Hakbesik ba Maromak

“Ita sei hanoin ba” sira

ITA sente laran-moras kuandu haree ita-nia família ida hetan terus no ikusmai mate. Ita sente triste duni tanba ita lakon ema neʼebé ita hadomi. Maibé, ita sente kmaan hodi hatene katak ita-nia Kriadór, Maromak Jeová, komprende oinsá ita sente. Liután neʼe, nia hakarak tebes atu uza ninia kbiit boot atu halo ema mate sira moris hiʼas fali. Mai ita haree oinsá mak Job nia liafuan neʼebé hakerek iha Jó (Ayub) 14:13-15 fó esperansa mai ita.

Hanoin toʼok situasaun ida-neʼe. Job mak ema neʼebé fiar makaʼas ba Maromak, maibé nia hasoru susar sira-neʼebé todan tebetebes. Nia lakon ninia rikusoin hotu, ninia oan hotu mate, no nia hetan moras neʼebé halo nia terus liu. Nia terus makaʼas toʼo nia halerik ba Maromak: “Oh, iha rate Ita subar haʼu bá!” (Versíkulu 13) Job haree katak mate mak bele halo nia sai livre. Iha rate, nia sei sai hanesan rikusoin neʼebé Maromak subar, nia sei livre husi susar no terus hotu. *

Job sei iha rate ba nafatin ka lae? Lae, Job la fiar hanesan neʼe. Iha ninia orasaun, nia hatete: “Oh, . . . Ita tau tempu neʼebé Ita marka tiha no hanoin-hetan haʼu bá!” Job fiar duni katak nia sei iha rate ba tempu balu deʼit no Maromak Jeová sei la haluha nia. Job kompara tempu neʼebé nia iha rate hanesan tempu neʼebé nia halo “serbisu obrigasaun nian”, katak nia tenke hein. Hein toʼo bainhira? Nia hatete: “Toʼo tempu neʼebé haʼu sai livre.” (Versíkulu 14) Nia sei sai livre husi rate, neʼe katak nia sei moris hiʼas fali husi mate!

Tanbasá mak Job fiar katak nia sei sai livre husi mate? Tanba nia hatene oinsá mak ita-nia Kriadór sente kona-ba fiar-naʼin sira-neʼebé laran-metin, neʼebé mate ona. Job hatete: “Ita sei bolu, no haʼu rasik sei hatán ba Ita. Ita sei hanoin ba buat neʼebé Ita halo ho Ita-nia liman.” (Versíkulu 15) Job hatene katak Maromak mak halo nia. Maromak Jeová mak hun ba moris hotu, inklui mós prosesu neʼebé Job nuʼudar bebé komesa moris iha inan nia knotak. Entaun klaru katak nia bele halo Job moris fali depois nia mate.—Jó 10:8, 9; 31:15.

Job nia liafuan hanorin ita katak Jeová mak Maromak domin nian. Nia sente besik loos ho ninia atan sira hanesan Job, neʼebé tau sira-nia an iha ninia liman. Sira husik nia atu forma sira hodi sai ema neʼebé halo nia laran-kontente. (Isaías [Yesaya] 64:8) Maromak Jeová hafolin ema sira-neʼebé ho laran-metin adora nia. Nia “sei hanoin ba” fiar-naʼin sira-neʼebé mate ona. Tuir matenek-naʼin ida, liafuan iha lia-ebraiku neʼebé Job uza “hatudu sentimentu neʼebé makaʼas liu kona-ba hakarak atu halo buat ruma”. Sin, Maromak Jeová la hanoin-hetan deʼit ninia atan sira, maibé nia mós hakarak tebes atu halo sira moris hiʼas fali.

Ita agradese tebes tanba iha livru Job, livru neʼebé Moisés hakerek tinan balu depois nia hakerek Gênesis (Kejadian), Maromak fó sai ninia hakarak atu halo ema mate moris hiʼas fali. * Nia hakarak Ita hasoru fila fali ho ema neʼebé Ita hadomi, neʼebé mate ona. Hodi hanoin kona-ba neʼe bele ajuda Ita atu sente kmaan maski Ita triste. Entaun, diʼak atu aprende liután kona-ba Maromak domin nian, loos ka lae? No husik Maromak atu forma Ita sai ema neʼebé sei haree ninia hakarak hotu sai loloos.

[Nota–rodapé]