Maromak hakarak ita atu konfesa ita-nia sala ka lae?

Iha relijiaun barak, konfesa sala ba amlulik ka ulun-naʼin relijiaun mak buat neʼebé parte husi ema nia adorasaun. Maibé, se ohin loron ema simu hahalok naran deʼit, presiza nafatin atu bá konfesa ka lae?

IHA hanoin oioin kona-ba neʼe. Porezemplu, livru ida naran National Post husi rai-Kanadá fó-hatene kona-ba ema ida neʼebé hatete katak maski susar atu hatete sai ba ema seluk ita-nia sala, maibé halo ida-neʼe halo ita “sente la todan tan tanba ita hatene katak ema seluk hatene kona-ba neʼe, halo orasaun hamutuk ho ita no fó-hatene saida mak ita presiza halo”. Iha parte seluk, livru ida iha lia-inglés ho títulu Fó Bensa Mai Haʼu, Amu, Tanba Haʼu Halo Sala, konta kona-ba ema ida neʼebé hatete: “Buat ida neʼebé aat liu iha Igreja mak konfesa sala, tanba ida-neʼe halo ema laran-susar demais.” Saida mak Bíblia hatete kona-ba konfesa sala?

Bíblia hatete saida?

Iha Ukun-Fuan neʼebé Maromak fó ba nasaun Izraél, ita bele hetan matadalan kona-ba saida mak ema Izraél presiza halo kuandu sira halo sala. Porezemplu, kuandu ema ida halo sala hasoru ninia maluk ka kontra Maromak nia ukun-fuan, ema neʼe tenke fó sai nia sala ba amlulik neʼebé Maromak hili husi suku Levi, depois amlulik sei hasaʼe sakrifísiu ba Maromak atu taka ninia sala.—Levítico 5:1-6.

Tinan barak liutiha, kuandu profeta Natan korrije Liurai David tanba ninia sala boot, David halo saida? Nia simu kedas hodi dehan: “Haʼu halo sala ona hasoru Maromak Jeová.” (2 Samuel 12:13) David mós halo orasaun hodi husu Maromak atu fó perdua ba nia. Nia hetan rezultadu saida? David hakerek: “Ikusmai haʼu dehan sai haʼu-nia sala ba Ita, no haʼu la taka haʼu-nia sala. Haʼu dehan: ‘Haʼu sei dehan sai haʼu-nia sala ba Maromak Jeová.’ No Ita rasik perdua haʼu-nia sala.”—Salmo 32:5; 51:1-4.

Iha kongregasaun kristaun iha apóstolu sira-nia tempu, Maromak hakarak nafatin ema kristaun atu fó sai sira-nia sala. Tiago, Jesus nia alin neʼebé katuas ida iha kongregasaun iha Jeruzalein, husu ninia maluk kristaun hodi hatete: “Imi konfesa imi-nia sala ba malu, no reza ba malu atu imi hetan isin-diʼak.” (Tiago 5:16) Nuneʼe, ema kristaun presiza konfesa saida, no ba sé loos?

Presiza konfesa saida?

Ita nuʼudar ema sala-naʼin, loron-loron halo sala ruma la ho neon ka uza sala ita-nia nanál, no tan neʼe ita halo sala hasoru malu. (Roma 3:23) Ida-neʼe katak ita tenke konfesa sala ida-idak neʼebé ita halo ba amlulik ka ba ema ruma neʼebé iha kbiit ka lae?

Maski sala hotu kontra Maromak, maibé nia hanoin ita ho laran-sadiʼa hodi komprende katak ita halo sala tanba sala neʼebé ita hetan  husi Adão. Ema neʼebé hakerek salmu ida hatete: “Se sala sira deʼit mak Ita haree, oh, Jah, oh, Jeová, sé mak bele tahan? Tanba Ita mak fó perdua neʼebé loos, atu ema bele taʼuk Ita.” (Salmo 130:3, 4). Tan neʼe, saida mak ita presiza halo se ita halo sala kontra ema seluk? Hanoin-hetan katak iha orasaun Ami Aman, Jesus hanorin ita atu husu Maromak: “Haraik perdua mai ami sala, nuʼudar ami perdua ema neʼebé halo aat ami.” (Lucas 11:4) Sin, Maromak sei perdua ita-nia sala se ita hakbesik nia no husu hodi Jesus nia naran.—Joao 14:13, 14.

Jesus mós hatete katak atubele hetan perdua, ita presiza perdua mós sira “neʼebé halo aat” ita. Apóstolu Paulo fó-hanoin ninia maluk hodi hatete: “Imi sei perdua malu nuʼudar Naʼi fó perdua ona ba imi.” (Koloso 3:13) Kuandu ita perdua ema seluk nia sala hasoru ita, ita bele fiar katak Maromak mós perdua ita-nia sala.

Maibé, oinsá ho sala sira neʼebé boot, hanesan naʼok, bosok, sala-foʼer, hemu-lanu? Ema neʼebé halo sala hanesan neʼe kontra Maromak no ninia ukun-fuan. Se nuneʼe, saida mak nia presiza halo?

Ba sé loos mak presiza konfesa sala?

Maromak la fó kbiit ba ema ida atu perdua sala neʼebé kontra nia; Maromak deʼit mak bele fó perdua. Bíblia hatete momoos mai ita: “Se ita konfesa ita-nia sala, Maromak laran-metin no loos atu perdua ita-nia sala no atu hamoos ita husi buat la loos hotu.” (1 Joao 1:9, Bíblia Sagrada Para o Terceiro Milénio da Encarnação) Maibé, ita tenke konfesa sala ba sé loos?

Tanba Maromak deʼit mak bele fó perdua, ita tenke konfesa sala ba nia. Ida-neʼe mak buat neʼebé David halo, hanesan ita haree tiha ona. Maibé, saida tan mak ema presiza halo atu hetan perdua? Bíblia hatete: “Neʼe duni, hakribi imi sala bá hodi fila hikas ba Naʼi atu imi-nia sala bele hetan perdua.” (Apostolu 3:19) Sin, atu ita bele hetan perdua ita presiza simu katak ita halo sala no konfesa sala neʼe ba Maromak, no mós ita labele halo sala neʼe fali. Maski dala ruma susar atu la halo sala neʼe fali, maibé ita bele hetan ajuda.

Hanoin-hetan dixípulu Tiago nia liafuan neʼebé temi uluk: “Imi konfesa imi-nia sala ba malu, no reza ba malu atu imi hetan isin-diʼak.” Tiago hatutan tan: “Ema diʼak nia orasaun makaʼas tebetebes.” (Tiago 5:16) “Ema diʼak” neʼebé Tiago temi neʼe inklui “katuas kreda nian”, hanesan nia hatete iha versíkulu 14. Iha kongregasaun kristaun, iha ema neʼebé simu knaar atu serbí nuʼudar “katuas” neʼebé bele ajuda ema neʼebé hakarak hetan perdua husi Maromak. “Katuas” sira-neʼe la bele fó perdua ka taka ema nia sala, tanba la iha ema ida neʼebé iha kbiit atu fó perdua ba sala neʼebé nia maluk halo kontra Maromak. * Maibé, tanba katuas sira kumpre kritériu husi Bíblia, sira iha kbiit atu fó dixiplina neʼebé ajuda ema neʼebé halo sala boot atu fila fali ba dalan loos. Katuas sira ajuda ema atu rekoñese katak ninia sala sériu tebes no presiza hakribi sala.—Galasia 6:1.

 Tanbasá fó sai ita-nia sala?

Maski sala ruma neʼebé ema halo boot ka kiʼik, ida-neʼe bele halo ninia relasaun ho nia maluk no ho Maromak laʼo la diʼak. Nuneʼe, nia bele sente laran-susar no hanoin barak. Nia sente hanesan neʼe tanba ninia konxiénsia ka laran neʼebé Maromak fó mai ita ida-idak mak book nia. (Roma 2:14, 15) Se nuneʼe, saida mak nia bele halo?

Se ita haree fila fali ba eskritura iha Tiago, ita bele lee liafuan tuirmai neʼe: “Imi ida moras? Nia sei bolu katuas kreda nian bá; sira sei reza ba nia, [“sei kose nia ho mina iha Naʼi nia naran”, Bíblia Sagrada Para o Terceiro Milénio da Encarnação], no nia halo sala karik, nia sei hetan perdua.”—Tiago 5:14, 15.

Ida-neʼe hatudu katak sira neʼebé serbí nuʼudar katuas tau matan ba ema iha kongregasaun laran. Oinsá? Laʼós deʼit hodi rona ema fó sai sira-nia sala, maibé katuas sira mós presiza ajuda sira neʼebé sente “moras” tanba halo sala, atu sira bele sai diʼak fali. Tiago hatudu katak iha buat rua neʼebé katuas sira bele halo.

Primeiru, katuas sira ‘kose ho mina’. Ida-neʼe kona-ba kbiit neʼebé Maromak nia Liafuan iha atu kura. Apóstolu Paulo esplika katak “Maromak nia liafuan moris no book makaʼas . . . no bele hatene loloos buat neʼebé ema hanoin no hakarak iha nia fuan”. (Ebreu 4:12) Hodi uza Bíblia ho matenek, katuas sira bele ajuda ema neʼebé halo sala atu hatene saida mak halo problema mosu no saida mak sira presiza halo atu halo diʼak fali sira-nia relasaun ho Maromak.

Katuas sira mós “reza” ba ema neʼebé halo sala. Maski katuas sira-nia orasaun la troka dalan neʼebé Maromak halaʼo ninia justisa, maibé orasaun sira-neʼe importante tebes ba Maromak, neʼebé hakarak fó perdua ba sala liuhusi Kristu nia sakrifísiu. (1 Joao 2:2) Maromak prontu atu ajuda ema naran deʼit neʼebé loloos hakribi sala no neʼebé “halo hahalok neʼebé hatudu katak [nia] hakribi duni sala”.—Apostolu 26:20.

Razaun importante liu hotu atu ita fó sai ita-nia sala mak atu hetan relasaun diʼak fali ho Maromak no atu Nia bele simu ita. Jesus Kristu hatudu katak ulukliu ita presiza rezolve problema ruma ho ita-nia maluk no hadame malu atu ita bele adora Maromak ho laran neʼebé moos. (Mateus 5:23, 24) Provérbios 28:13 hatete: “Ema neʼebé taka nia sala sei la hetan diʼak, maibé ema neʼebé dehan sai no husik nia sala sei simu laran-sadiʼa.” Kuandu ita hatudu haraik-an iha Maromak Jeová nia oin no husu nia atu perdua ita, Maromak sei simu ita no iha tempu loloos nia sei foti ita hodi fó bensaun mai ita.—1 Pedro 5:6.

[Nota–rodapé]

[Liafuan neʼebé foti husi pájina 27]

Se ita hakbesik ba Maromak iha orasaun atu husu perdua iha Jesus nia naran, Maromak sei fó perdua ba ita

[Dezeñu iha pájina 28]

Razaun importante liu hotu atu fó sai ita-nia sala mak atu hetan relasaun diʼak fali ho Maromak