Banati-tuir sira-nia fiar

Jesus hanorin nia atu fó perdua

PEDRO sente taʼuk no bilán iha kalan neʼe. Nia sei nunka haluha tempu neʼebé Jesus no nia hateke malu. Jesus nia oin hatudu katak nia laran-tun tanba Pedro nia hahalok ka lae? Tuir loloos, ita la hatene, tanba Bíblia hatete deʼit: “Fila tiha oin, Naʼi hateke ba Pedro.” (Lucas 22:61) Maibé, ita hatene katak kuandu Jesus hateke ba nia, Pedro hatene loos katak nia halo ona sala neʼebé boot tebes. Nia hatene katak nia halo tiha buat neʼebé Jesus fó-hatene nanis, buat neʼebé Pedro jura katak nia sei nunka halo, nega nia Naʼi neʼebé nia hadomi loos. Kalan neʼe aat tebes ba Pedro, no karik, kuandu Jesus hateke ba nia, neʼe mak tempu aat liu iha Pedro nia moris tomak.

Maibé, Pedro la rende an. Tanba Pedro iha fiar neʼebé metin, nia sei iha oportunidade atu hadiʼa nia relasaun ho Jesus, no atu aprende lisaun importante husi Jesus. Lisaun neʼe kona-ba fó perdua. Ita ida-idak presiza aprende lisaun neʼebé hanesan. Entaun, mai ita akompaña Pedro atu hatene oinsá mak Pedro aprende lisaun ida-neʼe.

Pedro presiza aprende buat barak

Maizumenus fulan neen antes kalan neʼe, iha Kafarnaum besik Pedro nia uma, Pedro hakbesik Jesus no husu: “Naʼi, haʼu-nia maun eh alin sala hasoru haʼu karik, haʼu sei perdua nia dala hira? Toʼo dala hitu?” Karik Pedro hanoin katak nia hatudu laran-diʼak tanba nia dehan toʼo dala hitu. Tuir loloos, ulun-naʼin relijiaun nian iha tempu neʼebá hanorin katak tenke fó perdua ba dala tolu! Jesus hatete: “Laʼós dala hitu, maibé hitunulu dala hitu.”—Mateus 18:21, 22.

Jesus nia liafuan neʼe hatudu katak Pedro tenke sura ba dala hira nia fó perdua ka lae? Lae, maibé, hodi troka hitu sai hitunulu dala hitu, Jesus hatudu katak la iha rohan kona-ba fó perdua. Iha tempu neʼebá, ema barak ulun-toos. Hanesan karak-teen lakohi fó osan ba ema seluk no sura osan hotu neʼebé nia fó, dalan neʼebé sira fó perdua mós hanesan neʼe. Jesus hatudu Pedro katak nia mós hanesan neʼe. Maibé, Maromak nia hakarak mak fó perdua ho laran-diʼak no laran-luak.

Pedro la istori malu ho Jesus. Maibé lisaun neʼe kona loos Pedro nia laran ka lae? Dala ruma ita aprende diʼak liu atu fó perdua bainhira ita rasik hakarak duni atu ema seluk fó perdua ba ita. Entaun, mai ita koʼalia kona-ba saida mak akontese iha kalan antes Jesus mate. Iha kalan neʼe, Pedro hakarak nia Naʼi atu fó perdua ba nia dala barak.

Pedro halo sala balu

Kalan neʼe importante tebes, tanba neʼe mak kalan ikus ba Jesus nia moris iha mundu. Jesus hakarak hanorin buat barak ba ninia apóstolu sira. Porezemplu, lisaun kona-ba haraik-an. Jesus hatudu ezemplu diʼak hodi fase sira-nia ain, maski neʼe atan nia serbisu. Ulukliu, Pedro husu tansá Jesus halo serbisu neʼe. Tuirmai, nia la simu. Tuirmai fali, nia husu Jesus atu fase nia ain, liman no mós ulun! Jesus nafatin hatudu pasiénsia ba Pedro no esplika katak ninia  hahalok neʼe importante no tansá mak nia halo.—Joao 13:1-17.

Lakleur fali, apóstolu sira komesa istori malu kona-ba sé mak boot liu iha sira-nia leet. Nuʼudar ema sala-naʼin, sira foti an demais. Klaru katak Pedro mós envolve iha problema neʼe. Maski nuneʼe, Jesus korrije sira ho laran-diʼak no gaba sira tanba sira hela hamutuk ho nia nuʼudar sira-nia Naʼi, maski hasoru susar oioin. Maibé, nia mós fó-hatene nanis katak sira sei hewai ka nega nia. Pedro hatete fali katak maski nia mate karik, nia sei nunka heli lia hasoru Jesus. Jesus hatete katak, tuir loloos, Pedro sei heli lia kona-ba nia Naʼi ba dala tolu antes manu kokoreek dala rua. Tuirmai, Pedro dehan katak Jesus sala, no ho foti an, hatete katak ninia fiar metin liu fali apóstolu sira seluk nia fiar!—Mateus 26:31-35; Marcos 14:27-31; Lucas 22:24-28.

Jesus la bele hatudu pasiénsia tan ba Pedro, loos ka lae? Lae, Jesus kontinua atu buka buat diʼak iha apóstolu sira-nia fuan-laran, maski sira sala-naʼin. Nia hatene ona katak Pedro sei heli lia kona-ba nia, maibé nia hatete: “Haʼu harohan ona ba ó, atu ó-nia fiar keta kuran; hafoin wainhira ó fila fali, ó sei hametin ó-nia maun alin sira.” (Lucas 22:32) Nuneʼe, Jesus hatudu katak nia iha fiar ba Pedro, katak Pedro sei fila fali nuʼudar atan neʼebé laran-metin. Jesus laran-diʼak, prontu atu fó perdua, loos ka lae?

Depois, iha jardín Jetsémani, Pedro halo sala tan. Jesus husu nia, no mós Tiago no João, atu matan-moris nuʼudar Jesus bá mesak atu reza. Jesus sente laran-susar tebes no hakarak apóstolu naʼin-tolu neʼe atu apoia nia. Maibé Pedro no nia maluk sira toba dukur. Jesus nia liafuan hatudu katak nia hanoin ninia apóstolu sira no hakarak duni atu fó perdua ba sira. Nia dehan: “Espíritu hakarak tebes, maibé isin kbiit-laek.”—Marcos 14:32-38.

Lakleur fali, ema-lubun mosu. Sira kaer ahi-oan, surik no ai-dona. Apóstolu sira tenke uza matenek no halo tuir Jesus nia ezemplu. Maibé, derrepente deʼit, Pedro haksoit ba oin, uza surik atu taa Malco nia ulun, no konsege tesi sai Malco, amlulik boot nia atan neʼe, nia tilun. Jesus hakmatek hela. Nia korrije Pedro, fó isin-diʼak ba Malco, no esplika katak ninia dixípulu sira sei la uza violénsia, matadalan neʼebé ninia dixípulu sira tuir toʼo ohin loron. (Mateus 26:47-55; Lucas 22:47-51; Joao 18:10, 11) Pedro halo sala ba dala barak. Ninia situasaun fó hanoin ita katak “ita hotu halo sala barak”. (Tiago 3:2) Tuir loloos, loron-loron ita hotu hakarak Maromak fó perdua ba ita-nia sala, loos ka lae? Kona-ba Pedro, tuirmai neʼe, nia halo sala neʼebé boot liután.

Pedro halo sala boot liután

Jesus fó-hatene ema-lubun neʼe katak tan sira hakarak kaer nia, sira tenke husik apóstolu sira livre. Pedro haree ho laran-tun nuʼudar ema-lubun neʼe kesi Jesus. Depois, Pedro halai sees, hanesan mós apóstolu sira seluk.

Karik Pedro no João halai hamutuk, no karik sira para besik eis-Amlulik Boot Anás nia uma, fatin neʼebé ema-lubun lori Jesus. Nuʼudar ema lori Jesus ba fatin seluk, Pedro no João tuir, maibé sira “tuir nia husi dook”. (Mateus 26:58; Joao 18:12, 13) Pedro laʼós taʼuk-teen. Nia tenke hatudu aten-brani atu tuir ema sira-neʼe. Ema-lubun neʼe lori kroʼat sira, no uluk Pedro hakanek sira-neʼe ida. Maibé, Pedro sala nafatin tanba la halo tuir nia rasik nia liafuan atu la husik Jesus maski nia tenke mate ho Jesus.—Marcos 14:31.

Ohin loron ema barak sai hanesan Pedro hodi ‘tuir Kristu husi dook’. Neʼe katak sira lakohi ema seluk hatene kona-ba sira-nia fiar. Maibé ikusmai, Pedro rasik hakerek ba ema kristaun sira hodi esplika katak atu halo tuir Kristu, ita tenke laʼo hamutuk ho Kristu  hodi banati-tuir nia ezemplu, maski ema seluk halo buat saida deʼit hasoru ita.—1 Pedro 2:21.

Pedro tuir Jesus husi dook toʼo uma boot nia portaun. Uma boot neʼe mak Caifás nian. Caifás mak Amlulik Boot, ema riku ho kbiit boot. Baibain, ema boot hanesan neʼe iha pátiu, ka área neʼebé luan, iha uma klaran. Pedro hakbesik portaun, maibé ema la husik nia tama. João tama tiha ona, no nia husu ema neʼebé hein portaun atu husik Pedro tama. Maibé, karik Pedro la hamutuk ho João; no mós Pedro la koko atu tama uma laran atu hakbesik nia Naʼi. Nia nafatin iha pátiu, hamutuk ho atan balu neʼebé haneruk besik ahi, sira haree testemuña falsu sira tama sai hodi fó sasin falsu hasoru Jesus iha prosesu tesi-lia neʼebé halaʼo daudaun iha uma laran.—Marcos 14:54-57; Joao 18:15, 16, 18.

Husi naroman ahi nian, feto ida-neʼebé husik Pedro tama iha portaun bele haree Pedro ho momoos. Nia koñese Pedro. Nia duun Pedro hodi dehan: “Ó mós hamutuk ho Jesus Galileia nian.” Pedro hakfodak, no dehan katak nia la koñese Jesus no mós katak nia la hatene feto neʼe koʼalia kona-ba saida. Nia bá hamriik besik portaun hodi ema la haree nia, maibé feto ida seluk haree nia, no dehan: “Ida neʼe mós hamutuk ho Jesus Nazaré nian.” Pedro jura: “Haʼu la hatene ema neʼe.” (Mateus 26:69-72) Karik iha tempu neʼebá Pedro rona manu kokoreek, maibé tanba nia hanoin la metin, karik nia la hanoin kona buat neʼebé Jesus fó-hatene nanis iha oras balu liubá.

Pedro koko nafatin atu ema la haree nia. Maibé ema balu iha pátiu hakbesik nia. Sira ida mak Malco, ema neʼebé Pedro taa neʼe, nia família. Nia husu ba Pedro: “Haʼu la haree ó iha toʼos laran ho Jesus?” Pedro lakohi duni sira hatene katak nia hamutuk ho Jesus. Nuneʼe, nia jura dala ida tan, karik nia hatete katak malisan ruma sei kona nia se nia bosok. Nia foin koʼalia neʼe, no nia rona manu kokoreek dala ida tan, neʼe katak Pedro rona ona manu kokoreek ba dala rua.—Joao 18:26, 27; Marcos 14:71, 72.

Jesus foin sai ba varanda iha pátiu nia sorin. Iha tempu neʼe mak Pedro no Jesus hateke ba malu, no Pedro hatene kedas katak nia la laran-metin duni ba nia Naʼi! Tanba Pedro sente triste no sala, nia halai husi fatin neʼe. Nuʼudar fulan tomak monu daudaun, nia laʼo mesak iha sidade boot neʼe. Nia haree dalan la moos tanba matan nakonu ho matan-been. Nia para no tanis makaʼas.—Marcos 14:72; Lucas 22:61, 62.

Kuandu ema hatene katak sira halo sala boot hanesan neʼe, sira bele fiar katak Maromak sei nunka fó perdua ba sira. Karik Pedro  mós hanoin hanesan neʼe. Maibé, neʼe loos ka lae?

Pedro bele hetan perdua ka lae?

Nuʼudar loron saʼe no durante loron neʼe, karik Pedro hirus ba nia an! Karik nia mós triste no bilán, liuliu iha lokraik kuandu Jesus mate ho terus! Klaru katak Pedro sente laran-tun hodi hanoin fila-fila katak nia halo nia Naʼi laran-susar liután iha loron ikus ba Nia moris. Maski Pedro sente triste hanesan neʼe, maibé nia la rende an hodi mout iha triste laran. Ita hatene neʼe tanba nia la mesak nafatin, maibé nia halibur fali ho dixípulu sira seluk. (Lucas 24:33) Ita bele fiar katak apóstolu sira hotu triste no hakribi buat neʼebé sira halo iha kalan neʼebé ema kaer Jesus.

Tuir loloos, Pedro nia hahalok sira tuirmai mak hahalok diʼak tebes. Bainhira Maromak nia atan ida monu ba sala boot, buat neʼebé importante liu mak laʼós sala neʼebé nia halo ona, maibé ninia hakaʼas an atu hamriik fali no hatudu katak nia loloos hakribi ninia sala neʼe. (Provérbios 24:16) Pedro hatudu katak nia iha fiar neʼebé metin loos hodi halibur fali ho dixípulu sira seluk maski nia laran-tun tebetebes. Baibain ema neʼebé halo sala boot hakarak mesak deʼit, maibé ida-neʼe la diʼak duni. (Provérbios 18:1) Dalan matenek mak hamutuk ho maluk fiar-naʼin sira hodi bele sai metin fali atu serbí Maromak.—Ebreu 10:24, 25.

Tanba Pedro hamutuk ho fiar-naʼin sira seluk, nia rona liafuan neʼebé halo sira hotu hakfodak, katak Jesus nia rate, neʼebé iha fatuk kuak no taka metin ho fatuk boot, sai mamuk. Pedro no João halai ba Jesus nia rate. Karik tanba João klosan, nia halai lalais liu no toʼo uluk. Rate nia odamatan nakloke, maibé nia taʼuk atu tama. Pedro lae. Maski nia iis boot hela, nia tama kedas. Rate neʼe mamuk duni!—Joao 20:3-9.

Pedro fiar katak Jesus moris hiʼas ka lae? Lae, maski feto fiar-naʼin balu fó-hatene katak anju sira mosu no dehan katak Jesus moris hiʼas, maibé Pedro seidauk fiar. (Lucas 23:55–24:11) Maibé antes  loron neʼe ramata, Pedro nia laran-triste no laran-rua la iha tan. Nia fiar katak Jesus moris fali ona nuʼudar anju forte! Jesus hatudu an ba nia apóstolu sira. Maibé, antes nia mosu ba sira, nia mosu ba ema seluk. Iha loron neʼe apóstolu sira hatete: “Tebes, Naʼi moris hiʼas ona hodi mosu ba Simão!” (Lucas 24:34) No mós, apóstolu Paulo hakerek katak iha loron neʼebé Jesus moris hiʼas, Jesus “mosu ba Cefas, tuirmai ba sira sanulu-resin-rua”. (1 Korinto 15:5) Naran Cefas no naran Simão mak Pedro nia naran seluk. Iha loron neʼe, Jesus hatudu an ba Pedro, karik kuandu Pedro mesak.

Bíblia la fó-hatene kona-ba saida mak akontese kuandu Jesus no Pedro hasoru malu iha loron neʼe. Ita bele fiar katak Pedro sente kontente tebes atu haree nia Naʼi moris fali, no tanba nia iha oportunidade atu husu deskulpa. Iha tempu neʼebá Pedro hakarak duni Jesus atu fó perdua ba nia. Ita la iha dúvida katak Jesus ho laran-luak fó perdua ba nia. Ohin loron, ema kristaun neʼebé monu ba sala neʼebé boot tenke hanoin-hetan Pedro nia istória neʼe. Ita lakohi hanoin katak ita-nia sala boot toʼo Maromak nunka fó perdua. Jesus haleno ninia Aman nia hahalok sira, inklui “fó perdua ba sala boot”.—Isaías 55:7.

Buat seluk neʼebé hatudu katak Jesus fó perdua Pedro

Uluk Jesus haruka nia apóstolu sira atu bá Galileia hodi sira bele hasoru nia iha neʼebá. Kalan ida, kuandu sira toʼo ona, Pedro deside atu bá kail ikan iha Tasi Galileia. Sira balu akompaña nia. Antes tuir Jesus, Pedro iha bisnis neʼebé susesu nuʼudar peskadór iha neʼebá. Nuʼudar nia rona bee tasi baku neineik ba ró, no nia uza matenek atu hean ró no soe rede, karik nia sente kmaan. Iha kalan neʼe, karik nia hanoin kona-ba saida mak nia sei halo ho nia moris tanba Jesus nia serbisu iha mundu hotu ona. Nia hakarak halaʼo moris simples deʼit nuʼudar peskadór ka lae? Ita la hatene. Maibé iha kalan neʼe sira la konsege hetan ikan ida.—Mateus 26:32; Joao 21:1-3.

Kuandu loron hahú saʼe, sira haree ema ida iha tasi-ibun haruka sira atu soe sira-nia rede ba ró nia sorin seluk. Sira halo tuir no hetan ikan 153 kedas! Pedro hatene kedas ema neʼe sé. Nia haksoit husi ró no nani ba tasi-ibun. Iha neʼebá, Jesus, Pedro no nia maluk sira han ikan neʼebé Jesus tunu tiha ona. Jesus komesa koʼalia ba Pedro.

Jesus husu Pedro: “Ó hadomi haʼu liu fali sira-neʼe?” Karik Jesus hatudu ba ikan sira-neʼebé Pedro foin hetan. Saida mak Pedro hadomi liu, moris nuʼudar peskadór ka Jesus? Uluk Pedro nega nia Naʼi ba dala tolu, agora Jesus fó oportunidade ba nia atu dehan sai iha nia maluk sira-nia oin ninia domin ba Jesus ba dala tolu. Kuandu Pedro halo nuneʼe, Jesus fó-hatene nia oinsá nia bele hatudu ninia domin: hodi tau uluk serbisu ba Maromak duké buat seluk, no hodi tau matan ba Kristu nia bibi sira, katak Kristu nia dixípulu sira.—Joao 21:4-17.

Nuneʼe, Jesus hatudu katak nia no nia Aman hadomi hela Pedro no hakarak fó knaar sira ba nia. Pedro sei simu knaar importante iha kongregasaun neʼebé Kristu dirije. Buat sira-neʼe hatudu duni katak Jesus ho laran fó perdua ba Pedro! Neʼe book Pedro nia fuan, no nia mós  aprende lisaun importante atu fó perdua ba ema seluk.

Ba tinan barak tuirmai Pedro halaʼo nia knaar sira. Nia hametin nia maluk fiar-naʼin sira, hanesan Jesus haruka nia atu halo iha kalan antes nia mate. Pedro ho laran-diʼak no pasiénsia hakaʼas an atu tau matan Kristu nia bibi sira. Jesus mak fó Simão naran Pedro. Pedro katak Fatuk, no nia hanesan fatuk duni tanba nia metin, forte, no ema bele fiar ba nia, liuliu hodi ajuda ema seluk iha kongregasaun atu serbí Maromak. Ita hatene neʼe tanba karta rua neʼebé Pedro hakerek, neʼebé sai parte husi Bíblia, haleno Pedro nia domin ba fiar-naʼin seluk. No mós, karta sira-neʼe hatudu katak Pedro nunka haluha lisaun neʼebé Jesus hanorin nia kona-ba fó perdua ba ema seluk.—1 Pedro 3:8, 9; 4:8.

Ita mós hakarak aprende lisaun neʼebé hanesan. Ita husu Maromak atu fó perdua ba ita-nia sala loron-loron ka lae? Ita fiar katak Maromak loloos fó perdua ba ita-nia sala hodi ita sai moos iha nia oin ka lae? Ita hakaʼas an atu fó perdua ba ita-nia maluk sira ka lae? Se ita halo hanesan neʼe, ita banati-tuir Pedro nia fiar no ita-nia Naʼi nia laran-sadiʼa.

[Liafuan ne’ebé foti husi pájina 22]

Pedro hakarak nia Naʼi fó perdua ba nia, no ita hakarak Maromak fó perdua ba ita, loos ka lae?

[Dezeñu iha pájina 23]

“Fila tiha oin, Naʼi hateke ba Pedro”

[Dezeñu iha pájina 24]

“Naʼi . . . mosu ba Simão”