uitoan se kompara ho surat-tahan neʼebé uza beibeik ba ita-nia publikasaun sira seluk, maibé ida-neʼe bele ajuda estudante Bíblia sira atu lee livru Moris Haksolok ba Nafatin ho fokus tanba la haree borus dezeñu iha pájina sorin.

 Plástiku neʼebé proteje livru nia kulit. Livru foun neʼe nia kulit la hanesan ho livru sira seluk tanba taka ho plástiku modelu ida. Duké uza plástiku neʼebé nabilan, livru neʼe nia kulit uza plástiku neʼebé la nabilan, entaun ema bele haree dezeñu iha livru nia kulit ho klaru. Plástiku neʼe mós proteje livru atu la haree bosan, maski uza beibeik. Plástiku neʼebé la nabilan karun liu dala lima se kompara ho ida nabilan. Tan neʼe, sukursál balu serbisu hamutuk atu bele sosa plástiku la nabilan neʼebé baratu.

 Tanbasá hili materiál neʼebé karun atu halo livru foun neʼe? Irmaun ida husi Departamentu Print Internasionál esplika: “Ami hakarak ema atu uza didiʼak livru neʼe, entaun ami buka dalan atu livru neʼe la haree bosan lalais, maski ema uza beibeik ona.” Irmaun Eduardo neʼebé serbisu iha Eskritóriu Prodús Livru nian iha sukursál Brazíl dehan: “Ami kontente tebes atu haree oinsá Jeová nia organizasaun uza materiál neʼebé diʼak atu livru neʼe bele haree kapás, dura, no fasil atu kaer. Maibé iha tempu hanesan bele uza didiʼak osan kontribuisaun.”

 Ita komesa print livru Moris Haksolok ba Nafatin iha fulan-Marsu 2021. Neʼe mak durante tempu pandemia COVID-19 no mosu susar balu. Tanba Betel lockdown, irmaun-irmán part-time sira labele mai atu ajuda print publikasaun sira no Betel mós labele konvida irmaun-irmán foun atu serbí iha Betel. Rezultadu mak ladún iha ema barak atu ajuda print no fatin print balu taka tanba halo tuir regra husi governu.

 Saida mak irmaun sira halo? Bainhira bele uza fali fatin print, irmaun-irmán sira husi departamentu seluk iha Betel simu knaar atu ajuda ba tempu balu iha departamentu print nian. Irmaun Joel neʼebé serbisu ho Departamentu Print Internasionál hatete: “Sira-nia hahalok neʼebé la hanoin an deʼit no mós prontu atu aprende buat foun ajuda duni atu kumpre serbisu neʼe.”

 Maski hasoru situasaun susar, maibé ita print ona livru Moris Haksolok ba Nafatin hamutuk rihun ba rihun. Atu bele halo ida-neʼe, presiza materiál oioin, inklui ekipamentu ba mákina print nian, plástiku neʼebé uza atu proteje livru nia kulit, surat-tahan, tinta no goma. Durante fulan lima primeiru, organizasaun gasta osan dolar millaun 2 liu ba materiál sira deʼit. Atu bele poupa osan, ami print deʼit livru tuir buat neʼebé kongregasaun presiza.

 Estudante Bíblia no mós irmaun-irmán sira neʼebé fó estuda sira sente oinsá? Irmaun Paul iha rai-Austrália hatete: “Haʼu gosta loos uza livru Moris Haksolok ba Nafatin, no neʼe halo haʼu gosta atu dirije estuda Bíblia. Livru neʼe kapás loos no interativu tebes. Livru neʼe fó sai informasaun neʼebé klaru, iha pergunta sira neʼebé book tebes ema nia laran, iha vídeo sira, dezeñu oioin, tabela no mós planu ba estudante sira. Livru neʼe furak loos no motiva haʼu atu aumenta liután haʼu-nia matenek atu hanorin.”

 Estudante Bíblia ida iha Estadus Unidus hatete: “Haʼu gosta tebes livru foun neʼe. Dezeñu sira ajuda haʼu komprende pontu importante sira. Vídeo sira mós kona loos haʼu-nia laran no book haʼu atu halo mudansa.” Estudante neʼe estuda Bíblia dala rua semana-semana no tuir beibeik reuniaun sira.

 Jeová nia organizasaun nafatin presiza print livru Moris Haksolok ba Nafatin millaun ba millaun ba língua barak. Grupu Administradór aprova ona atu tradús livru neʼe ba língua hamutuk 710, neʼe língua 340 barak liu fali livru Komprende Bíblia.

 Ita-nia organizasaun hetan osan husi neʼebé atu print livru foun neʼe? Ida-neʼe bele akontese tanba irmaun-irmán sira-nia kontribuisaun ba serbisu iha mundu tomak neʼebé sira barak fó liuhusi donate.jw.org. Ami hafolin tebes imi-nia laran-diʼak atu apoia prodús publikasaun foun neʼebé bele ajuda ema atu aprende kona-ba Jeová no atu bele “moris ba nafatin”.—Salmo 22:26.