INFORMASAUN IHA OIN | TESTEMUÑA BA JEOVÁ NIA FIAR NO ATIVIDADE
Testemuña ba Jeová—Sira ema hanesan saida?
Ami Testemuña ba Jeová mak asosiasaun relijiaun nian ida neʼebé ketak husi grupu relijiaun sira seluk. Ami-nia sede-jerál iha rai-Estadus Unidus, maibé ami barak mak hela iha rai oioin. Tuir loloos, ami hamutuk naʼin-8.000.000 liu mak halaʼo atividade hanorin Bíblia iha rai 230 liu. Ami hakaʼas an atu kumpre Jesus nia liafuan, neʼebé dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu.”—Mateus 24:14.
Iha fatin neʼebé deʼit ami hela, ami hakaʼas an halo tuir nasaun nia lei sira. Maibé ami mós halo tuir Jesus nia liafuan ba ninia dixípulu sira, dehan: “Imi laʼós mundu neʼe nian.” Tan neʼe, ami hakarak moris neutrál deʼit, ami la hola parte iha buat polítiku nian no funu. (João 15:19; 17:16) Tuir loloos, durante Funu Mundiál Segundu, ema hatama Testemuña ba Jeová barak iha komarka, fó-terus no oho sira balu, tanba sira la apoia buat polítiku nian. Ulun-naʼin igreja protestante nian ida iha rai-Alemaña dehan: ‘Testemuña ba Jeová deʼit mak grupu ida neʼebé la hakruʼuk ba ditadór Hitler nia ukun.’
‘Testemuña ba Jeová sira mak ema neʼebé kaer metin ba morál neʼebé aas no la hanoin an deʼit. Ita hakarak duni hili ema sira hanesan neʼe mak sai polítiku-naʼin no ukun-naʼin, maibé sira lakohi simu. Maski sira halo tuir governu nia lei, maibé sira fiar katak Maromak nia Ukun deʼit mak bele halakon ita ema nia problema hotu.’—Liafuan husi jornál Nová Svoboda, rai-Repúblika Xeka
Maibé ami moris la haketak an husi ema seluk. Kona-ba ema kristaun sira, Jesus harohan ba Maromak: “Haʼu husu Ita laʼós atu hasai sira husi mundu.” (João 17:15) Tan neʼe, ami halaʼo ami-nia moris hanesan deʼit ho ema seluk, bá serbisu, eskola, bá kompras iha fatin neʼebé baibain ema hotu bá.
Karik Ita sei gosta
PERGUNTA KONA-BA BÍBLIA
Saida mak Maromak nia Ukun?
Tanbasá mak Maromak nia Ukun diʼak liu fali governu seluk hotu?
PERGUNTA SIRA NEʼEBÉ BAIBAIN EMA HUSU
Tanbasá mak Testemuña ba Jeová nafatin neutrál kona-ba buat polítiku nian?
Sira perigu ba nasaun ka lae?
