Se Ita mak inan ka aman ba oan joven, Ita sente katak nia koko Ita-nia pasiénsia nuʼudar inan-aman. Inan ida naran Maria iha rai-Brazíl, neʼebé iha oan-feto ho tinan 14, hatete: “Kuandu haʼu-nia oan koʼalia hasoru haʼu, ida-neʼe halo haʼu raan nakali. Ami naʼin-rua sai nervozu tebes hodi hakilar ba malu.” Carmela husi rai-Itália mós dehan: “Kuandu haʼu koʼalia ho haʼu-nia oan-mane, ami sempre haksesuk malu, no ikusmai nia tama iha ninia kuartu ho hirus.”

Tansá mak Ita-nia oan joven sempre gosta atu haksesuk malu ho Ita? Dala ruma, ida-neʼe tanba ninia kolega. Bíblia hatete katak kolega sira bele book makaʼas ita iha dalan neʼebé diʼak no aat. (Provérbios [Amsal] 13:20; 1 Korinto 15:33) Liután neʼe, ohin loron joven sira haree filme ka programa neʼebé hatudu joven sira la respeitu inan-aman.

Maibé, karik iha mós razaun seluk tan. No kuandu ita komprende ita-nia oan joven sira-nia situasaun, ida-neʼe bele ajuda ita atu koʼalia ho kalma. Mai ita haree hamutuk ezemplu balu.

Apóstolu Paulo hatete: “Wainhira haʼu labarik, haʼu koʼalia hanesan labarik, hanoin hanesan labarik, book an hanesan labarik; wainhira haʼu sai ona ema boot, haʼu husik ona buat neʼebé labarik nian.” (1 Korinto 13:11) Sin, dala ruma labarik ho ema boot iha hanoin neʼebé la hanesan. Oinsá?

Dala ruma, labarik sira hanoin badak deʼit atu  halo desizaun tuir buat neʼebé sira hakarak ka lakohi. Maibé ema boot sira bele halo desizaun hodi tetu didiʼak. Porezemplu, kuandu ema boot sira halo desizaun, sira hanoin uluk kona-ba rezultadu husi desizaun neʼe no oinsá mak ida-neʼe sei kona sira-nia an rasik no mós ema seluk. Maibé joven sira la hanesan, tanba atu halo nuneʼe mak hanesan hakat foun ba sira.

Bíblia fó laran-manas ba joven sira atu aumenta sira-nia matenek no haburas sira-nia “kbiit atu hanoin”. (Provérbios [Amsal] 1:4) Tuir loloos, Bíblia haruka ema kristaun hotu atu uza sira-nia “kbiit atu hanoin”. (Roma 12:1, 2, MF; Ebreu 5:14) Maibé nuʼudar Ita-nia oan joven komesa toman atu halo desizaun rasik, ida-neʼe book nia atu haksesuk malu ho Ita, maski ida-neʼe mak buat neʼebé kiʼik deʼit. Ka, nia mós bele fó sai ninia hanoin rasik neʼebé Ita sente la matenek. (Provérbios [Amsal] 14:12) Se Ita hasoru situasaun hanesan neʼe, oinsá mak Ita bele koʼalia ho kalma hodi la haksesuk malu?

Maibé la haluha: Kuandu Ita koʼalia ho Ita-nia oan joven, kuidadu atu la buka hodi manán. Maski haree hanesan nia la simu buat neʼebé Ita koʼalia, maibé dala ruma nia rona duni ba Ita. Keta hakfodak katak loron balu liutiha, Ita-nia oan joven nia hanoin sai hanesan deʼit ho Ita-nian, no nia komesa fó sai hanoin neʼe ba ema seluk nuʼudar ninia hanoin rasik.

“Dala ruma haʼu-nia oan-mane haksesuk malu kona-ba buat neʼebé kiʼik deʼit. Porezemplu, ami haksesuk malu kona-ba tansá nia estraga ninia sasán lalais deʼit ka goza ninia alin-feto. Maibé dala barak nia halo ida-neʼe tanba nia hakarak haʼu atu husu tansá mak nia halo hanesan neʼe no hatudu katak haʼu komprende nia. Nia hein haʼu atu hatete: ‘Ah, situasaun hanesan neʼe ka?’ ka ‘Ah, ó-nia hanoin mak hanesan neʼe ka?’ Kuandu haʼu hanoin fali kona-ba tempu neʼebá, haʼu haree katak se uluk haʼu koʼalia hanesan neʼe, ami naʼin-rua bele sees husi haksesuk beibeik.”—Kenji, Japaun.

Bainhira Ita haboot oan joven, Ita presiza prepara nia ba tempu neʼebé nia rasik bele kaer responsabilidade nuʼudar ema boot. (Gênesis [Kejadian] 2:24) Tan neʼe, Ita hakarak nia atu haburas matenek. Ida-neʼe inklui haburas hahalok sira neʼebé diʼak no fiar neʼebé loos. Kuandu nia hasoru tentasaun ruma atu halo sala, joven neʼebé iha matenek sei hanoin uluk kona-ba rezultadu husi ninia desizaun. Nia sei husu ba nia an: ‘Haʼu mak ema oinsá loos? Saida mak importante liu mai haʼu? Saida mak ema neʼebé matenek halo iha situasaun neʼe?’—2 Pedro 3:11.

Bíblia konta kona-ba mane joven ida naran José neʼebé iha matenek loos. Porezemplu, kuandu Potifar nia feen hakaʼas José atu toba hamutuk, José dehan: “Oinsá mak haʼu bele halo hahalok aat tebes neʼe no loloos halo sala kontra Maromak?” (Gênesis [Kejadian] 39:9) Maski iha tempu neʼebá ema Izraél seidauk hetan ukun-fuan kona-ba sala-foʼer, maibé José hatene Maromak nia hanoin kona-ba hahalok neʼe. Laʼós neʼe deʼit, José nia liafuan “oinsá mak haʼu bele” hatudu katak nia halo Maromak nia hanoin nuʼudar ninia hanoin rasik.—Éfeso 5:1.

Ita-nia oan joven mós sei iha prosesu atu halo rasik desizaun sira ho matenek. Ida-neʼe diʼak tanba kuandu ninia kolega sira hakaʼas nia atu halo buat ruma, nia sei kaer metin ba desizaun sira neʼebé nia rasik mak halo. (Provérbios [Amsal] 1:10-15) Maibé prosesu foun neʼe karik bele book nia atu kontra Ita. Se ida-neʼe akontese, Ita bele halo saida?

 Baibain, joven sira hakarak aprende atu halo desizaun rasik no kaer metin ba desizaun neʼe. Ida-neʼe mós buat neʼebé diʼak. Tanbasá? Tanba Bíblia dehan katak ema kristaun labele sai “hanesan labarik deʼit, eh ema ho laran namlele, ema neʼebé anin doutrina oioin nian huu bá huu mai”. (Éfeso 4:14) Tan neʼe, fó laran-manas ba Ita-nia oan joven hodi haburas ninia matenek atu halo desizaun diʼak neʼebé metin.

“Kuandu haʼu hatudu katak haʼu prontu atu rona ba haʼu-nia oan-feto sira, sira mós prontu atu rona ba haʼu-nia hanoin maski dala ruma ida-neʼe la hanesan ho sira-nian. Haʼu kuidadu atu la obriga sira atu hanoin hanesan deʼit ho haʼu-nian maibé husik sira atu halo desizaun rasik.”—Ivana, Repúblika Xeka.

Dala ruma, oan joven balu hatudu hahalok hanesan labarik kiʼik neʼebé xateia inan-aman kona-ba buat ruma toʼo inan-aman rende an deʼit. Se ida-neʼe akontese beibeik iha Ita-nia família, kuidadu. Maski hodi fó deʼit buat neʼebé Ita-nia oan joven hakarak bele hapara nia xateia ba tempu uitoan, maibé ida-neʼe hanorin nia katak se nia haksesuk ho Ita, nia bele manán. Entaun, Ita bele halo saida? Halo tuir Jesus nia konsellu neʼebé dehan: “Imi sei koʼalia hanesan neʼe: Nuneʼe, nuneʼe; la nuneʼe, la nuneʼe.” (Mateus 5:37) Oan joven sei la haksesuk ho Ita se nia haree katak Ita la troka beibeik Ita-nia desizaun.

Maski nuneʼe, Ita mós hakarak hatudu laran-diʼak. Porezemplu, se situasaun ida mosu no Ita-nia oan joven hakarak Ita troka Ita-nia lei kona-ba oras neʼebé nia tenke fila ba uma, husik nia esplika tanbasá mak nia hakarak hanesan neʼe. Hodi halo mudansa uitoan laʼós katak nia manán Ita, maibé neʼe katak Ita halo tuir Bíblia nia konsellu neʼebé dehan: “Halo ema hotu koko imi-nia laran-diʼak.”—Filipe 4:5.

Klaru katak la iha inan-aman neʼebé perfeitu. Bíblia hatete: “Ita hotu halo sala barak.” (Tiago 3:2) Se Ita haree katak haksesuk neʼe mosu tanba Ita, husu deskulpa lalais. Kuandu Ita fó sai Ita-nia sala, ida-neʼe hatudu ezemplu diʼak kona-ba haraik-an no ajuda Ita-nia oan joven hodi halo tuir hahalok ida-neʼe.

“Loron ida haʼu haksesuk malu ho haʼu-nia oan-mane. Kuandu haʼu hatún haʼu-nia nervozu, haʼu husu deskulpa tanba haʼu hirus. Ida-neʼe ajuda nia sente kalma no halo nia atu hakarak rona ba haʼu.”—Kenji, Japaun.