Haʼu boot iha Los Angeles iha rai-Estadus Unidus, iha bairru sira neʼebé nakonu ho joven sira neʼebé malandru no droga. Haʼu mak oan-mane segundu husi maun-alin naʼin-neen.

Husi kiʼik, haʼu-nia inan lori ami oan sira tuir igreja evanjélika. Maibé bainhira haʼu sai boot, haʼu komesa halaʼo moris ho oin rua. Se loron-domingu, haʼu sempre tuir misa no hananu koru. Maibé iha loron baileet, haʼu badiu deʼit, uza droga no halo sala-foʼer.

Haʼu mós toman halo violénsia. Bainhira haʼu laran-nakali, haʼu foti sasán naran deʼit neʼebé iha haʼu-nia oin hodi baku ema. Morál neʼebé haʼu aprende iha igreja la ajuda haʼu. Haʼu temi beibeik: “Maromak mak uza haʼu atu selu aat ho aat!” Iha tempu neʼebé haʼu sei eskola sekundária, haʼu gosta tebes grupu polítiku nian ida (Black Panthers) neʼebé halo violénsia atu halakon diskriminasaun ba ema kulit metan. Tan neʼe, haʼu tama ba grupu estudante nian ida neʼebé mós luta hasoru diskriminasaun. Dala ruma bainhira ami halo demonstrasaun atu protesta estadu, ami-nia eskola tenke taka.

Maibé halo protesta deʼit la toʼo ba haʼu, tan neʼe haʼu mós tuir tan grupu neʼebé halo krime makaʼas ba ema kulit mutin sira. Loron ida, haʼu ho kolega sira bá sinema atu haree filme kona-ba atan sira husi rai-Áfrika neʼebé uluk hasoru terus barak iha rai-Estadus Unidus. Haree ba hahalok neʼebé la iha justisa neʼe, ami sai laran-nakali tebes no baku kedas joven kulit mutin sira iha sinema laran. Ami mós tama ba bairru ema kulit mutin nian atu baku ema barak liután.

Maski haʼu seidauk toʼo tinan 20, maibé haʼu ho haʼu-nia maun-alin naʼin-tolu halo ona krime barak, no polísia sira buka ami. Haʼu-nia alin-mane ida sai ona membru ba máfia ida neʼebé aat loos, no haʼu mós ransu ho sira. Haʼu-nia moris sai aat liután ba beibeik.

Haʼu-nia kolega ida nia inan-aman mak Testemuña ba Jeová, no sira konvida haʼu tuir sira-nia reuniaun. Bainhira haʼu bá, haʼu haree kedas katak Testemuña sira mak la hanesan duni ho ema seluk. Ema hotu loke Bíblia durante reuniaun, no joven sira mós hatoʼo diskursu! Bainhira haʼu aprende katak Maromak nia naran mak Jeová no rona ema temi naran neʼe, haʼu sente hakfodak tebes. (Salmo  [Mazmur] 83:18) Iha reuniaun neʼe neʼebé haʼu bá, iha ema husi rai oioin, maibé sira hotu haree malu diʼak.

Foufoun, haʼu lakohi estuda Bíblia ho Testemuña sira, haʼu gosta tuir sira-nia reuniaun deʼit. Iha kalan ida bainhira haʼu tuir hela reuniaun, haʼu-nia kolega sira bá konsertu, no iha neʼebá, sira koko atu hadau joven ida nia jaket kulit, tan neʼe sira baku nia toʼo mate. Loron tuirmai, sira konta kona-ba neʼe hodi gaba an. Bainhira tama tribunál, sira mós hamnasa deʼit ba krime neʼebé sira halo. Ikusmai sira barak mak hetan kastigu iha komarka toʼo mate. Haʼu kontente tebes tanba haʼu la hamutuk ho sira iha kalan neʼebá. Ida-neʼe halo haʼu deside atu troka haʼu-nia moris no komesa estuda Bíblia.

Tanba haʼu toman ona haree ema halo diskriminasaun, neʼe halo haʼu hakfodak tebes haree unidade iha Testemuña sira-nia leet. Porezemplu, bainhira ema kulit mutin ida atu halo viajen ba rai seluk, nia husu família ida neʼebé kulit metan atu tau matan ba ninia oan sira. No mós, família ida seluk neʼebé kulit mutin simu joven kulit metan ida iha sira-nia uma no hela hamutuk ho nia. Loos, Testemuña ba Jeová sira hatudu duni domin ba malu hanesan Jesus dehan iha João 13:35: “Ema hotu sei hatene katak imi haʼu-nia dixípulu sira, se imi iha domin ba malu.”

Liuhusi estuda Bíblia, haʼu hatene katak haʼu tenke troka haʼu-nia hahalok aat, liuliu haʼu mós tenke troka haʼu-nia hanoin ho fiar tomak katak buka dame mak diʼak liu ba haʼu-nia moris. (Roma 12:2) Haʼu halo mudansa neineik-neineik iha haʼu-nia moris, no iha Janeiru 1974, haʼu hetan batizmu nuʼudar Testemuña ba Jeová ida.

Maski nuneʼe, haʼu tenke hakaʼas an nafatin atu kontrola haʼu-nia hirus. Porezemplu, iha loron ida bainhira haʼu bá haklaken, haʼu haree ema ida foin naʼok haʼu-nia karreta nia rádiu, nuneʼe haʼu duni tuir nia, toʼo ikus nia husik hela rádiu neʼe iha estrada laran no halai lakon tiha. Bainhira haʼu konta ida-neʼe ba irmaun sira neʼebé haklaken hamutuk, katuas kristaun ida husu haʼu: “Stephen, se ó kaer toman duni ema neʼe karik, ó sei halo saida ba nia?” Pergunta neʼe fanu haʼu-nia neon, katak haʼu tenke kontinua hakaʼas an buka atu moris ho dame.

Hahú husi Outubru 1974, haʼu uza oras 100 fulan-fulan atu haklaken no hanorin Bíblia ba ema. Liutiha tempu balu, haʼu halo serbisu voluntáriu iha Testemuña ba Jeová nia sede-jerál iha Novaiorke. Iha tinan 1978, haʼu fila fali ba Los Angeles atu tau matan ba haʼu-nia inan neʼebé moras todan. Tinan rua liu tiha, haʼu kaben ho haʼu-nia doben Aarhonda. Nia ajuda tebes haʼu tau matan ba haʼu-nia inan. Depois haʼu-nia inan mate, ami rua tuir Eskola Gilead no simu knaar nuʼudar misionáriu iha rai-Panamá, toʼo ohin loron ami sei serbí iha rai neʼe.

Husi tempu neʼebé haʼu hetan batizmu, dala barak haʼu hasoru situasaun neʼebé provoka haʼu-nia hirus. Maibé haʼu hasees an deʼit husi ema neʼebé koko atu halo haʼu nervozu, ka se lae, haʼu koko atu halo kalma fali situasaun. Haʼu-nia feen no ema seluk gaba haʼu tanba haʼu-nia hahalok diʼak. Tuir loloos, neʼe halo haʼu mós hakfodak! Maibé haʼu hatene, haʼu rasik la iha kbiit atu troka haʼu-nia hahalok, Maromak nia Liafuan Bíblia deʼit mak iha kbiit atu troka ema nia moris.—Ebreu 4:12.

Bíblia hanorin haʼu atu halaʼo moris neʼebé iha folin no nakonu ho dame. Haʼu la baku tan ema, maibé ajuda ema hakbesik ba Maromak. Haʼu mós estuda Bíblia ho ema ida neʼebé uluk odi malu ho haʼu bainhira ami sei eskola hamutuk! Ikusmai nia hetan batizmu, no ba tempu balu nia laran ami hela hamutuk iha uma ida deʼit. Toʼo ohin loron, nia mak haʼu-nia belun diʼak loos. Haʼu ho haʼu-nia feen ajuda ona ema naʼin-80 liu sai Testemuña ba Jeová hodi estuda Bíblia ho sira.

Haʼu agradese tebes ba Maromak Jeová tanba nia fó haʼu moris neʼebé iha folin no haksolok ho unidade neʼebé haʼu hetan husi haʼu-nia maluk fiar-naʼin sira.